Nasa e nia-nia mai, nuai-nuai mai, vuaivuai mai! ‘Think much, speak little and write less,’ chih Italian paunak phawkkha lou, laigelh a kiva kisa sim in gelh mawk! Khuaithum hang bu dengkha maimah! Hilele,‘Bangteng a di’n hunbi a om; kisukthring hun bang, midang in hon pahtawi hun bang; hihfuh hun bang, hihkhelh hun bang; mi hon kipahpih hun bang, mi hon huat hun bang; pahtak hun bang, muhdah hun bang; gensiat a om hun bang, phat a om hun bang; a simnop di gelhkhak hun bang, zakdah di gelhkhak hun bang; comment piak taklou gelh hun bang, comment bei thei mahmahlou gelhkhak hun bang; gou bang a kepbit di hihkhak hun bang, lakkhiak pah ngai hihkhak hun bang,’ hiai tengteng kigawm khawvel a teng khat ka na hi a, ka tuah a ka tuah zel lai di ahi di. A sim ut na om lai uleh ana sim uale. A sim utloute’ sim teitei dia ka gelh ahi kei.

Awlmohna toh siamlou sasa a, ka pan theihna teng a pang a, haksatna lianpi a kituah lai a haksatna ka tuahte (uh) genkhia a kinei a, huai haksatna ‘kol’ lakkhiak ngai hi a kithei a ka pholhkhiak zenzen leh ‘khuaithum hang bu’ ana hi zenhouh a, a deh in a hon deh no-nouh mai uhi. Khuaithum kichi khuai namai ahi kei a, a pi lian kei mahleh a nou a gol a, a pi a hang mahmah a, a mi dehna mun bang muatzou tuk a zang-gu nei ahi. Ka neilai in nihvei a hon dehkha a, ka luzang a hon dehna mun ah tuni tan in sak a pou kei a, peivel a bang lai hi. Himahleh ka ‘peivel’ a hon deh kha kei vanglak ua, hing dam in ka om vanglak hi. Khuai in mi a deh a, peivel a dehkhak leh mi a sizou uh, khangluite’n achi uhi.

Khuaithum (i lak ua Dapzar pau zang, Lusei pau ana zuite’n Khuaivanrial, achi du) kichi tuh singkung a bu nei ahi a, a hangsan mahmah ua, amau sang a khuai hatlou zawte’ bu bang sim in khuainoute a lak gaihsak mai uhi. Khuai hatlou zawte’ kha a keihtan sak ua, a lengthei kei lai uhi (ka theihkhelh keileh). Khuaibel, khuailaikang, chihte hileng tua leng theilou di ing a, singkung peuh a vak thoh mai di bang hial in ka om hi.

Mizote khat, kei dandeuh a amin tak zanglou Thanpuii Pa (amin kitheilou sak a Zokhual in a gen dia koih di ka chihleh a theihchetlou pi gen, n’on chih khak di uh ka lau a k’on taklang mai hi, a min tak bel ka thei kei, ka thugelh a phon lua hia?) kichi in, ‘Kan Mizia’ chih laibuta khat a gelh, achi uhi. Huai a Mizote toh kisai ‘sakhua’ ‘khawtang’, adg. a negative lam deuh ngen a gelh leh a laigelh khawng lawtel khollou, lah a gense ut a dim a om in ‘review’ a loh mahmah, achi uhi. Newspaper, magazine leh laigelhtu tuamtuamte tan in a laibu gelhte ua ‘review’ bawl neknek-dan un a kigen hi. Hiai laigelh chiah pen sim kha kei mahleng L. Keivom leh Zikpuii Pa in a ‘review’ uh ka simkha hi. Huai bang a dem kai leh zakdah loh laigelh himahleh college a Vernacular text a dia guanlut in a om hi.

L. Keivom in hichi’n a comment a: ‘Thanpuii Pa’n ‘Kan Mizia’ chih a gelh ah Mizote’ hinkhua a hoihlou lam ngen a gelh a, a thugelh dik mahleh valh haksa a sa chiat uh. Ken ‘Kan Mizia’ chih k’on gelh a, huai a ahoihlam ngen ka gelh leh ka laibu gelh tuh ‘Phung zing a piring vawrh ang mai hian a zo thuak ani,’ (Paunak: Ne gai/bei pah, om manlou, chihna) chi’n a gelh hi.

Zikpuii pa’n hiai thu review a bawlna ah hichi’n a gelh hi: ‘Essay hiam, poem hiam, bang thu kigelh himahleh objective tak impersonal tak a i et di uh hi’n ka ngai hi. Hichi bang in a tangpi thu in enta le: Thanpuii pa Essay ka gen ziak in essay tungtang k’on gen uang deuh di. A essay a athumal zat paukam a dik in a gen tuppen toh a kituak hia? A ngaihdan luikhiak a paipih siam hia? A bul a patdan leh a tawpna in a simtute’ ngaihtuahna a khoih hia? A sentence zatte a dik in a ki-balance dik hia? A thilmuh ama muhdan in midang a musak thei hia? Adjective a zatdan leh adverb a zatdan a hunlel ahi hia? A thugen pen bangtan pompih a, bangteng paih a, huaite a ziak diktak a theichian uhia? Hiai dotnate dungzui a emotional tellou a cool tak a i etzui di un ka koih hi. HUAI HILOU A, EIMAH NGAIHDAN TOH A KITUAHLOUH ZIAK KHAWNG A VANTANG KHAWM A COMMITTEE PHUAN A KIPUM VAU THOH PAHPAH MAI IN EHKHASIAMNA IN A HON PI TUNG DI TAN HON TUNPIH HAK MAHMAH DI AHI,’ chi’n a gen hi.

Hichi’n achi lai hi: ‘….Huchi mah bang in thil himhim a za-zaw a en in, hoihtak a sut in, dohzoutak a zil in, ngaihdan bong/kitan motmot leh puakkek koihkhia in, siamna in a hon pi tun tupna i tung baih zaw kei di ua hia? I College sinlai (vernacular text-te) uh a sithuai thei mahmah ua, ginalou sasa himahleh ken ah, Thanpuii pa tuk a controversial leh mi siamte’ ngaihtuahna suhehthei laigelh om in ka thei kei; huaiziak in (hiai thugelh) misiamte’ buan di’n om gige leh ka chi hi,’ achi. Saupi a om, copyright ngen lou pi a gen nilouh a nuam kei. Hiai tan k’on gensawn mai le ka kisuanglah hi.

Hiai Mizote toh kisai k’on gelh khak leh ka lungsim ah thu tuamtuam a hong lut daih hi. Amau hihdan zuih hoihsa bang mai in ‘Luseite kigense lou uh, kipahtawidan siam uh ahi,’ chih i thangsak mahmah uhi. A hihna tan uh a om tham, ken le ka theih. Mi kuahiam khat tanchin na genpih dek leh ‘a fel ania,’ ana chi pah di uh. Eilawi ihih uleh huai ahi khol kei. Ka seppih, K. Khamchinlian in achi sek a, ‘in khat bawl hileng, a hong entu khat in a hoihlouhna a hong kawkmuh leh hon deihsak ahi. Luseite bang a a hoihlouhna mu gegu a ‘a tha a lawm’ kichihsak in kideihsakna a om kei,’ achi hi.

A himhim a kipahtawi ut sim a Luseite toh kiteh nilouh ihi ua, a hoih mah ahi. Hilele i zang siam di uam? I pu-pate uh a kiphat chiang un, ‘Ki huchi maitang phat,’ a kichi uhi. Phat utlou bel hilou. Hiai thu Pastor (P) Thawngkham in, ‘Kimaitang phat, i kichi vial ua, utlou awmtak in i om ua, kimaitang gensiat dih uh, bangtan na omkhawm thei ua,’ achih bang ka ngaihtuahkhia hi.

Ahi a, k’on gen di. Luseite kamsiam mah uh. Kigense mawk kei mah uh. ‘Constructive’ hia? ‘Destructive?’ Simtute’n thu khen un. Ka thugelh a sim ut na om lai zenzen uleh! Langkhanpau Guite, Churachandpur Assembly Constituency a MLA candidate dia a hong din lai in Mizoram a kipan in MNF member kichi, Langkhanpau a dia campaign hong bawl a om uhi. Amau a genna uah, ‘Election ma in kou ka utut un ka kichi ua, election zoh a vote simkhit a hih chiang in lungsimsia bangmah ka nei kei ua, ka vuallelh uleh, hon zou nei ve ua, ka kichi uh,’ chih a hong gen uhi.

Ahi mah a adiam ah, Mizoram bang a MLA election a neih chiang ua candidate-te’n hichi’n vote campaign ah thu a gen uh, achi uhi. Candidate khat in a vote zonna a, a kituhpih a genna ah, ‘Ka khingpui pa tluklohna point pathum a awm; pakhatna, hmelhchhiat ah; pahnihna, eiruk thiam ah; pathumna, dawt sawi thiam ah,’ (Ka lang pa ka phaklouhna point thum a om: huaite, khatna ah melsiat ah; nihna ah, nekguk siam ah; thumna ah, zuaugen siam ah) khawng a kichi uh, chih ka za hi. Huaite i lak uah a kizangthei diam?

Dimapur a ka posting lai in a tanchinbute uah thu a gelh hangsan thei mahmah ua, Kaka Niralu kichi bang in huailai tan a dia Nagaland in zalenna ‘Sovereignty’ mulou a helte toh India a kihoulem mai di uh a ngaihtheihlouhdan hangsantak in a gelh miahmiah lai hi. Nagate’n India sepaihte’ khut a thuakte uh a ngaihtuah chiang a zalenna ‘Sovereignty/ freedom’ chihlouh a khengkhe di omlou in a gen mai hi. ‘Gen tam leh gen peih na hon chih ua n’on mohsak ulele poi ka sa kei, ka lungsim a om thu genkhelou a ka om sang a ka genkhiak mah hoih sa ka hi,’ achi mai hi. Ka sim khakna ‘The Nagaland Post’ hi’n ka thei hi.
English poet khat, John Keats hi’n ka thei, ka laibute ka puak kimlouh ziak in ahi chiah, chih ka gen thei kei. A dikkei leh a dik hon hilh un. Amah pen poet khat himahleh a ‘poetry’ gelhte min a nak dem mahmah ua, huchi’n thuak haksa sa in Italy ah a va kikhual hi. Mizawng inkuan a kipan ahi zawmah! Huchia a ‘Poetry’ gelhte nakpi a dem leh soisel in a om a, sawt le a dam kei. Mite demna leh soiselnate thuak haksa sa mahmah ahi ngei dia, a sih nung chiang a ahan tung a gelh dia hoih a sak thu a nusia hi. Huai tuh: “Here lay a man whose name is writ in water,” (hiaimun ah a min tuisik a kigelhpa a kivui), chihdan deuh ahi. Ka laibute ka puak kimlouh a poi e, diklou maithei. Hilele hiai bang thu om ahi. A sih nung in a poetry gelhte a hoihlam a theikhia uhi. Huai tak in hiai poet pen a min tuisik a gelh malak in ‘sanatui’ a gelh in a om a, England gam a kivuina mun thupipen ‘Westminster Abbey’ a han piak in a om hi.

Ka genkhelh kei a, Keats mah ahihleh Cambridge a Professor of English Literature in a tungtang hichi’n a gelh hi: ‘ It is certain that, by some fault in our commonwealth, the poor poet has not in these days, nor has had for two hundred years, a dog’s chance. Believe me – and I have spent a great part of ten years in watching some three hundred and twenty elementary schools, - we may prate of democracy, but actually, a poor child in England has little more hope than had the son of an Athenian slave to be emancipated into that intellectual freedom of which great writings are born,’ chi’n comment a pia hi.
Atung a Italian thupil theih gige tak di toh ka zou phot dia, huai ka theih gige-na di’n hon deihsak na om uleh hon remind zel un: ‘Think much, speak little and write less,’ ahi. Ei leh amau kibang i kisa uhia?