Nipipak kichi koi a kipan a i lak ua i indigenous pak khat uh suak ahia, chih theih zoh di ahi kei. Himahleh nidang deuh pu-patea' hun a kipan in lou lam khawng ah zouzam toh loubuk kim ah a ching uhi. Tu chiang a singtang lou nasem laite'n ching nawnlou a bang zawsop uhi. Hoih tak a ching hile tu chiang in a tang nekna chang theita tuh Moreh tawn a Myanmar a hong kipante lei sese lou a mahni chin tang mah nek mai di chu ahi. Himahleh i ching kei ua, zoudawn khua tan ah Myanmar nipipak tang i lei uhi. Hoih tak a ching hile a thau bangle meh kanna dia kibawlta ahi zawmah hi.
Nipipak a chituamna mahmah ahihleh a pak a lian petmah a, i lak ua pak dang omte nipipak seh li suah seh khat a lian a om kei di hi. Pak kilawm lua ahi kei, hilele a mel a pi mahmah ziahzuah a, huan a kung le sang in a nahte bangle a pek khiahkhuah se hi. Himahleh a kung pen a hawm pian a, a kung sung a mu in a dim hi. A pak lian mahleh a cheina a thupi kei a, a pak sung teng a tang in a dim a, a pak pang teng ah apak eng in a um kimvel hi. A tang omna mun ah a pak tung chiang in a tang lian di'n a vui hileh kilawm en phiikphiak in a belh hi.
Pak hoih lua a gen di hikei mahleh chituamna mahmah a nei a, huai tuh a pak in nisa omna lamlam a nga hi. Huaiaziak ahi dia Luseite'n nihawi par, achi uhi.
Hiai pak lian tak mai tuh a pak lah lian namah ahihchiang in khuaiva leh khuaikaite'n a pakzu ne in a nawn ua, amau a dia vualzawlna thupi tak a suak hi. Huai bang deuh in i lak ua a zak lian tham deuhte bang in a neih-le-lamte uh i lak ua a anniam deuhte' a dia zatpungdan (invest) hon nei le uh vualzawlna hong suak mai di'n a gintakhuai hi. Etsakna di'n, Rev. Khen P. Tombing in Rayburn School leh College a hon hong a, mi tampite' a dia laizilna lam a vualzawlna ahih kia hilou in laisiam government a sepma mulou tampite' a dia vualzawlna a hong suak hi. School leh college sese hon louh a le i lak ua mi hausa i neihte un farm hiam khutsiam-silbawlna (industry) hon bawl uhenla hileh huai a kilohna di hong om mai dia, huchia a zawngte' a dia kilohna di hong om dia, vualzawlna hong hi mai di uh ahi. Himahleh tuni tan a eilawi in hauhsakna di lampi i theih uh omsunte corruption, contract work leh MLA/MDC khawng hih a huai a kipan hauhsak di, chih ahi lel hi.
Nipipak tuh i late ua kilanglou mahmah pak khat ahi nawn hi. Himahleh pak toh numei tehkhin ahi tangpi a, hiai nipipak toh numei tehkhin di hile numei duangching tak, a etlawmna tengteng mi muhdia phoukhia toh ka tehkhin di hi. Aziak tuh pak dangte a pak kithuap nitnet ahihkeileh a sung kuak, a sung hawm, chih khawng ahi ua, hilele nipipak pen ah a kisel bangmah a om kei hi. A pah tung in a engvui tampi'n a tang a liah uh, chihlouh a kisel a tam kei. Huai hileh, numeite le vualzawlna ahi himhim ua, numei om kei leh mihing pianglou mawk di ahi hi.
Huan, nipipak tuh pau theilou ahi, chih i thei vek uh. Himahleh a pou khakna mun peuh ah phunlou hial in a pang hi. Loulai a kichingte le a pouna mun uh leigaw tak lak ah a pang mtrangtrang ua, a etlawmna suahkhe di'n suahtateitei tum in a suakta hi. Huan lei nip a poute le huchi mah in a pang ua, gamlak a atang kete nangawn a kim leh kiang a neh-lum thei di sing leh loupate leh a tung a dep-lum thei di singkungte' depna nuai ah a etlawmna mite muh di deih in damkhosuak di'n a pang uhi. Huchi'n a etlawmna leh a pakzu mihingte leh ganhingte muh di'n a hon phoukhia uhi. Hiaidan a i et leh kuhkalna hon sinsak ahi, i chithei hi. Hiai mah bang in eite le etlawm a hoih lua hi kei le'ng le i kilawm theihtawp a kilawm tum in pang chiat in, i hihna munmun uah kuhkal tak in pang chiat le i mihinpihte uh a dia vualzawlna hi thei ngei di'n ka gingta nawn hi.
A kim leh kiang leh a kiakna lei kia ahi kei lai a, vuahzu, daikai, nisa, huih nungte'n bangzahta in nawk in delh mah le uh huaite a thuak mualsuah lai hi. A kung hawmpi in hiai bang a pak thupi leh lian a pak theihna di'n a tha neih teng a suah a ngai hi. A hong pakkhiak theihna di'n hun sawt pi a lut a, a hong pakkhia a, a pak hong khang in a lian deuhdeuh a, a pak in nisa paina lamlam nga in a kihei dandan hi. Mihingte le pianken a dualdap sim khawng ihih lele nipipak kung bang in i mohpuakna chiat uh zou di'n kisuk le hihmoh omlou di a bang hi. Huaiban ah, i mihinpihte uh a di mah a banghiam vualzawlna hi thei sepkhiak theih lai di'n ka gingta hi.
Abul a ka gen ah k'ong kiknawn di. Nipipak tang nek didan i theih ua kipan in i ching nawn kei uh a bang hi. Nidanglai deuh a subsistence economy a hihlai phial a i pu-pate un lou cheina dia ana chin uh tulai cash economy a sum muhna di'n ching taktak le i lawk di uam? Myanmar a kipan a hong lutte lei ngailou di khop in lounasemte'n hon ching le uh sum muhna lampi hoih tak a hithei diam? Lou lai lah noksak lou, lou nawl dung suak bang ah kiching leh tampi a piang mai kei diam? A thau suk/hek tham bang ching hile a la ut company a om diam? Etlah tham bang ching in nei le a zuakna a haksa kei diam? Hiai dotnate i lak ua a navak leh a sui thei dite'n hon kankhe le uh chin tak ahihleh ahihlouh bang, chih deihhuai ka sa mawk hi.