Tulai in school naupang pasalte’n khekor tawn teng vekta uhi. Kei’ kailai tan inle Pawl V apat hekor tawn kiteng pan a, liansimtak hih nung in leng khekor buul kiteng nilouh hi. Puanhoih kinei zoulou ahihman in khekor buul, readymade hon leisak sek ua, a puan selua, a mailam sakhau lah dai a dai, khutzung taangnih tan kaan tum zoulou hi. Huaiban ah, khekor buul pen kha a mailam ton chihtak in ton a, among bang kiviktou veuhvouh zezen hial a, a angkilh lah tol a kitol baih, kawng kilhna bang chu heekkawi a asunglam a khumlut hi pahpah. A smart loupen pawl kihi gige, necktie mong teepkawt in seuh vang pah zel, a ohnagui (elastic) lah kifaan theilou phial khop a om, deeklam a khih in among kaikhe nuarnuar, van a aksi kai nuarnuar-te bangmai a! Puanak sakhau bal hek-hok. School kaitawp chiang a, Lui lam a kisil dia kuan chiang a khekor kawng kilhna kha noupi khaina dia kizen vanglak.

 Huai lai a ka Pu Muan in (form)khedap, naughty boy nei inchin ki-eng thei lotel. Atangpi a nylon khedap, Raju Swastik kibun. Kimawl kihatlua ahih chiang a uih theilua, room sung teng uih hut-hut mai. Nisa in hoihtak in a salzoi a, i sikkhial deuh bang chu kilep top thei! Zingkar teng a thop ngai gige lai. Pawl X tan ah leng uniform hoih kinei zoulou hi. Kungfu Shoes, Rs. 37/- man hong kithang, kum khat a 3 bang kibunsia! Zingkar, school kuanma a kungfu shoes, khemuk apat khetuul tan kikek pen khui malam, khekordor le khui, hilehle, school lutma teng football kipek ahih chiang a keknawn vek zel. Zingkar teng a huchi khop! 30 minutes recess hong hi a, dak agin phet chiang a volleyball court delh hu-hut. Lutnawn chiang a, kho-ul a kikawt gawp, Sir te’n lai hon dot chiang ua i dintouh leh khekor, i taw a belh dekdok, laikhe punpun ing a ka khut nam zel! Neulai a ka Pu Muan in tawvang hon sawkpih inchin, khut hon nappih zel. Huaiziak a, ke’n lianpi ka hih nung a leng khutnap zongsang, tutan a! Huchibang khawng a High School ana paltou in Pawl X a na kizoukhe trawk sam hi. Hiai tan ka tuntheih na dia laibu, abat a hon lasak gige Pa Zoutawn (TDL Store) leh uniform bat a hon na pe gige, (L) Pa Taithuam (ST Garment Store) te thupi uh ka sa a, chikmah chiang in ka mangngilh ngeikei ding.

 High School ka lutma in bel hehpihna mark a pawl suan hamham (conditionally promoted) ka hi deuh gige hi. Hindi mahmah haksa ka sa hi. Sir Sharma a panlai in ahihleh dotnate lehbulh geih lehang leng mark muhtheih hi. Sir G. Pumkhenthang in Hindi ahon hilh lai in, exam ding chiang in questions & answers teng hon pe masa vek a, huchi’n leng ka pass lah mahmah lai hi, tel in. Ahihziak in, pawl IX apat kidok na khat k’on nei a, 3-na kha kei’ position ahi sek hi. Lawmte’n deihkhop a hon na dem (compete) uh ana hi a, ke’n bel 1-na leh 2-na hi gigete dem na chang ka na theikei a, kuhkalna leh taihmakna tellou a lai ana sim nimnem ka hihman in lawmte’ tun tan ka tung zoukei hi. College level ah leng lehkha deih tuntunna ka neihlouh lailai ziak in graduate lou mihing ka hita mai. Poi sa in, kisik mahmah in kisik-kok hial le’ng leng thilteng a kichaivawt ta. Huaiziak in, ka damsung High School Standard toh ka zatbei mai ding hita hi.

Nitak khat, ka tanu school kaipanpan khat in, “Papa, ke’n tuni a school a nektheih tampi ne” ahon chi a, “A him hia?” ka chihleh, “Lim chi ve” hon chi a, “Kibang thou eivele” ka chihnawn leh anuih a za mahmah a, “Alim-ahim, ahim-alim” chi in anui nilouh hi. Class A leng hinailou, Nursery (Preparatory Class) hipan maimai khawngte leng lai kihilh thei nawnlou hita hi. ‘A(e)’ chi oh i chihleh, ‘Eii’ chi ve hon chi a, ‘P’ for ‘Peacock (pikok)’ i chihleh anuih za inchin, ama’n “Phi’ for ‘Phikhop’ chi hi. International Phonetic Sound ngen toh lehkha zir kipanta ahihman un a pawl niampente leng kihilh thei nawnlou maimah hi. Huaiziak in, tunung a khanvual phak taktak na di’n chu, abul apat phatuamngaihna taktak toh pan poimawhta hi. Hun-awl zatna maimai a school/college kai chihte, theih utna tellou a inkuante’ mitmei venna lel a laisim chihte tawpsan a, siam utna leh lai deihna taktak toh, theihtawp a panlak hun hita hi.
Hill Model High School, Singngat a teacher ka seplai in Pawl X pass-te lopna hun ah hasotnathu gen di’n ahon sep uhi. Huchibang thu gen di’n ka kisit mahmah hi. Mi lawhchingte, officer liante, lehkhasiam a mi’ theihphakte khawng in a gendeuh sek uhi. Genlou-theilou ka hihman in, mi lawhchingte’ tanchinte zang a hasotna pelou in, keimah hihkhelh apat in naupangte ka hasuan zaw a, kuhkal ding, taima ding, Nu-leh-Pa’ thumang ding, Pathian phawk kawm ding, lehkha simtamluat chih omlou, lawhsapna kichi omlou eima’n tha (labour) i piak zahzah a lawhching ding, tha i piaktam leh i lawhchinna sang ding, tha i piaktawm leh i lawhchinna niam ding chi in ka gen hi. Huaiziak in, sinlaite’n i phawk ding ua ka deih chu vangsiatna ziak ahihkei ngal leh lawhsapna kichi omlou ahi. Vangphatna hon petheitu Pathian phawk in eimah in leng tha, atamtheipen pe le hang i lawhchinna sang dia, tunung a khanvual eng ngoihngoih a omlou ding, i chi i namte’ adia suanhuai, kingakna khuampi poimawh hi ding i hi.

Tuchiang chiang ah kitaitehna sang mahmah ta a, lehkha sim nimnem hun hi nawnlou hi. Deihna taktak, siam utna a dangtak vongvong hun hita a, 1st division naran khawng bang chu ngaihsanghuai nawn khollou hi. Kou hun tan in leng pawl X result suak chih bang chu huihpi nung toh kibang a, 1st division a pass chih bang thupi kisa mahmah hi. Kuhkalna leh taihmaknate ka taksap ziak in record ngahtheih na chance hoih mahmah tampi ka mangsak hi. Pawl X ka exam un Hill Model High School apat 1st division a pass omkha nailou a, PUC ka sim in leng Lamka College apat 1st division omkha nailou hi. Aban bel, simtou nawnlou maimah ka hihman in poi chihlouh genbeh ding omlou hi. ‘Tupna asang leh kiakna sang’ chih ahihman in, sangtak mah tup tinten ahoihpen mai. IAS tum tinten-te’n IAS chet a muhzawh kei ua leh leng ‘I’ a kipan dang, hoihtak mah mu veve uhi. Huaiziak in, tup kichian, sangtak neih a huai delhpha dia tai-gan-gan ding himai hi.

 Tulai khovel ah Degree neih teltul kia bangmah hi nawnlou a, zattheih ding siamna neih poimawh ta hi. Laisiam zatna bei kitam mahmah ta hi. Gamthuk leh khawpi lian taktak genlouh, gamdang tanpha a sum tampi seng a lai va sim, degree hoihtak va zoukhia, hilehleng, sepna muzoulou chih bang leng gen ding hunkhop ki-om ta hi. Lehkha zir ngutngut sang in nasepdan kizirzaw lehang phatuamzaw leh kilawm hial ta hi. Huaiziak in, theihna gil leh zattaak, manpha leh midangte piaksawn theih ding, midangte’n ahon hamphatpih theih ding uh siamna taktak poimawh hi. Siam mahmah napi a midangte pesawn theilou, midang in phattuampih theilou chih omtham hi. Siamna taktak ngahna di’n mimal a kinga hi mahleh, pawlpi a kithuah noinoite i hihman un, Siamsinpawlpite’n leng a ‘pawlpi’ a kipawlkhawmna pen nuam sakthoh mai hilou a Siamna Taktak tup a nei a kipatthak poimawh hi. Siamsinna in kong tuamtuam tampi kawkthei in, poimawh vek thou mahleh, laisiamna mah pibawlpen in nei in, pupa tawndan khawng peuh siamsinte’n buaipih-pih kei mai lehang hoih kasa!

Laisiam sepna mulou chih hi siamzawhlouh ziak ahizaw diam chih ton aom. Aziak bel, a siamte’n sepsenglouh in sepna mu teltul thou uhi. Manipur a i leizawh kei leh leng, Central ah exam theih tampi om hi. Huaiziak in, siam taktak tup a, siamna i hon neih chiang a i mi i sate’ adia zattheih a om leng ngai hi. Lawhchinna sangtak ngah, milian leh milal chih a theihtham, siamna sangpipi nei himahle hang leng i mi i sate’ adia phattuamna neuchik beek i neihkei leh chu i siamna kha siamna taktak hilou chihna ahi.Sum-le-pai, thuneihna leh thildang ah ka gam leh nam’ adi’n phattuamna nei zoukei mah le’ng, ka theihna tawmchik zat phatuam teitei sawm in lehkha gelh beek in pan ka la hi. Mi lawhching hihna di’n laibu simtam angai.. Scientist minthang Albert Einstein in, “No man can be truly educated or successful in life unless he is a reader of good books. Strive not to be a success but rather to be of value” chi hi. Huaiziak in, lawhchinna delh lou in mi manpha hih tumzaw chiat ni.

©mangzouvl/24-10-2011