Ka lamet leh ut thu hilou in tutung ka department ua Annual Transfer Order a hong suak a, Lamka a ka omditan (tenure) chinglou hinapi’n Shillong a Headquarters mun a suan in ka om mawk hi. A ziak hi dia ka gintak pen ahihleh kum teng a ‘transfer proforma’ a Shillong ka ‘preference’ nihna a ka koih ziak hi di’n ka gingta hi. Kei ka hihleh upate’n ‘abilh a thoulou’ achih uh hi geih mi ka hi a, ka sepna department in a hon ‘transfer-na’ mun teng ua niallou a pai mihing khat ka hi. Ka seppihte gen hilou in kei k’ong kigen di.

‘A bilh a thoulou’ ka hihna ziak hi pen a ka kitheihna tuh ka seppihte bang in ka utna mun ‘posting’ ka ngen ngam ngei kei hi. Huchibang kal a, kei mizahkai chilou in ka sepna department in ka nget louh sasa in posting hazathuai hi a ka seppihte’n a theih munte uh a hon pe nak a, hilele ka seppihte mah in a hon hek nak ua, huchibang munte ah bel sawt ka om ngei kei hi. K’on ‘highlight’ masak ahi.

Shillong khawng a posting a om di, tate huai mun a ompih a, haksa lele Lamka zang bang zenlou a zalen lou deuh a ompih ka lunggulhna a sawt mahmahta hi. Hilele ahi thei kei, ka seppihte mah Shillong mun a ‘post’ awng a om leh omlouh ka dot chiang in ‘omlou’ a dawn in ka om hi. Huaiziak in ‘representation’ bang Shillong a posting-na di’n ka khe ngam ngei kei hi. Sian’ gel maw, ka tung petmah a, sumsenna sang in haksa mahleh ka lung a kim tadih lai hi. Huchi’n Shillong tang a kipan in Zogam ka galdot a, thuzakna (source) pi om kei mahleh Facebook kichi a kipan in muhtheihna chiang a om hi. Lehkha/laibu ka sim chiang in mitbelh/tarmit ka bun a, Zogam ka sim chiang in FB ka zang hi. Lamdang tuan kei. I muhtheihna ‘network’ om penpen zat di  mah hi’n ka koih hi.

Zogam pen Zomi, mihai hiloute’ a dia mawk  nelhsiah theih di’n ka koih kei hi. Zogam a dia ka panna leh ka ‘contribution’ tawm mahmah kha in teh, hilezong ka veina hang ka gen a bang a poi om ding? Hiai thu pansan a hon gelh dek ka hi a, duhthusam  deuh bang a gelh ut lai ka hi. Zogam tawng leh Zodawn a piang a khanglian ka hi sam a, Zogam ngai in awlmoh thei kei leng mihai suak di bang in ka kikoih hi. Ka thupi a hong lut di. Ka laigelhzia tuam maithei, paragraft khendan tuam le zong ka ngaihsutna tuam kei ven! A ngaihsun nuamte’n  ana sim unla, a sim peihloute bel sim teitei di’n hong kun ke’ng.

Manipur MLA election vote khezou in Manipur ka inkuan un ka nusia uhi. MLA kitelna result bel puankhiak ahi nai kei hi. Huchi’n Shillong a kipan in ka thei a, a ching dia ka gintak pente mah a ching uhi.  Huai ahi, Zogam ka galdotna masa? Hiai 2012 Manipur Assembly election ah eite mun bazah hiam a majority hihna nei ihi uhi.  Churachandpur, Singngat leh Thanlon ahi tangpi. Tutung ,2012  kitelna ah Singngat A/C leh Thanlon  A/C bang ‘free vote zone’ a kichi hi. Hiai A/C a vote result kei a di’n a ‘surprising’ kei, ahi di mah ching ahi uh. Himahleh Churachandpur A/C pen a hong ‘free vote’ kei sim phing a, ‘free vote zone’ hilele a ngei mah ching leh kilawm ka sakna mun bang ahi zawmah hi. A ‘free vote zone’ louhna ziak di ka thei zou kei hi. A saitute’n kei sang a thilhoih a pian di thei uh hi’n ka ngai hi.  Ahihleh hiai bang a mipite’n i palai di ua i telchingte un bang a hon semkhe di uh? Huai ahi, a buaihuai na!  

Huchia kitelpina i neih khit ua thu masa ahihleh ‘Singngat’ tui nekdi crore bangzah hiam sanction a bawl dia Centre solkal in a piak neksiatna thu ahi. A bialtu MLA in a va delh a, himahleh a mun (spot) a enkhe lou in Water Supply (PHED) a semtute’ FIR toh a kilehkik hi. A nung in a gen a, huai Singngat tuinek di lakna dia vanzatte ‘sub-standard’ mah ahi, achi hi. Hiai thu in ka lung a kam masa hi. Hiai bang thil om a, huai Singngat tuinek di nese tute solkal’ court hiam, Nampi’ court hiam a tut ahihlouh uh thillamdang a suak hi. Singngat ah teng nawn kei mahleng tuinek thu ah ka awlmoh mahmah lai hi.

Huchi’n Assembly Session a hon nei ua, huai ah MLR & LR Act kichi Manipur pumpi a zat di’n a hon ‘passed’ nawn uhi. I palaite uleh Assembly a singtang mi Member teng in Manipur pumpi a zat dia hoih sa mah a ngaihtuah a kuamah ‘kuke-kake’ chi omlou a hihman un i hamphatna di uh va passed pih nainai ahi di ua, kiphahuai, chihlouh theihlouh in a koih theih hi. Himahleh nidang in hiai Act theihtawp in i dal ua, i deih kei mahmah uhi. Huaiziak a dallouh/nanlouh a hiai Bill passed theih hiau a om peni hamphatpih uhiam, i haksatpih uhiam i ngak uh ngai di a bang hi.

Thu a hong leng zel a CM Ibobi in Power portfolio a let a kipan in Lamka ah le mei (electric) a pai hoih tuan mahmah chih thu FB ah hong ki-post taget hi. A ziak di ka thei kei, CM a hihna ziak a thu nei deuh ahi kha d’aw, ka chi hi. Eimi’n a puak lai sang a phat loh zaw, chih lampang a i ngaihtuah le bel kingaihtuah buai a khakham vei theih phial di a hihman in ka ngaihtuah sunzom kei mai di.

Bial (Constituency) veh leh puah  toh kisai in Singngat MLA a thawm a ngaih mahmah hi. Lampi bawlsak, intung di langva pia, adg. A kigen tam hi. FB khoih Singngat bial mi a tam ziak hia, chih bel ka thei kei. Hilele ‘active’ deuh zaw hi kha in teh! Churachandpur MLA pen amah bial a kia hilou a, Minister a hihna toh Manipur pumpi a ahi a, a thawm ngaih law lawmlawm kei lele a theihsiam huai hi. Ahihziak in, Churachandpur district a MLA 6 omte’ lak a MLA khat kia activity a ngaih mahmahna ziak tuam di’n ka gingta hi. Tipaimuhk, Thanlon, Henglep leh Saikot bangchi la?

Atung a thute ka buaipih ut pen ahi khol kei uh, a mun a om a theite’n anuai a thute a hihtheih leh hon hilh un. Guite Road bang achita? Mi hausa leh motor neite’n huai ah passenger leh van paw di’n a motorte uh a sawllut ngamta uhia? Passenger motorte nuam tak in a tai theita hia? I zoudawn mehte uh se manlou a Lamka puaktung in a omta hia?  Night motor service ahihlouh tawp a evening motor service theih di’n a lampi a hoihta hia? Hiaite a hihtheihlouh tawp in le lamkal ah AR-te’n sawt pipi, poimohlou pi in a hon khawlsak lailai uhia? A dawnna ka thei ut mahmah hi.

A poimohpen, I Zogam uh Zomite’n tenna di leh khosakna di’n I lunggulh vungvung un, taikhiaksan di’n pammaih I sa ngoihngoih uhia? Zoudawn a tengte bit leh lungmuang a kisa uhia? Zoudawn ah solkal a kipan hamphatna hong paite diktak a hawm leh a mutu dite piak in a om uhia? Zoudawn a damdawi-in leh skulte kingaknatak ahi uhia? Kikawmna lampite a hoih huntawk uhia? Kial-le-tak om leh a gil uh a vahna diam? Hun in a hon hilh mai ngai di hia? Palai khat hihna ziak a dawi-ai (magic) bang a hiai teng ni khat thu a hihtheih hi kei mahleh a panlaknate uh theih a uthuai mahmah hi.

A tawpna di’n, chi zenzen leng ‘Autonomous Tribal State’ ichih uh a taktak a deih ihi uhia? Huai toh kisai bang kitelpina hun ma a ‘talk show’ ah a kigen nasa tel mai a, ka chihthu hi.