Chi a dam a, tasam lawmlawmlou a i om leh zaw hun pai hat mahmah a bang hi. February 17, 2012 in Shillong a kisuan di’n Lamka ka nusia uhi. Ka tanu naupangpen Shillong a skul kai sak ut ka hihman in ka tapa upapen toh kou, a nu-le-pate ka pai ma un ka sawl masa uhi. Huchia hong kipankhia in, inn luah di takngial le omlou pi in motor hire in k’ong pai uhi. Shillong ka nupa un kong tung ua, naihtheihna lamlam naih in ka khosa uhi. February 20, 2012  in ka sepna di ah joining report ka pethei ngal hi. Haksatna lawmlawm tuaklou ka suak ua, kipahhuai mahmah. Sawt i hong om deuhdeuh a, mit a vak deuhdeuh a, pawtkhia a kholai vak man khollou kihi mahleh tuah leh theih leh ngaihdan tuamtuam bang a hong pawt sam hi. Haksa ka sak mahmah khat ahihleh biakin kai ahi a, aziak tuh biakin pen ka office kiang uh ahi a, Monday – Friday sung a ka lampi zuih biakin kai di chiang a tot ahi mawk a, a zingchiang (Monday) a ka tot di lampi thou Sunday a zuih lawk pen ka ning hi. A hou pen haksa-sa ka hi pen mai.

Shillong ka tun tung un ka nupa bang un nuam ka sa mahmah ua, zingkal huihvot nung lak bang ah mitbelh bun lou a mit mut sak di bang in walking ka pai zel uhi. Himahleh March leh April kha a hong hi a, a lum mahmah sam hi. Huih vot bel a nung thou. Ka seppih khotualte khat in ‘tulai a lum lai pen hun ahi, May 15 tan a lum dia, aban a vot di’ a hon chi hi. Himahleh kum dang banglou ahi dia, July tan in le a vot nai kei hi. Himahleh inlam, Lamka vel a lumdan gen toh teh a lum lou chu ahi himhim di. Shillong a khua a lum ni pen 28.(?)..Celsius degree hi’n ‘The Shillong Times’ in a gen hi. Ei lam bang zah, chih bel ka thei kei hi.

Kum kim-khat bang Shillong a om himahleng khotualte lungput ka thei tam vak kei a, mi gen a kipan bel zak ka nei sam hi. Hilele kei theih a hihlouhman in k’on gen khol kei di. Ka theih sun ahihleh khe a pai peih mahmah lou hi un ka thei hi. Tomchik khe a pai a tun mai di le Taxi/Bus a man guigui uh. Huan, sumnen i neih keileh van lei a haksa mahmah a, sumnen zon sang a avan uh khotlouh bang  tel zaw uh ahi. Sum khal toh van kilei theilou ahi pen mai. Maks!

Khotualte toh i kibatlouhna mahmah uh ka theih a om taget hi. Huai tuh, misi a neih chiang un ni 3/4 bang vui lou in a luang a koih uhi. Misi luang a om sung teng nekkhawmna a bawl ua, nek di bangkim koih uh ahi, chih a hon hilh uhi. Himahleh kei va gal khak pen a vui ni di a gal ka hi a, huai tan ka thei kei. Singpi leh nektheih a hawm thithe ngut uh. Eilawi bel misi vuikhiak pah kia ngaklah hi’n ka kithei a, ahimah le ihi uh. Nidang a i pi-pute hun ua bel mi a sih leh, a sih ni a misi luang tuamna di puan gat di kipan ua, a vui ni chiang bang a nek di zu sa pan uh ahi. Huai paidan Khasite’n ana zui vanglak uh a d’aw, ka chi hi.  

Kuva ahihleh a teklam deuhte’n a hai mahmah ua, sunu, kuva nah leh a tang kawlzal a pua in, temta khawng a kheh tawm in a bawl uhi. Nidang deuh a eilawi in singtang lam a ‘dumbawm’ i kuah utoh a kibang mahmah hi. Himahleh numei laizial tep khat le ka mukha kei thethup hi. A tep omlou hia, chih zaw ka thei kei. A pasalte un bel a tep tham ua, Meiteite’ hihdan in a bawm in a lei khol kei ua, a zang in a lei ua, ar-tilli, lai-tilli, bang in a lei zauhzauh uhi.

Lamka tengte leh Shillong a tengte’n kibatna mahmah i nei uhi. Huai tuh, foot-path khawng a dingkhawm a houlim ahi. Dongkholh ka sa thei petmah a, hiailam thu a ei sang a changkang zaw tuan hetlou uh hi’n ka mu hi. Shillong a hiai bang thilchin a tawp theih kei uleh le Lamka lam bek ah tawpsan in ana om leh ka chi mahmah hi. Hileh, Shillong sang a kal khat bek a changkan zawkna hi di’n ka gingta hi. Lamka sung a foot-path omte a mehzuakte tu lai uh, a dawp di toh, a lei toh, phaphetlou ihi ua, huai mun khawng kithuahkhawmna leh houlim mawkna di’n zang kei le a zui/tawn-te’ a dia nuamtuam mahmah di ahi, chih bang ngaihtuah in a om hi. Hiai bang a Lamka toh teh nilouh sawm ka hi kei hi. Hilele muh leh theihte taklat himhim uthuai sak thu a k’on gen ahi.

Shillong leh Lamka a kibatlouhna mahmah nawn tuh sa i meh nop leh zingkal baihtak a thoukhia a sa zuakna mun a va kituh a ngai kei. Zingkal a sa meh i sawm leh nitak a leikholh hiau mai di ahi. Zingkal a sa lane a sa lei dia na kuan dek leh mihai na hi di, ZL dak 9 ma a mulou di na hihziak in. Aksa ahihleh na mu maithei. Huai ahi. Sa zuakte le a kin kei ua, khot louh di le lau lou uh a bang mai uhi.

Hiai a tung a i kibatna uleh i kibatlouhna uh ka gen ziak a huai thu buaipih nilouh sawm ka hi kei, i kibatlouhna uh omte gen di chileng gen seng di ahi kei, phalbi ni in le a hon daih kei di. Himahleh Shillong a special-na mahmah khat hi a ka chiamteh tuh I khodak leh gam hing dipdip, hing ngiingei I dakna lamlam ah a kimu a, a tawldamhuai petmah hi. En ahihleh a la kia a ‘Zoukuam dam diai aw,…’ nei hang a, I dakna lamlam lah hin malak a giau hi tel! Hiai khawng ngaihtuah a ‘Green & Clean’ Zogam Campaign khawng pat di’n a hoih mahmah hi.

Shillong a khualzinmi (tourists) tam hia, tourists hi tuanlou a khualzin tam hia, ka thei zou kei. Hotel a tam mahmah a, man tam pipi bang le a om hi. Ka seppihte khat Shillong a training dia hong hoh in Hotel zon sak di’n a hon hilhkhol hi. Ka zon uleh ‘Single’ room a muh hak mahmah a, mun khat a ‘om’ a chih uh a ‘rate’ ka et uleh zan khat a Rs. 6000/- ahi zenhouh hi. Nek leh tak zaw huam hi’n a gen uh. Huchia ka zonzon chiang un khat ka mu ua, zan khat a Rs. 600/- ahi. Hotel giahman a tam deuhdeuh leh lun deuhdeuh a daw, ka chi hial hi. Hotel huai zah om a, a inluah man uh a tamtam di toh kitoudelh zou uh a daw, chia ka ngaihtuah khemkhem sek ahi a, ka zon khak a kipan in ‘kitoudelh mahmah’ di un ka gingta hi. (Hiai a Hotel ka chih an-nekna hilou a giahna ahi a, nekna toh a kithuah maithei. Eilawi in Hotel i chih chiang un singpi leh nektheih nekna in i koih ua, huaite RESTAURANT hi daih ahi).

Ka ngaihtuah a, Lamka ah Hotel a om sam hi. Ma deuh in Hotel Eden ahi a, IB Road ah le khat a om, Dr. Dallian in Gouchinkhup Veng ah Hotel Venus a hon hong a, huai Lamka a dia a changkang pen ahi. Himahleh Hotel Venus bangchi tuk in a lun a ka thei kei. Huai bang a Hotel changkang i khopi ua omsun a lut kei leh bel i gam ua dia sum hong thoh di mi hausa hong zin om kha lou uh, chihna a suak hi. Hiai a kipan in i gam uh khualna lungsim nei bangzah hiam in ngaihdan neihtheih di’n ka gingta hi.

Hotel kia ahi kei, Shillong ah Mizoram House, Nagaland House, Assam House, chihte a om lai hi. Huaite ngaihtuah in Hotel a kinga lou a khualzin bangzah Shillong khopi a om di ahia, chih a ngaihtuah theih lai di hi.

I gam uh a se mawng, chi ka hi kei, ‘Manipur as a whole’ pen et a Tourist hip di chi ahi kei hi. Law & Order, insurgency, hiamgamna, kisuamna, adg. tampi a om di hi. Hiaite’n bei ni a nei kei di. Hilele adan om deuh a, thusia news a zak di tawm deuh leh gamdang mi leh khualzin mite hip deuh di’n ka gingta hi.

Meghalaya ah khua khat Mawlynnong kichi khota khat a om hi. In 80 vel hi’n a gen uh. Huai khua tuh ‘the cleanest village in Asia’ achi uhi. Huaiziak in Mawlynnong khua in tourists tam a hip mahmah a, Shillong a tengte nangawn a hip a, a hoh di’n a kuan sek uhi. Himahleh ka seppihte khat huai khua en di’n a va hoh tei a, a hong tun a agensawndan in, ‘huai bang khota ettak kei, a khomite kituak le uh a su siangthou zou mah kei di ua,’ achi hi. A mulou pi a simmoh di hi kei mahleh a va hohte lung tunglou deuh tangpi uh a bang hi.

Ei gam bang ah le tuadan deuh in i Khuga Dam leh a kim leh kiang khawng chei in, a kilawmdan bang internet khawng a khahkhia in, a lem mite en sak in, khualzin mi hong hoh bang a om zenzen uleh bit leh nuam a sak theih pen di uh (comfort & secure) bang a om sak in, a makaih di hoihtak om le bang achi daw? Ngaihtuah tham ching thu hi’n na koih uhia?