Chawhlohna Lungsim (Spitefulness)
By Vungzamuan Valte

Hiai thumal huathuaipi khat abang maimah hi, lungsim ngaihtuahna thuktak genna ahi hi (condition of the mind). English ten spitefulness chi ua, a definition dan in, “A desire to harm others or to see others suffer” leh “The quality or condition of being vindictive”. Ahia, society khantouhna dingin poimoh mahmah zenhouh hi. The Iliad ah hazatgukna’ lungsim nasatak, Achiles in Agamemnon tung ah nei zenhouh hi, “ahon khem himhim, ahon bawlsiat himhim”, thuak mahtak hen aw, ngaidam mawngmawng kei ning, chih lampang ahi hiai Epic thupitak kingakna. Ngaidam kei ning! chawh tak hen aw! Thuak ek  hen aw! thuak tak mah ahi! chih ngaihdan mihing ten kinei mawk hi, I pianpih anahi maimah zenhoih hi. Naupang pau theinailou khong in temta ahon tawi a, khoih ken ichi tuartuar sek, thumanglou in ahong kisukha a, na theita hia, na choh hia, ka thu na mang kei a eive, chi’n nu leh pa ten kichi kheukhou sek hi. Khoih louh ding, nek louh ding, kahtouh louhna ding, kumsuk louhna ding, chih ki-daikaihna kinei pah tingteng hi. Huai daikaihna palsat teiteite, I huat ziak mawng hilou a kithuhilhna dan in, na theita maw, hihnawn ken aw, chi’n paukam kineisek hi. Huatna toh hehna kigawmkhawm, lah itna giltak apat suak ahi hi (kitaihilhna).

Natalie Angier in, “A little spite goes a long way in maintaining fairness in society” chihialthok a dik mahmah sa ing. Huatna, kithupisakna, ki- hajatna ichihte  mihingte pianpih melma ahi, himahleh ahoih luatna zong omsam hi. Ki-chouna omlou in hahkatna piangtheilou hi, chouna hoih leh choutu hoih in mihingte bawlhoih naknak hi. Midangte siatna ding kia ngaihtuahte alungsim uh gimtakpi a, punna leh metna omloupi ah zong, natpitak in pang kunkun peih laizang uhi, huchidan mihingte kha setan toh kinai diak aduam a, sadist (sadistic pleasure) chi-hialthok uhi. Mite haksatna tunga kipahna mu, mite thuakgimna tung a lungkimna mu, kichi hi.

Ahi, khovel ah mihingte gamsa bangmai a akhosak lai u’n, gamsate toh melma leh ki-nektuah dingdan kia ngaihtuah ua, melmate apat suahtakna dingin lungsim lunggelna nasatak nei uhi. Mihingte vualtungtuang ua, gamsate tung ah vaaihawm uhi. Mihing toh mihing hong ki-melma nawn leuleu ua, melmate tung a suahtakna ding zontakpi ngai nawn leuleu hi, might is right, chi-hialthok uhi.  Vualzohna tangtute hong khang khawsuak ua, chii khahsawn in leitung ah kizalhsuak uhi. Tua hunlai nangawn in, chouna lungsim poimoh mahmah a, kisinsakna dingin zangtakpi uhi. Chihbel melmate tung a vualzohna ngahnading in pankawm ngai a, kimohsakna, kikawktuahna, kisiamlouhtanna, kisel kinakna te amualsuah uh poimoh hi. Hihfuh louh chiangin kimohsakna piang a, kinakna tun hi, nang’ ziak, nou ziak, na choh uhia, kichi kunkun ding un um zenhouh ing. Khanthuam Sukte in Teikang a simlai in Mangsum’ khawnbawl upate lak ah kimohsakna lianpi piang a, Guite inkuansung ah kikhenpina pianghialthok hi. Ki-mohsa lou in, nou ziak kichih sangin pan’khawm dingdan, panlak didan vaihawm zawle u’bel anahloh pekzaw khamohlou ding hi. Sachangte (hunters) zong huchisek uhi, chilphih phak lek aom kap khial maimah teltawk eivoi, or na hawlsiam kei a eive, kichi theizel uhi, huai kimohsakna in siatna a tut chiang in ki-chawhlohna diklou (huatna) suak a, kisinna ding a zangsiam ten bel lohchinna kalbi suaksak uhi. Neulai in kichoutuahna kithangsak hiven, tal a chil kinuh, khepi kisiksak, hiai kichounate kimawlna dan a lathei ki om hi, thangpaihna dan a la ki om leuleu a, phuba lak utna piangsak hi, game dan a lathei ten bel thangpaih naksang in khanvual hoih, lawm hoih muhloh uhi.

Spite ichi hiam, Chawhlohna lungsim in Siatna (vice) leh Hoihna (virtue) nei veve hi. Mihing ten I neulai nasan in lawmte hazatna kinei chiat hiven, lawmte’ siatna ding deih ngoihngoih om uhi. Mite siatna ding deihte bel spite diklou neite hi ua, prang dandeuh a lawmte kiguihsak leltak te bel virtue chihdan deuh, pilvanna ding chituh uhi. Banah, lawmte toh kitaitehna ah hajatna lungsim paai lou kiomlou phial ding hi, himahleh huai hajatna ziaka mite siatna ding tantan lunggelna neilou kiom a, competitor dan in kikoih mai hi. Khenkhat leuleu lah, mi suksiat teitei sawm, vuak ek di aka khong chi maimah om thei ua, lungsim paisual, mihehpihhuai suak uhi. Student life ah peer pressure ziakin naupang khenkhat ten boss hoihlou nungjui ua, siatna khuk ah lut uhi. I society sung ah kisimmohna, kiengbawlna te uangdiak hiven, sappau leh pau dang zangte kikou ekek mawk hi, kisathei, kithupisak chihdan in kila mawk hi, huchidan lungputna pen hajatna chikhat ahi, hiai I paidan in mite lungsim ah chituh diklou tuh a, complex neihloh hial tamtak om uhi, tua ziakin sappau leh pau dang ah kibahloh hial hizaw hi. Ahi, student life ah chawhlohna kiuangsak diak hiven, apilkhel deuh ten, a lawmte uh, Ojate gawtsak ek thei uhi, lohtak omlou napi’ kipahna mumawk uhi.
Huchimah bangin, insung ah zong unau kilai kilai thei ua, kihajatuah uh chih di hia, ki complain tuah den uhi, khat in athuak chia khat kipak mawk dan ahi. Vaihawm siam mahmah kul tazen hi. Huchilou in zaw, lugsim ahon zang taktak ua, athu hatzawpen in agukin kipahna ding mumu thei zenhouh hi. Singtang nangawn ah numeite kihaja mahmah ua, pasalte pawtkhawmna deuhte, gensiatna ding zong nilouh sekmah uhi. Numei ahong pangkhawm taktka ua, nungak ahuatdeuh uh ahon bomhuan taktak uhchu aw, vaal sak chiang chaichai mahmah eive ua, spitefulness zangkhafuh kisa-ngial unteh. Tangval ten hel ding a enlou sakzou eisettawk ve ua! Himahleh, nungak hailou inbel, asuahtakna ding lampi hon zongsuah a, athuthei deuh khat ahon mat geih leh, adangte lehvalsak deer thei hi, kilumlet bilbel sakzou hi. Mite’ simmohna pen I khansuahna kalbi zong hithei hi, khua sung a vaal kisa mahmah pa/nu khua dang ah star attraction suak thei hi. Khua sung a zatna bei, chia mite gengen zong, khua dang ah poimoh viau thei hi, kizatdan hoih, leh khosakna kibulpatna dingin pangkai mahmah thei hi. Mahni tenna khua haksa sakziak a taikhia, lohchingtak a khawsa mi tampi om mah uhi.

Hajatna ziakin mi khat in, ahuat mahmah pa mit nih khelkhaik ding ahihnak leh, ama mit khat khelkhiak poisalou chih omthei hi, lungsim meima neite hinkhua ahi. Invengte huat mahmah theinazenpi a hih teitei ut mihing ki-om tazen hi, mihing’ ngeina ahi, kihoulouh ziak zong hithei. Nupa kina na, kikhen ut hialthok, huchidante kha hajatna ziakin a neih le lam uh khohmangthang thei zenhouh uhi, kikhen zohchia sum tampi ka liau sangin zangmang ning, chihna ahi hi. Mi hoihlouhna gen ding thei mahmahte, amau zong huai dinmun ah om le uh, akhawk penpen ding hizawmah maithei. Dan bohsiatna lam gensiam mahmahte leh mite diklouhna gen zangzangte kha, akhawk pen hinuam mahmah uhi, mi ikawk leh I khutzung thum in ei hon kawk ahi chih dik mahmah. Misiamte sutdan in, huatna lungsim leh thiikna lugsim neitam ten mi gensia sia ua, misiatna ding lungel pen in nei zenhouh  uhi, amau ading in thilphatuam om hetlou napi’n hahkattak in pang kunkun peih laizang ua, court case khong neih nilouh zong poisalou uhi, chihdan ahi.

Lugsim paidan diklou, mi hem-et, thil teng koi et leh misiatna ding kia ngaihtuah, migensiat khong atempaina lam hizawmah chihte kha, lungsim kikhekna khat bawlsak poimoh lua uhi, kisugim thawn leltak ahih dan uh theihsak kul hi, banah khovel ah mi tengteng kibang sipsip lou ihihdan khong theihsak poimoh mahmah hi. Sugkuan a kithuhilhna leh lawm hoih neih khaak in thupi gen mahmah a, zi hoih, pasal hoih neih khaak zong a damdoi hoih penpente ahi hi. Miten sum hon hau, neih le lam hon nei, buaipih louh ding hinazenpi, I buaipih khaak chia, lunggimsak phet ahi, kipahpih sukleng asiatna omlou hial napi, kipahpih thei hetlou chih khong lunggimna phatuamlou ahi. Huai sangin, ken leng theihtawp suah in pan kon la ding a, kong kisuk tei aw le! Ka pa tapa! Koitak ahia? chih zawk dingdan ahi hi. Huai dan hileh bel, hajatna hoih (virtue) hizaw lel ding hi, phatuam mahmah ding a, vualzawlna naak zong suak thei takpi hi. Mi khat in a sepna ah lohsam kisa adiam, hiai ah chiltang mekmek dia om nilouh sangin mun dang ah pai leng a phatuam zaw ding, chia kisingsa inchin, lungkim mahmah dan ahi, kiim leh paamte soisel sel sangin hihfuh zawdaih hi.

Itsikna, hajatna, chawhtak heh aw! chihna lungsim munkhat peuh ah om thei zelzel a, office nasan ah kihajatna nasa mahmah hi, kisuksiat tupna ichi hiam, tungnun’ kituhna ziakin midangte heksiat utna lungsim nei om neunou thahah uhi. Boss te’ kipahsak utna ziak in a poimoh lou tantan in kampau neu zongsang ua, mite sepsuahsa a credit (minphatna) ngah sawm a kivial pei om mahtham uhi, naupan’huai chihding hia? Piching ngen omkhawm hinazenpi, hiai khong zaw  khovel in apuaksuah ahi. Kuhkalna in hiaite liahkhuh thei a, phiatmang thei zelsam hi, challenge dan a lasiamte adingin, niteng in puakgik puakseng louh omdan ahi hi. Tuaziak mah ahi, stress chih khong, depression chih khong, damlouhna mak taktak ineih nasan uh. Sakhua heutute gentangpite i zaak mundiak, (haksatna leh mangbatna a thuahte uh) platform hoihtak nei leh captive audience nei ahihna uah genkhiak olsam sa mahmah uhi. Ahia, khovel a piangkhia peumahte nekzong chiat ihihna ah haksatna leh mangbatna tuaklou ki-omlou ding hi, genkhiak theihlouh leh miteng kiang a kup chilou tamtak I niteng khosakna ah kituak chiat a, sakhua heutute kia hithahah louhial uhi, himahleh platform hoih apat genkhiak bel olsam diak hiding dan mah ahi. A degree zong kibanglou deuh himaithei, chihbel emotional lam toh kisai leh kisailou thilte ahihna uah.

Bang hang a mi ginalou, lungsim hoihlou leh sualna bawlte lohching ahise ua, chih kingaihtuah nilouh thei hi, thil omthei mah ahi. Himahleh, tuachibang hinkhua hoihlou a gamtangte I engsawn ding ahi thahah kei, I kisinna ding leh thil hoihlou apat kivenna ding lampi dik leh hoih hon kawkmuhtu isuahsak ding ahi zaw hi. Khawvel a khosakna, nekzonna, kitaitehna ah chalak deuh mah zaw poimoh mah hi. chalak siamloute kituantual nuamse hi, khanvualte kiphalah deuh mah hi. Chalak siangthou leh chalak huathuai a omzel a hiven. A degree a teh dingin Meitei chalak sangpetmah a, Bengali chalak in phazoulou hial hi, tua mah bangin eilak ah zong anam anam in chalakdan degree tehtheih ding hi, abeh abeh in zong…. tehsese ding chihna hilou in, theihsiamna ah koih ni. Traffice tamna ah awl hiathiat in tai lechin midangten hon awm diamdiam louhial ding uhi, huham’ deuh mah ngai ahi, Bombay ah local train tuan’ sawm, mi lutmasa sak nilouh lechin, nileng in zong na tuangkha keihial ding, amun azir a khosak ngai hi. Khopi ah bus, train, metro tuanna ah numei ten atuahteng uh poisa in hang laklak mawk le uh, nileng a buaiden ding uhi, pasal ommohte ka genna. Chawhloh zawmah lai ding ua, hehpihna mark muh kilamet louh ahoih pen hi. Pilvan’ louhziak a poket maar na tuah leh khasiat sese a phatuam kei, panpihtu  na mu kei hial ding.

Siamsinna, sumzonna, nekzonna tengteng ah kihajatna, kisimmohna, kihuatna, kiengbawlna te adimset in munkhatpeuh ah om vek hi, leitung a kitaitehna ahi, mite chawhloh ding a om sangin, lohsapna ah sporting taka lakdan siam kisin kul hi, thuaktheihna, kuhkalna leh pilkheltak lah mite siatna ding khoihkha zenlou a gamtatdan siam kiphamoh hi. Biakna toh kisai zong, gensia sia pawl ki om zenhouh hi, dinmun deihna hiam, hun tanglou kisa hiam, tuitumzou kisalou chihdan aom chiangin pawl kisehkhen naknak hi, heutu dinmun utna hikhasek hi. Khenkhate asung a tuitumtak a om hinazenpi, intekpan mahmah lou, melma pan maimah zong omtheih hi, pawlpi sung a setan kiphualgu, achang chang a dawk zeuh zel chihdan  om uhi. Biakna nasan ah kitaitehna nasatak om ahihzenhouh leh, khovel khosakna leh nekzonna ah, kitaitehna nasazawsem dingmah zaw hi, politics bel genlouh a maang. Uangtak a nekguk takguk ahoih louhdan gengen theite, adinmun ah om khaloute hi-ut mahmah ua, ne thei ta thei dinmun ah omkha zenhouh le uh nasa ngial unchia, chipawl omthei thepthup uhi. Khenkhat leuleu, ut le dah a khosa, hih zialzial, a omna kisuan khiak ziaka huchidan a khosa thei nawnlou, a theihsa, ahihsa mah gensia sia,  mihingte ikibatlouhna uh huaikhawng ahi.. Sports lam kitaitehna ah kisiangthou sakpen pa/nu adiktak in performance enhancing drugs zangte lak ah tel ut diak hi, alangtang a siangthou, hilehle aguk a bel poisak neilou, huchidan mah hi. Mi a kisiangthousak tata a ninpen, a kholou pen, a virgin lou pen, agukkhah pen, a thulimlou pen hidaih nuam/ut mahmah chi ua, kiselsiam ziak ahi chi uhi, dik mah adiam? I kitheih chian’louh ziak aleltak diam maw, maimah in? Huaiziakin, spite ichih kha thil hoihpi ahi, azangsiamte adingin. Mite huatna, hajatna, chawhlohnate I tuah ding mah hi’chin, pumpelh sawm nilouh lengzong hitheilou hial ahi, fakna kia dongtute ahinkhua uh a derthawng zaw a, zong mangbang baih zawtham uhi. Mite simmohna tuak lou kua aom dia? Abraham Lincoln ahahthuak pen pawl ahi ngei ding, Mahatma Gandhi kaan a simmohna, enghouna leh chawhlohna thuak mihing tamlou hial ding hi. Hksatna apan kisekkhia uhi, sik hoih apianna ding in meisa a haltui ngai ahi, pichinna dingin haksatna tampitak experience a thuakmualsuah ngai takpi hi, Christianity sakhua I zuihna ah kilang mahmah hi, haksatna tampitak a thuak mualsuahte kha lawman lallukhu dongtu ding ahi, chia kisinsak hive hang: chihtoh kibang geih maw?