Hiai thu kiselna tampi pawtsak thu ahi a, kei bang le ngaihdan gen dia sawl in ka om zeuhzeuh a, poimoh ka sak leh saklouh bang dot mun in ka om sim hi. Himahleh ka ngaihdan gen masa lou in amau ngaihdan ka gen sak masa a, huchi'n a hon dawndan ua zir in ka dawng mai hi. Naupang curfew koih deih lamte' panna ahihleh naupang khawlai a mawk pawt hoihlou sa ahi ua, a dik a, huaiziak mah a naupang curfew ngai saloute' sang a koih hoihsa tamzaw a koih khak a om hi'n a kilang hi.

Naupang curfew koih ngai saloute' panna ahihleh "mahni tate chiat pawt sak kei le curfew koih ngailou sa hi mai ahi" chih ahi. A gen uh a dik veve hi. Khatvei si-galna khat ah hiai thu a kiselna nasa deuh a hong piang hi. Ka ngaihdan a hon dong ua, 'Ka thei kei, mahni tate chiat pawt sak kei le, chih gaih hi a baihlam a, na tate uh thuzoh deuh le na hi di uh. Kei bang in le ka tate pawtlou di'n ka hilh a, a pawtkhiak louh uh deih in film hi'n bang hileh khelhsak in inn ah ka khum a, hilele a lawmte uh a dim in hong hoh zel ua, a ngaihna ka thei kei,' chia ka dawn leh U Thanga Tonsing in dik a sa mahmah hi. A thupi di'n a tunga zang mah leng hiai thu a ka ngaihdan gen khollou di ka hi.

Englishte'n 'Man is a social animal' achi uhi. Social animal chiatchiat a le eilawi, adiak a Zo suante social animal diak i bang uhi. Naupang genlouh piching tanpha khawlai a hih di nei le hi ngellou pawt-pawt; poimoh lou pipi a mi in va lengla; a kullou pipi a kipolhlimna leh kipolhkhawmna di sai guigui; pawl min khat hiam zang a kithuahkhawmna sai bang taima viau, hichi ihi ua, i naupangte uh a pawt uleh bangziak a mohsa di? Lamka a zingkal khaw tawntawn a Hotel a hun zang bei insung pa bangzah i om di uh? Sun khaw tawntawn a pomohlou pi a khawlai pawt insung pa bangzah i om lai di uh? Hiaite khawng i ngaihtuah leh tate khawlai pawtlou dia thuhilh ngam pa bangzah om di uh, chih hon ngaihtuah sak hi. Panpih ngai kua hiam va panpih lah hilou; insung a zi-le-ta leh nu-le-pate' buaina ngaihsak hetlou a hun zang bei bangzah om? Kingaihtuah thak le naupang curfew koih di'n i chin uhia? I dinmun uh i ngaihtuah leh hichi khawng ihih chiang ua YPA hiam, bang pawl hiam in naupang curfew koih a i tate uh khawlai pawt di hon ven/kham sak di uh chu a deihhuai mahmah ngut hi.

Ki-pawttuahte i hihna uh a chianna di'n hiai k'on gen lai di. Naupan lai khawng a lawmte toh kithuah a mawl zuazuate ihi uh. Tangval ihih chiang ua hohna di theilou pipi a lawmte toh kikum a in khat a lengla teiteite i hilai uhi. Tua ka gen hunlai khawng bel singtang hinkhua ahi a, demna di a om khol kei, mahni khawsakna mun a i hun zatdan mah uh ahih vek ziak in. Hilele tua kichangkang sak a, ki-khawpi mi sak a, tulai khawvel khantouhna sang tak zarzou bante' a di'n a chinchi kei a, chin nawnlouh di mah le ahita hi.

Kei tanchin ah hong lut zual leng, nidang a lawm ngai mahmah khat ka hi a, hilele mi hon ngaih di'n ka khawsak a niam hi. Huchi sasa in mi paunuam ka hih ziak in min a hon ngai thei uhi. In khawng a kikhum, chih bang haksa ka sak mahmah khat ahi. Hilele pawl 10 k'on pass chiang in ka lawm ngaihna a hong dau a, laisim utna k'on nei zui hi. Huchi'n khawlai ka pawt tawm hiaihiai a, tuni chiang bang in office kai a pawtkhiak ngai hikeileh in a om den zou mahmah di'n ka kigingta hi. Lamka a ka om chiang bang in le a poimoh lua om ahihkeileh khawlai ka pawt mawkmawk kei hi. Huchi'n in ah laibu toh kithuah in, leh anhuan-mehhuan khawng toh insung mah ah ka hun tamzaw ka zawng gige hi.

Tu chiang a hichi thei ka hihman in ka tate khawlai a pawt di uh ka deih kei mahmah a, ka thuhilhna tampen le ahi. Huchia khawlai a pawt di uh ka deihlouh ziak in Lamka a ka ten lut nung uh sawtlou in (1995) TV khat ka lei hi. Ka veng sung ua TV nei masa pawl le ka hi ban di'n ka gingta. Himahleh inkim-inkiangte'n a hong en ut ua, kham theih ahi kei hi. Huai lai in CD/DVD chihte a om nai kei. VCP/VCR player leh cassette khawng khel a et ahi lai. CD player a hong suak a, ka lei nawn a, ka tate'n a etnop teng uh film ka khelh sak a, in ah chu a om ngut uhi. Hilele, a lehlam ah a lawmte uh a dimdim in a hong om ua, a etnop uh a bei chiang in a zui ut zel uhi.

Mobile phone a hong suak a, ka tate' lawmte a nu-le-pate uh handset changkang taktak a leisak ua, in ah a hong hoh ua, a eng ua, a phun pah zel uhi. Mi nu leh pate bang ka mohsa man mahmah a, hiai thu ah ka zi toh bang le ka kinak loh phial uhi. 'Mi nu leh pate mohsa het koh' hon chi gelgawl bang chu 'thutawp gen' di'n hoih ka sa phial hi. A poi mahmah chu kipolhkhawm himhim ut mawkte ihi ziak uh ahi.

A himhim a khawlai pawt zaw hoihlou mah ahi. Huai ban a lawm ngaih luat bang le hoih tuanlou ahi. Lawm a poimoh kei, chi hilou in. Lawm hoih ahihleh neih ngeingei di ahi zawmah. Hiaite ka theihna kon gen lai di. Ka ngaihtuah kik chiang in ka neulai a ka nu leh pate' tung a ka vuina tampen ka lawm ngaih ziak ahi. Lawmte toh thil hih di khat sawm, a hon phal kei ua, heh a vui kihi pah. Huaiziak a nu leh pate' kiang a insung programme dong masa lou a khawlai toh programme i bawl himhim leh insung a ei mah kiheh ahi mai hi. Huaiziak in tuni chiang in insung a programme bawl masa lou in khawlai toh programme bawl ka sawm nawn himhim kei hi.

Hiai thu naupangte' a di kia ahi kei. Piching bang in le lawm a ngaih luat leh khawlai toh programme a bawlkhawm a, insung a poimohna a neih a zi hiam, kua hiam in a gen chiang in amah programme a fail khak di a lau a, piching e, chilou in insung ah kinakna a piang mai hi. Huaiziak a khawlai toh kisai himhim se vek kei lele a tamzaw in hoihna sang in siatna a tun ngeingei hi.

Mihing in lawm hoih i poimoh chiat uh. Hilele lawm teng lawm hoih ahi vek kei. Adiak a hon ngai mahmahte bang a selam a hon kaitu ahi thei zawmah hi. Huaiziak a lawm i ngaih zoh peuh leh insung a hehna di tam ut ahi a, khawlai nuam i sak a i ngaihnat sung teng insung awlmohna omlou a kinakna lam manoh zel di ahi mai hi. Hiai in naupang hi'n, tuailai hi'n, piching hitaleh a uap vek hi. Dik salou na om uleh hon gen tei le-uchin. A diktak a zaw eilawi bang a kipawl zelzul nam dang a om hial di ua aw, chih phet ahi. Singtang khawta a teng hi nawnlou a, kikhawpi sak leh kichangkang sak theita ihih chiang ua huaite tawpsan tak di'n a hoih mahmah hi.

Hiai, a tung a ka gente a kipan in ana ngaihtuah unla, naupang curfew poimoh ihi uhia, piching leh tuailai tan a curfew poimoh lai, chihte ana kidong di'n k'on ngen hi. Hiai ka thugelh in a poimoh dungzui a kiuap lou a, kivehtuah louh di, chih lampang gen ahi kei, chih le simtute'n na theih uh ka deih lai hi.