Tulel a thil sui leh ngaihtuah mi (thought leaders) te buaipih pen khat tuh facebook, twitter, leh lnternet addiction, chihte ahi. Khang khat (one generation) chauh sung a vanzat poimoh leh hon panpihtu thupi mahmah apan hon subuaitu lianpen suak uh eive, hiai technological communication tools te kha. Technological communication hoihlua, human communication segawp. Room khat a omkhawm bangle mahni phone chiat a midang toh kithuzak, or games kimawl, or music ngai, agei apa toh kihou kha mawngmawng lou. Lampi pai, hiam, bus/metro tuang lele abil  a bang a angaih kithei lou, robot mah bang. Facebook post i bawlzoh chia kuateng in hon ‘like’ di uah aw, bangzah comment omta dia aw, chih buaipih nawn. Twitter account i neih leh ‘follower’ bangzah aphata a, bangzah in ana khang dia aw chih hizel. LinkedIn khawng alah ka lawmte bang dinmun ah a ana omta di uah aw chih awlmoh huai zel. Na phone a message hiam call dakkal khat sung a namuh keile chu patau hita; ka phone sia hia, network hoihlou hia, ahihkeh ana ki switch off kha? Hiai himai eive, tulai mi tamtak te hinkhua.

Roger Cohen in tunai a New York Times a agelhna ah hiaidan in ngaihsun hi: Mihingte ipian apan i dinmun lauhhuai, lauh di om ahi chih na toh piang khawm ihi. Hun dang ah bel gamsa lauhuai, natna, gal leh kidouna chih te ahi. Tuhun ah hiai lauhuai te daita ua, hilele mihing in lauhdi khat poimoh veve. Huaiziak a tulai a lauhuai pen dia i ngaihtuah khiak tuh i status a keniam kha di chih hita; status anxiety hita e, tulai natna.

Hiai lauhna, status kiakniam khak di venna, ziak a thilteng kha phou khiakhia mai. Mi pilvang tamtak in privacy a buaipih lai ua, ei lehpai. Online world a thilteng Over-share. Keile damlai kahi, hon mangngilh kei un, hon ngaihsak un, chihna hisim mai. I picture leh comment post te mi’n a comment hiam a ‘like’ keileh, anasa zawsem khat koihkhiak beh. Mi nih ki message, kuamah dangtoh kisai hetlou bang le facebook vazang sese. ( Hongpawt manlou zel di maw, honna kingak ngak a. Sawmzaw hi’ng a, man thei nailou. Any in-law troubles? Pshh, will tell you later. I pa’n zaw sa huan hiven. Ash, kaheh lua, ka duhduh toh, poimoh lou pipi na hongom phiing a aka hia.. Nang le khatvei khawng gen fek suk di eive le. Just shut up, you don’t know what’s goin on here, ok.) Na phone uah, online sese lou in ki message suk le uchin zaw sum le tawm beizaw di hiven maw....

Lamet theih khat bel, hon chimtak pah na unteh chih ahi. US mahmah ah le ‘facebook fatigue’ cih bang hahgen ta uh bang hi. ‘Internet Sabbath’ zang a, Sintawpni nitak apan Seppatni zingkal tan internet mawngmawng toh kisu khalou chipawl bangle om. China leh South Korea chih khawng ah ‘internet rescue camp’ chih peuh sai un, internet addict te hotkhiak sawm in buai uh chihbang le om tel veh aw. Intel company bang inle Sepnawnni zingkal lam dakkal 4 sungbek a semtute’n internet leh phone chihte toh kisukha lou a, quiet time neih di chih policy bang ana bawl ta uhi; atup uh bel a semtute’ ngaihtuah na suksiang di, hatsak di chih ahi.

‘Quiet time’, ‘solitude’ chihte tulai a luxury suak ta ahih mah ve. Personal life om nawnlou. I hun zat didan toh kisai en thu nei nawnlou; circumstances leh gadgets in vaihawmta. Mimal hi’n, professional life hi’n, khotang hi’n, saptuam vai hita leh, programme kibawl sa te delh a tai nongnong gige; absorb tatak lah bangmah omlou. Gamdang khenkhat ah bel hiai bang hinkhua chimtak na, ning kitel na lian petmah ta hihtuak. Hotel khenkhat leh ‘black hole resort’ mun khenkhat ah internet leh tv neihlouh na di’n customer te’n sum tam pipi pia chitel ta uhi. Hiai thu teng toh kisai essay hoih mahmah, ‘The Joy of Quiet’ kichi, Novelist Pico Iyer in New York Times a December 29, 2011 a agelh alunglut te adi’n etthak taak mahmah ahi.

Ahim him inle ngaihtuahna siangthou, chiimtak neihna leh iki saikhak pih midang te adia phatuam zawsem hih theihna dia, omtuam na, daizikzik a eikia a omna, quiet time, ana poimoh lawtel ahi. 17th century lai a French mipil Blaise Pascal ngial inchu khovel buaina tengteng mihingte room sung a amau kia a dai dide a atut theihlouh ziak uh ahi, ana chitel hi. Thawm ngaih zoizoi (noise) him him in i ngaihtuah leh sense te subuai hi. Tualgal leh riots khawng chiang a mipi husa angaih semsem leh huhamna sang semsem; husa angaih semsem chia mihing te sense leh conscience corrupt dedeuh hilel hi. Bangziak a na isak chia nakpi a kisang ek a kikou ihi di? Anat ziak a hong ommai bang mahleh, ikikou ekleh athuak nuamdeuh takpi hi. I sense te leh conscience te a numb gawp ziak ahimai.

Atuam deuh in, Sherlock Holmes ngaihtuah mah dih. Hiai, khovel a fictional detective minthang pen in bangchi in a case te a suikhe zel ale? A chair a kingai di inchin, amit si kawm a khut kilhtuah a dai dide a ngaihtuah di inchin, alawmte alang alang adiangte suikhiak zohlouh teng aman ana suikhe zel. Amah method zat bel concentration, meditation, mindfulness chihte ahi; hon subuai theiteng koihkhia a, thil khatkia ngaihtuah chenchen di. Tulai a multi-tasking achih chih lai un, mi productivity keniam lua ahihman in, mindfulness training chihkhawng ki pibawl thak mahmah chih ahi, tumlam gamte ah. 

Pathian toh kithuah na di”n le ‘quiet time’ sang a poimoh zaw omlou hi. Khovel a sahkhaw lian pen tegel, Christianity leh Islam te sehnel gamdai (desert) apan apiang ahi uh. Khenkhat te sut dan in, sehnel gam ah van lah sang, meikai lou; kim-le-kiang lah sing-le-lou omlou, dai zikzik; khovel awnglua, lianlua ahih man in mihing in thawmhauna neiden a, Pathian poimoh kisa diak in, zong le zong diak uh, chi uhi. Buddhism leh Hinduism ichihte bangle khovel toh kisu khalou, omtuam mite muhsuah mah ahi.

Bible mahmah ah le, Pathian toh akithuah tatak te omtuam sek uhi. Mosi bang, Jesu mahmah le.
Tuhun inleng, kum hong kihei in Christmas ahong hinawn ta a, ihih theih dan bangchiat ua nuamsa tak a zat sawm in i phe sosouh nawnta uh. Anuam theipen a hih di chih hideuh gige mai. Atang pi in, Christmas hun pen inkuan, u-le-nau, lawm-le-vual, kimuh khawm hun, gift kipiak nahun, apaisa hun thute gen a hunnuam zat nahun in izang uh. Sap gam khawng ah leng huai dan mah in mun tuam tuam a om u-le-nau te kisuk khawm a, hun nuam zatna hun ahipen mai abang. 

Hileleng, igensek bang a, i lungtang sung naungek awn a, Jesu athak a piangsak nawnding ichih le bel quiet time mah poimoh zelding hi. Kenchu Christmas leh quiet time kituak kasa mahmah e. Christmas La a minthang mahmah ‘Silent Night’ bang ngaihsun thak mahdih. Aw ngat mahmah, music le tamlou, gam daitak lak a hong kisa ngiaingiai pen in hon zou diak hi’n a theih theih. Gan ankuang alum Jesu Christ mitkha a chiangtak a honmu sakthei hiveh aw. Tulai khovel buai cherchur lak ah, Christmas hunbek in i kumkhat hun paisa enkik in, ihih khelh leh hihhoih te enthak in, kum thak adi bang priority inei a, banglam a bangchi kizat di chih gelna, Pathian toh dialogue nei a, quiet time zatna hun in zangthei le manpha mahmah ding hi. I biakna hunte bang uah le worship/singspiration banah daih dide nahun bang hahzat le, khat in pulpit apan a thu genkhe loiloi chih gige sang in-bang achi dia?

Dotna khenkhat: Tukum paisa sung in laibu bangzah nasim man a?  Chik ale Bible nasim last? Tukal sung in hiaipa/hiainu adi’n phatuam kha ing e chih di om hia? Hiai kava hihkhak/genkhak sese chuh ka kisik/kipak e, chih di om hia? Thil dang sukbuai hetlouh in na lawm hiam, na-nu-na-pa toh kimai tuah in nguuntak in na kihou kha himhim uhia? Kumnawn la, eimah in plan hoihtak bawl di in huai zuidi maw, ahih keileh ahun-le-amun zir a paitou neknek nawn di? Ahia, kei agelh tupa mahmah inle dawn didan gina nei hetkei maimah hive’ng aw, hiai dotna te. Ka email chu den mah in kava check ngeitak a... Hiai atung a dotna te geel theidia lungsim suksiang nadi’n quiet time hoihtak ki poimoh pahleh kilawm.....