Kei kha, taget a ka zinna hi’n ka paina mun peuh bang; a tot khak lampi teng bang kuama’n a muh khaklouh uleh a tot khaklouh lampi uh tawn bang in ka kingai sek a, zahpihhuai hon sa na tam mahmah di uhi. Hilele kei a dia gelhtham ching thu a suak nak hi. Mizoram a posting ka pai lai in ka paina thu bang ninhuai khop in ka gelh a, tu’n ka Shillong lampi k’on gelh nawn hi. Hiai zaw saupi gelh a sutzop di’n kei sang a theizaw tampi a om di ziak in khatvei a zoh mai di’n ka koih hi.

Mizoram a kipan a Lamka a kum 2 phalou posting a ka om lai in Shillong a ka Headquarters uh Audit Branch a posting di’n order a hong suak nawn hi. Shillong a ka posting di toh kisai pen ka lamet ngei ahi kei. Aziak ahihleh, nidang a Shillong ut a posting ngen dia kinget (represent) mai ka sawm chiang in ka seppihte ka dong a, ‘post’ awng omlou, chih dawnna ka mu gige hi. Himahleh kum teng a ka sepna uh toh kisai a ‘Transfer Proforma’ kichi a om a, huai a posting deihna mun telna (preference exercise) theih a hihman in Shillong leh Guwahati ka gelh gige hi. Tutung in huai ka deihtelna ah Shillong ka gelhtel a, lam-et hetlouh in Shillong Headquarters ah posting a hon pia uhi. Himahleh ka kisakkhiak dek hial chiang in haksa kasa mahmah nawn a, a ziak, ka nu leh pate Phaitong a kipan a ka pikhiak khakman in. Amaute taisan di pen thubaih ahi kei hi. Ahia, kikhel hia kikhellou, kei a di hi’n ka tate’ a di hileh a hoihzawkna di ahihnak leh pai di himai, chih thupukna lak ahita.

A paikhe dia thupukna lak a hihnung a bangchi pai di, chih hi nawn. Lamka lak a Bolero/TATA Sumo chihte i dawp chiang a a-rate di diktak bang hon hilh khollou uh, hi nemnum sim khawng a hong hih chiang un pai didan ka buai mahmah hi. Huchi’n Shillong a ka nuphal-pa’ kiang ah ‘hong pi mai ve’ chi’n a DI ka ngen a, aman a ‘permit’ di a hon sai a, a hong kuan hi. In a hong tung uh ka muh in kipak lua hinapi in ka nuphal-pa’ tung a ka kisuanlahna a hong lianzaw a, ‘kik mai ve ua’ chih mai di’n hoih ka sa hi. Kisuanlahna ziak a sawlkik mawk vual ahi kei a, kipak tak a motor a mahni thu a pai mai di hi’n ka koih hi. A ni a hong tung dek a invengte bang in khakna hong nei in, van puak dia ka koihte bang uh a hong guanpih ua, kipahhuai mahmah zel.

Shillong zuan di’n k’ong kipankhia ua, lunglenna leh lametna toh ka om heuhou hi. Mahni inlum nusia a mi in luah a khosak di pen thubaih ahi kei, chih ka thei hi. Himahleh lametna in a hon kai a, kei leh ka inkuanpihte’ a dia kikhel ka sak sim nung a Pathian in hiai bang lem hon gelsak ahihleh mihing in kikhel i chih hon Siamtu’n kikhel sa lau a Shillong mun a hon kisuan sak hi di hive’n, chihna toh ka lungsim ah saikakna tampi a om hi. Upate’n ‘Mel i bawl thei kei; lungsim zaw bawl theih ahi’ achih uh bang a kibawl theihna hun ahih khak leh, chih lamen in ka pai zel hi.

Lampi ahihleh Kangpokpi a kipan in Maram tan ana se mahmah a, hat tai theih ahi ngel kei. Maram a kipan a lampi a hoih tak in ka driver un ‘speed down’ khollou in lamkawi ah a hon pei zungzung mai a, Kimbawi’ Nu bang a hong law awkawk hi. Kohima khen a lampi a hoih nawn tak in huchi bok in driver in a hon pei nawn a, huai zet in chu kawng bang a kham mahmah hi. Guite Road toh teh in a noplouhna munte bang le nuam tak ahi zel. Mi gam leh ei gam bangchi? Tipaimukh Road bang a mam in a hoih mahmah zel a, vui sese lou a i gam ua lampi hoih om ahi maw, chia kihehnep mai di hi’n ka koih hi.

Assam ka lut ua kipan in a lampi lah hoih, tang, nop in a nuam petmah a, huai bang ngen hileh Lamka a kipan Sinzawl tan dakkal 3 motor tai di’n ka gingta kei hi. Huaiban ah, ettonhuai mahmah a ka theih tuh lampi kiang a vakna neilou khuam a phuh uh, motor mit/linght in a salh chiang a vak sengseng thei a koih utoh lampi kiang a singkung omte a kepbit ua, huaite a bul ‘sunu/lime’ a nuhngoute uh mahmah in driver-te  panpih di’n ka gingta hi. Tua i gam ua singkung teng kisat bei, lampi kiang a poute tata bang sat baihlam sa a i hawi louh uh a poi mahmah hi. Huai hikei leh, Guite Road kiang a singkung omte a bul nuhngou sam le lampi se mahleh nuam tuam mahmah di’n ka gingta hi.

Shillong ka lut kuan un suangmeihol (coal) kai Truck ana tam mahmah a, ka gintak sang un ka tung hak zaw uhi. Kiginni zingkal in Shillong ka lut ua, ka vante uh a Gang Dalzakamte’ in a nga in 101 lam ah giak di’n ka kuan uhi. Mahni khua hilou a, in luah di omsa omlou chu Tuikukte pem bang mai in ka nupa un, Kimbawi’ Nu toh ka paina di lamlam uah ka kikhenna di uh van tawi in ka kizui-zui mai uhi. An ne dia hon chial a om uleh a in ua giah ngal di himai, chih dinmun ahi a, kisuanlahna leh lemchinna toh ka hun uh ka zang uhi.

18.02.2012 zingkal a Shillong tung ka hi ua, ka vante uh Pologround lam a nusia a 101 lam a om ka hih utoh Pathianni a Biakin kai man di’n ka kikoih kei uhi. Himahleh Shillong a Biakin kai hun 2:00 PM – 2:30 PM ana hi a ka va kai man uhi. Lamka a Biakin kailouh ‘Silver Jubilee’ lop ka sawm Pathian in ka bohsiat hoih sa ahi dia, Mizoram a ka kisuan (transfer) lai in Aizawl ah ka bohsia a, tu’n Shillong ah ka bohse kha zel hi. Biakin va kai thremthram, chihdan khawng ahi vel hi.

Nak manlou phial in ka sepna di mun Audit Branch ah joining report ka va pia a, sep di lah a hon pe kei lai uhi. Huchi’n sep di omlou na nana chu ‘kawng, kuai,’ ‘kat no,’ ‘siphou’ chih vel leh kuva hai a cigarettes tep zel khawng toh hun zat ahita mai hi. Sum a tang/khal deuh bang i piak leh ‘lahbiang’ chih khawng ahi maimai lai hi. Seppih a niam deuhte bang kuva i piak guih leh ‘khublei sibun’ chih kidong, hilai eive!

Shillong khopi ana kilamdang mahmah in ka mu a, khawlai pawtna leh mun dang zotna dia nidang a motor ticket lakna mun leh a khopi sung a veng tuamtuam zotna dia khe a paina dia munpi a kinei Police Bazar /PB kichi bang ana lamdang mahmah hi. PB bang ana teng tawntung khat in hiai PB ahi, achih hi keileh kiselpih mai leng a kilawm hi. Physical Test dia ka hoh lai, Join dia ka hoh lai, Induction Training Course a ka hoh lai leh Computer Training dia ka hoh laite toh a kibang nawn mahmah kei hi. Mun khat a kipan in mun dang zot ka sawm a, ka kam in zaw a gen thei sam na a ka theihna in a zou nawn kei hi.

Hiai ka ‘Shillong Lampi’ pen a tuam ahi kei a, kei a di’n a tuam, chihthu ahi. Lamka leh Zogam ‘powder’ kinuh toh kibang lou deuh ahi dia, chi khawng ngiat a man tu-tup, chihte a om kei hi. Lamka a Dam tui kal khal sung a kimu hamham (a mulou tamzaw) sang in a tui uh a siang in a nal mahmah a, i kisil chiang bang in siang diak a kibang lai hi. New Lamka a ‘ring-well’ tui man tu-tup khawng a kisil toh a kikhai mahmah hi. Lamka khopi a kichei a kinei a i pawtkhiak leh khedap bang Office tun ma in leivui a dim in a nin man a; Shillong ah bel huai ahi kei, huai lam thu a nuam tak ahi. Huih nung a leivui khu vungvung chih khawng a om mang kei a, kiphiat-phiat a ngai kei lai hi. Ka khe a ulsuak baih ziak in a uih nak, chih thu ahi.

Ahia, Shillong pen khopi siangthou khat himahleh siangthou lua hi’n ka thei kei hi. Kuva a hai mahmah ziak un lampi kiang a khuam leh dai/fencing leh inte ah sunu/lime a kitat bang nengnung a, huai in a etlawmna kintak in a subei hi’n a kilang hi. Huai ban ah, lampi tuam zekte ah nin a kipai thang mahmah lai hi. A khopi hahsiang dia semtute’n zingkal teng in niin a hah ua, a zingchiang a hahsiang nawn di a dim a om zel bang mai ahi. Manipur toh a kibatlouhna om sun ahihleh Manipur bang zen a namse di’n niin a kikholkhawm kei a, huai ahi. Manipur toh zaw ka teh vanglak dah di.

Mizoram toh k’on teh daih dia, sianthouna toh kisai in ah Mizoram a changkang mahmah in ka thei hi. Khopi zek ah dawr leh in neitute’n a in kong chiat uah ‘dust-bin’ a koih chiat ua, kholak a niin paihthang, chihte a om ngel kei hi. Kuva a hai ua, thei a zuak ua, laizial a tep ua, huaite a tunna uh kholak ah a paihthang het kei uhi. Niin-bawm (dustbin) ah a khe geihgeih mai uh. Lamka bang chu, kholai a nullah, guam leh lampi siik teng ‘dust-bin’ hi mai, chikchiang a i khosung uh siangthou di? I khosung uh a sianthou ma bangchidan a ei a changkang hi di? I kicheinate uh changkang lele i kim leh kiang uh a sianthou ma uh bangchidan a eite’n ‘ka changkang uh’ chithei di? Dotna tampi a om a, huaite i dawnna uh i gamtatdan uleh i kim leh kiang uh sianthoudan in a hon pawkhe mai di.

Shillong ka zotna leh tunna thu gelh himah leng a ‘bai’ hileh ‘a hangtramna’ ahi dia, a ‘pok’ hileh ka ‘tuinihna’ a tam sim a, huaite mah ahi ka gennop. Shillong kichi nidang pek a kingaisang khopi ahi a, Shillong a lai zil theite bang kingaisang mahmah ahi. A climate (bouruak) nopdan lel bang le a theite’n hatu hul zen a agen uh ahi. Huai mun tung chu ka hi peuhmah a, bangtan????

Bangteng hileh Shillong zaw a naihna lampi state dang sung ah a se sim om mahleh Meghalaya state sung i tun nak leh lampi sia, chih a om khol kei. Manipur a kipan in ka zuan a; Nagaland a kipan in ka zuan a; Silchar a kipan in ka zuan a, Guwahati a kipan in ka zuan a, lampi sia leh phok neknuk, chihte ka tawn kha ngei kei hi. Meghalaya state in suangmeihol (coal) a hauh ziak in coal kai Truck a tam mahmah a, huaite’n traffic a jam (lampi a buaisak) nak uh chih thu ahi.

Zogam ah Shillong bang a naih tak khopi chikchiang in a om di? Zogam ah chihchiang in siamsinna mun hoih Shillong bang a naih tham di a hong om di? Zogam ah chikchiang in Shillong bang a in luahdi zong a kivei  mi bangzah a hong om di? Chikchiang in mun dang leh gam dang a kipan in mi’n a tate uh Zogam a khanglian di’n a deih di uh? Kingaaihtuah hun na sa uhia, ka chipih leh ka Zomi pihte? Shillong, Bangalore, Chennai, chihte ah Zomi Nam Ni i lawm uh, a hoih hi. Hilele Zogam ah bang lamet di a om a? chih ngaihtuah tham ching tak ahi. Thupi tak a Zomi Nam Ni khovel pumpi a zat ahih pen sang in i Zogam uh bangzahta a lunggulhhuai hi hiam, chih ngaihtuah zawk di’n hoih ka sa hi.

Eite mahmah inle Zogam khelah lou a, huai a kipan a pawtkhiak lunggulh ihih uleh a diklouhna om ahi, chih sui di’n a hoih hi. Kei bel ka sepna toh kisai a suankhiak a om lel ka hi. Hilele kilohtawm leh kholai a mehzuak a i mi leh sate uh Zogam khelah lou a om ngap uh, chih bang a diktak in ngaihtuah le Zogam, Zogam, chichi mah le nuamlou mah hi kha di ahi, chih ngaihtuah tham a ching hi. Huaiziak in Zogam pen a lunggulhhuai, ngaihnathuai, uthuai, khiaklahhuai, taisan ngamlouh gam hihsak i sawm uh a ngai hi. Huaiban a, midang, nam dangte nangawn in a lunggulh gam uh hihsak di eite mohpuak ahi, chih thei le, chih ka genbeh lailai hi.