MISHMITE GAM AH : 

By Vungzamuan Valte

Kum tamsim paita himahleh (1997 leh 1998), ka lailungsung hon luahtu ahihban ah mialna toh kidim gam hi a, Van Laukha Siangthou leh vakna meikuang in a tatvaak khaaklouh hive un, tualniam diak mahmah lai uhi. Mishmite Arunachal gamtawng penpen  China, Burma, India border (tri-junction), “The land of the rising sun”, achihna mun uah teng uhi, hiaimun a tengte Idu Mishmi chise uhi. Eastern Himalaya mountain chains, gamkense lakpi, mualtung sangvengvong, suangtaak taktak ngen omna, leihoih leh huanhai chiintheihna ding aom mahmah louhna gam, leh nektak zonna haksatna penpen lak ah teng kha uhi. China lam ah a tamzawtham om ua, radio leh TV khong China te channels manchiang mahmah hiven, amaupau mah in ngaikhe thei uhi. India toh China akidou lai un (1962 Indo-Chinese war) hiai Mishmite khenkhat thuzoh ua, China sepaihte galgukdan in honglut uhi, Indian Army Brigade khat mawngmawng Walong ah nuaichimit zouhial uhi. Huaizaiktak in ahi, India sorkar in SSB abawlkhiak nasan, gamgi a tengte toh pan’khawmdan khat aom akuldan theisuah thak uhi. Lamkaihtu ding omlou in Vukgam leh kawlkenselakpi ah hong tualkum thei thahah louhial ding uhi. Tua kidouna ah kisattuahna nasa mahmah a, thauvui thauthang beikiikei in kibei ek mah uhi, rifle knife, tempawng leh khut le khe azattheih teng uh zangin kibalsialnuaina thupitak piang hi, nasia lawtel mahmah hiven Lohit lui sisan suakzou hial chi uhi. India sepaihte nungkikvual hilou in ummbichilh ua, Lohit vuktui ah atuakkhia toh tampitak mangthang laidep uhi.

Brahmaputra luinaak liantak, tuihing a tawmtute lak ah Lohit poimoh mahmah a, hiai vuktui in Mishmite gam ei gam a om Tuivai lui danin tawnsuak hi, himahleh nektak zonna ding, ngasa betna ding ziazang ahikei, atuizang khauhchihtakpi in khauh maimah a (under current), siang kilkel himahleh a thukdan tehvual ahikei. Border task force ten lampi bawlden ua, Hayuliang geilak ah Lohit tuilian in pioneerte mi 10 lampi bawllai, aomna mualpang uh ngamlekhat in mawmvalh duam thahah hiven, muh ding aom nawn rengreng kei uh. Ngakuai khai in papi khat suangtung ah vatu thahah venchin, bang awk kha adiam? amah kailut geih, muh chih a omnawn keihial. Army Expedition team (adventure) ten river rafting hihna dingin enlah mahmah ua, mi 8 lai Lohit lui ah rafting hih in kitholhsuk uhi, pingpei hattak in nuai hileh kilawm hial in tuinuia tuizangkhauh in nuaimang hiau hi, aluang uh muhding aom himhim kei. Mihing in hiai luitui khe in kaan ngeilou ua or kiliau galkai ngeilou chi uhi, vuktui vot mahmah in mihing sisan khalsak thei a, tuikhauhtak in tuisiam’ ichih minpu a theisiam mawh hial hi, tuaziakin sikkhau zan ua, kiluai dengdeng in lenggalkai sek uhi, valuk toh kibang geih dan ahi, luigal lam ah singkung pomchot mai uhi (singkungdang ah belh thlap).Seng pawkawm in khaampang ah numeite kahtou ziauziau thei uhi, maktak ahi.

 
British ten Assam a luahtung lai un China luttheihna ding lampi zong den ua, hiai Mishmite tenna gam aluh in luhtuntun hialthok uhi. Haksa sa mahmah ua, lutmoh hial uhi, chihbel hiai singtangmite’ kawl kense lakpi ah kah ziauziau mawk ua, zawng toh kibang maimah uhi. Mualtung ah khosa ua, British sepaihte’, ahon hon a pai zungzungte suangthaang kamkhum ua, tampipi si uhi. Suangthaang ichih bel, mualtung ah suangtampi kholkhawm ua, anuai ah mi apailaitak un ngamlekhat in khukkhumsuk ua, suahtakna ding vaang mahmah hi. Chin Hills ah milun Khuppau (Khuasak hausapa) leh mihangsan tamtak ten tuachibang in suangthaang kamkhum ua, British sepaihte tamtak na that ngeitham uhi. Hiai Mishmi ten Poison arrows bawlsiam ua, sabetna leh gaal saina in zangthei uhi. British heutute mangbang in a lohdingdan tuan theilou hial ua, atawp atawp in hiai mihingte, suak le sal a bawl kul ahi chih ngaihtuahta uhi, huchi’n policy decision khauhtak la ua, kani (opium) hon introduce ta mai uhi. Kani tamlou chikchik pia ua, gam haksapi ah zong van tampipi pawzou uhi, bawng leh sakor zattheihlouhna gam hiven, kuli muanhuai suaksak ua, kani ziak in hiaigam luhsuah zoupetmah mai uhi. China lutna ding lampi musuah hial ua, himahleh agam mahmah haksa lawtel ahihchia’, phatuam lawmlawm lou suak hi, Nampong apat Burma tawn in Stillwell road bawlthak ua, kidoupi nihna ah zangphatuam mahmah uhi.
Hiai opium ziakin suak le sal suaktakpi ua, kani ngai (addict) tampitak hong pian’khiak loh hial uhi. Tua hun lai in, de-addiction vaisaidan omnailou ahihchiang in, Britishte mah hong mangbang thakphing ua, Tezu (District Headquarter) ah treasury bawl ua, huai treasury apat license mimal mal kiang ah piakthoh in, kani (opium) ration danin tamlou lou (personal consumption) hawmkhia uhi. Hiai paidan tunitan in paitou lailai hi, aziakbel kani ngaite a dingin suahtakna ding vaang mahmah a, medicinal purpose, a damtheithna ding ua kiphamoh asuak ta hi. Himahleh, tuachibang a kani tamlou lou piakkhiak pen chihtham hilou a, deihkhoplouhna piangdok pah lian hi, kani ngai hong pung zungzung hial ua, achi (seed) tuh in opium hahtakpi in hon chingpanta uhi. Kum 100 khong kani chiing ua, kani ngai ua, kani apianna gam suaksak  ua, apipute khosakdan leh sakhua biakna toh (culture) kizawitawn in kani pen traditional practice hong suakta hi. Kani nelou omlouphial ua, ceremony aneihna peuh uah hihhamtang uhi, khaini muamdan in akam gei uah koih ua (nehnuai ah), ihmu mu maidan ahi uhi.

Pasal a tamzawtham ten kani ngai ahihna uah nasep chih omnawnlou in numeite mohpuakna ngenta hong suak a, nektakzonna, lounasep, nau kep leh adang dang akhut uah kingapetmah maita hi. Naupang chikchik in kiteng ua, pasal ten kum 40 a dampih ua leh ahoih mahmah suak hi, pasal kum 40 bel eilam mi kum 60 sangin tekzawtham hi. Laizial dan a tep, zabel dan a tep, leh a dikthoh a hih zong om ua, numeite zong duaisan louhial uhi. A mak mahmah bel, hiai gam ah haichi dang hoih taktak lou hi, singtanglou/farm chihtaak bawlna ding zong omlou hi, suanggam ahipetmah, gamkensia leh tuklup theihna ngenta ahi hi. Defence lam ah strategic importance omlou hileh, hiai gam ah lampi kisiallou mawng mawng ding hi, agam haksapeetmah, agen a genchi zong hilou hi. Indai Army te ziakin Hindi siamloh hial ua, bangtanhiam in changkanna khat suakdok hi, huaidan hikeileh achihngaihna omlou dingdan ahi uhi. Gammang lak ah gamsa bangphial in khosa lai maithei uhi. Khatvei PWD Executive Engineer gypsy a tailai lamsaklam apat suang tuk in alu lamang hiau hi, angawng ah attan bang hial in alu manghiau mawk, chi uhi.Pilot hawkdak in a lenna high tension wire ah awksak in kuangsakhluahhluah hi, Mishmi nungak ngou henhon kisilte enlahlua, niamlen kha ahi.

Dibrugarh apat Tinsukia, Tinsukia apat Dumduma, Dumduma apat Saikhoaghat hiam Dholaghat hiam ah Brahmaputra lui kaantan ngai hi. Leilawn omlou ahihna toh long (ferry) in gari toh, mihing toh, van toh honpua a Brahmaputra kikaan hi. Brahmaputra luinaklam hiven, tui current haatpetmah a, anawkna lamlam khoubang lianpipi chim hemhuam zel hi, gam lianpipi zaankhat thu in mangduam zel hi. Under current tuinuai ah ging humhum a, whirlpool lianpipi ngamkhat khat in om phutphut zel hi, hiai whirlpool ten long lianpi zong tuinuai ah kailut thei a, piaunel tampipi tuahkoi koi hi, long capsize ut mahmah hi. Tuaziak in longpu ten theisiamtak in paikaan tum in heel duaiduai zel uhi. Minute 20 val kituang a, dipkuatna ding tamphangial  hi, long kingakna mun te tuihat in nawksiat hun neisek a, amun kituantuan se hi, huchidan aom chiang in long apat kumkhiakna mun leh gari lakkhiakna bei, mihing leh van tampi toh taang tektuk theihna mun ahi. Tuisiang deuh hiven river dolphins tampitak muhtheih in om a, mit taituan mahmah hi. Tunchu lei thupitak omta chi ua, haksa nawnlou.
 
Sadiya sub division (Assam) khopi Chapakouwa, Chapakouwa apat Namsai  check gate kitung hi, lui-hai (pagla nadi) bangzahhiam kikaan nawn a, Roing paina lampi leh Tezu lampi kikhen hi. Tezu khua Lohit luipang ah (district headquarter) tuiluang ging humhum kizaden hi. Pagla nadi, Digaru chi ua, luinaklam (Himalaya ah) vuah azuk chiangin, ngamkhat khat in tui khangphut phut a lauhuai petmah hi, nitak a tuilian honhon, luangliam vutvut, zingkar a siaktan a kaan theih chihkhong maktak ahi. Tezu apat Hayuliang sub division Headquarter paina lampi Lohit luipang ah pai hianhian a, mualtung akah takin, sawmnih vei khawng kikheptou ngiaungiau (serpentine) hi, Hawa Pass itun’chiang in ensuk leng lauhuai hialmah hi, Lohit luikihawt in Assam phaizang a nawkdarh hemhuam muhding tampetmah mai hi. Hayuliang tunna dingin kumsuk kik leuleu hi a, kikumsuk suk madan ahi, Lohit luipang ah om leuleu a, huchi in, Walong lam paina China Border tan (Kibithu) lampi paisuak hi.

Hayuliang apat Walong lam kimkhat ah Lohit lui kaanna ding suspension bridge kisawih derhderh theihna om a, huai apat, naak leh tal in lei sidek dek zen in kikahtouh hi, dakkar thum zoh in Hawai block headquarter kitung hi. Mualsangtak ahi a, Hawai khua pen inn tam hetlou hi, government office ten cheimawi leltak zaw uhi. Walong ah airstrip lianlouchik om hiven, 1962 kidoulai in Indiate lenna nih vaboh ua, khat pen lamhaih ahi, khat pen supply pua ahi, China sepaihten pilotte gawl- at hiau uhi. Tunitan in huai lenna te lengkhe zou dingvual hilou in aguhvuak toh om remrom lai uhi. Walong ah War Memorial thupitak om hi, Walong apat Kibithu paina dingin Armyte phalna neih ngai a, Kibithu apat, Burma taklam ah, China veilam ah, vuk in a tupmang mualsang ngekngok ngenta gamlapipi kimuthei hi. Hawai khua leh Walong khua khong ah theihkholhlouhpi in vuk zu ek ut mahmah a, huih hatchitakpi in hat zawmah hi, nitak chiang in Siberian crane khualzin lengging chaitchiat kawm a kisam ging kheukhou zak ding tampha mahmah a, muhtheih bel hilou hial uhi. Sadiya apat Tezu nuamtak a nikhat thu a tuntheih hinazenpi, I tuahkhelh khak leh ni 2 zong tangkhang khak theih ahi hi. Tezu apat Hayuliang dakkar 5 khong kitai a, Hayuliang apat Walong dakkar 3 leh 4 vel ngai hi, Walong apat Kibithu (Kihibithu) bel gamla nawnlou a dakkar khat lel khong kitai hi. Walong ah BDO office om a, IB zong om hi. Walong water fall pen ngakik ka muhkhak laklak ah asangpen hiding in um ing.

Mualtung a teng Mishmite, ei singtangmite lak ah tuantual diak ua, tunitan in khuapi a ten’ sangin mualdawn tangsang tung a ten’ telzawlai tampitak om uhi. School kai ding ngaihsaklou leh civilization himhim poimohngaih lou hi ua, kum 1 a khatvei khopi hoh changchang tampitak omlaitel uh, chi (salt) lei ding leh antang apoimoh chiang un, khopi lam manoh in kumsuk leltak uhi. I pipute hunlai in Hingtal (Silchar) ah chi leh van tuamtuam lei ding a kumsuk sek dandeuh uh ahi hi. Misi vui dan bel ei hihdan in hih thou ua, hantung ah salu leh akgia khong tak tertuar sek uhi. Puja chi ua, kithoina ngaipoimoh petmah uhi, pupa biakna nei in, kithoina kum 1 sungin thumvei khong bawl zel uhi, a neih le lam tengteng uh hiai puja chiang in beisak laizang uhi. Silh le ten ding kibawl thei ua, Mishmi te traditional dress gialphatak ngaisang mahmah ua, pasal ten temsau kuah mahmoh uhi. Kani ngai ahihchiang un, kani chiing ua, agam uah hoih phamahmah vial laizang hi. Akung sandan mihing’ din tantan pha ngekngok ua, a pod, kani gah aktui chiachia lum pengpong geuh uhi, buk tep kawm in duattak in numei ten enkol ua, a nekzonna pen uh zong ahi hi. Mikhual amuh peuhmah chiang un muan’moh’ chihtakpi in muangmoh ua, apau makdeuh deuh un hou-se zialzial uhi, hamsiat toihtoih u’zaw himaithei. Suangtum singtum maipah ua, kisual ngapsa in om maimah uhi, naupangte uangdiak zawmah lai uhi. Huchidan hinkhua pen thil lamdang hilou hial hi, a kani chiinte uh suksiatsak ding a mikhualte muangmoh ahizaw uhi.A innsung uah puanpanchik a kani tui a keusakte uh khai ngeinguai ua gimse takpi hi. Sialsa hah nek petmah ua, innsung ah khai ngeinguai ua, tempi in atkhecheuh zel ua, akamsung uah muampuak pempuam zel uhi, sa em louh, sa huan louh, alim mah temtuam diam? Sawtpipi akamsuang uah muam zawmah ua, mui viau maithei, thaang viau maithei?

Himahleh,Namsai lak a khosa khate bel, singpihuan leh timber business(saw mill) banah gamsung hauhsakna teng luaktu hi ua, changkang in hausathei mahmah thepthup zel uhi, Mishmi kichih ding utlou hial thok leng omdan ahi uhi.Siamna zong ua, khopi ah school leh college kai ua,sepna nei khong tamkuamtak omsam uhi.Vaite pilna mahmah bel, Tezu apat KM 40 vel a gamla ah Pathian Biakna munsiangthou khat omsak ua, a Pathian uh, bawngnoi duhpa Krishna zi masapen Rukmini kha Mishmi nungak melhoih ahi chizensam uhi.Tua ziakin,February ni15 chiangin kum teng in,Vaiten“The HOLY Parsuram Kund”puja thupitak neisek ua, mi a sing asing a sim hoh noinoi zel uhi. Haridwar a Hindute hihsek danin Holy Dip hih ua sianna mu kichi uhi. Huchih hunchiang in Tezu khopi ah FAIR thupitak om zel a sumsinna hun hoihtak suaksak uhi. India mi, vaiten hichidan deuh, pansan ding hoihtak tak, ka gam, ka lei achihtheihna ding uh maidok siam mahmah leuleu uhi. Ei gam ah zong Miracle piangsak in,Holy Place dandeuh bawlsiam le,Pilgrimage Centre suakpah ziang ding a, hoih lehlam mahmah maithei! Hmarte suidan in CHHURA nupi pen Mishmi Nungak THAIRAWNCHAWNG ahi chi uhi.Gammial ahi,eite zong missionaryte omlou hileh, bang isuak de aw?   Khualzinna_zaw_awl_in...