MISHMITE GAM AH…PART II
Written by Vungzamuan Valte, Columnist Zogam.com.

1997 February khatawplam in India sorkar in ahon thupiakdan dungjui un, huai Mishmi gam a poppy danloutak a chiinnate (illicit cultivation) suasam dingin kuankhiakna thupitak kinei hi. Lohit District leh Yingkeong District te target deuh in kinei a, satellite image toh pangin poppy cultivation omnate aguk a etkhiakna (surveillance) report toh kikuankhia hi. Mihing mahmah, leh sum le pai, vanzat etc. kidaihlouh mahtoh Tirap leh Changlang district te kimitsuan phalou hi, hiai Mishmite siatna bulpi azungtoh karhkhiak ding chih athupi ahi hi. Sum zat ding Rupees lakh 5 lel hon kengsak ua, akuankhete TA/DA toh pan’khawm ngai dan ahi hi. Tua hunlai a Ministry of Finance (Department of Revenue) a Joint Secretary Reva Nair leh Narcotics Commissioner of India, Gwalior te supervision na nuai a hiai poppy destruction operation kibawl ahi a, Central Bureau of Narcotics apat team khat, Narcotics Control Bureau apat team khat, Nort East a Customs & Central Excise department apat mi 60 vel leh State Excise (AP) apat representative te banah security pen district administration apat leh CRPF personnel te ahi uhi. Operation bawlna mun ah over all incharge himahleng team nih a kikhen ngai ahia, district nihte a kigamlat deuh ziak leh kikawmtuahna omloupi ahihziak in, team khat Tezpur apat Brahmaputra kaan in Pasighat ah, huchiin Yingkeong district ah luttou in Damro kuamlak nuai dingin kuankhia uhi. Japan suak wireless equipment leh walkie talkie banah galthuam om sunsun tawikhia in, agencies chih apat team tuamtuamte Dibrugarh ah kisutuah dingin omna mun chiat apat ka kuankhia siausiau uhi. Dibrugarh ah planning bawlfel diam in, kei pen Lohit District lam ah ka kuankhia hi, himahleh agam mahmah haksa lawtel dan anahi zenhouh a Yingkeong lam a teamte toh wireless nasan a kithuzak banlou in ka ompah maimah uhi. Dibrugarh ah 24 hours control room hongkhia in bangchichi hiam in kithuzaktuahna STD tungtawn in aomthei hamham lel hi.

Office gari 30 lam poimoh ahihna toh department chih in a kentheih chiat uh hon keng ua, a kidaihlouhnate bel nek le taak ding puakna leh annhuantu dingte puakna in bus ki hire hial hi. Theihngeilouhna a gamtang ding, gamlakpi a giah zong ngaithei leh tuahsia tuahtheihna ahih toh, 1990 a operation fail dimdemsa, Hawai khua a umchibilh aom, hutkhiak ngai ahihdan khong uh kithei giugiau hi, lungsim thawmhau hial mah hi. Nek le tak mahmah zong muhlouh theih hi a, non-cooperation tactic zangin hon hentang thei ahihna uah localte soudop akul leh poimoh masa ahi hi. Vuahzunuai ah Dibrugarh apat Tinsukia, Doomdooma te tawn in Brahmaputra luinaklam manoh in, hiai luipi kaan gaalkai theihna ding mun Dholai leh Soikhoghat ka manoh uhi, Dholai lampi a siat luat mahmah ziakin Soikhoghat lam panin ka paita uhi, himahleh Doomdooma apat lampi mumaltak omloupi anahi maimah a, buannoi lakpi ah gari teng tanggawp in ka buaipetmah mai uhi. Bangzahhiamte Brahmaputra luikam tungman mah le ung, a tamzaw leh bus te lampi ah taang gawp ua, niitum utin hon ngaklou ahihchiang in, a nawnunglamte dinkhawl dingin wireless tungtawn in thu kipia hi, tea gardente guest house ah kihenkhawm mai unla zingchiang khawvak ah panlathak ni chih ahimai. Kou bel, Soikhoghat mun chih-haam in ka tungthei ua, Brahmaputra ferry omnawnlou (zekai man) ahihtoh gari 6 vel luipiau a buannoilakpi ah boatmente temporary hutments beel in ka liing kheukheu uhi. Nungkik thei lah hilou, maban lah sawnthei samlou in ka tangkhang ua, vuah in lah theu sawm mahmah lou, luipi lah liansemsem, ann nekding boatmen te ka bawlsak ua khamkhop omkei mahleh ann ngawllou in ka om vanglak uhi. Zan-giahna ding ka buai mahmah ua, ann nekna dohkan a giak pawl toh, longsung a giakpawl toh, longsung a giak ngamlou lah om, ka buai petmah hial uhi. Bihari boatmen khat in along hon awn a, numeite amailam ah, kei anunglam ah, a vanpuakte tung ah ka giak thei changchang uhi. Zan-kar in luipangte tuikihawt in tuahkhe duam zel a, ke-ging dum zel hi, zingkar in ka dakkhia a, tui anakhang mahmah mai a, luipang lianpipi ahekdemduam mai a, chizauhuai mahmah asuak hi, ihmut Kar in long khihna khau kisia hileh, zankar in Bangladesh kitung man hial leh kilawm hi, tui a hat mahmah ziakin, I kiaklup kei zenzen leh!
 
Zingkar khawvak in nisuak kilawmtak hon puak a, lawmte aomna uapat awlawl in hong kihawtphei thei ua, luipipang ah dak 12.30 PM in ka kisutuah thei hamham uhi. Ferry a gari guanlut mahtak haksa petmah mai, kesak kha zenzen le muhding om kiikeei louhial a mangthang hiau ding hiinchin, ferry in sik-khatthu a gari teng pawtheilou ahihna ah ka kiviallehsak nilouh ua, atawp atawp in khawmuizul in Brahmaputra luigal ka kaai khong khong uhi. Brahmaputra naklam a vuahzu in tuikhangsak  mahmah banah tuizang khauhsak mahmah a, luangging humhum hial hi, luipisung ah peivei kipei huthut ten amhaisak mahmah a, piaunel tuikihawt in a tuah koikoite ziakin long lampi kikheng pahpah a, longpu ten heel duaiduai zel uhi, capsize thei, tuinuai a kailut thei chizenhouh uhi. Ahia, longtung apat I khuadak leh river dolphins (fresh water) muh ding tam peuhmah ua, lung hon kilawpsak mahmah zel hi. Landing point zong kikheng kheng se ahihziakin ka buaisim mahmah ua, Sadiya Sub Division headquarter, Chapakowa khomial in ka lut uhi. IB nuamtak ah kitawldam a, khenkhatte forest guest house ah a tawldam uhi, himahleh zaankhua in vuah zu zuizui den maimah a lungliapna thupitak hontun hi, maban ah lui kaan ding lei omlouhna mun tampitak om ahihna ah. Zingsang baihtak in SDPO pa, mi nih keleu toh aguk khialkhial in muhna kinei a, ULFA te huaimun a tam mahmah ahihna uah pilvanhuai hi, officer hiai zahzah security omlou a ka pai uh nuamohlua asak thu hon muam hi, Arunachal sung, Assam border area ah zong omlawtel ahi ua, huai Changlang leh Tirap district gamgi lam ngial ah houh NSCN te om zawmah lai ua, Assam Rifles te patrolling paiden dingin kingen mai hi. Ground realities thei khukkhak kuamah omlou, leitung a munhaksatna mahmahte lak a khat maituahkha ka hihna uah, dakna lamlam, ngatna lamlam bing hileh kilawm hial hi, I officer kuanpih zouzaite ei khut a kinga hilai zawmah, thawmhauhuai ka sa mahmah mai. Chapakowa, Sadiya Sub Division, Assam ah Pu H. Chinkhenthang in IAS a muh tunglai deuh in SDO hingei hi, awl a Meghalaya lam zuan ahi hi.

Arunachal border check gate aninawn sunma in ka tung uhi, huai ah police te leh state excise ten hon vaidawn ua, himahleh apamzek ah nullah khat let chihtakpi in lian ahi honchi ua, zingsang in bel khe a paikaitheih ahi, luinaklam ah vuah hahzuklua chidan ahi uhi, maimah aw! Beidotna ngen, beidotna ngen. Namsai khua ah IB khat om hi, ka kikulh ua, kei bel hamphathuaitak in kou department a sem 1976 batch, Digaru Mishmi te laisiam Madam Fantry Mein (Jaswal) pianna khua hikha laizang inchin, tawldamna mun ka maidok hi. Zingsang baihtak in enkhetu kisawl in huai luilian nuanua pen, tui khe a palzoh dingin ana om maimah a, kin leh buangin ka kikhohkhia sungsung hial thok uhi. Ka taiphei zel ua, Digaru (Pagla nadi/Mad river) achih uh ka tuntak un lei leh vaan kikhaih in anakikhai nawn leuleu a, lui-hai achih mahmah uh diklawtel sakna in kipumdim zouhial hi, khaal laai in hiai pen lui hilou in gamkeu leh suangphoklak asuak a, mualsang lam ah vuah azuk chiangin flash flood ngamlekhat thu in om phutphut dan anahi maimah a, ka mangbang mahmah mai uhi. Tui kihawt lah ging buabua mai, sing le suang khong tai duamduam mai, ging humhum zawzen in a khangzek a Lohit lui lianmahmah toh kizom uhi. Bihari longpute toh kihou kihou in, mautawn leh khaugui pangkhawm in gari khat leh mihing 3 or 4 zel sikkhatthu in kon piikaai ding uh achitazen ua, lungsim bel koilaklak hiam kilok ging dupdup hialmah hi. A hangsan deuhte kuan masa in, gari khat toh mihing thum le li khong tuang in ahong kipanta ua, haksa satak chu ahi uh, chihhaam in a galkaithei ua, khutkoi mutzen in ka kichibai molhmolh mai uhi. Gari thum leh li galkaita, tui lah hat deuhdeuh, khua lah mialsawm nawn leuleu, vuah la zuden ahichiang in, galkaisate mah lungsim ah om hiven, midang teng nungkik a forest lodge manoh dingin ka vaikhaak a, zingsang chia kithuzak ding chi in, kei a nawnungpen dingin ka kuankheta hi, plastic khaugui khat toh maupum tawn bangzah hiam in ka hinna uh a lentang hamham lel hi, haksa sa petmah in ka galkaithei khong khong uhi. Khua omloupi anahi maimah a, vuahnuai ah khawmial in honlap ahichiangin, nektak bawl ding a buaihuai petmah leuleu hi, Bihari longpute mahmah phathuai sa ingh, hiai tantan a mihingte hunkhe ding a nekzonna a hong patkhiak mahmah uh. Ka houlim ua, mi 30 vel nek ding bawl tuh hautak asa mahmah ua, chihdingdan tuan omlou ahihna ah, gari khat leh mihing 3 leh 4 long a kipuak galkaina lel leng Rs 200 ahia, ann hon bawlsak ua, um le bel kidaihlou, kou puakte lah hong tunglou ahia, dak 9 vel in, lim in limkeitaleh bawng ek nam vingveng nuai ah chiak thei teng chiak kawm in, sanga chu tel hileh kilawm, kibahgawp petmah, gilkial lawtel mahmah ahina toh, ka ne eksam uhi. Lupna ding buai in ka buainawn leuleu ua, annnek dohkan a giahsuk mai telzawte chu ahithei a, school building KM nih a gamla manoh in local ten va kha ua, kei leh numei teng huaikiim a Army emergency team te puanzaknuai ah lupna kheptheih tung ah lungmuangtak in ka giak thei uhi. Army personnel 4 lel om ahi ua, lupna ding hon awn ahi uhi, tua nitak’ amau koi a giak aduam a?

 
Zingkar in lawmte ahong khodak phei ua, tua luilauhuai pen gari a tai gaalkaai thei in ahong tung nawn leuleu uhi, kipankhe nawn leuleu in Tezu khopi (Lohit District Hq.) ka manohta uhi, Tezu khopi tunmazek in nullah khat analian tagetzel a, ka galkai teitei theivanglak uhi. Circuit house ah room teng ka luahdim vek ua mun tuamtuam ah kihawmzak in khamuangtak in ka omtheita uhi. Zite toh kithuzak louhna sawtdek ahihna toh STD bawl dingin STD booth lam manoh sauhsauh uhi. Mi thum telkhia in D.C pa Dev Verma IAS kimuhpih in detailed programme kibawlkhia hi, CRPF te Roing apat hong kipankheta uh chih leh Arunachal battalionte kisak khawlna hungaih kawm in SP pa Lama toh security lam gelfel sipsip in Hayuliang Sud Division SDO pa thupiak ka ngak uhi, local mi VLW dandeuh mi bangzahhiam kipoimoh a, coolie ahuntawk kipoimoh bok a, local Magistrate thum bek kipoimoh bok hi. Huchih Kar in, BRTF te heutupa a Commander uh (SE rank ahi) a camp uah va mu in, hiaigam haksa lawtel mahmah, tuilian, menchim, Leilawn kisia, nek le tak, mihing leh van leh gari security thil ah zong buaitheihna tamlawtel ahihna ah, coffee dawnkawm in, na organisation un huhtheihna teng a non huh uh ngai ding ahi, chih thumna ahi mai. Mi hoihtak ahi a, kon hun mahmah ding uh, hileh leng kou hiaimun a omden ding ka hi ua, localte sukkhasiat louh hamham a poimoh pen ahi, nou toh semkhawm danin kilang le ung, na painung ua kou lehbuai ek ding ka hi ua, alangtang loudeuh a vaisai ngai ding ahi, achi hi. Nitak khat huai district sung a SSB lam enkoltu Commandant in ann ne dingin honchial a, mi thum ka tonpih hi, glass nih vel a valhzohtak in a lungsim ahong kilangkhia a, poppy destruction bawlpen thilhoih ahi kei, localte sentiment buaisak ding nahi uh, hihlouh hoih ka sa, na hihdek taktak ua leh kei local mi ka hi a, na program uh hon theisak un, hon chimawk hi, ann nekhin, pautamse lou in, hiaipa le mihaipi eive maw? Ka kichi ua, na thunuai a sem lah hilou ung a, chih lungsimna toh muh ka sawm nawnse kei hi, muh leng Ka munawn bok kei.
 
Hayuliang SDO pa’n sawltaak hon sawl in Tiluwa lui naaklam ah tui lian lawtel mahmah, lei lah omlou zawmah ahihchiang in gari teng lui lehlam a koih ngai di, mihing bel suspension bridge a pai gaikai di, huchia Hayuliang khua, truck leh Hayuliang a CRPF te bus zang a tun theih ding chih ahita hi. Roing apat CRPF te hong tung ngeilou ua, anithum ni in ka kuankhiaksan ta uhi, SP leh DC te kiang ah, hon nungdelh mai u’hen, phamoh kei ka chi hi. Lohit luipang ah kitai kitai a, munkhat ah PWD te EE khat, lamsak lam apat suang hong tuksuk in alu alak hiauna mun hon hilh ua, heiha! agam mahmah le kense si, mualsang thei si, suang lah tam, luitui lah kihawt ging zuazua, lui neuchik chik isak le palzoh ding himahmah lou, tui a phul a phul maimah, gam maktak ahi himhim. Mualsang lam kon manohta ua, HAWA PASS paina lampi ah Vaite Lord Krishna in Mishmi Nungak  a neihna mun kigalmuh thei chiichiai hi, Thaironchong khua bel kimukha lou hi, CHHURA lawinu tuallenna. Hawa pass lut touhna ding lampi kikhep kikhep ahia, serpentine curve achi uh, atung apat ka sim ua, khep 18 suah bang, khep 20 suah bang, amun sang mahmah ahihna ah, huih vot mahmah a, pass ichih kha, pi leh pu ten gam khat leh gam khat a kawmtuahna mun uh (mualtungsang tak a KAWN) mihingte paisuak theihna mun omsun chihna ahi. Hawa pass apat bel kumsuk kumsuk hinawn taget zel, lui liansim kigalmuh pah chiaichiai a, I kumsuk suk leh kitung pah hetlou hial hi, leilawn dandeuh om inchin kikhamuang tuan hial hi. Lampi ah hotel chihding omlou ahia, lamgei a buk neuchik khong ah nekding zuak aom sam uhi, gilkial ahih toh nekding ka zong ua, alimkei petmah mai, ehe! Hichi di ahih in, bang ichi khosak dua oi! Chihsimpah in aom hi, a tamzawte roti ne hinalai, en a ann uh, a meh uh netheilou chu, vaite’n nekding amu mah dua aw? Chih ahi mai. Ka taitai ua, Tiluwa (Tilwa) lui ka tung khong uhi, SDO/BDO leh midang dang ten hon vaidawn ua, luikam tan gari a taithei hamham hi, leilawn kisawi derhderh ka mitsuan ta uhi, driver tengteng kiang ah BRTF te labour camp ah gari teng toh na giak ding ua, ka thupiak louh in vakthap kei un, giahna ding leh nek ding na muhmuh dan un ana kitoudelh mai un chih chiang lel kigenthei hi. SDO pa gari toh BDO pa gari toh truck toh, CRPF te bus toh kizui in Hayuliang IB ka tung khong khongta uhi, Lohit lui gei aom ahia, nuam vanglak eingal. Hilehle, etna lamlam mualsang ngen in tuamkimvel a, lungjiinhuai chihdan ahi thou thou.
 
Wireless kon fit pah ua, Dibrugarh, Shillong, Gwallior chihchu gamlatak ahi, Yingkeong a kuante zong kihoupih thei ta himhim loumai, STD lah chu Sharmaji khat sumdawng hausa in control chi ua, line ahon piak leh pai chang chang lel, mobile omnailou ahia, kithuzak theilou in kitangkhang ta hi. Omna, dinmun leh progress report piaktheihna omlou ahihziakin, CRPF te wireless tungtawn in Tezu ah coded message kikhak a, huchi in DC pa’n Dibrugarh lam ah Fax in daily situation report hon piaksak thei changchang lel hi. Tun nitak in vaihawmna nei dingin mi 4 ka tonpih a, SDO leh BDO ten dinner vaisai ua, houlimna kon panta uhi. SDO pen Khonsa mi hi a, BDO pen Adi mi ahi, Arunachal ah chu Adi te namsang in kikhoih deuh ua, pau zong pauthei deuhmah hi. Arunachal Pradesh Civil Services pachal ahi ua, Delhi khong a laisin zou ahihna uah pilna chiangtak zong nei uhi. Aksa, sanga khong bawl ua, royal stag hon hawm uhi, peck nih vel zoh in, sir, bangchidan a program bawl ding ihi ua? Kou deihdan inchu, hiaimun ah kar khat om unla, poppy plant na deih zahzah kon pawsuah ding ua, lim khong ila ding ua, huchidan hileh hoihpen ding ahi, mipi toh kinawktuahna lah omlou ding a, Hawa khua a MLA pa bangchu Minister hilai zawmah inchin, ahon chita mai uhi. Ann ne ding a hon chial na hi ua, zingchiang in I genfel zaw ding uh, chi in ann nekzoh in ka kikhenfel theiham uhi. Ka nuai a superintendent teng samkhawm in team thum kibawl hi, local official te ut in utkei tale uh, kuan thouthou di, Hayuliang OC pa toh kei kithuah di, team khat Tezu OC pa toh, team dang khat Arunachal Pradesh Battalion company commander toh chi in vai ka hawm uhi, Magistrate khat chiat ahon got ding un thu kipia hi. Himahleh, vangtahhuaitak in azannawn in Hayuliang apat KM 5 lek ah Menchim (landslide) thupitak om zenhouh a, BRTF ten kar nih bawl ngai di chilaizang ua, mangbathuai sawnsawn mahmah mai hi. Ni thum sung kikulkum a ka om nung un a kidaamzoulou toh, localten lah buaina bawl ding kia zong ahihna uah, ki discipline zoh honghaksa sim pah mawk hi, nitak chiangin khamtheih bang hon nei ua, laithai kap in chimthoizou nawnlou suak hi. Ani 3 na in menchipna enkhia in ka diangsuah ua, Lohit tuilian in mualpang aa lampi nemang anahi zenhouh a, bawl ngaihna leng omlou hileh kilawm hialthok hi. Munkhat ah ka din lai un, BRFT labour khat in, hiai gei ah labour nasem omlai ngamkhat aa leinuailam tui in lamang inchin mi 8 mangthang hiau, chih honhilh thahah leh ka kiguih zawzen hi, kum 3 paita a thiltung ahi hi.

Hinawn mahmah kei, menchipna tan gari in ipai ding ua, khe in I phakzohna tantan uh pai ni  chi in, ani 4 ni in vai ka hawmta uhi. BDO pa’n linpipi in honzui a, CRPF te van toh kou van toh Coolie 40 in honzui ua, kong paipai ua khomui kuan in khua khat ah ka kingata uhi, huaiban ah menchim lianzawsem, khe a leng paigalkai theihvual hilou om leuleu a, chihngaihna omnawn tuanlou hi. IB ah kihenkhawm in CRPF te school building ah, kong ihmu ua, kong nak taktak uhchu aw, mobile om hileh aging ngaihnophuai mahmah ding hia, tawlam toh, gawlging toh, naakging toh, iiknuahnuah toh, tawlchiat chu, anasa eive aw! Dak 12 in BDO pa hong paimawk, buaina om chizawmah, amhaihuai tak ahi, mei lah omlou, CRPF ten numei hostel a naupang omte va hawlzak uh, chi. CRPF te isap chia huchidan om hetlou ahihdan kichian mahmah zel, lawmpa’n lah, numei ten identification bawl thei ding chi ahi uh, honchi zawsop. Ka thangpaihtha suakgawp inchin, aw le, zingkar in identification parade ibawlsak dia, meivak omloupi a mihing mel muthei te mit avak mah di maw, ka chih leh dai vengveng, azingsang in le bangmah gennawn se kei hial. Zingsang baihtak a breakfast lunch toh kithuah nekhin in, khokhunglam, khotawmlam leh lamkhang, lamsak teng kon vaatmai taktakta uhchu, akap chelchul mai uh, mualtunglam ah group khat ka tonpih leh, inn tamlou ana om inchin bangmah genlou vanglak uhi, paikhengsan in mualpang hoihtak, lampi apat kimuhlouhna mun ah poppy plants dintantan mualpang dimsek in om metmot mai hi. CRPF te kivengsak in, Arunachal Armed police te atunglam leh a nawllam a kivengsak in ka hon zial taktak uhchu nuamtak ahi, pitek khat banghiam hih a pau mulmul ana om inchin taikhe ut mawngmawng lou, poppy plants pen ankam dawng ngikngiak bangdeuh ahia, seasonal ahihtoh a zik kitanleh (buds) bei mai ahi, tem a sat ngailou, chiangpum a khettan ziauziau ahi mai, khatvei khet a laam khat, laam nih kimkot maat zeelzuul dan ahi. Loumun lianpetmah ahihna ah, hun leh tha tampitak lut a, dakkar nih zoh in chu ki-et liakliak in aom hi. CBN team ten louchiing feet teh ua, huchih kar in lamlian gei a khua khat a gamtangte nawkdarh dingin mipi sousangte kisa ua, kimaituah in chiangpum toh kibei ek mah uhi, a husa uh kiza mahleh I nasep kizounailou ahihchia kidiangkhe pah theilou, atawp a thau hong ging tuartuarta mai, hei hei hei, chia kikhohsuk ziang, a nupi te un tuisa lak a thaksikvui hel a CRPF te ana buak uh, tem toh bang toh pang uh, huchia firing order piak ngai, BDO pa’n ana pe utlou in AK Sharma in pesukgawp dan ahi, poi kei, nang piak chu kei piak ahi mai, ka chi a alungdam mahmah.
 
Nupi thangpai ten a taw uh leem ua, ataw uh lak ua, hamsiatna chikhat dan a Mishmi ten angaih uh ahi. Chiangpum a zepsak toihtoih dan anahi ua, limlakna a late bel ka paihsak vek hi. Ka muhphak teng uh metmaivek in Lohit luigal lam bel leilawn omlou ahihtoh ka masuan theita kei uhi. Zan khawmial in Hayuliang ka tungkik thei hamham ua, aliam leh a mang omzenlou in ka bubit uhi, galvan mangsak zong omlou, kipahhuai himai, thauvui gim bang kinam vingveng hileh kilawm hial in, manglam bang abang zawzen hialthok. Thautang bangzah mawng mawng kikhah hiam report honpia un ichih leh CRPF te kia isak leh AP Bn leh local police te nasan in nuamsa lawtel anahi maimah uh, suaikaih ding teng kaih ahiziang mai. Hun bei hulhul ahihtoh Choglagam leh Goiliang lam nawkzek in ka paisanta uhi. Walong, Hawai leh Lati valley lam chu remchang lou ahipeuhmah dia, mihing thuneihna baak a thuneitu Pa Pathian mahmah in menchin lianpipi hon daalsak ahihna toh anawn chiang a midangte sutzop dingin ka khawlsanta uhi. SDO leh a BDO ten hon vaikhak ua, sir, kumnawn chiang in zaw hong hohnawn mahmah ke’n aw! Achi uhi, ke’n le, midang ahong kuan’tak ka gingta, chihteng in ka kikhen ua, Tiluwa luitan ahon kha uhi. Driverte toh ka kimaituah tak un, akap ut phial ua, haksa salwtel dan ahilam uh ahonhilh chiang un ka hehpihtha asuak mahmah mai hi.Hucitel a mun haksa, ka hohnawn mahmah kei hial ding, mite lungsuna leltak hizawmah, chihngen ahi, naute gen. Ke’n bel, I sep ding sem ihi, deihbang in panla theilou in, khuavang in hon siam zenzen a, huai dan kikei leh local government te hihbutlouh hihsak ihia, denchiah kipak lawtel mahmah ding uh ahi, sualdouna ahia, drug trafficking nasan omta ahi, helpawl zong kigolhta uh ahi, ka chichi hi.

 
Tezu ka tungkik ua, STD booth chu a luck khop mai, ken le sungkuante kar 3 nungin ka houpih ta khong hi. Zingkar in Tezu geilak ah khua bangzahhiam ka phakual ua, ngampatak in gari deih zahzah toh taikual in ka muhteng uh ka baan zial uhi. Loiling khua ah tamkhoptak ka meetmai ua, chiik le achi ngam kei uhi, buaina bawl aom peuhmah leh mat di chih ka lungsim tintenta hi. Khua lumdeuh ahihna toh Tezu kiimlak ah bel March khabullam in zong opium (afim) e’n kani ichihmai laktheihta a, agahte pum pengpong ua hoihthei ngial uhi. Zabel chiachia pha ua, DC pa kiang ah, hiai na huangsung (Tezu kim leh kiang ah) mahmah ah hichidan tampitak om ahi, chiin tamkuamtak popy ball/pods ka pesak lemlum a, a kisuanglah viau, SP pa bang mohsa dek mawk. Khua khat ah ka lut dek u’leh, lampi ah sawl ana kikoih mawk, a khuasung ua inn khat apat meikhu zaampawt nguainguai mai, bangbang hiam ging lumlum, ADC pa’n hon zui hiven, puja nei ahi ding uh achi hi, ke’n bel lampi a sawl ka muhphet a theipah ka hihchiangin, lut teitei di maw? Ahon chi a, ke’n lut lou e, pusa biakna bel ei ahon dalna ding ua abawl uh ahi ve, hileh le, kei le tribal ka hi a, biakna bel ka zahtakpih hi, kik maini in, niteng a bawlsamlou ding ahi ua, poppy zong mangmawk louding ahihna toh, kou paikhit nung in bawlchai un, ka chi a ka kikhenta uhi. DC pa kiang leh SP pa kiang a kipahthu gen in, maban a panlakdingdan genkhawm in, suggestion tamlou gelhthoh a pia in innlam ka zuanta uhi. Kuanlam a haksatna teng, nikhatthu in ka taikhen’san vengveng ua, Digrugarh bansuak in Paite innlam zuan chihmahtak ka hatngial uhi. Amak mahmah bel, ahun toh kituak khalou adiam, kou vangtah ziak adiam, Dibrugarh apat Tezu zan thum ka zatna uah, ani 4 ni a Tezu tungpan, kiklam in nikhat thu in ka paisuak mawk uhi. Ka hohlouhna ding ua thumpawl om aduam aw, ka chichi mai.

Finance lam ah numei nih, khat in sum kem, khat in record bawl, ka saisak a feltak in ka tunnung uh karkhat sungin final report ka pia uhi. Bangteng hileh, physically very challenging, mentally nerve wrecking, emotionally difficult to sustain, chih tungtang leh, Himalayas gam haksatdan, amite a hehpihhuai dan uh, gawtna hilou a livelihood methods dang, sustainable development piansak a kuldan, opium addiction pen a sakhuana uleh cultural moorings, traditional practices etc. ua tel ahihnate theihsiampih a, awlawl a piikhiakna nasep apoimoh dante ka hahgenpen hi. Future operations ading do’s and don’ts tamtak ka kawkmuh bak ah, planning leh execution pen a syncronise mahmah poimoh a, local support system bawkhiak a poimoh dan leh amau support lou a thil hithei vuallou ahi chih toh, ka ihmutsan sawmta hi, haksa adiam a, ka sisan ah omden a, manglam khong ah hongsuak zelzel laitel hi. Vaan Laukha vaakna omlou, Gammial diktak chu eive…….Pu Khawtinkhuma, Luseite MA masapen leh a Finance Minister masapen uh NEFA ah Assistant Political Agent in omkha ngei hi, a chanchin agensekte, a nasepdante khong local miten thei mahmah lai ua, amah ziakin hon Mizo bawl ua, hon lainat hial uhi. Pu Khuma ka lungsim ah hongsuak dundun sek a, khual azin chiang ua Kuli tampipi toh azinsek lai khong uh, a gensekte ka mangngilh theikei hi, Aizawl a ka omlai in ka landlord ahia, amah 1997 in sita hi. Gensau zek lai le, Pu Khawtinkhuma kha Mizo movement ah amatawng hi a, India government a khemkhiana dan in dinmun hoihtak pia in NEFA ah, huaikhit in Manipur ah dinmun liantak nei in koih uhi. Mizo Union Memorandum masapen, India Prime Minister kiang a petute lak a khat ahi, a gelhtu amah ahia, Mizo Nam lak ah Paite (pronounced as Paihte) chiangtak in tuangsak hi.