Mi kua hiam a min uh zaza lele chiamteh theih hetlouh min a om hi. Hiai bang a mi min chiamteh haksate upate’n ‘kisathei ahi uh’ ana chi uhi. Mawk zawzen! Himahleh min khenkhat, khatvei zak mai a mangngilh nawn louh a om zel hi. Huchi bang a chiamteh theih pahte a melhoih tuam ziak uhiam, a fel tuam ziak uhiam, mite’n a phat ziak uhiam ahi tuan kei hi. Khatvei zak a ‘ngaihnat riau’ na khat hong om mawk, chih thu ahi. Huai ahi hiai thugelh hong piankhiakna bul.
Ka pa, kum tampi lupna ngak a omta awlmohna ziak in October 2012 kal tawp in Lamka ka zuan hi. Nilaini a tung himahleng lawmte toh Kiginni zingkal in ka kimuthei pan uhi. Lawmte zingkal in a hong hoh ua, houlimna di thupi (topic) om tuanlou in ngeina bang in ‘thutak pai lou’ thute mah genkhawm in ka chiak uhi. Huchia thutak pai lou thute a ka houlim lai un koilam a hong kipan ahia, chih theihlouh in topic di a hong lut phut a, huai tuh “Vungbawi’ Kuva’ ahi.
Kua teng in Vungbawi thei a kua teng in theilou chih omlou in ‘khe khat khai’ bang in ka vek un ‘Vungbawi’ Kuva’ ah ka lunglut phut mawk uhi. A theisate’n ‘Kuva zuak lou ahi’ chile ule a thei nailou teng huai kuva duhhuai tak hai ut in ka kilawp vek mawk uhi. Thupi dang a lut ngaihna omlou ahih chiang in a Vungbawi theite ‘minority’ hong suak zawmah uh, ‘majority’ utna zui in “Vungbawi’ Kuva’ hai di’n ka kuan ringot uhi. Kuva zuak lou mah ahih chiang in a kuva bawl di a kong lak uah ka leitawm ua, a in uah ka lut uhi. ‘Koi a Vungbawi’ chia kan toh, ‘Na kuva’ chia kan toh, chiau a chiau lut ahi pah zel hi. Kuva bawl di’n ka sam ua, ‘ka khut kawt ahi, khawnvaktui gim nam di ahi’ chi lele, ‘khawnvaktui gim a nam leh a kick a hatzaw di’ chi bang ka om lai uhi. Maitai siuseu mahmah in a hong naih a, hong tu in kuva a hong bawl a, ka hai ua, ka lungkim chiat uhi. Huai ni a kipan ka kimuh teng ua pauzat tangpi in ‘Vungbawi’ Kuva’ chih ka zang ua, a hon limsak mahmah hi.
Sawt om theilou di ka hihman in Vungbawi’ kuva ha hai khit un le ahithei liai teng ka kingaina ua, dawnkhawm leh nekkhawmna bang ka nei uhi. Ka honpi ua ka kimuhkhawmna mun uh ahihleh Pearson khaw-khung ahi a, huai ah bawngsa ka zial uhi. Huai nitaklam mah in le Vungbawi in a hong uap a, buh-le-meh le lim ka sa chiat uhi. Thutak a lak vak di om khollou, chiamnui vek lah hilou, kipawllim ka hi pen mai uhi. Huai hun chiah chu a nuam in hatu muan zou manglou ngen in a ki-om hi.
An nekhin ka pai ua, YPA duty om ana hi a, Bungmual YPA-te lei tung ah ana duty uhi. Huai ah Son toh MT kuva lei di’n a va kum uhi. Huai mun a duty-te nih kimawl ahi di ua, kipek gang-gang in a kimawl uhi. Kei motor sung a om in ‘Ka muan leh ka muan’ ka na chih zenzen leh khat hong tai vengveng in ka mit ‘YPA eyebrow’ a hong nuhsak a, ka nak si a tam sim hi. Huai eyebrow pen Shillong tan bangzah hiam ka kilehpih hi.
Heh sim ka hi dia, a zan in ka ihmu ngel kei a, ka ngaihtuah chiang in Police a FIR Register a zonkhiak sak bang ka ut hi. Huchi’n zingkhua a hong vak a, VL ka phone a, ka pu Bazar ‘Damkam’ Bazar’ ah ka kimu uhi. Huai ah ka ngaihdan ka gen a, ‘heh sim chu ka hi dia, Police a FIR register mai di hia, ka chi a, hilele ka ngaihtuah thak chiang in a nalua le hilou, melhem a om le hilou, ngaihsak kei leng ka eyebrow bang le a hong mang dia, ka mangngilh mai di’ chia ka hilh leh a hon pompih mahmah a, huchi’n ka dai hi. Eyebrow hong nuh pa chu ka kankhia a, hilele bangmah gen ka tum kei hi. Ka hehna langsak leng heh deuhdeuh di ing a, mi thubuai guan di ing a, kei le thubuai a kikai buai di hi lel ka hi, chi’n kei leh kei ka kinem hi.
A himhim a eilawi chu, mi huham, ngap zawng khawng chou leh vuak mawk poi saloute ihi ua, ganhing toh i kinaih lai mahmah uhi. Lamka bang ah kipolhkhawmna, khawmpi, concert, chihte neih i ching mahmah uhi. Huaite lak ah buaina omlou a zat chih a om mang kei. Gospel Centenary i lawm ua, Hall kong a kisual di a bei kei; Zomi Nam Ni i zang ua, a buai deuh gige; Kut i zang ua, stage bang i deng dalh phial uh. I sisan lumdan uleh i huhamdan uh hangsanna taktak hilou a gamsa lungput ana hi nilouh lai ahi. Khawvel khang hat mahmah in top-le-chilh in Digital khawvel ah a hon pilut a; eite’n thouhai kawm pi leh i gamsa lungput utoh huaite i zang zawmah uhi.
Huai ban ah, eilawi i hihna uh khat hi a ka theih a om hi. Pawlpi bang hiam a panna nei hiam, volunteer hiam bang a seh a i om uleh huai i hihna uh suang mahmah, mi bang that lele siang di khop a kingai pahte ihi uhi. Mohpuakna piak a i omna ziak uh pen ngaihtuah lou a mohpuakna piak a i om pen uh kiphatsak pih a hangsan kineih mawk, zoh louh di kuahiam chou kha hiam, kisualpih kha hiam in om lele hon hun di om, chih ngaihdan nei pahte ihi uhi. Hiai mentality pen a dik pen ahi kei. Seh a i omna ziak uh theihchet a, huai semsuah dia panlak a poimoh zaw hi.
Aban zaw sau ka gen dah mai dia, tulai facebook, ichih uh i khoih leh laisim lah kipeih lou, laigelh lah kipeih lou, bangtan tuailaite a hon nawr kha diam ah, i na et uh ngai mai di’n ka gingta hi. Vungbawi’ Kuva pen mangilh hak in om ve’n.