TANAU LAINA
Written by Vungzamuan Valte. 
Tanau Laina ichih pen English in Kinship kichi a kitanauna I gen chiangin relationship in zom hi. Bangchidan a kitanauna hong piangdok hiam, kuate tanau laina hisak ihia? Chih khong I ngaihsut chiangin, mihingte I khosakna dan leh kivaihawmdan ah kinga lian petmah a, tanau suahtheihna dingin kalbi tampi mahmah om hi. Nupa kitenna in sungkuan (family) bawl a, sungkuan in ta leh tu suangsak a, unau, sanggam, laina, tanau chih khong piangdoksak hi. Kinship pen blood toh kizom hilhel a, laigui zom, sisan kizoppih ichi hiam, sulkhat kual ichih khong in kitanauna genkha diak mahmah uhi. Tui sangin sisan gikzaw ichih zong athupi mahmah genna hizenhouh a, sisan a kizopna neite mah kingaina tuntun, kideihsak tuntun leh kinek‐it tuntun se uhi. Nidanglai mite I et chiangin zi leh pasal ding akizon chiang un akithei nai leh kizop khakna nei, ahoihna uleh a siatnate uh kitheituahte mah kizong se ua, zi ding a taak, pasal ding a taak chih omsak se uhi. Khanggui nasan kisui kisui namah ua, kansui ding leh gel detdet ding tamsak diak uhi, banghanghiam chihleh chii‐kikhah dingin vasa leh ganhingte nasan in deihteltheihna lungsim pianpih hive un, mihing ten chu lunggelna I neih ding mah anahi hi. Kumpi lian taktak ten, thupisem suah a utna ziak un marriage diplomacy zangin kitanauna bawl ua, kihuhtuah ua, khangtou hulhul mah u’zaw hi. Meitei leng nasan in 15th century AD in Pong kumpi tanu nei dingin kisabemten mahleh Sourumkhum in Khampat ah (lampi ah) ana lambun eksam mah hi, tuaziak mah ahi ei Zosuante I darhzakna san uh, khamtung zuan a taidarhte ihi uhi. Ahia, zite toh kitanauna bel sisan kizopna dan in kisim lou deuh adiam? ta leh nau neihpih ding, khosakpih ding leh sungkhat dan a kilakna hizaw leh kilawm maimah. Aziak bel, pa khat in zi nei a ta nei hi, huaipa ta ahi hi. A tapa in zi nei a ta nei hi, huaipa tupa ahi hi, a tu in zi nei a ta nei hi, huaipa tusawn kichi leuleu hi. Hiai inkuante khangthu ah pasal kia kisim a, pasal ten kisisan zopna piangsak hi, pasal a omlouh chiang in khangmang kichi zawmah lai hi. Banghang hiam chihleh, ei zosuante bel Patriarchal society kivaipuakna dan a kienkol leh kimakaihte ihihziak uh ahilim hi.
Immediate family ichih chiang in sanggam laina ichihna hi a, extended family ichih chiangin kitanaupih chihna dan ahi hi, zite’ sungkuante anawlam hi ua, In Laws chih ahi hi, huai bel kikahiangna nei,
kizopkhakna nei chihna ahi hi. Himahleh, zi leh pasal (nupa) a kineihna bel blood relationship himahleh (kinship) sigui kizopna in huapkhalou zel hi, ahangbel kitenna pen beisak theih, tawpsak theih (kimakna) himawk inchin, kiplou leh detdoulou suakthei mawk hi. Tuaziak mah ahi, I pipute danin numei leh balchi, numei leh vokkuang, numei in sakhua anei kei, leh numei in kha neilou ding zahdong a koihna nei lawi kiom tel hi. Nupa khat in ta nei ua kikhenna a pian’khak chiangin a numei in enkol mahleh ata phung bel apa phung hiveve hi, sisan mah gikzaw hilel mai. Kitanauna ah zong kuahiam khat in anu phung zuan mahleh mihing ngeina dan hilou a, pipute dan hilou ahihna ah khonung buaitheihna tamtak piang veve hi. Tapa taimang suahtheihna tampi mahmah om a, phung taisan sawm mihing omsek mah uhi, khatvei Aizawl ah Thomte putek khat (tua chu sita), pu nang bang dia Pachuau na kichih eite? Ka chih laizang leh, Pachuaute insung a khanglian hi unga, Ngopa apat Sairang ah ka pem ua, kum 40 ka khosa ua, huchiin Aizawl ka lut uhi, hileh le khang nih khang thum tan in le Thomte ka hihlam ana thei kerkur atam mai ua, Thomte ka suakthak mai, ka tate certificate teng le ka khekthak vek achi hi. A tate college lecturer leh sepna hoih taktak nei om uhi.
Leitung ah sisan a kizopna leh khosakdan ah chiindan tuamtuam om mahtham hi, He Mosuo kichi, Lugu Lake, China geilak a teng mihing 40000 vel tribe khat om ua, numeite lalna gam (kingdom) chi uhi, ahangbel numei ten pasal kitenpih lou ua, a utteng toh kipawl in ta nei thei uhi (free sex), tangvalpitou hinazepi a numei ten a kipolhpih ut kei ua lehbel khaithawn suak dengdong thei ua, numei ten a lupkhawmpih ding uh deihteltheihna sangtak nei leuleu uhi. Numei ten insung kem ua, nek leh tak sutuah ua, ta leh tu enkol ua, neih le lam nasan numeite khut ah kinga hi, banah gou le gam numeite khang ah kipesawnte hi uhi, matriarchal society ahi hi. Meghalaya ah Numeite thuneihna sang petmah a, numei in innsung ah vaihawm ua, tanu naupangpen in gou le gam luahsawn hi. Hichidan society ah pasalte mohpuakna niam mahmah a, khantouhna kalbi bawl hamsa mahmah leuleu hi, pasalpitou mouthak dia zite insung a va Namaste khualkhual di chu uthuai thahah louhial hinmaw. Khasi, Garo, Jaintia te societies ah numei thuneihna ahivek hi, banghang hiam chihleh, nidanglai in pasalte galdou dingin kuankhia ua, hin le sih kikar a om gige ahihna uah insung kepna numeite khut ah om mah ana hi hi. Hun hongpaizel ah zong hiaidan a kivaihawmna kheklou in paisuakpih thahah laizang ua, kituisabuah lemlum uhi. Pasalte naman lou deuhdeuh, pasalte paa dinmun a dinglou a visitor, uncle dinmun hilel, ta neihpihtu dinmun chauh, singkuan khaitu a sehna omlou ahihna ah kiakniamna namenlou tung hi, khasi numei ten namdang pasal a felzaw enlah ua, khasi society ah laklut theihna dan bawl ua, ami asa uh suaksak uhi. Himahleh, pasal ten namdang mite neih chiang un khasi mi le sa in simlou ua, zong khasi society a laklut theihna dan bawllou uhi. A society uah kituahlouhna namenlou meima lianpi paai tentun ua, pasalte kikoukhe ngamlou in kun khiukheu leltak uhi. Khasi tak leh khasi taklou chih tangkoupihte mahmah zong hamhaih takzet ua, pure blood omnawnlou chithahah laizang uhi, amau sisan kia kipesawn nilouh le uh bang suak ding aduam a? Tua zong pygmy te sang a lianzawdeuh chauh hive un, genetic improvement omlou in khosuak sihva uh.India sung ah Kerala a Nairs, Ezhavas, Warriers chihte zong Matriarchal societies hi ua, Karnataka a Tulus te zong ahi uhi, himahleh hiaidan a kivaihawmna in kiakniamna tun a, awlawl in dau deuhdeuh a, kiam hiaihiai ta hi.
Tang a tuan in, ta neilou ten kep nei ua, adopt uhi, huchidan kikepna ah phungsuangtu suahsak pawl nei uhi. Himahleh nampi kichiten huchidan te pomlou ua, sianglou leh diklou in Judate bangin tuh koihtop mai uhi. Nupa pawlam ah ta piangthei ahihna ah, kholak ta chi ua, zawlta zong chi uhi, himahleh huchidan naupangte kha, pa te phungmin mah pusak uhi. Ka ta ahikei chitintente ta bel phungbei suak ua, nute a koppih louh chu chihdingdan dang omlou suak hi. Tamasa, tanawn leh sawnta chihkhong nei teltul kiom thei a, huchidante kha insungmi a sim ahithou uhi, himahleh kipawseh deuh omlou theilou ua, angsung tang, intekna tang deuh chih piangdok hi, sungkhat (kin) a sim ahi veve uhi. Kitanauna ah tulai khovel in a puaksuah gestational surrogacy (zi hilou, numei dang naupaisak), in-vitro fertilization (donated ovum), leh naulak chih ten sisan a kitanauna (biogenetic basis of kinship) dausak mahmah ngeingut a, gays leh lesbians ten naukep nei le uh kuapen apa, kuapen anu chih leh a phung mahmah uh buaihuaipi ding suak hi. Mihingte kitanauna buaisak diak ding bang maimah veh, kemtu (guardianship) hihna leltak dinmun ahih ziakin. Foster parents (nu leh pa taklou) chih mahtak om ahihna ah, foster children (ta taklou) chih hong hisawn sawn zawmah laizel inchin, huchidan naupangte a dingin amhaihuaipi suakthei laizang hi. Naupang in a deihtelna neitheiloupi a leitung khuavak hong mumawk ahihna ah hamhaihna lianpi masuan in khovel hinkhua hon paltou ding a, liangvaihna khovel zaw ahipen mai ve.
Kitanauna bawlna ah vaite chihdantak leh sanscritization chi ua, nam sangzaw neih teitei sawmna lungsim banah hihna sangzaw, neih le lam hauzaw neih ding kituhna khovel ah leeng uhi. Leitung a nam tuamtuam ten class system nei deuhchiat ua, nam sang leh namniam chihdandeuh in kikhen hamtang uhi, Judate hinkhua ah namniamte simmohna liankholdiak a, vaite hinkhua ah zong huchimah in pai hi, puansawp pawl, galdou pawl, biakna saipawl, vaihawm pawl, siksek pawl, mite nasem pawl, sapul khoihpawl chih khong in. Huchia kikhenna ten social systems hoihlou piangdoksak a kimuhsitna leh kineksiatna pianpih hi. Tanau laina bawlna ah haksatna lianpi tun a, zi leh pasal zonna ah thilhithei lou chih leh taboo, zek tampi neisak hi. Huchidan mahbang in Zosuante lak ah zong vaihawmpawl (hausa), siksek, siampu/siampi, tangkou, galhat, khawnbawl upa chih khong in kikhen diudeu a, zi leh pasal zonna ah kideidanna liantak neisam uhi. Liandou leh Thanghou te unau chanchin ah kitheichian mahmah a, Khupching leh Ngambawm te tangthu ah zong chiang sitset hi, tagah Meithai te a dingin mihausa, mithupite tanu beiseih ngaihna omlou asuak hi. Man tampipi kisial ua,sial in kisial ua, dak leh khimantam in kisial ua, leizou lou in deihpente tulzen in teksan ua, khangdawn’lai a senchil ngaihte ngilhmoh kisa in la phuak zialzial uhi. A nei leh anei mah kideihsak zenhouh ua, vaite’ paidan toh kilamdanglou hial ana hizenhouh akei maw.
Zosuante kivaipuakna dan ah, tapa upapen in innpi ngak leh tapa neupen in innpi ngak chih kihelh neinuai a, Sukte leh Mizote paidan in tapa tumpen in innpi ngak hi, vaihawm liana asuak hi. Namdang atuam tuam ten bel tapa upapen mah innpi ngak in kinei a, kichian mahmah linlian hi, vaihawmdan zong dikdawmdeuh hi. Lusei ten nou kivaihawmdan hoih zaw ahi chi ua, lah khekthei nawnlou suak uhi, nautum kingeksak in nu le pate lamsuahsa nekmang kar ngaklah lua sadan ahi uhi. Ahi, zi neih pasal neih ahun chiangin, zi ding hel ua, kitenna a omkhit chiangin makpa chih piangdok a, mou chih piangdok a, tate pi leh pu ding piangdok ua, sungpa/sungnu kichi hi. Mou pen nu le pa in atanu hawmthohtak uh itchihtakpi in it ua, makpa pa bel lal mahmah lel hi, makpa duat suak a, sungte inn ah intektak in om lenlan thei hi. Nupite nu leh pa ten tu amuhchiang un kipahna toh kidim ua, vuaksuaklou ahihna uah tu melmu kichi ua a lungsim uh vaan a khaai banghialthok hi. Huaiziak tak ahi, pi le pute inn ah kimaingal a, annkhing mehkhing kisawk ngam hi, unau sanggampih te innsung sangin I tate a pi/pute in uah lalzaw naknak uhi. Naupang piangtung in leng a it, a ngai, a duattu thei mahmah lel uhi. Huchi in, naupangte ni bang, gang bang hong ompah ua, kinship relationship building process kipanta hi. Huaiziakin, hichidan ahi a, sungkhat laina, tanau laina, inkuan nai, inkuan gamla, indongta chihte piangdok sak a, khosakna leh sungkuan kivaihawmdan mumaltak toh nupa hinkhua kipankhia hi.
Tanau Laina ichih chiangin, sisan kizoppih sese lou zong tanau suakthei a, inndongta I bawl chiangin kilang mahmah hi, behpa, sanggampa,sanggamnu, ni le gang, sungpa sungnu, lawmpa chih ten panmun hon nei ua, a haksa, a nuam honthuakpih ding, honzarzoupih ding, I ziat I vei ah om uhi. Siatna tuakthei, damlouhna tuakthei, sihna tuakthei, banah kipahna simsenglouh zong mukhathei ihihna ah hon dahpih ding, hon khamuantu ding, I taang a ding ding, hon kipahpih ding, hon nekpih ding kipoimoh ngitnget hi. Tuate ziakin Tanau Laina poimoh ihi, kouzaw tanau laina le ka neizou kei uh, amau zaw tanau laina ahau ua, chih kampau kizatam mahmah sek hi. A nei leh neilou kikar kigamla lua, chih mahtak tampha ngial a, meikhulian bawk chih kampau zong piangdok hial hi. Pipute patsa Paite kampaute kivaihawmdan ahoih mahmah bel, nau min phuaktu ding, nau domtu ding, pate enkoltu ding, pate ruang tuammasatu ding Langkhentu ding etc. chih kinei diudeu a, ahun hun a sep dingdan sehkholhsa om ahihna ah kizen mahmah linlian hi. Pipute geldan in bel, belsung khat kia a kilaktuah nilouh ahoihlouh dan thei ua, mihing chi (genes) kikhek zelzel ding ahihdan zong thei uhi, zek chih nei uhi. Damtheihna ding leh khosuahna dingin poimoh ahi chih thei kiukiau uhi. Tanau laina keklou chih kampau zong nei ua, hina‐ ngut e, mahmah tel chih thakthak in om hi. Huai ahileh, tanau laina bawlna ah I ngaihtuah khaklouh uh tampitak om dingin um tinten ing, zi zon tungtang mahmah ah, ken zong tu‐khawnungpi a ka muhdok hitazen ei! Muh muh, tuah tuah maidok ziangte ihihna uah, namdang nasan neih poisaklouhna khovel ahita, ensin peuhmah leng maw!
Mi hehsak khak theih zenhouh ahihna ah, etsakna in kei hong kipia mai ning maw: Pu Khaitual in Khuptong tanu nei a, pipi nunu Thomte ahi.
Pu Rochan in Hauzel tanu nei hi.
Pi Hangnem in Tangpuate pasal nei a, Tangpau pa min phuah hizawmah ing. Pi Khamngai in Vuite (Guite) nei a, tu muanhuai nei ka suak uhi.
Papa’n Khuptong tanu nei a, ka nu nunu pen Naulak ahi. Papa’n nunu omlouh ziakin zizi neinawn a Guite tanu nei hi.
Ni Zangai in pasal Guite nei a, gang banah Guite tupa nei kisuak hi. Pa Rokhum in Tunglut tanu nei hi.
Pa Sumlian in Teizang tanu nei hi. Pa Vunghnun in Samte tanu nei hi.
Pa Pauthuam in Hrangchal tanu nei hi. Pa Thangsing in Guite tanu nei hi.
U Tualzalian in Samte tanu nei hi. U Sangrem in Suantak pasal nei hi.
U Challianmoi in Tombing pasal nei hi. U Rolianjam in Mangte tanu nei hi
Ke’n Tunglut tanu nei ing.
Naupa Rosang in Langel tanu nei hi.
Nau numei ten pasal Langel bang, Baite bang, phaipi bang nei uhi.
Nau pasal ten nupi Tangpua bang, Khupphil bang, Mangzou bang, Brajabihari tanu bang …nei uhi. Puzon pizon lam ah, pizon Hangsing tanu hi a, zizi nau ten Ngaihte bang, Tonsing bang, Hangzou bang
nei ferfar uhi. Sanggam te ta ten Luseite, pawite bang, Tombing bang, Shoute bang, Hatzaw bang nei uhi.
Huchidan khong I ngaihtuah chiangin, tanau laina ichih hiaidan khong hong hi ana hi maimah. Zosuan tanu ten vaite/namdangte aneih chiang un, tanau laina ding khat, a sungkuan ten mangsak adua aw, chihna in honzeel ek mawk sek a, ngaihtuahna ah anu apa ten bang ngaihdan anei dua aw? A makpa pa ding uh, a innsung ua a tanupi ding uh, sanggam tate ni ding, sangam tate gang ding khong mansuah kha akisa dua aw? Chih khong hongsuak sese sek a, Sese mai, huai Negrote khong gang chihthahah di le, chih lunggimna aom dia aw? Tute zaw abang abang hileh ki‐itna ahi, mel tuam in tuam kei taleh, ichi hia? Miten amah zaw eipau asiam na a, eimi hilou hiveh aw, chia a phung hon zotsan thouthou ding enkol kol kha khong ihi maimah diam?
Ka mimal ngaihdan maimai ahi, I NUNGAKTE UH PAMMAIH KA NASA TEI EMEM KHASEK A AHI...ZOUSUAN TANUTE I KIDAIHTA UA, GAMKEK AKEI UA HIA! HEMHEM TE! ICHIH THEIH LEHCHU PATHIAN GAM KEKNA LE HIVEN MAW.