MYANMAR GAM BUAINA
~ Vungzamuan Valte
Tutung a Burma chia itheih tangpi uh, Myanmar gamsung buaina in mipite leh adiak a North East India a State 2 Manipur leh Mizoram te hon khoihkha diak ahih ziakin kikum sinleng chidan ka hi hi.
A BUAINA BULPI UH
Myanmar gam pen Military Rule in 1962 apat 1988 tan ana om ngeita a, huaihun lai in General Ne Win in hattakin vaihawm hi. Gen. Ne Win makaih a Burma Socialist Party (BSP) vaihawmna 1988 kum in mipite kiphinna (Students) nasatak mai ziakin paihkhiak hi a, Military Rule nanuai mah ah State Law and Order Restoration Council (SLORC) kichi in vaihawmna nei leuleu uhi.
May, 1990 in Burma gamsung kivaipuakna danbu bawltu (Constitution Making Body) ding MP 492 kitelna om a, huai lak ah NLD te 392 tak ching uhi. Himahleh hiai kitelna result military junta ten pom utlou ua, huchi in The State Peace and Development Council chi in vaihawmna lentou uhi.
2007 in The Saffron Revolution kichi Buddhists Monks te kiphinna nasatak mai om a, huaipen in Election omsak ding, Minority Rights kepbit ding, leh Political Prisoners te khahkhiak ding chihta a phutna uh ahi hi.
Huchi in 2011 in Political Reforms chikhat omsak hong hi a, suangkulh tangte tampitak khahkhiak hi ua, huaihun in Aung San Suu Kyi leng House Arrest ahihna apat suahtakna piak ahi hi.
2008 in Constitution bawlkhiak hi a huai dungzui in NLD te heutunu a pasal Foreigner ahihna ah government a dinmun neithei lou dingin gakna bawl uhi. NLD ten kiphinna nasatak mai neitou ua, 2010 a Military Dictatorship nanuai a election om pen NLD ten boycott uhi. Huchi in sepaihte thuneihna nuai ah USDP government in kum 5 sung vaihawm ua, awlawl in Aung San Suu Kyi makaihna nuai a National League for Democracy party ten leng 2008 Constitution pen pompih dan khat nei in, 2015 a General Election pen tuh ua, nasatak mai in Vualzou uhi. NLD government nuai ah Peace and reconciliation lam leh development lam nasatak mai in vaisai pah zungzung ua, NLD te heutunu pen State Counsellor chih minlawh uhi. Full democracy hikei mahleh, Free and Fair Multi Party Election masapen ahihna ah, Myanmar a dingin cheptehtham ching asuak a, democracy nuai a mipite kivaihawmna diktak chiam pahta ding ua lametna lianpi khovel in nei hi.
Hiai 2008 Constitution in Military lam apat representatives National Parliament te ah 25% seat reserve mawk a, State Assembly te ah 1/3 seats reserve mawk hi, huaiziak in elected government in thuneihna sangtak neilou suak a, Ministry poimoh taktakte Defence, Border Affairs, leh Home Affairs chihte Army heutute portfolio ahi top mai a, Army te'n Ministers ding guang thei uh chihna ahi hi.
NLD Government nuai ah 2015-2020 sungin Army lamte thuneihna kiamtuam mahmah thousam mahleh, i theihsa mah bangun State Counsellor leh Minister te'n absolute power tawi zenzen louhial ua, bangtan hiam ah Army te tawh kithuah kawm a a gamtatnate u'leng State Counsellor in a pauhual zelzel sam ngai hihtuak hi.
November ni 8, 2020 a election om ding chih ahong gintung apat September leh October kha nih sung mahmah Pandemic nasan khawksa louhial in mipite phurtak leh thathoutak mai in hiai kitelna maituah dingin kisa ua, internet ziak mah in akip akawi in kimuthei a kizuiden thei zawmah hi.
Result ahong suahkhiak tak in, Indiate danloutak in kitel ni mah in kithei ngal zungzung mai a, NLD ten landslide victory mu uh ahi chi in kipahna lianpi kinei teisam hi. NLD te'n seat 322 a poimohna uah seat 396 ngut mu venvon mai ua, a Army Chief uh General Min Aung Hlaing in election ma daih a a patauhna (Election result tawh kisai pilvan mahmah ngai ding ahi chi khin daihta ahi) tangtung petmah a, Military/Tatmadaw te thuneihna awlawl a bei dingdan in koihta ua, President bek ahih theihna ding lampi khuat panta hi. USDP kichi Military te political party te'n seat 33 kia mu nelnul ua ektehtut mai ding bangta uhi. Huchi in election pen fair lou ahi chih suanlam in thubuai labuai bawlpanta ua Election Commission ah complaint bawl ua, himahleh nawlkhin in om hi.
Huchi in Tatmadaw lamten thuguk bawl in, Military coup ni 1 February, 2021 in thuneihna la ua, President leh NLD party lubawk teng pawmang hiau uhi. Tatmadaw te lauh penpen ahihleh, a thuneihna uh kiam hiaihiai pen tutung election result apat junta te power beithei ding hong bangta a, Constitution nasan bawllamdang ahong hih ding sih lauh a lau ahi uhi.
A gintaklouhna lamdaih uah mipi sousang te'n nasatak mai in kiphinna nei pah tingteng ua, lauh neilou hial in panla ngitnget mai uhi. Doctorte leh Nurse te nasatak mai in protest matawng in pang ua, bank nasemte, sumdawngmite, Railways nasemte, Transporters te, government nasemte nasan kiphin ua, office khawng vuak gaivek hial leh kilawm hial hi.
Manipur Govt leh Mizoram Govt nasan buai mahmah ta ua, laipi sorkar thupiak nasan zui lou in buaina ziak a galtaite panpihna piak ding hanchiamta uhi.
Hiai buaina huaise semsem lai ding bang maimah a, tunitan in hinna 600 valte huhamtak a thah hita ua, mihing 3000 val dingte suangkulh a khum ahita uhi.
ETHNIC ISSUES AND INTERNAL CONFLICTS:
Hiai buaina in Burma gamsung a Ethnic Minorities te leh kum 70 val vingveng Militancy nasatak mai, sovereignty ngen a kiphinte leh Autonomy ngen a kiphinte (Panglong Agreement sukbuchin louh ziaka) ahon tawhkuang thak nawn a, hong huaise mahmah ding bang maimah hi. Burma/Myanmar ah CIVIL WAR ahong piang kei ding chih kuan agen thei a? Piang khinta leng ahi khamawh di hia?
A banban in sut sin leng part II ah…..
