Kou hun lai toh, chizenmah leng, teh in kuapeuh mah in nuam i sata ua, singtang a khawsa hi'n khopi a khawsate hileh kikhiakna pi a om nawn kei. Singtang dawn a kipan khual hong zinte tanpha khe a pai a khualzin i om nawn kei sim uhi. Khawta kikal khawng zaw khe a pai a kiphak tuah hi lai mahleh. Nasep-silbawl ah le ahi thou, a thanuam deuhte'n gim tak in na sem mahle uh a tangpi in huchi lawmlawm a tawl in kuaman na i sem nawn kei uhi. Singtang lam leh khopi a kikhiakna omsun hi a ka theih tuh tenna mun hih thoh in ka mu hi.
Khualzin a hong zangkhai a, kithuzakna a baihlam a, khawpi a om teng singtang ah a kim thou hi. Kicheina chile lah kilamdanna om tuanlou, van neih ah hileh kibang, huchi'n zangkhai tak in i khawsa chiat sim uhi. A kallak a genthei deuh leh haksa deuh zaw a om a, i om ua, kikim vek theilou i hihna ua a om di mah ahi. Hilele hiai bang a i khawsak theih uh i zang siam uhia? chih kidot louh vual dotna ching a hong suak hi. Singtang/Zoudawn toh kichimatna ka neih lai ziak in ka phak a poimoh hun a omlou thei kei a, ka pha a, ka thei mahmah hi. Nasep-silbawl ah a zangkhai mahmah uh. Zingkal thoubaih a, mit-ek nuai-tuk a an bak a om nawn kei. Papi leh tuailaite zingkal a singpi leh nektheih zuakna Hotel a zingkal hun zang masa, awl a an ne a vaikuan ahi mai uh. Antun chih bang le a om nawn mang kei a, Tiffin in a guang geih mai uhi. Thialnah leh nahtang-teh a antun chih a om nawn kei hi.
Khawpi a tengte mah lah changkang kisa, van suak thak a om peuhmah leh kidem bawl a lei pah souhsouh; adiak a gari bang haksa pipi a neih teitei sawm hile kilawm. Huai ka gen leh 'cell-phone' a hong lut-tung lai bang ka phawk hi. Nak poimohlouh lua, chih thei sa-sa a tuailaite' a dia leisak, a changkang tata bang leisak lai. Huai in insung khawsa changkanna behlap hia, chih ka thei kei. Huchia i ta tuailaite uh 'mini-computer' hi mai, cell-phone toh khumkhawm a inkuan dia bawl, balance, top-up chihte nu leh pate' thunsak ngai lai! Huchia i ta leh naute uh changkang kisa mahmah mai uh. A lawmte uh lak bang a kihisak laidi, chih ka ngaihtuah chiang a kei chu zum mahmah ka hi. Hiai pen tak ahi Hi-fi Life Maw, Hai-fai Life, ka chih nopna. Hai-fai ahihleh kei bawltawm ahi a, 'Hai vek, haina ngen toh kidim, a hai ngen' ka chih nopna ahi.
Zogam.com/zogamonnline simtute'n ka thupi tel thei mah le-uh a theilou omthei a hihna ziak in k'on gen thak di. 'Hi-fi' chih 'high fidelity' kichi English a music khawng, la khawng hoihtak a siangset a ngaihkhiak theih dia kibawl genna ahi. A lamkhak louh-louh bang lamkha a music system a kigen khat ahihleh 'Fx' ahi. 'Fx' lamsau 'special effects' chih ahi maimah! Huai hileh tua ka thupi pen in a tup i hinkhua uh kingakna tham ching, mite' etton tham, ki-khisiang-set, chihna toh a hong kinaih hi. Huai dinmun ah i ding uhia? Mahni chiat kingaihtuah a ngai hi.
Tumlam gamte, nitum seng lou gam ana luahte toh i insung van neihte uleh i kicheinate uh kibang hita. Amaute kuamah thunuai a om khalou phial, USA bang 1779 a zalenna ana mu, England bang in 'Independence Day' nei vetlou, huaite toh i hinkhua uh kikim a khawsak i sawm ua, amaute i en ua, a hihdan uh chin i sawm mawk uleh 'hai-fai' life a bang maimah diam? chih bang ngaihtuah-huai di'n ka koih hi. Amaute'n sum a hauh uleh a hauh semna di uh vanzat/vanneih (assets) nei ahi ua, eilawi in sum i hauh uleh a sum mai nei ihi uh. Huai omdan tuh sum hau ringot, hausa lou, chihna hi'n ka kikoih hi. Himahleh a lehlam ah a hausa mahmah ua, a deih teng uh a lei zou zel uhi. Dem ngam di ahi kei uh.
Hiai tan k'on gen in le chiang di'n ka gingta hi, i khawsakdan uleh i hinkhua uh hi-fi ichi ngam di uam? Eilawi bel sepna muhna dia laizil ihi lai ua, pilna leh theihna taktak zil dia kichawm zoulou lampangte ihi lai uhi. Huaiziak a kei mah bangle ka inmun a sem theilou a kisuan vialvial khat ka hi. Huai dungzui a mahni zilna, siamna toh kituak a khawpi tuamtuam leh gamdang tanpha a sepna neite bang i pilvang diak di un hoih ka sa hi. Mi phalua-dan in kikoih nai kei phot le bang achi di? Mi phakluatna bang mai a American hiam, European hiam, Negro-te hiam toh kingaih leh kiten khawng ngaihsan huai-lua bang in i numeite bang un ngai kei thei le-uh a hoih diam? Kei dinmun hileh bang ka chi dia chih bel ka thei kei. Eimi mah zi a ka neih ziak a chi ka hi kei. Ken zaw eimi mah, ka chi lailai hi.
Hi-fi standard khawvel a ding ihi ua, hi-fi life apply hun ahi. Huai lampang en lou a 'Hai-fai life' i zuih nilouh uleh bangchi di? A dawnna nang kiang ah a om hi. Digital khovel a ding ihi ua, niteng in van thak a suak zungzung a, company khat in a bawlkhiak uh, motor, phone, khawl tuamtuam bang a model hong kikheng zungzung lai di ahi, ani-ani a. Huai a hihman a khovel khang hulhul lak a i tal buai khak di uh mahni chiat kiven pen a poimoh gige di a suak hi.
Tuni tan in ka hihna 'profile' a niamdan ka thei a, huai 'maintain' di'n ka kikoih hi. Midangte' hinkhua, 'Its my life' chia, kuamah dem utloute dem ka hi kei. I hinkhua uleh i chindan uleh i hinpih uh 'principle' in omzia nei deuh leh chih ka deih mahmah hi. I hinkhua ule I theihlouh kal ua ana Hi-fi mai di'n I koih di ua, hilele ki-update-dan siam in nam sang leh khangtoute' hinkhua ei a di'n koih kei phot in, awl a zui di'n kingai phot le a chidamhuai diam? IT Revolution in mawl tak a hinkhua zangte hon bingphut a, mumangthoh kha bang hi di'n kingaihtuah le bang a chi di? Ka profile a niamluat ziak a midang mohsa ka hi kei, a hihzoute'n a hih di uh kham theihna dia thuneihna nei ka hi kei. Ka ngaihdan k'on luikhiak thu ahi.
Hi-fi tak a khawsa thei chiat di'n kipan peuhmah le maw, ka mi leh sate; i omna peuh ua, i nekzonna peuh ua, i sum muhdan peuh ua, i sepna peuh ua, i nekna peuh ua, i dawnna peuh ua, i sum-dawndan peuh ua, i Pathian thu-awidan peuh ua, i gamtatdan peuh ua, lawm i polhdan peuh ua, namdangte toh i sepkhawmdan peuh ua, ua....ua, in ana ngaihtuah uh. Hai-fai hilou a Hi-fi di'n i kawng uh gak-kip chiat ni uh. A dik diam? Mi ka phaklouh ziak a hiai thu hon luikhia bang a hon ngai na om uleh na loh-loh-uh hon loh mai un. Mi phalah deuh mihing ka hih ziak in. Hilele awlmohna bang neithei ve, chihdan eive.
A sau sim a, ka gelhbeh ut omlai mahleh hichi'n ka nga bauh mai di aw.
.