Hiai thu Lamka a ka om sung a gelhkhin a post ka sawm leh keyboard support leh mouse ka ken khaklouh ziak in ka gelh khin zou kei hi. Laptop ah ka gelh sek a, keimah in ka nuaimang kha nak a, ka gelh moh zen hi. Ahuntak a, a hihna tak toh gelh ka sawm leh lohsam ka hi pen mai hi. Hilele a thupi himhim a tu’n kon gelh thouthou di.

Manipur solkal in Lamka leh a sehvel a village authority tuam a hon bawlsak uh term khat lel pai pan hi’n ka thei hi. Kitelna neih masak a hih lai in uthuai hi’n kuaman a koih khol kei ua, a diak a kou veng bang ah propose system a hih in a ki-propose peuh khutlik a va tel mai uh a bang hi. Himahleh hun a hong pai a, solkal in development scheme chi khat, NREGS/ MGNREGS kichi V/A khut a implement di’n a hon luikhe mawk hi. Huai tak in V/A memberte hi’n Jobcard-holderte hileh a thuneihna uh a hong kiphawkkhia a, a term uh bei ma nangawn a V/A member a pangte paihkhiak utna khawng a hong om pah hi. Member a pang lelte’n lah member hithei di leh hi theilou di criteria a thei mahmah ua, dan bang a vikkhia-khia uhi. Hilele a term uh a hong bei a, tu’n election neih a hong ngaita himhim hi.

V/A election di toh kisai a houlimna ngaihnophuai chih di hia, haihuai tampi a om lai hi. Election ni di veng khat a fixed bang suan thithe a om, bang pawl-pawl hiam bang kigolh a ngoh a om lai, mak tak ahi. New Lamka, Vengnuam a kitel ni di Oct. 22 kichi Nov. 5 a suan uh, atawp a Nov. 8 zingkal a kitel thei khong uh, chih ahi. New Lamka Hebron Veng a kitelna om masa, a ballot paperte uh kihal, chih hilai! Kou veng a le election di nih vei bang suan a om, buaihuai sim chu ahi.

Huaiban a, vote nei thei di leh nei theilou di kal bang gen leh sak a tam a tam, jobcard holder-te kia, chi pawl om; veng sung a teng det ahih nak uleh poilou, chi pawl om, buaihuai ahi mai. Election ni di kisuan thithe na ziak bang SDO a kan pawl toh, pawl tuamtuam a kan pawl toh, kihelh uh hidan in a kigen hi. Huaiban a, controversial mahmah nawn ahihleh ‘one man one vote’ chih ahi. Veng khat a V/A member di 12 telkhiak di lak a voter khat in 12 lak a mi khat tel di, chi pawl om; voter khat in candidate om tengteng lak a adeih mi 12 hiam huai sang a tam zawlou a tel di, chi pawl toh, interpretation haksa pipi a om a, SDO a va dong zut pawl a tam uhi. SDO lam a kipan a dawnna ahihleh ‘one man one vote’ omzia chu mi khat in V/A member di candidate teng lak a 12 a tel thei di, chih ahi. Ka om sung a election nei veng thum a om a, Headquarter Veng ah voter khat in mi 12 a tel; Bungmual ah voter khat in mi 12 a tel a; New Lamka, Vengnuam ah voter khat in mi khat kia a tel, a kichi hi. Ka pausan nung a kitelte’n bang a chi hih ua, chih ka thei kei.

Hiai thu ka gelh a lungluthuai ka sakna pen hiai ahi. V/A i neih tung ua kuamah vote zong omlou, proposal system a pai a, huai a ki-proposed khate khutlik a telching tawmtawm uh ahi. Himahleh tutung a hichituk a V/A member ut a hong tam ua, chin tei sawm a pan a lak mawk uh a ziak saupi zon a ngai kei. A utna ziak uh a chiang kekkok mahmah hi. V/A khut a MGNREGS implement ahihziak a sum om chih kuapeuh in a kitheih ziak ahi. Hiai ka thugen zadah pawl a om maithei uh, hilele Satan in hon sel lele ka pang ngam di. Sum om a, huai a kipan a luite hong puak uh, huchia midangte hong ut uh ahi peuhmah hi. Eilawi awngmawng a ngaihna omlou i hihna khat uh a om in ka thei hi. V/A member ana hisate bang hih zel a ut ua leh a summuhna uh sel deuh in Job-tiva, Job-car khawng in hong kitholh pah kei le uh midang in ut di koih a koih ngeoihngeoih di un ka gingta kei hi. Hilele nidang a mistry le hilou ‘jugali’ khawng a kiloh khawng V/A member hiam, mate khawng a hong hih uleh Job-tiva a tai pah a hong ut chiang ua midangte a chil uh phul hi’n ka thei hi.

Huaiban ah, veng neu tham deuh khawng ah nautang’ sep theilouh leh a khutsiam deuhte’ (skilled labourer) sep ngai a hong om hi. Huaite sepna dia material cost hong pai, hilele nautang in sem theilou, huai chiang a job- card holder-te a kipan a sum kithohkhawm in huai a na sem, material cost hong pai pen zanglou phial a nasep zou thei uh, huaite a kipan summuh nei uh, huaite mipite’n thei zui zel uh, huai khawng mah le midangte V/A member hih utsaktu a suak lai hi. A pau ngam taktak a om khol kei ua hiven, veng khenkhat bang a MDC election sang a sousang zaw sim om di’n ka gingta hi.

V/A member ana hisate’ ut lai na ziak lah kithei mahmah, V/A member dia ching thakte’ utna ziak lah kithei mahmah, Lamka leh a sehvel bang a hong bang diam ah, ana enzui himhim le maw. V/A member hih a utna ziak uh limlang mai a tu bangmai a chiang ahi. Kuamah ka demna ahi kei, thudik hi a ka theih hon salkhia ka hi lel hi. Ahim-him a, MDC election bang Nagate’n theihtawp a nang ua; eilawi a kilawp pen a pang. V/A election bang Kuki leh Naga lamte’n theihtawp a nang ua, eilawi a kilawp pen a pang zel, muhkholhna tasam deuh ihi di ua aw, chih bang ka ngaihtuah maimai hi. A lehlam tak a chu solkal et a dia a thumang mahmah pawl kihihtuak zel, huai khawng hi ka ngaihtuah maimai.