Tu nai chin a Gangpimual Village authority in Tuitha lui a tuili luh a thukhenna a bawl uh a kigen nak mahmah hi. Hiai bang a thukhenna neih louhna kum tampi paita di'n a gintakhuai hi. Kei pian nung in le ka thei kha kei hi. Huchi hileh kum 50 val tham tuili luh a thukhenna neih hi nawnlou, chihna a suak hi. Tu naichin a hiai bang a thukhenna neih a om pen tampite'n lamdang sa di'n ka gingta hi. Khenkhat bang a nuih uh za hial di'n ka gingta lai hi. Hilele nidang a khanglui hun a ana chin uh ahi a, dik mahmah hi'n a gen uhi.

Tuili luh louh le thukhenna dang khat a nei ua AITUI DAWN ahi. Hiai pen bang 'ai' ahia chih ka kan kha kei a, ka thei kei. Guta-lata a kingoh a om leh ngoh a om pen in 'aitui' a dawn ngam leh ngamlouh in thu a na khen uhi.

Tuili luh pen ka nu leh ka pi'n a gen zel ua, huaiziak a ka zak theih hoih zawk ahi. Guta-lata a kingoh a om uleh khangluite'n ngoh a om pen tuili a luh sak uh, achi uhi. Tuiliau theilou ahih a leh a kawng a khauhual a khih in a liluh sak uh, achi uhi. Hiai bang thukhenna a ngoh a om pen tuisiam petmah bang hi lele a moh ngeingei leh tui ah a tum thei himhim kei, a chi ua; ngoh a om pen tui liau theilou bang hi lele a dik a leh a tum vungvung mai, a chi lai uhi. Khangluite' theih dia chu mak leh pilhuai pi a suak hi.

Tutung a hihdan pen ah ngohtu leh ngoh a om gel a nih ua tuili luhsak ahi ua, nidang a toh kibanglou deuh a hih ahi d'aw, a hon chi sak hi. Ngoh a om pen bang a dik mah hi in, tui lak a kipan kilamkhe masa in pang mawk leh moh a ngoh a om di bang ka sa hi. Tuban hih nawn bang a ngaih di leh hoih tak a kankhiak a hihsak di'n a hoih di. A ngohtu leh ngoh a om tegel in a liluh mah d'u hia? Ngoh a om pen kia? Kei a na theihdan a chu ngoh a om pen luh sak uh ahi peuhmah hi. Himahleh kei le a mukha leh a theichian hi tuan lou ka hih ziak in ka gendan dik di ahi, chia hon gelh bel ka hi kei hi.

Huai ban ah, hiai thukhenna dan pen khanglui lai pek a dik bilbel hia a gen uh ahi a, tuban a hichi bang case a om nawn lele zat zel mai dia hoih di'n ka gingta hi. Bible toh bang le a kikalhna om di'n ka gingta kei hi. Hiai bang dan khangluite'n a na neih uh kepbit a siatna om di'n ka gingta kei lai hi.

Tutung a hichi bang hih ngai tan tung hi ngal a press coverage khawng a amin tak uh taklat a hihlou mawk pen ken hou ka sa get hi. Hichi tuk a kuhkal a kingoh a, hausa upate tanpha lung-am sak zou case hi ngal a mintak taklat ngal di'n hoih ka sa mahmah hi. A thukhen dan le kei mimal ngaihdan in mawlhuai ka sa kei lai hi.