THE KAMKEI
Tiger Tiger, burning bright,
In the forests of the night;
What immortal hand or eye,
Could frame thy fearful symmetry?
In what distant deeps or skies,
Burnt the fire of thine eyes?
On what wings dare he aspire?
What the hand, dare seize the fire?
And what shoulder, & what art,
Could twist the sinews of thy heart?
And when thy heart began to beat,
What dread hand& what dread feet?
What the hammer, what the chain?
In what furnace was thy brain?
What the anvil, what dread grasp?
Dare its deadly terrors clasp!
When the stars threw down their spears
And water'd heaven with their tears:
Did he smile his work to see?
Did he who made the Lamb make thee?
Tiger Tiger burning bright,
In the forests of the night:
What immortal hand or eye,
Dare frame thy fearful symmetry?
William Blake in hiai lavui a phuakkhiakna dingin sahang hinkhua theikichian mahmah hi.Sa lauhuai leh zahtathuai ahi a, mite lungkhamna tuntu zong ahi hi. Jim Corbet in sahang mihing nete tampitak (200 vaal) Kumaon Region ah that hi, thupi mahmah mai, tua hunlai in mihing sa nethei (man eater) lauh chihtakpi in lau ua, suahtakna tampite kia’h tun hi. Nidanglai a Raja kichite a thupinate uh akitehna tangpi uh sahang matzah chih khong ahi hi. Gam vak in kuankhia ua, tei toh silai toh mi tampipi, ni tampipi gamlak ah sahang man dingin (game) kuankhesek uhi. Meitei gam ah zong Kabui Kei-oiba chih om ngei hiding hive’n laibu ah kisinsak hial uhi. Mihing khat sahang suak chihthu ahi. Meiteite tangthu thupitak “Khamba leh Thoibi” ah, tangvalpa a vualtungtuanna tak bel, sahang matsawmin gamkuan ua, gamlak ah sahang in a boh laitak in gawzum hoihtak lei ah phut in pang tengtang a, sahang in a boktakin a nakguh kikartak ah vutlut chet mai hi, mite simmohpa pentak thupitak a tawisang in om maimah hi.
Tulai in sahang in mihing ne chih kithang mahmah zel a, Sundarbans lak ah uang diak hi.India phualpi MP leh UP khong ah zong leopard in mi ne chih mah tam lua hi. Banghang a sa in mi ne hiam, chihleh a gamsa nek ding uh tawm hiai hiai, gammang bei hulhul, huchia mihing leh sa kimaituahna tam semsem dan ahi hi. Gammang lak ah nek ding a muhzohlouh chiang un vok, kel, bawng leh mihing nasan ne maidan ahi uhi. A liam leh bai, a damlou leh teksia chih omtham ua, gamsa manzounawnlou ten huchidan ngongtatna nei uhi, ahangbel easy prey zongmaimah dan hilim uhi. A liam, khebai, habal, chinkia chihte khong mah hinuam chitchiat ua, gankhoite kel, beram, vok, bawng banah mihing khong enlah maimah uhi. Mihing ten a maingalluat chiang un, a gamtatna uh, a lalgam te uh a suasamsak zialzial chiang un thangpai mahmah dan hiding ua, bohthut policy zatkhum naknak uhi.
Mihingte lungsim luahdimtu hiai sa lauhuaitak in khovel pumpi ah thuneihna lianpi nei hi. China ten Yi biakna achih uh sahang biakna chikhat ahi, a Zodiac sign uah zong telsak uhi. Nepal ten Bagh Jatra achih ua sahang kutpi ahi, Tibetan, Sikimmish, leh Chinese ten Sahang pen khovel a thi-piangsaktu (matter) chi ua, Dragon pen spirit chi ua, tiger/dragon dance hih sulsul sek uhi. Vietnam ah tiger temple bawl ua, gamsate kumpi, hangsanna, thupina, poisakneihlouhna ensak hi, chi uhi. India a Warli tribe ten sahang khekhap a muh chiang un “Paoona Aala” khualzahtak hongpai chi’n kikou tuaituai sek uhi.Vualzawlna tuntheitu chi uhi. Goa ah tribes khekhat in sahang lauhchihtakpi in lau ua, bia hial thok uhi, that ngam sese louhial uhi. Rajsathan a Bhils ten sahang bia ua, a pathiannu uh Ambadevi sahang tung ah tuangsak hilhial uhi. Korku tribe ten sahang bia ua, sahang guh leh lei damdoi hoih dan in ngai uhi. Tulunadu tribe ten khaa (bhooth) lau in bia ua, sahang kha abiak chikhat uh ahi. Baghels kichi MP a tribe khat in sahang apat piangkhia kichi hialthok uhi. Kols kichiten sahang pen Baghsehwar Deo chi ua, nek leh tak a vualzawltu chizensam uhi.
Lyngham tribe, Meghalaya ten sahang pen mihing kha chikhat ahi chi ua, mihingte vualzawl theitu leh gawtna petheitu chi uhi. Garo numeiten sahang chin leh anak khong ok ua, damna ding leh vengbitu chizensam uhi. Nagate leuleu in mihing leh sahang pen suangtu kibang, NU khat apat piangkhawm hilhel, khat pen gammang a khosa ahilel chi uhi. Pawite khenkhat in sahang bia ua, Nutar kithoihna chi uhi. Hiaibel a vualzawlna ngetna dan uh ahi, vok gou ua, zu phih ua, tuibuk phih ua, lungkimsak uhi, tuachidan a hihte kha sahang in khoihlou kichi uhi. Amau sahang that utlou ua, sahang kithat amuhchiang un, “He Pu, kua khutliam hong tuakkha na hi zenhouh a”, chi in kahpih uhi.
Humpinelkai, Keipi, keite, Gialbem chih khong igam ah omngei uhi, himahleh tunichiang in humpinelkai bel muhphak ding om nawnlou hial hi. Keipi (sahang lian) pen pil mahmah a, mihingte khosakdan enkhia khia hidan in kigen hi. Zapau Sukte in Thanhranga Sailo Khuangleng lal a omlouh kar un ruun ek a salkaih leh mihing thah 300 lai nei hi, Thanhranga bel a unaute toh galbawla kuanmang ahi ua, Thanhranga salnu Dimnem taikhia in Zapau hiaithu hilh a huchia Sailote vadou dan ahi uhi. Mualbem ah salmatte uh lawm in zu leh sa nilengleng in ne ua lamlam maimah uhi, huchihkar in Lalkhawl leh Thangneihkhawl a salmatte uh numei nih taikhia ua, Gunnlui a tuntak un tuilian-in khaktan hi. Lungkham leh mangbangtaka a om lai un keipi lian mahmah vapai a amei khong vatahtah mawk hi, tui khong liangalkai in kilehkik zel a, huchi in Lalkhawl in keipi mei lenin gunlui galkai hi. Sahang pen kilehkik nawn a Thangneikhawl zong huchimah bangin galkaipih nawn hi. Huchihlaitak in Salmat mah Tuahdim zong gunlui gal ah galtai hong tungsuk tei a, sahang in vapikai nawn leuleu hi. Huchin, keipi in a lampi paina uah zuizui a, zan thum mawngmawng a giahna peuh uah veng den hi. Zingsang khat, Lalkhawl pa gamvak toh kituakkha uhi, huai apat keipi pen paimang dan ahi. A hong suahtakdante uh, sahang in a panpihdante a gen chiang un apa’n zong, aw nang keipi migi, tunitakin ka innnuai ua vokpi hong la in chi’n thukhak hi, tua zan in vokpi va-ne taktak a, tangvalte’n a delhdek chiangun, intekpa’n khambikbek hi, ka piaksa ahi, chi hi. Thanhranga Sailo zi, pi Dari leh atanu Banchhingpui tanchin zaw, hiai kiruuna huhamtak a thiltung himahleh, i gensau dah mai ding, Mizote lungsim nasak mahmah khat ahihziak in.
Lauhuai mah zaw ahingei ding, naupang khemna dingin kihahzat mahmah a, kahngaibawmpi, sikhapi, sahang chihte khong I kikhem ihmutna ding ua hoih mahmahte anahi hi. Keimi tui chih zong omsak hihang, tua keimi tui dawn peuhmah sahang suak ziang thei danin kigensek hi, tangthu kumlui khat zong om zawmah hi. Keimi tui mun khenkhat ah omtakpi hi chi ua, mun khat aomna bel Tualkiang-Haichin khawgei ah ahi. Kichiamna dingin zong kihahzat mahmah a, sahang luguh sung a tui dawn ngap hiala kichiamte mihangsan ahi uhi. Pipu ten sahang lau mahmah ua, a man zoute pahtawina sangpenpen pia uhi, Ai sek ua, nupisia danin a mantupa kicheisak ua, buk tepkawm in nik teng nepnuap se hi. Sahang lu pen phoukhia ua, sahang kamsung ah suang guanglut uhi, a mantu in aktui keitam a, nang non zoukei, chi’n a ngawng ah bantan toihtoih a, laamkhum nilouh maidan ahi. Tuazohchiang in mipa pen salpha danin kichei nawn leuleu a, Sahang kha (spirit), leh sahang dang mualtung apat ana-enkheukhoute, lau leh ling kawmin meital zenin kikhohmang hiau uhi, chi uhi.
Nungak tangvalte a kingaih taktak chiangun kichiamna dingin zangsek ua, sahang in hon theihpih hen, k’on khen ngeingei leh sahang in hon kei hen, chia kichiam hialte, a thuchiam ua ginomloute sahang in la taktak sek ahi chi uhi. Sahang haa kei zen a kichiamte chu a thuchiam uah ginomna uh ahi, chihdan ahi. Nidanglai deuh in Serbung khua ah thil lamdangtak tungngei hi, nupa khat om uhi, tua ma deuh in, sim lam ah khosa ua, Khawhai ahi chi uhi. Tua nupate a kiten ding lai un, Ralte nungak ahi, akiten ma un nungak nu leh pa te’n ka tanu na pemkhiakpih louh ding uh ahi, chi uhi. Khenkhatte gendanin, a nungak penin a pasal ding pen kianga akichiamsak dan ahi chi uhi. Hun hong paizel a, mahni mi leh sate omna lam a khosak hong lunglengta uhi, saklam manoh in hong pemkhia ua, Serbung khua ah hong khosa uhi. Kum khat, Tuimang gei ah lou nei ua, lougiak uhi, asanggam numeite uh nih toh lougiak in om uhi. Nikhat, khawmui kuan in keipi loulai ah vapai mawk a, pasal pen tuah mang maimah hi, a zi kisazok in tu toh pangin a pasal luang vahunkhia hi. Nitakin, loubuk ah giahpih ua, keipi pen buk kimvel ah kivei kivei maimah hi. Buk bang a gua kiphante nek puak kungkung zel a, numei in leng “Nang le zahngai deuh mahmah tan la” chia semlawng a akhet leh bangvang apat sawkkhe hiau hi. Luang khat buk a kikham, khat pen tuahmang hita, mangbathuai chih louh chu gending dan aom kei himhim. Numei khat pen lau lua in taisuah a, azan azan in khua taitung hi, khat pen tui-um tunna bul, loubuk sung ah kibuden hi. Sibup mansim chi uhi.
Khuasung a mipite huai sahang lauhuai mahmah chang dingin kisa ua, papi leh tangval thahat teng kuankhia uhi. Tuate lak ah naupang tleirol khat tel a, nang zaw na naupang lawdeuh lai, kik mai in chin sawl sawl maimah uhi. Amah pen sawl a tading hilou, kuan teitei tum tinten dan anahi a, kuan teitei takpi hi, silai khat pua hi. Zankhua in sahang pen chang ua, suak mahmah louhial hi, khovak ngakin ihmu sim chiat ua, hawm neilou hial in tua keipi pen hiai naupangpa maitak ah vatu leuluau thahah hi, aman zong muhamham kawm in amaitak a tu ahihtoh kap pah a, sahang pen nakpitak khatvei kia hawkging throt in lamkhanglam ah tuakkhia hi. Khuamial thiithiai lai ahihman in zingkhovak ngak ua, khovak nuai ah anungsui uleh, naichik ah ana si leplup hi. Tua mihangsan, tangvalnou pen kuadang mah hilou in, ka pu Lianzawn Khuptong piana pu Thonglian ahi hi. Zankhatthu in mihangsan leh minthang asuak petmah mawk hi, tu hun lai in Serbung khua ah inn 700 khong om dingin kigen hi. Pu Lianzawn bel tu’n Lamka, Teddim Road ah (Pa H. Chinthang in gei ah) asuangkuante toh khosa uhi. Hiai thiltung lamdangtak pianna pen sungkuan khat nu leh pa te tanchin chia genmangmoh khat ahi hi. Sahang in thil hihthei mah ahi, phuba la mah ahi, chia genkheukhou in omphah hial hi, sahang in tua thuchiamte thei a, za a, tuachibang thil huhamna nasep hihmah hiam?