S H I L L O N G
Shillong thu hon gelh dek ka hi a, simtute 'Khublei Shibun maw.' Khasi pau in hon gelh leng lah a theilou tampi om di ihi ua theihlouh dia gelh sang in ei pau mah in k'on gelh mai di. Ka thugelh thupi dia 'Shillong' chih hon tel himah leng a khopi tanchin lam gen tum ka hi kei a, ka muhdan lam gen sawm ka hizaw hi. Shillong pen nidang pek a kipan a khopi minthang ahi a, naupan lai khawng a mukha ngei dia ka na kikoih louh ahi. Shillong a school leh college kai bante bang siam petmah di ua gingta a, kingaisang mahmah ahi a; Shillong genlouh Mission Compound a skul kai bante tanpha kingaisang ahi lai hi. Huai ahih chiang a Shillong tan a kai bante bang chuuu, chih vengveng himaidan ahi. Midang in hiai ngaihdan na neihlouh tawp ua le kei a dia neihtham mah ahi.
Ka muh masakna ahihleh All India Radio, Imphal a ka sep lai a Bank PO exam dia ka kuan ahi a, himahleh exam hun ana kisuan maimah a, ka thawn kik hi. Huchi'n tua ka sepna ka muh kuan in Physical Test nei di'n 1994 kum in ka kuan nawn hi. Huaikum mah in ka sepna join dia Shillong mah a kuan a ngai nawn a, ka mu nawn a, huai kum mah in November 15 a kipan December 31 tan 'Induction Course' training di'n ka kuan nawn hi. 2003 kum in Computer Training di'n ka kuan nawn a, himahleh huai hun in kholai pawtna hun di a om het kei a, ZL dak 9 a kipan NL dak 5.30 tan bang Office a training ka hihman un. Huai nung ka mu nawn kei vengveng hi.
Tutung a ka kisuan a mu nawn pan ka hi a, ka dakna lamlam chituam vek phial in ka thei hi. Ana khang hat mahmah a, nidang a step a khe a paina teng bang 'pucca road' ana suak a, kholai kal nengneng khawng a taxi a tailut zungzung in a om hi. Ka dak zel a, lamdang ka sa deuhdeuh hi. Ka training lai ua ka Office pansan pipen uh Laitumkhrah mun bang ka thei zou kei maimah hi. Kholai a khe a hon paipih chiang un ka paikhakna sate bang ah ka mit hong vak kuau zel a hilele a ban ka thei nawn kei pah zel hi.
A tui nek uh a siangthou a, i kisil chiang bang in a kinal henhen zawzen hi. Lamka lam a well tui man tutup a kisil toh a kikhe mahmah. Huaiban a, Zogam powder in hon tuam lunglung chihte a om kei a, kisil mun luat louh bangle a poi kei hi. Huih a hong nung a, vot henhen in a hon seem a, kihalh suaisuai mah a bang hi.
Lamka khawng toh teh a motor tam law mahmah himahleh mawk tai vuvu chihte a om kei a, kimakhelh hehu chihle a om sam kei. Driver-te a zahngai ua, mihing a veng mahmah uhi. Lamka lam ah ahihleh mihing in motor ven petmah a ngai a, hon phukha bang om le-ule a mihing kimoh suk pah di a bang hi. Huaiziak in hiai thu ah ei lam toh Shillong a kilehbulh geih hi. Lamka khawng a motor hek bang a hek in hih vevu le uh tuahsia tam mahmah di'n a gintakhuai hi. Huan, Lamka toh teh in a lampite uh a kawchik thei mahmah a, hilele traffic buai lua, chih a tam kei. A Traffic Police-te uh a zahtak mahmah ua, lampi kawchik a hihziak in lamka-thuam (junction) teng ah Traffic Police a duty ua, huaite' thu a mang mahmah uhi. Police chiatchiat dia le Shillong a Traffice Police tam ngai diak di'n ka gingta hi. Ei lam ah ahihleh Traffic dan bohsiat ngam leh Traffic Police-te' thu lou a motor tai ngam khawng thupina bang in i ngai leuleu uhi. Hai vai! Solkal in i bitna di ua dan a bawl khawng palsat ngam leh huai dan enkoltu dia a koihte uh thu manlouh khawng thupina a i ngaih sung teng uh koi malak a changkang kihi lou di ahi, chih theih di'n hoih ka sa hi. Hiai lungput (mentality) i neih sung uh khangtoulou (uncivilised) leh civic sense neilou nam kihi nilouh di ahi, chih phawk ni.
Ei lam toh teh in meh a kiman zaw a, ei lam a rate dudak omlou a ut zahzah gen mawk, chihte omlou deuh a bang hi. Zawngtah bang houh kg. Khat a 60 ahi, a chi ua, gap 4 khawng sawmthum in a lei theih hi. Huai ban a ei lam a kimulou kelsa, kaikuang, ngasa chi tuamtuam a tam lai hi. A man a tam deuh pawl a om, chihthu ah. Bawng sa leh vok sa tuh ei lam toh a man a kibang sim a, himahleh bawng sin tuh man tam tak ahi, Rs. 300/- per Kg. ahi ringot.
Lamka lam a Bank hoh buaihuai mahmah pen hiai lam ah a thawveng mahmah a, ATM bangchu, himai, ut hunhun ahi. Paina peuh ah a om a, sum neih teng lakkhiak bei gige khak di a lauhuai lam ahi. ATM leh bank guard (veng) di'n Security Service tuamtuam a kipan in a sep ua, Central leh State force-te a zang vet kei uh. Mi khat in 'Single Barrel' tawi in a guard mai a, galmuang tak a hi di. Zomi Nam Ni zatna bang ah le Security Service a kipan in a hong kuan mai ua, a kiphubuai, chihte a om vet kei hi.
Khopi e, chilou in singkung leh mau/gua, chihte hing dipdip in a ding ua, Zogam sang mah in a 'zou' zaw a, vasa chi tuamtuam ham leh muh di a tam mahmah hi. Va-ak, tuklou, tawm-manai, chihte ham khawng i zak leh nidanglai Zogam bang phawkkhiak in a om mai hi. Ei gam hileh 'buangnai gawphel' toh 'Air Gun' toh i delhkhe kin mahmah di un ka gingta hi. Mite'n a gam uh a kepbit kia uh hilou a, sing leh gua leh huai a gamta ganhingte kembit khawm lai uh ahi maw, chih in a om hi. Ei le i kipan mai d'uam?
A lampite uh mahmah a hoih lai a, lamtou taktak khawng himahleh mam in a mam mai a, 'speed breaker' omna munte chihlouh hon tattat chih a om kei hi. Huaiban ah, ei lam a i suangte uh a vomsa himahleh 'black-topping' in a vom suak sak zou kei a, tou le a tou kei namah hi. Shillong lam ah ahihleh a suangte uh ngou vengvong mahleh lampi a bawl chiang un a vom suak dimdem zel hi. Lampi nuam lou vual ahi kei. Huan, tou-lou vual ahi kei bok hi.
Shillong a in luah di zon tuh solkal a sepna thak mu a join dia kisa toh a kibang mai hi. Passport lemlak, domicile certificate, voter identity card, police verification, chihte tan a tawi a ngai hi. (Veng a tuam dungzui a ngai khollou chu a om). Veng chih a ei lam a Village Authority (VA) ichih dandeuh ua Dorbar Snong kichite a thunei mahmah ua, a veng mite un le a zahtak mahmah uhi. MLA/Minister i chihte' sang ua kihta zaw uh a bang hial hi. Bangziak ahi di? Solkal in thuneihna kichiantak a piak ziak ahi. Bank a loan la di bang, Gas connection deihte bang in Dorbar Snong a kipan lehkha lak ngai teitei hidan ahi. Domicile Certificate bang deih hile SDO/DC Office, chihte a sai ngailou phial a Dorbar Snong in hon pe mai di hileh a kilawm hi. Kivaipuakdan kichian tak neite mah zaw adaan ana om teitei eive, chih in a om.
Ei lam ah Mizoram in a neih dandeuh uh Village Authority i nei tei ua, Mizoram a VA bang a thuneihna kichian nei lah hi mellou, solkal in hon piak lah hi sam, thuneihna kichian bangteng om ahia, chih theibut louh khat in i kipua ua, mi a toh teh a zumhuai a bang hi. Ka theihna chiang a i VA-te uh thuneihna omsun hi a ka theih tuh MGNREGS (Job Card) i chih mai ua sum hong paite soisak a, 'material cost' khawng mahni thu a kihawm a, Job Car khawng leh Job-tiva khawng lei hi mai in ka thei hi. Shillong a Dorbar Snong-te' thuneihna bangbang piak bang hilai le-uh bangteng a sawisa lai di ua aw, ka chi phet ve.
Hilou hi, diklou deuh mah hi hang, ichi thei uhia? Solkal a kipan a thuneihna kichian neih a, huai thuneihna pen kichian tak leh a phatuam dia zat i ut uhia? Tuadana mah a pai a ei leh ei 'khuangbai' bang mai a kinek-nek ut lai ihi uhia? Kuapeuh kingaihtuah di'n hoih ka sa hi. A hoih lam a mite' paidan enton a, i thuneihnate uh mahni angmasialna lou deuh a zang hile tua i VA-te uh thuneihna lel ale a hoihlam a kikhekna omthei zek di'n ka gingta hi.
Ka jingkhublei kyrpang maw.
.