SINGTANG MEH MAHMAH by Vungzamuan Valte

Singtangmite bazar aom hia? Bang meh akizuak deuh, sihzou, ngari, tengkol, aisa, gawtuai chihkhong aom diam? Guwahati ah Beltola, Shillong ah Happy Valley, Agartala ah Cricket ground nunglam a bridge nuai, huaidan kha hidaih mai, eite mahmah. Bangdia zawngtah huchituktel a ngaina ihi dua aw? A namsiat siat toh, sung nat- lai nat piangsak, ekbuk sungteng uih hluahhluah, nawtkuang in haal le kuangpuatpuat hial leh kilawm. Khasite gam ah zawngtah gammang lak ah tam hiven, amau nelou napi ua sum muhna dingin zangtakpi uhi. Assam gam leh Tripura ah tamdiak hiven, kizen kisa thei ngial hilou hia? a kg a lei hizawmah.  South India ah zong wild in pou maimah a, zawngtah nekdan hon thei mawk le u’bel aman saang ve! Huai zawngtah nektheih ahi chih musuahtu mahmah Zogam Award sangpen pen piaktak sa ke, duhgawl dan le chituam riau himaithei. Mandalay, Tahan, Tamu lam apat zawngtah alom alom in Manipur te supply zungzung uhi, sumnak suaksak akei ua. Tangkuangteh zaw, damdoi dingin Bengali ten tamlou chikchik henlom chiltel ua, I lom laksak vekchia, phallou zawmah uh akei maw, ..daawai hai..chimak uh akei!. E’nbel leigaihsak vek sawm, kimu vekvek lou ahihchia. Gamsa chituamtuam, nektheih dia le gintakhuai lou khong Dimapur Bazar ah om teltual, kikhai ngeinguai, Lamka Bazar ah zong zawng leh Ngau sa tam chi uh, lamdang kei, nektheih nekmawk neiloute hihangh. Munirka ah uisa, bawngkerot, kawm leh zubi kan’gam eksoubis toh kizuak. Delhi leh mundang dang ah eilamte omkhawmna deuh peuhmah ah zubi kan’gam siksek toh eksoubis mithra pata ngat vaite’n hon bawlsak ua nuamtuan lua a’ihbang.

Vaite lak ah buhsih mah kiduh hiven, antang bag lianpipi ipuak kungkung chiangin lamdang sa ua, amau bel ata vui tamlou toh khosa liklik thei uhi. Roti tamlouchik bawl nimnem ua, achar khong toh tui thuah in, ne liamliam thei ua, hoihlou tuanlou maimah uhi. Lunch box ah roti pek nih khong thun chicheuh ua, amehpih ding allu kan tamlou khong toh lungkimtak in kuan laulau thei mawk uhi, buhsih lunch box ah chamber nih khong a thun ngai, mehtui pepulh khong toh, a nam vengvung khong puak chihchu uthuai thahah louhial zaw hi. Tuaziak mah hilou ding hiam, lunch gilpi a puak mah kisiam zaw tangpi.

Bekanthu pen Assamese, Arunachalese, Khasis, Nagas, Tripuris, Mizote leh eigam singtangmi ten kinechiat hi, Khasi ten tungrungbai ahon bawl taktak uh chu, khaaktak ahi, nam vingveng mai. Meitei ten a ngari uh ahon bawl taktak uhtuh, nasana eive. Huai, Burma lam suak leh Bangladesh lam suak ngari chikhat NGAPIH a uihdan chu..ganpul muat chiah chiah himai. I nek chia lah limlou tuanlou zel, nekzoh chia gilpuak eng ang a gilpi zuut hauh hauh himai, fan hattak a kimutsak hizawmah, ihmut suak riairiai maidan hilou amaw!  Gawtuaithu ngialhouh a neilou kiomlou hial hi, North East mi peuhmah in chiindan khat nei in kibawl chiat a, lim zong dawmlimlou hial hi, akoihna container airtight ngai, a puakna bag namtui viaiviai, fridge sungteng nam vengvung, tuidawn ding nasan agim in luahdim sipsip. Huchituktel a gimhat, I damtheihna dingin ahoih mah diam? suitak ahi. Meh kholailengte khangkhuh leh singloupi mahmah thupi sa ing, vengsung teng ah septik leakage omsak zouhial hi’nchin, tawlet khaak uai tawlet khak uai, drain pipe, septik, leak ahi, chia vaite kikou kheukhou khong thil nuihzathuai hinawnlou hi,  kingeinaseh ngopta hihang. Vangphat-huai takin singtang sipisial ai-um, vaigam ah I pawlut kei ua, kipahhuai lawtel, khaak diak hi’n maw. Vokthau um muat zaw lim tiptiap, sungna piangsaktu chu hipeuhmah ding eive.

Koimun peuh ah om leng, singtang meh duhna puang mawk, inn lam a I duhngellouh khong tata kiduh tazen, lamdang. Maiteh vaiten nektheih ahihlam theilou ua, lamgei peuh a maiteh kai ngeinguai imhuh chiangin kidam hamsapi ahi, I gen chia hon laksak somsom zawmah uh a’ihbang. Vai mehzuak ten begap tampipi zuak teltual sek ua, ateh muhding om mawngmawng lou,  ateh nektheih ahihlam theilou hizawmah uhi. Nupi enterprising deuh khat in, hiai agah zuak u’chin a, ateh la ngeilou u’maw? Achih thahah leh, kou nektheih ahihlam theilou chihsan hiau. Na zuak nawn chiangin ateh tamlou hon puak in chia thukhak, hon puak taktak, nektheihte anahi, kipak lawtel, nidangchiangin leng tampipi hon puak in, kei kiang kia ah non pe di, chi. Nupi dang khat in hiai chanchinhoih anathei kha, sumlom muhna dingin hijack sak hiau, tua bel vaite mehzuakte nasan in BELAWI,  BETEH chia kikou lauhlauh ta. Delhi a R.K. Puram lam nupite hi ka gen. Munirka sung ah singtang meh zuakna om hi, uisa leh bawngkerot toh, chinchi tak ahi, pilhuai sa ing. Himahleh, ui mat mawkmawk haihuaipi ahi, Koera ten uisa duh chihtakpi in duh maimah ua, a Embassy gei-lak ua stray dogs bei hiau, Maneka Gandhi in buaina sautak bawlsak hial hi. Vaigam a ui vakthap teng I gam uah pawsuah thei leng kihauhsak loh hial leh kilawm, Mizoram leh Nagaland ah kikhawng bei hiau ding hi, Manipur tung zoulou di aka! Election duty in Manipur apat IRB te Agartala ah koih kha ve unchin, Minister khat ui vulh lai, a duat mahmah neksak maimah uh hihtuak, Minister pu kap hialthok lah aw.

Singtang louhal zoh in, tuaiterek leh aigechil omlai ahi, singnou sel panpan, haainou sel panpan,  tua hunlaitak ahi, tuaikitui hawp kulh kulh hun, mawnglawktui zong limse. Khangkhuh muh ding om simsimta, singthupi mahmah zong hong naipianta, lung, kilawp in, aom ngei, chipawl kitam ding hi. Khatvei, 2000 kum lakvek ahi, ka Sungpa damlai hiven, Delhi ah hongzin inchin, bag dim in singtang meh hon puak tazen, gik sasim zaw ahingei di, “gam hiai tantan aom khong in, inn lam meh duh vettak kei mai le u’chin, vaite mi hiaizah in anek theih uh nesuk maimai ve ua”, chiin ana kithuhilh uhi, awmtak ahi. Ahia, inn lam meh puaktu ding neite, thontu ding neite bangchu mithupi a ngaih hizel unchin maw! Inn lam meh ka nei, ann hong ne un, meh hong la un, chia deihsak deuhte sapkhawm khong nuam asak lamtak uh hithepthup zel inchin, buaihuaipi zaw hi. Khualzin chia ei a ding puak zaw thukhat, mi meh di puaksak mahtak,  gimse/uihthei boksi. Apilvang lou deuhte ngialhouh, baalpi mi thot puakkhak ziaka excess baggage neihlawh,  paih dial ah …heiha, airport sung a kua theihpih louh a kapkap khong ki-om lawtel dan ahi. Laithon leh sum kipuaksak zaw theihsiam huai lua, ahong lak pah ding nak ua leh. Mak ka sak mahmah, tunitan a ka theihsiam louh chu hiai ahi, itna ziak chu ahipeuhmah ding, nupi ten amau duhlouhpi khong vaikhak ua, ahong tunchia kipak petmah mawk uh, miteng hilh ua, hawm sawm zawmah laisek uhi. Kipahna melmuh chu anuam a ahi di, kipahna ding zon dan chikhat chu ahi peuhmah.

Huai ichih hangin, Bengalite mahmah uang uh sa ke, khualzin haat chihtakpi in haat ua, nek ding buaipih takpi in buaipih zel thepthup uhi. Nga keu khong pua uh ei settawk voi, nga lou a hing lou ding kisa aduam! Vegetarian kichi peuhsette lah, buaina pianna khukpi hizel ua, aktui ne, duut dawn, lah sa nelou kichi ua, Meitei ten zaw “I am a vegetarian, I can eat fish and Chicken” chi ua kizen linlian mahmah zel. I om gamla’ deuhdeuh leh tangmi meh duhna lian deuhdeuh adiam? khatvei, USA a om khat in zawngtah puaklut sawm hihtuak, airport ah paihsak daih ua, enliam vongvong maidan ahi. Bang dia sum leh tha, ngaihtuahna, phone, hun, thautui, leh adang dang sengtakpi a singtang meh ngaina vulvul ihia? Chih kidot thahah ding hikei, foreign a zinthei mitampi ten a tamsung ding uh daih di dal/dailuah/beans/pea chih khong pua letlut uh ei settawk voi. Chinese te ngial houh nek le tak ah kuhkal petmah ua, dolhou khong, pasikhawm khong kem tektuk ut mahmah uh ahi, Chinese market ah meh mak deuhdeuh muh ding atam, eiloi ten kituahpih viau laitei hang.
 
Louhing leh ganhingte, I gam a piangte mah kiduh ahihchiangin, I sisan a belh ahitakpi ve, gam itna, nam itna, khua le tui itna hon chituh hiveh aw maw? I gam ah piang kei leh duh leng zong kimulou ding a, deih leng zong kinei zoulou ding a, tua ziakin I gamsa, I leitang, sing le louhing, haichi, gua le maute teng teng  kep leh zuun ngai lawtel dan ahi ve. Kuva nasan I gam a pianglou pentak huchituktel a iduh leh ching in, suan in, pousak zaw leng hilou ding hiam? Nekzon theihna ding tam semsem leh kilawm maw? Himahleh maw, singtang meh puak ziaka excess khak, dom ding hautak/gik toh kinakna omveu chu abuaihuai viau mai, banah sungkhat laina, u le nau.. singtang meh khaktu ding neilou pawltak chu ka hi,  poi ka sa lawmlawm kei, a uih thei bek a....

Khangthak ten singtangmeh mah ahon chitou tou lai duam maw?