Gamtat Dan Kilawm : Etiquette

By Vungzamuan Valte.

Hiai kammal in thutampi gen hi, mihingte khantouhna leh kivaipuaknate insung, khosung, biakna leh adang dang ah omdan kilawm, leh chindan kilawm poimoh petmah hi. Mihingte’ khua-le-tui, khanvual, u-le-nau, nu-le-pa leh insak inkhangte toh tengkhawm ihi ua, social being (mahni a tolteng hilou), Khawsa khawmte ihi uhi. Hiai thupi in, ahun toh kituak a khoheidan, kicheidan, omdante gen hi. Huchia I Khawsak khawm chiangin dan le dun, thu le la , zuih ding leh zuihlouh ding, akilawm leh lawmlou, zahtak ding leh khual ding chihdan piangdok a, sapten omdan kilawm Etiquette chi uhi, hiai anuai a dan in genchian uhi.
 
1. Conventional requirements as to social behavior; proprieties of conduct as established in any class or community or for any occasion.
2. A prescribed or accepted code of usage in matters of ceremony, as at a court or in official or other formal observances.
3. The code of ethical behavior regarding professional practice or action among the members of a profession in their dealings with each other.

Malai hunin pasalte gamlak a nekzongtu hi ua, zawng leh ngau bangphial a akhawsak lai un hiamhei tawi in gamsate man ua nekding sutuah uhi, numei ten nau kem ua bitna ding zong uhi. Tua hunlaiin, mohpuakna (division of labour) omlawtel kei mahleh, bangtan hiam neiteisam uhi. Pasalte mohpuakna lianpen sa leh gal lakpan kihumbit ahipen hi, tuaziak mah in luum leh tei toh kithuam kawm in huhamdeuhtak in omthepthuap ua, huai omdan bel akul leh poimoh ahi hi. Tunitan in gam khenkhat ah zahmoh neiliante pasalpha hisak ua chikhahtu dingin deihtelpen in neilai uhi, amaute lak ah omdan kilawmlou ahithahah keihial. 

Hon suangtute ensinle, zi leh pasal ding azon chiang un, pasal pen galhang, pasalpha, damthei, thahat hideuhse ua, nemei bel taima, maitai, damthei, nasep kizen, buktep zou, zulup siam chihte ahi uhi. Pipute hunlai nangawn in omdan hoih, khosakdan kilawm, gamtatdan kilawmte kichituhna nei ua, dan gelhthoh omkei mahleh kivaihawmna dan kichiantak nei uhi.

Khumpi sian’thouna palsat’ pen khelhna lianpenpawl ahi, numei gep zong khelhna ahi, zawlgaite apusa in pai chihialthok uhi. Pitek putekte zahtak dan kichituh ua, sang a uzawte zahna lianpitoh tung-et uhi. Nu le pate ngialhouh zahtak petmah ua, amin un sam ngam himhim louhial uhi. Nekna takna ah tekzawte awn ua naupangte nektheih leh teklamte nektheih bawltuam uhi, upasa chizensam uhi, sasung, sasin, akal, angoi, eknel hideuhse hi. Sakhua thilsaina ah ZEK nei ua, kithoina ah numei leh naupang teltheilou uhi, kithoi hunin kongbiang ah sawl bang ua huai pen palsak ding hilou hial hi, etiquette chikhat ahi. Khuasung kithoina aom chiangin khuanawl ah sawl koih ua, palsat teitei ding hilou hi, liautheihna ahi.

Zunek sanek namun ah paidan khat nei ua, zuhai (nou) tangmasa, tep masa, akizom dingdan aomsa nei uhi. Ton sagoh chiangin ni nih khong zu le sa ne ua, Thangsuah nupate tuazohin kikulkhum uhi, ni thum sung kikulkhum ua kisiansuahna nei uhi, khual leh tual apat lengla neitheilou uhi, paidan khat ahi. Gamsa mat tungtang ah sabil saliang piak dingte pia ua, tanu khakna ah sabil saling piakdingte pia ua, hawmdan leh chindan kilawm toh vaisai uhi. Mou helna, mouman piakna, sialkhumsagoh chih khong ah paidan kichuptak nei ua, palsat dingvual hilou hi, kinak kisiat theihna tungsak thei hi. Pusa kipiak ngeina ahi, piakkhelh khak bel pute simmohna chi uhi, lauhuaipi khat ahi leuleu.

Moral issues in hon tuamkimvel pah a, vaite lak ah sungkuan kinailua kiten ding khaam bikbek uhi, hiaidan palsat ten sihna tanpha lohtak uhi, ei lak ah zek-neihna chiang omsak uhi. Leitung a piangkhia mihingte peuhmah in tuinaklam a ekthak phallou hial uhi, chiinchilou mahmah hi, hamsiat thuakna ahi. Leitung ah biakna, kithoina chikhat neilou mihing ki-omlou hial hi, huaite niinsak leh thaangbawlte mohpaihna sangpen piak ahi. Sihna mangbatna ah kihuhtuah ngeina ahi, thazoituam omtheilou hi, ngeina ahiziak in.

Kial leh taksap hunin kihuhtuah ngeina ahi, pipute ngeina ahi. Nungakte siangthou ding a lamet ahi, sianthoulouhna pen khelhna thupitak ahiziak in, (gam khenkhat ten achetna neihial uhi, ei ate bel in good faith ahi). Minam khat in paidan kineichiat hi, khuasung khat in paidan chituam nei leuleu hi, innsung ah kipiidan, kikepdan leh khosakdan kinei nawn leuleu hi. Tuaten nasatak in mihingte lungsim leh khoheidan control hi, lampi dik, omdan hoih leh kilawm chituh a, maban khosak dingdan, khat le khat kilainattuah dingdan leh mite tung a lohchinna thuguk piangsak hi.

Thilthawnpiak (endowment) I pianchil apat kineichiat hiven, pianfel leh fellou, thahat leh hatlou, damthei leh damtheilou, khuakpilna neihoih leh neitawm kiom hi, hiaite bel genes ikipiaksawnte ziak ahi hi. I bawltheih omlou ahihna ah, awlawl in piching dinmun ahong hihchiang un mihingte lungsim leh pianken, khat leh khat kikar ah kilamdang mahmah mawk uhi. Atuantual zawdeuh omlou theilou suak a, unau lak ah amadawk zawdeuh omteitei mawk hi. Himahleh nu le pate hinkhua ahbel, ahatlou penpen in alungtang uh luahdim hi, kepsiam leh dopsiam ngai ahihdan theisiampah mai uhi. Paukam khauh leh nem, hehbaih leh zaidam, chilkon leh thilphal, hajatna nei leh lungpigel, thanuam leh thadah, kuhkal leh kallou, theibaih leh baihlou ichihte ngeinadan in hongpai pahtingteng uhi, hilhhilh ziak, taitai ziak a kichituhna ten phattuamna neilou chihna hilou hi.

Naupang achiil huntak a chiil kha, makaih kha, leh seekneem kha chih zong omtham hi. Paidan (walking style), tutdan, khoheidan, mit-hahdan, napnitdan, kipolhdan, kamtam leh kamtawm, gen-utzawng, lung-lutzawng, nuihmai, zuaugensiam, chiamnuihsiam, numei riau, pasal fetfat, cherang, che-awl, u le nau ngaina leh ngaina lou, nu le pa zah leh zahlou ichih teng hong kibanglou pah mawk ahi, lamdang sak maimah in om hi, kepdan, nek le tak, kisekdan, kibang hinazenpi.

Tuate ziakin “ETIQUETTE” ichih poimoh mahmah a, sintheih leh kibawlphat theihna tampitak omkha ding hi. Nidanglai a gamtatdan kilawm, mouhoihte qualifications, Pasal ding a chitnate, societal values, social systems, moral values ichihte tulai dinmun ah tampitakte hitheinawnlou suak hi. Gamtatdan kilawm in mi ahiip, mi a etlawmsak, mi atawisang, banah zahlaklou in hinkhua zangsak hi, omdan kilawm hinkhua neithei dingin I hoihlouhnate kitheihsuah poimoh masapen hi. Situation tuamtuam ensin le maw:

1.    Innsung ah : Pa khenkhatte hehsa in inntung ua, zi le tate nawk ek mawk uhi, phattuamna bei ahi. Amau khelhna omloupi, na problem solve theisamlou uhi, gamtadan kilawmlou ahi.
Nu le pa khenkhatte hangsawk mahmah mawk, haan ek in problem solve chihbel kitheitam hetlou hi, huainaksang in buaina behlapsak zawmah hi, kamdam a gen hoihzawtham hi.
Innsung ah houchik aa omkhak baihlam mahmah hi, discipline neuchik bek neih dingdan ahi, zi le ta ten hon enton ahihna uah. Miten zong hon phawngphut thei laizang uhi.
Ann nekdan tanpha innsung ah kichil ngai hi, buahdeuh nenua a ann nek a limchi kei, mite lak ah zahlakna bulpi ahi. Kicheidan hunphet aom, auangtlua leh lang lehluah khong aom pen innnupite a dingin kilawm tuan thahah lou hi.
Innsung siangthou damtheihna ahi, taksa siangthou damtheihna ahi, kikep siangthou peuhmah phot ding ahi hi. Um leh bel, nek leh tak asiangthou ding ahi, thou bohsak luailuai kilawmlou hi.
Zingthoh hun, lup hun, annnek hun, singpi dawn hun kichiantak neih poimoh mahmah hi, kisintakpi ngai hi, omdan kilawm leh kizenhuai ahingal a. Innlengte ziakin na tate laisina, school kaina leh a maban ding uh nabuaisak ding ahi himhim kei, innlengte sangin nazi natate a poimohzaw ngalsi ua.
U ding, nau ding, nu ding, pa ding, ni ding, gang ding, pu ding, pi ding kitheihsak pah ahoih hi, hei! chia kisap ahoih kei, min kidot pah ahoih zaw, singbul suangbul houpih a kihoupih hoihlou hi.
Nupa kisapdan buaihuaipi khat ahi, darling, honey chihzawzen zaw uanglawdiak sa ing, eipau mah a kisaptheih hinazenpi, hey! ki-chih sukringot chu adik kei himhim, numei ten U Lian, U Thang, U Mang achih uh kilawm hi, pasal ten bel noudeuh a sapdan kithei hi’n maw, ahun leh amun azir in, gentam ngai kei.

2.    Kholak ah : Khenkhat ten lampi pai kawm in singbul suangbul suisui mawk ua bang poikhoih ahi peuhmah duam, poimoh lou hi. Lampilai a pai doidoi zong kilawm lahdeuh hi, lampi sik a pai ngeina ahi. Lawmte toh kimuh ziaka lampi lai a kidinhou mawk ding ahikei, kihemkhia inla na deihdan teek un kihou zaw un, lampi lehlam apat mi sam kuaukuau ken, kinaih tuah zawmai un.

Lampi paikawm zenpi’ phone a pau kuaukuau kilawm lahdeuh hi, tuahsual thuahna bulpi zong ahi, adiakin gari heek kawm a phone lak teitei. Lamnawl ah dinkhawl zual inla na gen ut genkhin meng zaw in. Kholak aa tamluat zong mite thulaklouhna suakthei hi, pawt kisumtheih poimoh hi.
Lampi lian khaktan zenin kiphekzuih thahah kei un, mite a dia lamkhaktu na hi diang ua, mi’n haihuai asa ding ua, gari tukthei taithei in hon nawk ek khamohlou ding hi, pilvan’ huai lua hi.

Lamgei peuh a zunpeek ek kilawm lahdeuh hi, mun fianrial leh kawmbu zon’ ding ahi. Nupite’ lamgei a tusukmawk, ging pah sursur, bawsak buahbuah, lemtou turh chihte chiintamlouh ahoih hi, direction piak siampen chia kitaitehna chi ahikei, iipp dan kisin poimoh mahmah hi.

Mi na-tuah chiang in, khualzin ahihleh, chibai inla, damtak a kimuh amanphatdan gen in, chikchia’ pai di chih sese akul kei, van khak ut nahih kei ngal leh, nang toh kisaikhakna neilou hial hi. Ann neta maw, chihzong kul sese lou hi, ann nekpih ding chi nahih kei vanglak leh. Zukham natuah khak leh hou-se ken, na deihsak taktak leh awl in thuhilh zaw in. Meltheihlouh kisual buaipih thahah ken, nang’ nalehbuai kha ding, nupa kina na tuah leh kihemkhia in, na vaal pah thou ding.

 

3.    Mi inn ah : Poimohna ziaka alou theilou a pawtna ding om ahihleh na hohna dingte theisak masa in, mi mawk phawng phutphutte kuaman pakta thahah louhial hi.

Maingalna mahmah ahih keinak leh mi inn ah, khualum lua, thoukang hauna mahmah u’chia, thou tam namahmah tel e, chi chi dingin kuaman hon welcome thahah lou hi, pilvang in. Tutna ding hiam, tu in chih welcome na omloupi in pau pah zukzuk ken, mi’ buaina nei, hohna ding nei hithei ahi. Gen ut sak ut aom leh genpah ahoih hi. Migensia dingin vialvak ken, na hohna sa mi’n thei ahi, na gensiatte thei uh ahi, na tawkhaak muhsak in na om kha ding hi.

Nektheih dawntheih mi’n ahon offer leh na deihdan gen pahpah zaw in, ka duh ahia? ka dawn dia hia? Chihchih sangin na duh keileh duhlou himai eivoi maw. Dawntheih louh ineih leh genpah ding ahi, mi’n abawlsa, ka duh kei, ka dawn theikei chih nunulh haihuaipi ahi. Nek theih ah zong huaimah bangin hihzaw in, mifel nahi dia innleng hoih, innleng fel chia pahtak na hizaw ngei ding.

Maingal dan chiang theih hoih hi, sungkhat laina, na inntekna ahih kei leh, room sung khong ah lut gulgul ken, annbel mehbel sawk mawkmawk ken, inntekte naute khong mekkap thahah ken, nuam nasak keileh hohlouh mai dingdan ahi.

Houlimna vantang ah inntekpa, innteknu kinakpih-ek thahah ding ahi kei, nupa kina na tuahkhak leh pilvang in, gup tuam neih ahoih kei, melma na suakpah kha ding hi. Lawmhoih, maingalna mahmah bel thutuam in koih le, atangpi thu igenna ahi.

Mi van, mi vankoihna, leh thil dangdang vatheklek laizang ken, ka en thei diam, ka khoih thei diam chia ngetna bawl masak ding ahi. Lenglatna ah mahni naupangte kepsiam poimoh diak hi.

 

4.    Office ah : Office kai hun leh paihun om ahihna ah akilawmdan chiangbek theih kulmahmah hi. Alou theilou haksatna bel theihsiamna omtham mahleh, azihzeh hitheisam lou hi. Sepna, nekzonna a serious dan theih kul mahmah hi. Suanlam neihgige naupan’ vaai suakthei a, mohpuakna piak haksa hi, kuhkalna, taihmakna leh mohpuakna a ginomnate poimoh ngial hi.

Office decorum maintain siam poimoh mahmah hi, innsung a omdan aom thahah ding hilou hial hi. Mi hon ngaktu aom leh kibuaisak se dah in, dispose off pah zaw in, na office kipawhlimna dingin zang maimah ken, office a hihding chiang leh hihlouh ding theih kisam hi. Mi’ mai ah phone zangin pau nilouh ken, saifelsak pahzaw inla huchiin mi houpih zaw in. Faifuk huauhuau ding ahikei, au ruarua ding ahi kei, toilet sunga lasak ongong ding ahi kei, kinak kiselna mun ahi kei.

Office ah kichei dingdan bikhiah aom leh huaidan in kichei in, akilawm tawk a kicheidan siam in. Numeite a dingin kichei dingdan tangpi om hi, huaidan in kicheisuk mai in, nik sing vehvuh vaite lak ah teng hetken. Official function, official dinnerte ah, formal ahihngal leh huaidan in kisingsa in, mi omdan aom hoih hi. Informal chihziak in occasion toh kitualoupi a kichei ding chi hilou hi.

Offical lunch, official dinner hun in chial nahihleh tel in, hihtheihlouhna ah excuse nget hoih hi. Nek le dawn ah pilvang in, na duhzawng genpah zaw in, khamzen in dawn kenla, gilzut huanhuan zenin nesam ken, kuang let hnurhnur a nekding lak kilawmlou hi, lakthak zel theih ahi, siangthoutak in om inla, apheizawng a puak ngai dingin om mahmah ken, simmoh det nahi kha ding, mite’n koihdan khat hon neithei uhi. Kidektheihna kan a poimoh tuabang hunin omlou hi.

Meeting na ah mobile gingsak zenhouh ken, heutute room ah mobile hamsak chouchouse ken, Hai na maw? Ahon chihlouh leh hampha kisa mahmah in. Heutute thugenlai interrupt ken, gen ding hun ahon piak leh kisakhawl zenin gen hmiahhmiah in, poilou hi.

 

5.    Biakin ah : Kikhopna hunbichiam nei ahi, ahun geih in tun’sawm in, malam awng deiduai napi, anunglam delh doidoi ken, kihoulim nading zong ahisam kei, konglam ah gen ding sak ding sekhia in. Phone ginsak, phone mekmek, nuih vurvur, tutpihte etsaksak haihuaipi ahi, chiin tamlouh ahoih pen. Zekaipi a lut nahihleh a nunglam ah kizep mai in, kikhop/biakna pailel lai buaisaktu hihsese akilawm kei. Na kuankhiak ding chiangin na sakkhau enkichian masa teitei in.

Biakin sung ihmutna hilou hi, kisum hamham in, din ding ahihleh dingsuk dingtou mai in, kipiakzohna mah hoih hi. La-sak chiangin sa teisam in, dak vutvut ken. Nung leh ma sawk zualzual ken, muamtheih tawilut/muamlut ken, kipesawn sam kei un. Thuaktheihna poimoh mahmah, lumsak ziakin kizaap sese kilawm lahdeuh hiau hi, kinul zawmai in. Thum chiang a hak keekuu dingin kikhawm dahmai in, mi thum kar in muhnop omlou hi, biakna mun ah mi melhkual zualzual ken; zite, pasalte leh ngaihzawngte melh nading mundang zong zaw in.
Biakin kihopna ah kicheidan huntawk aom hi, kilawm lah deuh khenkhat om naknak hi, ki-iipp khak khak in om thei hi, taw dawk lehluh, koilai hiam khong langsim lehluah, pan lua, tight lua chihte party dress ahi. Amun leh mual toh kituak a kicheidan theihmamoh ding ahi.

Panmun nei ten sehsa aomdan in program paipih ding ahi, mite panmun laksak, suhsak ken, hai honsa lawtel ding uhi, kum khat a hun khatvei tang sunsunte ihi, aam lawsam uh ahi. Lapitu nahihleh laa pii maimai in, thugentu dia seh na hikei, thumna nei dia seh leng nahisam kei chih thei in.

Thugentu ding nahihleh kisakhawl in, la deih na neih leh, la khat tel in, nathugen dingtoh kituak ahih ding ahi. Ahunchiang lel thei in, mi ihmu ngeinguai ahihleh nathugen manlou, hiplou, pangkailou hiding hi, mi thathousak in, ahunlel thei in, dakkar khat vaal thugen’ aphatuam kei. Chiamnuih bawl ken, biakna ahi. Gei a tute wish asekei, hilehle houlim nilouh ding ahikei hial.

Conductor nahihleh thugenpa gending teng gensak’ ken, puanding omteng kaikhawm inla puang in, na thuneihna hun ahi. Share utzek, lungsim kam lua na neihleh tomkimtak in genhiau in, hun tang nawn vekvek lou ding nahi chih kithei in, himahleh tagahnawimuh ding chihna bel hilou hi. Biakna ahi, kamsiam luat aval omthei hi, mimaltak a mikhual honglengla hilou ua, Parthian Biakna/fellowship with God ahi. Thohlawm peloute chiamteh mawkmawk ken, kilawm lou hi.

 

6.    Khawmpi/function : Chial nahih leh ahungeih lap sawm teitei in, lap zohlouhna khat aomleh theisak in. Teltheilouhna khat aomleh excuse nget ngeingei ding ahi, huchilou zaw, kisimmohna diktak ahi. Tutna mun ding sehsa akibawl danin tusukpah mai in, mi buaisak selou in. Hun piak nahihleh kigingsa in kuan in, theihtawpsuah in semsuah in, na lungkimna tan bel mi’n hon theisiam lawtel ding uhi.
Thugenna piak nahihleh mite nekding genkhia in, aw ging ngaihtak in paukhia in, zaktheih manglouh a phun suih suihte tawlhuai lawtel hi, hun piakman omloupi suak hi, maimah aw, gintak bangkei na e, chih ding atam a tam ahi, mi’n theigeige laitei ua, kisik’ zong phatuam nawnlou hial hi. Ahithei tannin function beimatan om in, hihtheihlouhna aomleh excuse nget dingdan ahi. Mipi punkhawmna ah buaina bawlthei lel hisawm ken, pilvangtak in omzaw in.

 

7.    Sumbuk ah: Sumsinmite a dingin mipite akingakna uh ahi, customer is king chihial om ua, hon dawrtute lungkimtak a paikiksak dan siam ding ahi. Kamsiamlou ten zong kisin sawm ding ahi, na deih kei leh en koh, lei koh, bang a nahong hih, bangmang zong na hia, chih ding hilou hial hi.

Vanzuakte kilawmtak a koih, siangthoutak a koih, smart deuh a kichei, nuihmai deuh aom, chihte lohchinna thuguk hileh kilawm, mun khat a ektehtuh maimah sangin, chetdeuh vatvat leh pau utdeuh poimoh hi, kamtawm leh leikha natna (bitter tongue) neite sepding hilou hial hi. Smart store, smart restaurant chihdandeuh, tulaideuh a sumbukte kepsiangthou leh mite hiipthei ding a bawlsiam ngai lawtel hi, sum senzek mah ding ahi, kitaitehna ahita, nungak fel hire chihmahtak. Program teng ah, (saptuam tel in) nungak melfel dingsak sek ua, tulaidan ahi chizawmahta uhi.

 

Ahi Ahi : Meeting na ah chair lam in athuvek uh ngaikhia inla, dohtheitak leh lungsim kihongtak in tel in. Ngaihdan genhun ah panmunkhoh inla, ahunlou in kigolh nilouh ken. Theihtawp in na ngaihdan gen inla, committee thupukna pen pomkip in, khawnung gen numnum haihuai ahi, pichinhuai lou hi. Hoih isaklouhte agenda point puaklut thak theih ahi chih thei in, vekthak zawmai in, himahleh atamzawte thupukna pompih theihpen pilna ahi. Phunchiak hinkhua tawpsan in.

School ah kicheidan kinei a, heutute zahtakdan kisin hi, omdan kilawm poimoh mahmah hi. Games and Sports kitaitehna ah sinding tamtak om hi, lungduaina, pankhawmna, game spirit, team spirit, leh skill tuamtuam poimoh hi, hiai ah zong etiquette poimoh diak hi, sportsmen spirit neite games and sports ah omdan kilawm neite kichithei ding hi. Office ah kicheidan kilawm moh taktak na mungei ding, mi hip lou hi, lungluthuai lou hi.
Doctorte leh Nursete kilawmlouchik in kichei nepnuap mawkle uh, bang ngaihdan inei dia? Professional ethics leh decorum a maintain chiang ua kilawm a, kitung etdan ahi. Siangthou deuhmah a kichei ding zaw ahi. Office a hon dawrtute (citizens) huat ding hithahah louhial hi, kamdam a khakkhiak ding ahi. Lam-et guk neih kilawmlou hi, miten India police chiangpum tawite’ rank in ahon koih khading ua, uipi (kuta) duhgawl chih naloh kha ding. Semlou hinkhua taisan in, Lamka ah semlou a sum khonte toh  apoimohlou a police duty peih deuhte kihuatbawl simta hilou hia? Palaite chettheina traffic bohsiat, program loplouh, chihte kilawmlou hi, Nehru coat silhteisam in liahkhuh zoulou. Khangthak leh tulai a kingaizawng ten mitheihsese aom kul samawk ua!!