KUMLUI-KUMTHAK THUGEEL: CAPITAL PUNISHMENT
Christmas leh kumthak hunte Jesu Christ hongpiang lopna hun ahih ban ah I hinkhua paisa leh maban te ngaihtuah thakna hun ahi. Hun lui I ngaihtuah kik chian sihna-manna I insung leh tanau-laina, lawm-le-vual lak a ana tungte I lungsung ah honglang lou theikei sek hi. Sihna himhim athuak nuam a omkei. Hileleng ahon deen dan (shock value) atuam tuam omthei di’n a gintak huai. Natna leh teeknat a si, theihtawp suah a khoizoh a hon beisan te bang pom theihna omdeuh adia aw chih in a om. Hileleng, accident hiam a siphut, ahihkei leh thautang khawng a si chihte pomtheih leh thuak a haksa mahmah. Hiaite banah, accident le hilou, tup mah a mihing leh mihing kithah, kikap lup, kikhet lup, banah sihnung a mualphou huaitak a ki bawl chihte athuak haksa diak ding hi. Atuak loute’n ngaih a ngaihtuah phaklouh thuakna hiding hi.
Mihing hinna tung a vaihawm a, sih-le-hin kal kithuneih khumna toh kisai in hun tuamtuam ah paidan tuamtuam ana om hi. Malai a kumpi (kingdom or empire) nuai a oma, citizenship rights omlou, subject population dan a mipi te a omlai unbel mi nautang te hinna bangmah louphial ahi. Christian sahkhua bang hong hat a, Christian doctrine poimoh mahmah chuh mihing leh khovel thuneihna bat phaklouh ah mihing lungtang leh kha, kuamah nuai a omlou om ahi chih ahi. Hun hongpai in khovel kivai puakdan hong kikheng zela, political theory mahmah ah le 17th century vel in mihing hinna pen banghiam sepsuah na dia vanzat (a means to some end) maimai hithei lou; huai malak a state/government te nasep poimoh pen mihing hinna humbit hizaw (an end in itself) chih ngaihdan hong om hi. Hiai toh kisai in Thomas Hobbes, John Locke leh Immanuel Kant chihte thugelhte bang influential diak hi.
Hiaidan in solkar (government) pen mihing te’n amau damna dileh hoih nadi ngimna a abawl khiak uh ahihman in solkar dan nuai ah hinna kilak, kithah, murder, phallouh ahi. Mikhat in midang that a, murder ahihleh, dan nuai a agawtna tangpi chu hoihtak a dan nuai a dinsak zohchia amahle suangkul a khum hia, ahihkei leh sihsak tei (capital punishment or death penalty) ahi. Hiaidan in capital punishment pen murder hilou a, dan in aseh bang a sep khiakna, solkar danzuihna hilel hi. Huan ah, hiai bang a hinna lak theihna solkar a liauliau ahi. Sovereign state khat sung a organization dang in galvan atawi uh le phallouh, mi tung a khut akhak ule phallouh chu ahi, sovereign state in a uk gamsung a ‘monopoly on violence’ nei ahih man in; huchia pawldang in mi athah uleh dan nuai ah capital punishment hilou in murder in paiding hi. Gendan dang in, kuamah him him thah phallouh; alou theilou a thah ngai omleh dan dungzui a Solkar chauh in that thei chihna ahi.
French Revolution (1789) lalgam (kingdom or empire) beina, leh nation-state kipat na dan in ngai ta le, dan dungzui a kivai hawmna, nation-state leh dikna nei, rights-bearing citizenship dan a mipi te dopsanga a omnung unle dan dungzui a kithahna (capital punishment) om toutou lai hi. Mihing te sih-le-hinna tung a vaihawm theihna chuh thuneihna tawp (mark of sovereignty) in kingai a, solkar te’n zang toutou lai uhi. 20th century ah kidoupi khatna, nihna leh Holocaust ichih te hong om a, huaiteng ziak in Universal Declaration of Human Rights (UDHR) in honzui tou a, hilele huainung inle capital punishment/death sentence bel kizang toutou lai. Tutan inle a omlai, hilele, azang tatak tawmchik phet ahita. Etsakna di’n, European Union (EU) bang ah member hihtheihna di’n capital punishment kha gamsung dan a phallouh ahihdi chih condition khat ahi. UN bang ah leng death sentence himhim sepkhiak (execute) louh photding (moratorium on death sentence) chih proposal kipe lutlut ta a, hilele gam tamlou chik te’n adal laiziak un tanglai suak hi. India leng adal tute laka khat ahi. Hileleng India ah leng capital punishment phal himahleh kizang vaang dedeuhta; zanlam a Ajmal Kasab khailup ahih kha kum 2004 nung a akhatveina ahi. Mihing hinna dan dungzui a kilak sak hial pen serious law mahmah ahihman in India dan ah le dan in capital sentence apiak nung inle, solkar in President tungtawn in a sovereign power zang in ngaidam top (pardon), a gawtna suniam (commute), amoh pen taksa poihlong hiam, naupai chihkhawng ziak a gawtna kiamsak (respite), athah hundi kipel saksak (reprieve) chihte hih theilai hi. Hiaite’n court martial nuai a mohtang te le huapvek ahi. Supreme Court chihdan in death sentence hial zaw ‘rarest of rare cases’ chauh a piak di chih ahi.
Bangteng hileh, hiai concept leh paidan enton in dan hoihtak nei a, hoihtak a dan dungzui a thukhenna bawl leh mipite pomna (acceptance and legitimacy) nei le hilou galvan tawi pawl chiteng in capital punishment chi in, mi that that uhi. Manipur bang ah kithang mahmah. Eisung mahmah ahle tukum mahmah inle ina thuak ta uh.
Anih tegel kal akibat louhna bel: Gamsung dan ah hoihtak in a thu level tuamtuam ah ngaihtuah in om a, ngoh a omte le adikna uh hoihtak a gensak a om in, huaiteng pansan a thutanna piak ahi. Huai thutanna le President in ngaidam hithet (pardon) thei; state Governor te bang inle ngaidam thei hialkei mahle uh thatsak lou in, gawtna niamzaw pethei gige lai uhi. Thah tatak ahih chiang unle agen nopte uh gensak in om ua, asahkhua dungzui un siampute thumna neihsak hi ua, aluang uh zahtak tak in sahkhua toh kituak in sil (bath) ahihkei leh puan atuam in koihkhiak hi uhi. Osama Bin Laden hial bangle asihkhit nungzaw aluang mawkbawl hetlou uh ahi. Huan ah, gal hi’n gallou hileh, mi siluang mualphou huaitak a ki hihsak chih UN nuai ahle phallouh, war crime angaih ahi. Eilawi capital punishment te bel kaplum masa phot, huaizoh chia a ngohna di zongkhawm, ahih keileh a sisa ngohna te phone tungtawn khawng a a misi sungte khawng gelhkhe sak nemnum. Asisa mihing luang nasan zahtaak dan theilou, mualphou huaitak a kikoih sak lai. A sun anu-le-pa, zi-le-ta leh sanggam te adi’n thuak hak, mangngih, ngaihdam hak mahmah in teh maw. Hichibang tel nasep khawng pawl tuamtuam lak a le alianpen a kingai a, iki gen chiang bang a I minle zanglou zezen a ‘Pawlpi’ kichi hialte khawng in hon hihchiang unzaw gendi atheih hakdeuh aka.
Bangteng hileh I tenna gam buai a, galvan tawi pawl tamlua ahihman in hiai bang a kithah na om toutou lai di’ng ahi. Tu dinmun in pawlteng in capital punishment/ death penalty piak nawnlouh di, beisak di chih lamet vual ahi kei. Hilele, paidan akilawm tanbek nei in, a sisa mihing luang leh anutsiat zi-le-ta, nu-le-pa te beek dawmdeuh leh mihing/misiluang hihna ah zahtak na neukha beek toh ki treat theile chih kingen nuam ihi.
Bible a imuh dan in, Pathian in meithai leh tagah te kahna ngaikhawk ahi. Bible in meithai leh tagah suahna gentheihna tawp angai mahbang in, Pathian in meithai te, tagah te kemtu kahi ana chihial hi. Hiaidan inbel tagah leh meithai bawltu (widow/orphan maker) a pankhak di pen vualzawl huai hetlou peuhmah ding chih theihmai ahi.
Bible chauhlou, gamsung dan te ahle thah a om di mihing in taneu aneihia, zi meithai suak mai di anei hia, chih consideration lian petmah khat ahi. Bang chiteng a khial hilele huchibang mite zahngaihna kipe sek hi. Rajiv Gandhi that tute bangle huai consideration ziakin tutan in thah hilou uhi.
Hiaite ziak in:
Khatna ah, kithat pahpah zeenlou a poimoh ahih lele punishment dang kipiak didan le zong ni. Suangkul inei kei chih ithei. Hilele, pawlpi subuai theidi mi a omleh Manipur sung lut phallouh, District apan nohpawt, chihte bang hihdan khat hithei leh kilawm.
Nihna ah, sihna di tanhial ah liantawk lele mimal khat thutanna himawk lou in, pawlpi nei ihih leh huaisung a cabinet council ichihte tanbek in geel khawm in amau thutanna bawl uhen.
Thumna ah, thahdia thutan khum ahih leh ngoh a om pen nu-le-pa, tanau naipen te kiang ah a sentence sepkhiak (execute) ahihma in theihsakna leh ngohnate hilhchetna bawl hi teitei hen.
Lina ah, thutanna sepkhiak ahih a, ngoh a ompen thah ahihleh aluang kilawm tak a, zahtakna toh asungte kiang piakkhiak hihen. Asih khitnung in bangteng loh lengle misi in phawk nawnlou a, mi sisa I treat dan ah ei hihna kilang hizaw lel hi.
Ngana ah, thah a om mi in amah a kinga, zi-le-ta, nu-le-pa aneih leh huhna leh kankuahna hoihtak piak hi uhen. Athat tu organization in ahihtheih kei lele khotang pawlpi te hiam, saptuam hiam, leh MLA/MDC te’n hichibang a tagah-meithai suakmai te I kankuah di, huhna piakdi, I mohpuak ahi. Ana thuak sa, vul ningniang a omte le mangngilh louh teitei di ahi.
Hiai atung a kigente kuamah adia zakdah huai hidin kaging kei. Pawlpi, paidan leh organization hoihtak nei a, command structure kichian tak nei chiangte adi’n sepkhiak moh hidi’n le ka gingta kei. Akisai khakpih te’n kithah na omnawn ma ngei in hon ngaihtuah le uh chih ka ngetna ahi.
Eilawi, ami nautangte le, atangpi in, awlchik a mi gense susuih, mi su thangpai theilel, atatak a lah diklou isak te dal a ding ngam louzel ibang sek ua, thumang tak ibat hang un phunphun toh ithuah chiang un izuih te le lungkim tuanlou sek uhi. Ahitak in, nam tawmchik petmah ihi ua, galvan tawi pawlte bangle I tanau-laina mah, I veng ikhang a tengte mah ahi uh. Amauleng eiziak mah a thunei thei ahithou ua, neih-le-lam hau le ule eilak lou a show-off na di uh om tuanlou, azi-ata te uh eilak mah ut uh, eilak mah a legitimacy deih uh ahih man in Saptuam bang, khotang pawlpi te bang, leh solkar heutute bang in stand la in, ahoihlou kalh in ding ngam le ithu pailouh nadi om tuanlou hi. A thu khotang a kisu lauvek in, ‘bangmah kigen ngamlou, sihtheih navek’ ikichih tuahvek chia khat te’n nuamtak honsa uh ahi. Ki mawk gensiat hiam, kikou siat thoh hilou a, hoih deih a, serious taka I puaknat leh veite gen ihih nak leh lauh di a omkei. Martin Luther King Jr. in ana gen khat thei gige ni: “Our lives begin to end the day we become silent about things that matter.”
Hiaite teng phawk kawm in, Kumthak Zatnuam!!