Ngaihtuahthak ngai hilou hiam?

SOLKAL A SEPNA ZONNA TOH KISAI I DINMUN UH

Eilawi tu’n i dinmun uh a hong hoih deuhta a, tuailai siamsin tampite nu leh pate’n thagum seng leh kho-ul kai a chawm lou a midang in hon chawmsak bang, nu leh pate’n thagim-thatawl lou deuh a siamsin thei ahita uhi. Huchi ahih dungzui in a awlmoh thei leh huai bang a chawm a hihna uh theisiamte’n maban limchi a nei ua a theisiamloute bel gen ngaihna omlou ahi mai un ka thei hi. Mihing a hai ngal hichi hai thei lawmlawm di’n ka gingta thei kei hi. Hai, chih di hia, theisiam utlou? Ka tate’ tungtang midang nu leh pa ana hitate toh ka kikupna uah ta gina nei mangloute toh ka kibang sim uhi. Kei kia a tuak ka kisak leh midang a tuak ana om sam ua, poi ka sakpih mahmah hi. Ka gen ut pen ka tate’ tungtang ahi kei, k’on pan dia, na sim zom uleh huai a kipan in ka gen ut pen na thei mai di uh.

Eilawi kha, i nu leh pate un a tangpi a lai a hon zilsakna ziak uh amasa a Government (central/state) hiam, Public Sector Undertaking (PSU) hiam, Banking & Insurance Industries hiam, Private Sector hoihtak khawng hiam a sepna muh a, thagum zang lou deuh a nek leh kivakna di muhna dia kizilsak ihi uhi. Hiai thu ngaihtuah in eilawi pen niamkiak mahmah hi’n ka kithei hi. Eilawi ka chih chiang a Zomi e, bang e, ka chihna ahi kei, Paite kampau zangte ka chihna ahi.

Kum paisa bangzah hiam a kipan in eilawi sepna zonna lam ah i keniam mahmah un ka thei hi. I kim leh kiang ua mite hiai bang sepna zonna lam ah a min uh a dawk tam thei mahmah a, huaite ka muh chiang in ‘na’ sakna ka nei mawk hi. UPSC in sepna a lakte zaw thutuam ahi, miteng hihvual ahi kei. Himahleh Staff Selection Commission/Recruitment Board dangdang leh Banking, Insurance, chihte khawng a result ah eilawi i min uh tawm ka sa thei mahmah hi. Midangte hazatna thu bang mahleh a haza lampang mah ka hi. SSC Combined Graduate Level 2011 a India pumpi a ching zah leh appointment a piakna uh bang ka na en a, ka kingaise phial hi. Eimite tawm lua, MLA genlouh MDC tanpha neiloute’ sang a aching tawm zaw, chih theih phial ahi. Hiai in i society uh paidan reflex di’n ka gingta hi. Bangziak a hiai bang a eite keniam? A ziak-asan zonkhiak di’n hoih ka sa hi. Pathian limsak dia i tuailaite uh thunun zoulou, laisim dia lah thunun zou tuanlou, omdan hoih a om dia lah thunun zou tuanlou, kipawlkhawm helhul lel dia leng zalen maimai uh. Huchi bangchi gahsuah mahmah di maw?

Hiai toh kisai a ka gensau ut a om lai hi. I society utoh kisai ah Lamka a ka om lai bang in kiselna nasa tak a piang sek. Huai ahihleh ‘naupang curfew’ toh kisai ahi. Si-galna mun khawng a hot topic a suak nak hi. Mahni tate control zou kisate’n ‘naupang curfew poimoh-lou, mahni tate chiat i in uah kembit le’ achi uhi. Dik mahmah! Ken le ka tate ka hentang a, kisual phialphial in ka om uhi. A lawmte uh a hong hoh ua, ‘Pai ua,’ va chih sak theih ahi kei, a dim in in ah a hong hoh ua, ka tate’ lungtang a la mai uhi. Hiai kol a tang bangzah i om uh?

Hiai toh kisai FB ah a awloh a om sam d’aw, chih ngaihtuahna in ka post a, L. Gin Sang kichi khat in a hon ‘Amen’ sak lel hi. Khat in a lungkiathuai louhdan, Delhi khawng a ei mi laisiam a tamdan a hon gen a, hoih veve. Hilele ka lung a muang zou tuan kei. Eimi, Delhi genlouh India gam sung a metropolitan city tan a laizil dia kuan tampi om mah in teh, hilele a tangpi a huai bang mun tungzou kitam lou hial ahi. Metropolitan city genlouh Shillong tung zou tan bang le khosakna changkang deuhte’ a ahi lai hi. Huai ahihman in i milipzah uh et a Lamka zang a siamsin a omzah toh teh in mun dang zuan zou percent a tawm lai mahmah hi. Mun dang a siamsinte kia ‘focus’ a hiai gen ka hi kei, Lamka zang pel zouloute toh ‘focus’ khawm ka hi. Huai hileh tu lel a i dinmun ua ngaihmuang mai di ihi di uam?

Huaiban ah, Delhi leh metropolitan city dangdang a siamsin dia kuante’ lak ah siamna taktak zong 50% i om di uam? 10% hiam 5% khawng lel ahi maimah diam? Hiai statistics a mun a omte’n hon zongkhe ve ua le. Huai hileh ‘ngaihmuang’ tak a om di leh ‘awlmoh leh patauh’ hun mah hia, chih a theihtheih mai di hi.

Mun dang zuan zoulou a Lamka zang a omte ahihleh a awlmoh taktak tawm mahmah un ka mu hi. Se vek, hoihlou vek, ka chi kei, hilele a lamethuai di tawm mahmah un ka mu hi, kei tate tel in. Drug sal a tang lou leh alcoholic loute’ buaipih tuh kiphatsak, gutkha nek, kihonsual, chihte ahi lai hi. Biakna lah limsak lou, laizilna lah limsak tuanlou, thadah leh van hoih khawng deih thuah ngen ahi ua, huaiban ah, kipolhkhawm kia a ut lai uhi. Huaite tu nung chiang a bang hong suak di uh?

Tuailaite’ lak a hiai bang a zalenna ‘system’ khat in a paita a, ‘system’ a hong suah chiang in bawllem a haksa hi. ‘System’ khek kichi ni khat thu a khek mawk theih ahi kei a, awl a akikhek ngai a hihman in hun hong lut di a suak hi. Lamka a educational institution khawng neitute leh huai a semtute’n i tuailaite uh khawlouhdan thei mahmah di un ka gingta hi. Huaite bang lampi a pi a, a hoihlam a ‘harness-dan’ khat a om kei leh i tunung dinmun di uh ngaihngamhuai khollou di sa ka hi. Insung nu leh pate’n zou nawn lou hi deuh chiat in ka mu hi. Huai hileh, i society uh bawllem nawn theihdan a om khak leh huai suikhe dia committee bang saptuam level hia, phatuamngai pawlpi level hia, politics a pawlpi level hiam a bawlkhiak a, suikhiak di’n a hoih hi.Drugs leh zu khawng a kibualte’n kisual lam khawng a buaina bawllou zawsop uh a bang a, hilele a hoih bang a kilang, lah kholai kia leh lawm-le-vual kithuahkhawmna kia utte pawl in kisual lam ah buaina a bawl tangpi zel uhi.

Kou hun lai vel a chu eimite competitive examna khawng a min tam dawk pawl a kihi a midangte’n le lamdang a hon sa uhi. Tuni chiang a bel i milip omzah utoh teh a niam gawp, mi’n ‘hiaite pawl’ hon chi gu di ua gingta mai ka hi. Ngaihtuah thak ngai mah hi’n ka thei, nou la?