“Aaaa khaih, hiai na Mangzou ule theer-thur, (phamta) U Sumzamung chiah lai pha aka hia” - Rooney Muan Tangpua
Ka sung hatlouh ziak in kar 2 sung mawngmawng kamgei meima in ka om neer-nur nilouh a, mi’ lak a kihel leng a nuam kholkei. Kum 1990 lak vel ahi a, Khristian Tuailai Pawl in program poimawhtak kinei ahihman in, kikhawm ding in nungak leh tangvalte, analhthei tawp a kichei in Biakin lam kimanawh hi. Field lam apat nungak khat hong paisuk ngaihngaih a, Khamzamawi-te’ innkong ahong tun in U Sanglian in, “Ngaihlun, bangchituk a kichei in, kinalhsak mahmah letele Nungak Kamgei Meima na hi thouthou” ana chihkhum. Ha Ha Ha.. Ka laigelhna a mi’ min ka taklat khakte kha ka ngaihnat-te ahi ua, deihkhop a ka chihkawt-te ngial bang chu Singngat-te’ lak a leng a Special diakte ahi uhi. Pandar bang chu tangval phatuamngaite’ lak a Singngat Special Chart No. 1, akizom a kar 3 sung ahihna hita la-o. Ka pen a muzoukei a hiven.
Ka U-te khat sepaih suty hong pai a tape recorder Panasonic hoihlouchik khat hon pua hi. Teirol tunglai, S. Chingnu, Lianlunching leh Thangboi Mangte & Muana Ngaihte chihte khawng’ hong larkhiak tung, cassette a bawl tunglai uh ahi bok a huai tape recorder, cassette reel ne-ut deuhmai kha ka lawmta hon un ka deihthoh mahmah uhi. Louhal zawh hun vel in, mi’ siinglei ding kar/tou in ka kilawh sek ua, dry-cell battery laamkhat tantan khawng a zomkhawm dendon in ka kilawhna mun uah (tape) ka tawi zel uhi. Huai hunlai pek apat S. Chingnu leh a lasakte ka na ngaina gige hi. Sun hun kia hilou, nitak chiang in leng tape recorder ngaih deuhdeuh a khawlak a khah in, ahihkei leh, guitar tawh khawdung-khawvai a kikoupih in ‘ka tong naubang na saanchil in, tongdam neem in naubang n’on sang a’ ka na chi ngolhngolh saam hi, ngaihzawng nei leng hiloupi in!
Nidang in Video Charity Show chih kithang mahmah hi. Charity Show a kichih naak leh muhnophuai ding, film nuam hi ding in kikoih a, bangziak a charity show kibawl hi a, a bawltute’n bang tupna a bawl u’hiam chih donloupi in et teitei kisawm sek hi. Kou leng khatvei charity show ka bawl ua, ka summuh teng un ann ka nekhawm ri-ngot uhi. The Malsawm Initiative leh CT Lian Convenience Store pangkhawm a naupang vualphaloute kithuahpihna dia charity show – A Nite with S. Chingnu (August 31, 2012) ahon buatsaih uh, atung apat ka phur in ka ngaipoimawh mahmah hi. Huchi’n, ka inteknu tawh ticket 2 lei in ka va tel ua ka lamet leh kithalawp mah dungzui in nuam ka sa a, tel thaman om ka sa a, vaisaidan leh thilhihdan (performance) bangkim lungtunhuai ka sa hi. Ahi a, huai hun a va tel midangte akhoihdan, hun zangtute’n bang lungsim pu in a zang ua, a uaptu mipite’n bangchi’n a uap ua chih ka theikei. Concert nuamtak dan in hia huai hun a zatbei uh, ahihkei leh, vualphalou naupangte lungsim a phawk kawm in?
Hun hong paizel ding ah a ziak tuamtuam om a charity concert omzel lai ding ahihman in, hiai tawh kisai tamlou kupnop ka nei hi. Lasak siamte leh tumging tum ging siamte a thawn a kikousak mawk dan omlou ahihman in, a kilawmtawk sum leh thilpiak piak ding mah ahi. Huai kha, ahunma in genfel dimdiam hi henla, apoimawh leh suai kai hial in thukimna bawl hi henla, akhawnung in atamzaw/tawmzaw a kideek chih omkei leh. Lasatute’ lawh ding kithukimna omsa ahihman in (sum lengvel dangte) amau’ khut ah hilou in, vaisaite’ khut ah lutzaw leh ‘in aid of’ ahihna langsem di’n ka ngaihtuah. Vaisaitute’n kithukimna zah pezoulou ding dinmun a aom u’leh mundang a sawk mai ding uh, a val a muhkhiak ua lelah hampha uh himai. Huan, mipi lam in phurdan chintawk kitheilou kha sek hi. Va dinkhiak a sum/paak va piak hiam pen dem ka hikei, himahleh, huchia i va gamtat chiang in lasatute subuai a, entu midangte’ adi’n mitdonhuai hi. Eimah phurdan leh kilawpdan chiat in, i tutmun ah, la i na sakpih hiam, khut i beng hiam, i ut leh dingkawm in i kipahpih hiam hilel leh pichinhuai ka sa.
La luite phorhkhiak thak a saklar thak zel ding, a khang-khang a kipiaksawn touh ding a hoih ka sakdan ka hon gelhkha ngeita. S. Chingnu’ la hit mahmah te Nancy Biaklun in ahon salar thak a, khangthakte kia hilou, a kumlui zawdeuh tan in leng i kipahpih uh. Huan, lasak ana siamluite bang in leng nupi/papi hih nung a tawpsan pah mawk ding hilou hi. Siam lailai uh ahihdan Singngat Special Music Video Album enkhate’n i thei mai ding uh. Australia gam a gospel la sasiam kumlui pipi te’ hun zatkhawmna Home Coming i et leh, lungluthuai mahmah hi. Lasate, tumging tumte, leh a uaptu mipite, atangpi in kum 50 tunglam ngen hi uh a, nidang a gospel la sa a ana lar – Gaither Vocal Band, Jeff & Sheri Easter, Jason Crabb, Rhonda Vincent, The Isaacs, Gloria Gaither, Anthony Burger chihte leh adangdang in la sa uh a, upa lam ngen hita mahle uh siam mahmah lai uhi. Huchibang ahihziak in, lasak siamluite koihdap mai lou in A Nite with S. Thangkhankham (Thoukang/Lengdang pom mai in), A Nite with Lianlunching (Juanna Danglou/Na Geelngam diam), A Nite with Nengzachin (Antuimawl/Sakmel hoih lungsim sia), A Nite with V. Paukhansiam (Junlouh Zogam/Laizom teng aw), leh adangdang neitou thei zel le’ng nuam mahmah di eive.
Eiloi lak ah phatuamngaihna kichi dausot mahmah a theih in om hi. Phatuamngai taktak leng hunkhop ki-om tham a, mun/hun khenkhat ah bel phatuamngaihna bang leng phutluih a hih hun om a, nek ding a om ziak a phatuamngaih va suah na mun leng om a, supna ding ahih lebel phatuamngaih peihlouhna mun leng om lai hi. Huchibang kar ah, phatuamngaih luat bang leng thuaktheihna, liautheihna, awkkhak-theihna ahihman in kidaangkoih siam apoimawh na mun/hun bang leng omsak mai hoihzaw leh kilawmta hi. Mi kisual i va phelh na lam a va thuak-ek sang a chu gal-et vengveng mai ut-huaizaw di eihchu. Kuahiam tuakkhial khat i va awlmawh na lam a va awkkhaktheih ahih miau a chu a ut-ut si in puul le uh, kei ka dam leh hun, chih mai baihlam ta aka!!
mangzouvl/20/09/2012