Shillong a khawsa di'n i hong kisa zet chu ngaihtuahna tam baih thou e. Tasam phut leng kua sawk di? In lam bang a antang leh dal batna di vai mahajon kineilou hi a, sum hong bei phut leh bang loh di? Lamka bang a bat a sa lak mawk theih di hilou, sum bei leh lunggulh ni a bangchi di? Damlouhna khat nei leng kua dong di? Meltheih doctor genlouh pharmacy a damdawite eilam a toh kibang khollou lai? Lom ngaihtuah di'n a buaihuai mahmah hi. Hilele, awl a, a hun bang zel a ngaihtuahdan ka siam simta hi.

Shillong a khawsa dia i hong kisak zet leh a gam lah nuam mahmah, nek-le-tak lam lah chitam mahmah lai, hilele a gam mite bangziak a hiai bang a, a tangpi a neu ua, a mel uh sia a d'aw, chih ngaihtuahlouh theih ahi kei. A tangpi in a gep nimnem ua; a neu zawmah uhi. Sep di ka neihlouh chiang bang un ka Clerk uh, R.K. Suresh toh Police Bazar ah ka va ding zel ua, ka kiang a hong paite bang ka na teh-bawl chiang in ka liang tan phazou a tawmzaw a om uhi (numei hi deuh). Ka houlimpih chiang a ka gen chiang bang in aman le hi a sa mahmah hi. 'Adu nine eisu yamna ngakpa' (Huai eivoi kenle lamdang ka sak) achi sam hi.

A melsiat tangpi ziak uh hia, a kideihkhop ziak uh, ka thei kei. Tui/Lui kikop, thil kikop himhim ah a kineisak ua, kuamah ot a sawm kei uh, a theite'n achi uhi. Lui a puansawp khawm bang le kineisak mahmah in a un mai uh, achi uhi. Tuitawina mun bang ah le ahi thou lai. Huaiban ah, a gam mite a chil mahmah uh, achi ua, huaiziak mah ahi di, dal, allu, adg. dng. i lei chiang in a kibuk hun geih in a hon pia uhi. A bukna uh digital ahi tangpi a, huaiziak a bukna dik zang a hon pia uhia? chih ka thei kei. Ei lam ah bel i theil lei di in a bukzoh deuh masiah a ki-utkei hi.

Ka gelhkha lakloh a chia thangpaih pan ka hi sam kei hi. Kuamah om ngeilouhna leh sik khaklouhna mun a om bang zen a hiai thu ka gelh mawk, keile kipaklua ka hi kei hi. Ei gam mah, i mi-le-sate toh omkhawm mah nuam e! Himahleh i tenna gam utoh teh a nuam mahmah bel electric vak den, tui lah siang, leivui khu vengvung om khollou, vuah a zuk leh lampi siang deuhdeuh, chih khawng ahi. Buannawi in hon theh buan dia motor mawk heklou lai uh! Khai! Phatna ngen a dim di a bang a, huai ahi sam kei.

A theite'n a gen ua, hiai gam a teng mite unau bang kingaihsak mahmahlou uh ahi, achi ua, huaiziak a ahausa ngal hau deuhdeuh ahi uh, achi uhi.

Hilele, ka Office nung uah 'Keating Road' kichi lampi neuchik a om a, huai Road kiang a 'Bata' khedap zuakna kong ah vuah zu in zu-kei leh tui a vun theihna mun a om hi. Huai mun ah motor hektute'n mi, huai tui nin in a theh di a venna un awlchik ('awlchik'/very slowly) in a hek mai uhi. Niteng a ka paina ahi a, ka thei mahmah hi. Ei lam a, mu gegu a, motor hattak a tai a buannawi leh hawktui kithehsak-ek, chihte omlou ahi mai. A mihinpihte uh a dawm uhi. Hiai tan! Mok mai! (Ka chihna ziak tuh a gam mite a hoih uh, chi vek hilou ka hi). Ana ngai ua, bang thu a hong om hiam ah? A se vek uh, chihna hi tuanlou in.

A solkal uh a hoih a, contract nasemte le hoih deuh uh ahi di. (Ei lam toh teh in). Himahleh niiknuai thuneihna gam ahi a, a numeite un thu a nei mahmah uhi. A hih soisoi mai ua, kuamah zahtak di et in a en kei uhi. Lampi bang lawmta in zui, en i pelh keileh a hon awn vet kei uhi. Va phut dia lah hideuhlou khawng in a ki-om mai hi. State dang a kipante bang simmoh bawl himhim khawng thupina a ngai a bang uhi. A tak in mukha kei mahleng TV khawng a ka muhdan in Vietnam-te toh a mel uh a kibang thei mahmah hi. Ana omsate' gen a ka zak leh ka om nung ua ka inkuanpihte' thiltuah k'on gen ahi.

A pau ulah kilehbulh in a pau ua, English toh a pau paidan uh a kibang mahmah, a theite'n achi uhi. Huaiziak a pauleh (interpretation) toh kisai in Khasi-te'n English a thugente' thugen lehkhiak baihlam a sa uh, achi uhi. A thei ka hi kei, Khasi pau haksa mahmah ahi, chih ka seppih Bengali-te, sawt pi Shillong a omte'n a gen uhi. A pau uh paidan hiai bang ahi: It has become hot, chih ei pau in genle 'Khua a hong lum na e' chihdi ahi dia; Khasi pau in 'Ka la sdang shit' ahi. 'An na neta hia?' 'Have you taken food' pen, 'Ka la bamja' chih ahi a, English bang mai a lehpai pau ahi mai. A gelh chiang un 'Ka' amasa in om nak mahleh a genkhiak chiang un 'Ka' pen a chikhe kholkei zel uhi. Lamdang ka sak ziak a hiai khawng hon gelh mawk ka hi a, Khasi pau thei deksuai lou ka hi. Theih ngei di le ahi kei. Siam, chih bang tuh kahase, himai! Hilele 'number' (khat, nih, thum,) chihte bang ei toh i simdan uh a kibang thethup hi.

A pau uh a kilehbulh khiakdan hiai bang ahi. Shillong a veng lailung mahmah leh lun mahmah tuh 'Laitumkhrah' ahi. Hiai veng min a gen chiang un 'Laimukhrah' achi mawk uhi. A veng min omzia tak tuh 'Lait'- lui, 'Umkhrah' a lui min ahi. English in 'Umkhrah river' a chihtheih di. Ei pau in 'Umkhrah lui' ahi di. Himahleh a gelh chiang un 'Lui Umkhrah' chihna a suak hi. Himahleh 'Lait Umkhrah' chilou in 'Laimukhrah' hiam, 'Laimu' khawng achi maimai uhi. 'Kuva na ne diam?' chih bang 'Bam kuai?' ahi a; ei pau a gen di hile 'Ne kuva/kuai?' chihna ahi zel hi.

A laimal himhim ule – A, AW, B..Z – alphabeth (A, B, C) bang lamsang tak ahi. 'A' in a kipan a, 'Y' in a tawp mawk hi. A laimal zat uh hiai bang ahi:

'I' leh 'N' nih a nei uhi. 'I' pen a gelh didan ka thei kei, khat 'I' ahi a, a khat pen 'I' tung ah dot nih '..' a kisun hi. 'N' pen amasa 'N' ahi a; khat pen 'N' tung ah '~' a om hi. Laimal 23 a zang uh. 'Z' tellou in a buai vet kei ua, C leh CH tung tang bang a le buai vetlou uh a bang hi. A lak ua LAI toh kisai a mimasate' (pioneers) gelhdan mah buai vetlou a zang uh a bang hi. Eilawi ihih uleh mi masate' hih teng bawllemlou a suksiat lampang ngim i bang maimah ua, huai in tuni tan a laigelhdan kibangsak thei mahmahlou a d'aw, ka chi kha nak hi. Hiai Khasi laimal a 'Y' pen a ut chiang un ei pau a 'i' toh kibang in a zang ua; khatvei leh 'O' in a gingsak zel uhi. Kei ka va buai a hiven, amau a buai vet kei uhi. Etsakna'n: 'Ym lei lei' (No problem/Poilou) chih a gen chiang un ei pau hileh 'Om lei lei' chi'n a sim uhi. Himahleh min hiam, behmin hiam ahih chiang in ei laimal a 'i' in a ging zel hi. Etsakna: Beh min ah 'Mynsong' chih bang ah. Mimal min ah 'Tryte' chihte ah ahi. Hiaite bang ah 'i' in a ging thethup hi.

Bangteng hileh, a hausa ngal hausa; a zawng ngal zawng mahmah uh ahi deuh di uh. A gam uh hauhsakna suang-meihol (coal) ahi a, suang-meihol kai motor lian pipi sunkhua-zankhua in a tai ngoi-ngoi mai hi. Suang-meihol omna lam a tangpi in Jaintia Hills/Jawai Road hileh a kilawm a, huai lampi a lun mahmah a, 'traffic jam' leh 'accident' a tam se achi uhi.

A gam uh a hoihdan leh a hauhsakdan a thupi hi. Shillong khawsung bang ah mi khat in inn lam/bawl dek leh a inmun di a tohna mun ah a inn lamna di suang leh piaunel/leingoi a hoihpen khawng a toukhia uhi. A inn bawl a let leh a neu, a san leh a niam' dungzui a mundang a lakbeh ngai zaw a om tham di. Hilele, in khat lamna dia a inmun kitoudelh zou ahi sim hi. Gam hoih chu ana luah kha mahmah uh ka sa hi. Ei lam a 'Serou leingoi' hiam, 'Thoubal leingoi' chihte chu koilak ah (kadai dagi) himai ahi.

Himahleh a gam hauhsakna uh a vek un a zou sam kei ua, a lak ua mi hausate'n huai vek uh a bang hi. Meghalaya state kichi suang-meihol, uranium, piaunel leh suang hoih mahmah gam ahi a, a lak ua mi hausate kia in a zar zou uh a bang hi. Ei lam ah bel i gam hauhsakna uh omsun gammang leh gamsa leh vasate ahi uhi. Huaite tu'n i mangthang sak gai simta uhi. Huaiban ah, Meghalaya gam in hausakna a neihte – coal, piaunel, suang, chihte – a gammi, mihausate' a huai bei uleh adan om in ka koih hi. Eite ihih uleh i gam hausakna uh i lak ua mihausate'n huai gai uh hilou in, i lak ua thuneite leh chethei teng in mipite leh milip hamphatna di solkal a kipan a hong paite a huai gai zawsop uhi. Nachi uam? Sau gelh ngei kei.