'Nang kua mi na hiam? Koilam zuan ding na hiam?

Bang hiam nang nahin pih?'     V. Siampu

(Pathin thugen dan in hon na koih kei unla, hiai pa ka ngaihsang mahmah ziak a ka gelh ahi zaw. Ka gelhna sawtpi himahleh ka pholhkhiak ngam zok louh ahi.)

Pathian a kipan a taimang sawm, namphu/force a Pathian in a mat, a utlouhpen mission piak a om a, a mission lohchin di deihlou pumpi, Pathian chou ngam Jonah! Etdan khat a et a thumanglou leh genhak; a lehlam a et a mi hangsan leh a hihna imlou mihing leh chitak, Jonah! Tulai i lak ua galvan tawi' kichihmuh leh kimakaih lou a kihawl thoh nainaite' lak ah hiai bang mihing omleh 'maituam leh koih hoih' a tuak diam, promotion kin di? Pathian' Jawlneite' lak a Pathian chou ngam om sun, Jawlnei dangte bang a thumang hut-hut hilou, hiai mipa'n hon hip riau mawk hi.

Thu hi'n thil himhim hileh i theihsa bangle etdan tuam deuh leh gendan tuam deuh a hong kigen chiang in a hong lungluthuai thak thei hi. Himahleh hiai thu hi i pastorte uleh theologiante uh gelh dia kilawm, kei pentak in ka hon luikhiak kilawmlah sim a bang hi. A tangpi a i etdan un hiai Jonah kichi mipa tuh Pathian thumanglou, migenhak, mikhial hi di'n i koih uh. Jawlnei taimang, Pathian a kipan a taikhiak sawm ahi a, amah a hoihna himhim om di'nle i koih kei uhi. Adikna chiang a om di. Hilele i velchian thak sin uh awle.

Jonah: Jonah tuh Pathian' sawlna manglou a sel mihing himahleh a min khiakna 'VAKHU' ahi vanglak hi. A min pukhaloupi a khel viau khat houh a diam, chih in a om. Tulai i khristian min uleh Bible min ban a Pathian tam hial a kituakloupi mi tampite bang deuh houh ahi zaw diam, chih bangle a ngaihtuah theih hi. Ets. Johan, Paul, chihbang a gilou a chiamteh a om, ban a Pathian tam a THIAN X or Y hingal a rehab centre khawng a lut veu, chihdan deuh. LST a Jonah laibu et in a hinkhua, a nasep, a tenna, chihte a kimu kei. A pa min Amittai, sawl a a-omna Nineveh, a taimang dek a long a matna, Joppa khua leh tun a tupna Tarshish, chihte loungal. 2 Kumpipate 14:25 in a hon panpih zek a, huai a kipan a muhbeh theih omte: Jonah tenna Gath Hepher, Israel Kumpipa Jeroboam IIna vaihawm hun a Jawlnei, leh Israel Lalgam in melmate' khut a agam khahsuah uh bangzahhiam a lakkik hunlai ahi, chihte ahi.

NINEVEH: Hiai khopi tuh khopi thupitak, Assyriate' khopi ahi a, a kongzing paisuak a nithum lam ahi. Tigris lui pang a om, Jonah tenna a kipan a malsuah mel 500 (800 km) vel hi dia tuat ahi. Nineveh mite' gitlouhdan Jonah laibu sung ah a kigelh kei a: Pathian in '...a gitlouhdan uh ka mai a hong tung,' chihlouh a kimu kei. Himahleh Jonah nung kum 100 vel di a Jawlnei Nahum in a genna a kipan a Nineveh mite' gitlounate hiaite hi'n a theihtheih hi : sisan suah, zuau leh kisuamna a pumdim, a melmate himhim hinghawi chih omlou, kizuakna a pumdim a akizuakte mithip ngen, dawi-aisanna lam a kuamah phaklouh, chihte.

TARSISH: Jonah tenna a kipan a tumlam mel 2000 (3200 km) vel a om, tulai Spain hi'n a kigen hi.

A LAIBU: LST a Jawlnei Laibu dangte a kipatna ah a MIN, pa MIN, TENNA, NASEP/KIVAKNA, KUMPI VAIHAWMTU' MIN LEH HUN, chihte in a kipan vek sim tangpi uhi. Himahleh Jonah laibu hiai banglou tak in a kipan phut hi. 'Huan Amittai tapa Jonah kiang'h TOUPA thu a hongtung a, hichi'n achi, "Thou inla, khopi thupitak, Nineveh khopi ah va hoh in, huai ah va tangkou in; a gitlouhdan uh ka mai a hong tungta ngal a," chi'n. Huchi'n bang dang genlou in Jonah thou in TOUPA a kipan a taikhia a Tarsish manoh di'n a kisakhe ngal hi. Joppa khua ah a hohsuk a, huai ah Tarsish zuan di long a va tuakkha a, a tuanman di pia in TOUPA a kipan a taimang di'n huai a omte toh a kuankhia uhi. A laibu sungthu, a drama (scene) a kin zawzawt mahmah hi.

CHIAMTEH IN: Israel/Juda kulmut lungsim ngaihtuahna ah Israel gam pua tung leh a Pathian un zui dia gingtalou mai di uh ahi. Bangziakin? 'TOUPA' omna a kipan a paimang di'n'(from the presence of the LORD), a chihziak in. Hiai ahi Juda khuak, lungsim leh ngaihtuahna.

A DRAMA: TOUPA' thu Jonah kiang tung; Nineveh khopi a tangkou dia sawl, Jonah utlou a Tarsish zuan a paikhe dia Joppa khua a hohsuk; huai a Tarsish zuan di long tuakha a atuanman di pia, huai a mite toh kipankhia uh, ahita. Long ah a hong tuang pan uh chu, TOUPA a kipan a taikhiak malak ah, endih, TOUPA'N huihpi a delhzui sakta ngoingoi mai hi. Huihpi hatkhiakdan lah chu a long uh kekzou leh kilawm a hat ahi zawmah. Longpute patau in a pathiante chiat uh a sam ua, a long uh zangkhai sak di'n a van puakte uh tuipi a apaikhia uhi. Himahleh patau thawm himhim awlmoh vet lou in Jonah tuh long tuang nuainungpen ah a kumsuk a, huai ah a ihmu huthut mai hi. Huaitak in longpupa (captain) in vanaih in, 'Bangchi la, ihmuthaipa? Thou inla na Pathian sam sam ve; I manthat vek louna di ua na Pathian i tung ua zahngai maithei hilou a maw,' a va chi hi. Huaiban ah long a tuangte kikum in 'Hongdih uh, kua ziak mawngmawng a hiai bang thil om ahia, chih i theihna di un aisan ni uh,' a kichi ua, ai a san ua, Jonah tung a tu zawmah hi.

Huaitak in Jonah a dong ua: ' Hehpihtak in hon hilh mai in; Kuapen ziak mahmah a hiai bang buaina i tung ua tung ahia? Bang na a na sep? Koi a hong kipan? Koi gam mi na hia? Bang mi hi mawngmawngle na hia?'chi'n a dong run tamai uhi. Jonah in ki-im lou hial in hichi'n a dawng hi: 'Hebru mi ka hi; huan ka TOUPA ka lau hi, ka Pathian, van Pathian tuh tuipi leh khomual bawltu ahi,' chia a hilh zenzen leh huai mite'n lauh petmah in a lau ua, ling deldel kawm in 'Bangziak a hiai bang thil hih na tamai a leh?' chia a dot ban uah, 'Tuipi koute' a dia a daih theihna dia kou nang bang hon loh di ka hi ua leh?' a chih behlap uhi. Huihpi lah hat deuhdeuh mai! Eilawi hile i ki-im louh tak uleh! Pastor, Reverend tan inle i ki-im mai di un ka gingta ka chi.

Jonah in: 'Hon domtou unla tuipi ah hon zankhia un; huai hileh tuipi noute' a di'n a hong khawl di. Huai huihpi hattak lah kei' ziak a nung ahi, chih ka theichian,' chi'n a hilh hi. A thumanlouh sih pih ngap top! Pasalpha tharthar ka sa hi. Jonah in huai chimahleh longpute'n a long uh piautak lam a hei tum in pan in a pang mai ua, hilele hei zoh malak in huihpi a hat semsem lai hi. (A bitna di uh hilele tualthah a ngam mai kei uh.Tulai ei' khang hiamgamtak a omkha bang hileh longpute'n thudot chihle omman lou a aisan khin phet, Jonah tung a tuk toh kituak a thah hiau bang tuak maileh kilawm ka sa hi). Longpute le kisiam sak a, 'Kum hiai zah long hekta ing a, huihpi hat tampi lak a hawl paisuak khin ing a, long hawl khawng ka siam vele, ka zei'lam ei vele,' chih bang ngaihtuah uh hi maithei. Piautak zot sak tum teitei uh, lah haksa deuhdeuh! A hihtheih tawp uh a suah nung ua chu, hithei nawn mahmah lou, Jonah Pathian' kiang a thum top uh! ' AW TOUPA, ka hon ngen uh, hiai mihing' ziak in koute hon mangthangsak mahmah ke'n, midik sisan suah inle hon ngai dah mai inla; Nang hoih nasak bang a thilhih hi'n hon ngai mai in,' chia thum kawm in Jonah tuipi ah a pailut uhi. Tuipi kihawt a dai pah zawmah! Huaitak in, huai mite'n a lau semsem lai ua, kithoihna bang lan hial in TOUPA' mai ah kilatna bang a nei hial uhi. Mission piak a ompen taisan mahleh a lehlam a Pathian a dia va lohching veve a suak hi. Longpu senior leh zei hikei le uh Jonah in 'tuipi ah hon paikhia un,' a chih a paikhe pah di un a gintakhuai hi. Ki-senior sak a Jonah thu manglou a piautak lam a long hei a sawm chiang unle ahithei mahmah kei! Zei a kisakna uh bangmahlou suak! Amau' siamna a hih vuallouh dia tuipi kihawtsak TU om hive'n!

Himahleh TOUPA'N Jonah valh di ngapi a sepkhol a, ngapi a hong kuan bombom mai a, Jonah a valhta hi. Huchi'n ngapi' gilsung ah Jonah ni thum leh zan thum a om hi. A etnophuai (climax scene) drama, scene teng hiai ah a beita. Hilele thutak a kiselna thupipen (verbal climax) hiai ah a hong kipan dek pan lai hi. Ngapi' gilsung a kipan in Jonah a thum a, a thumna a thupi ngial hi. 'Ka gimthuakna thupitak ziakin TOUPA ka sam a, ama'n a hon dawng hi. Sheol gilsung a kipan in ka kikoukhia a, ka aw Nang na za hi'....chia thumsuk ngiatngiat in ' Himahleh kipahthugen kawm in na mai ah kithoihna ka lan ding a; Hotdamna na TOPA' a ahihman in ka thuchiam ka pel kei ding,' chi'n a thum hi. Huchi'n TOPA'N ngapi thu a pia a, piautak ah a lawkheta hi. Piautak ah Jonah kawt nimnem leh zoi ngiingei in a lum a, 'hing nawnta, Pathian in hiaitan a hon gawt khit ngalleh hon sawl nawn kei na'n teh,' chih khawng ngaihtuah in a om maithei.

TOUPA lah a chihsa a ta tuan kei. Angei bok! 'Huchi'n TOUPA' thu Jonah kiang'h a nihveina di'n a hong tung a, hichi'n achi, "Thou inla, Nineveh ah va hoh in, huai khopi thupitak ah, gen in k'on chih thu va tangkou pih in,"'chih mah ahi zel. Hiaizet in chu Jonahle kisa in a kuanta hi. Nineveh khopi ana thupi mahmah a, paisuak di'n ni thum lampai hial daih khopi ana hi a. Huchi'n Jonah khopi sung a lut in ni khat lampai tan kia pai in a va tangkou a, 'Ni sawmli kia hun na nei uh, huai ban nuaisiah in na om di uh!' chi'n a gen hi. Ni thum lampai lak a ni khat lam (1/3) kia a thu va gen chauh ahi. Za le uleh poilou; za keile ule poi tuan lou; theile ulah poi lou; theise keile ule poi tuan lou, chi tuh ahi peuhmah.

Hilele Jonah thugen zapha chiang a kisik pah ua, an-ngolh di a puang ua, a neupen a kipan a lianpen tan in sai-ippuan a silh uhi. Huchi'n a kumpipa uh, Jonah thugen za kha loupi tan in hiai Jonah thugen ana zasawn a, amah mah a laltutphah a kipan a kumsuk in a puansilh toh a puksuk a, sai-ippuaan silh in leivui lak ah a lumsuk hi. Hiai thu in Nineveh khopi zelsuak in Nineveh kumpi leh a khawnbawlte'n hiai bang thupuan a bawl hial uhi: 'mihing hi'n gamsa hita leh, gan honte tan in kuamah in ne in dawn kei hen; hiai kia hilou in sai-ippian silh in kuapeuh in a khelhna tawpsan hen,'chi'n thupuan a bawl mai uhi. Huaiban ah, 'TOUPA a thangpaihna thupitak a kipan in a nunghei dia, manthatna hih a sawmsa a kipan in a khut a lakik in a hon mangthangsak kei di, chih kua a genkhol thei,' chi'n kisik in a omta mai uhi. TOUPA' mai a kisik a, an ngawl a, sai-ippuan silh a om di, chih kua hilh ahi di? A risk uhia, a'ihk'eh kigamgi a om na nana Israelte' hihdan kawkmuh thei om?

A kisikna uh Pathian in a pomsak zawmah! Hiai ahi Jonah hehna!

Nineveh khopi puksiat di deih lawmahmah tettet, a thupuak bangle ginatak a tangkoupih utlou, hamlam petmah a thu a gen ziak a Nineveh khopi kisik a Pathian' zahngaihna mu maimah a et chiang in Jonah a thangpai petmah hi. Pathian a phul chot mai a: 'Ah, TOUPA, a chil a ka kuanma a ka gensa hilou a maw? Hiaiziak mah a Tarsish zuan a taimang hilou ka maw? Nang lah hehpihna hau leh itna-nunnemna a dim na hihlam ka hon theih ziak a hih dia na gelsa siatna bang hihlou a na khut kik veu ahih ka theihchet laitei toh,' a chi nulnul mai hi. A thangpaihtawp a suah zawmah a: 'Huaiziak in, tumahmah in, Aw TOUPA, hehpihtak in hon si sak mai in, kei a dia hin sang in sih a hoihzaw ngal a,' a chi rut mai hi. Pathian inle a ngaihna theilou lampang ahi di chu: 'Na hichi heh tel hih dik kisa lua maw?' a chi lel hi. Hiaile dawng nawn se lou in Jonah tuh Nineveh khopi a kipan in a pawt nalnal a, khopi suahlam a tu in a gal-et pheuphau hi. Bukta lam zen in Nineveh khopi tung ah bang thil a hong tung hiam, chih a galdot lailai hi. A lungphu bang kin tettet in 'Pukse taleh, haltum in hong om leh, ' chih khawng ngaihtuah tham di'n a gintakhuai hi.

Lamdang tak in zan khat thu in lim nuamtak di louzam khat Jonah liah di Pathian in ana pousak hi. Jonah in a kipahpih mahmah mai. Himahleh, endih, zan khat thu in ana vulnawn maimah! Hiai in Jonah thangpaihna a behlap lai a, huai kia hilou in Pathian in suahlam huih lum huthut a nungsak a, nisa khauhtak in Jonah lutang a sal lai zawmah hi. Jonah thangpai lua tuh sih a ut tuntun a, 'Kei a di'n hin sang in sih a hoihzaw,' a chinawn hi. Huchi'n Pathian in 'Hiai louzam ziak a na thangpaih mawk hihdik kisa maw,' chi'n Jonah a dong a, Jonah in 'Hihdik e, ka thangpaih di mah ahi, si zou di khop a thangpai mah ka hi!' a chi tun mai hi. Pathian in ahihleh nemtak mai in 'Hiai nang' bawlsale hilou louzam khat ziak a na hichi thangpaih tel, en ve, Nineveh khopi, mihing nuai khat leh sing nih tak vei leh tak theiloute' ban a ganhon huaizahtate ka hehpih di mah hilou maw?' a chihsan hiau hi.

Aban om lou in hichi'n Jonah laibu a tawp guih nawn hi. A ngaihtuah sau utte' a dia zop dia hichi tawp hia, a'ihk'eh gen beh ngailou, chih a kithei kei. Pathian in hiai teng hun sa geih hi di'n koihle a tawldamhuaipen di. Hilele, Paite hilele, kei lungsim liaulaiu ahi a, k'on behlap di. Jonah kichi hiai bang a pasalpha, a chih ngal sih pih ngap khop a khauh, sihle kihtalou pa a pasalphatna ziak a Pathian in tel a diam? Israelte leh Assyriate kimelma gige a hihna ua Assyriate lah a gitlouhdan uh 'a melmate uh hinghawi lou' mite' kiang a Jonah bang a pasalpha lou a kuan ngam omlou di, chih Pathian in thei? Pakta riau hiveng aw. Khai, kei kiale ka hia hia oi? Jesu mahmah inle amah a kipan a chiamtehna laigelhmite leh Pharisaite'n a nget lai ua a chiamtehna dia JONAH tel mawk hiveh!(Matthai 12:38-40) Jesu inle pakta hi maithei. Hikei leh tellou dia gintakhuai. Mi thupi ahi himhim.