BANG SINLAI NA MU A.. By Vungzamuan Valte.

July, 2013 khabul in IIM Lucknow ah management course (capsule programme for senior management) sinsak in ka om masa ua, misiamte laizirna ah va teltei chu ka hi tei phot peuhmah hi, college kaikhaloute a di`n chu a tha-ithuai khopmai le. IIM Lucknow te hon sinsak tangpi hiaite ahi, Fiscal and Monetary policies, Banking and Financial Policies, IT Infrastructure, Knowledge Management, Leadership and Motivation, Lifestyle and Motivation, Organisational Development, Sustainable Development, Team Building, Social Network and its importance etc. Kar thum sung vingveng ahon kulkhum nungun, phurtak leh harh vikvek in dakkar 9 khong vanlaizawl ah kileng hi, London (Heathrow Airport) ni 28.7.2013 in ka boh uhi.  Europe gam  manglam a I muh baak kimukha nailou ahihna ah hampha ka kisa tei mahmah ringot a, miten zaw a ut leh dah ua atotkual nasa  uh ahi, chihbel kihaih samlou hi,  nunglam sabah asuak. Lehkha zir dia kuan hikei mah le ung, sep ding leh sai ding tampha ngial a, hun awl tam honpe hetlou mawk uhi, noptal dia India government in ahonsawl chu ka hikei peuhmah phot uhi. Bang di’a sum hiai zahzah seng adua aw, sum lakh sawm valval mi khat tunga seng settawk ua, haivai lua vachih thahah di lah hikei deuhve’n, a guk in nuih nuih theih hitakpi hi, asum in hon pe zaw ve ua, chih le thilhithei hisamlou suak hi.

Airport ah hon dawntu omlou hileh buaipah theihna tampitak om hi, Thomas Cook te ka overseas partner uh ahia, kizen mahmah, Kensington ah tunna ding hotel nuamtak, banah London khopi a munpoimohte ka hohna ding teng uh book sa leh mansa sipsip in feltak in duansavek in koih uhi. Mr. Thomas of Serbia, mi polhnuampi khat hi a, travel guide leh tourism management lam ah Western Europe specialist ahiphot peuhmah hi. Ni 29.7.2013 in London khopi aa munpoimoh tamkuamtak, Trafalgar square (Admiral Nelson in 1805 a Napoleon a zoh theihgigena), speaker’s point (Gen ut sak ut nei ten open taka  tangkou theihna mun), The Thames, London Tower, London Bridge, London Eye, Madamme Tussauds, Hyde park,  James park, Regent park, genseng khang e,  hon fan’kuapih zoh in, khawmial in nitak dak 9 vel in, dinner dingin mahni utna chiat ah ka teikualta uhi, Indian restaurant zong pah lawi, Chinese le poikei chipawl, a tariff sanglua chipawl, sum kheksak dia kipeibuai, hoh utna tuamriau nei pawl, utna chiat ah ahi phot mai. Vaite’ felna tak bel, London khong ah dinner nekpih dia thuaikhetu ding nei ua, chilkon ahichiang un, pilhuaipi khat ahi, chalak le zaw haudeuh mah uhi.

Ni 29.7.2013 leh 30.7.2013 te sehsa a om bangin London School of Economics, manglam a i matphaklouh namun ah hon hmuaktu, hon makaihtu leh subject /topic geelkhawlsa bangbang a hon vaisaipihtu, ahun ahun a feltak a hih kim sipsip, akaan avaal omlou, a kimlou leng omsamlou in hiai mun ah ni nih sung ka program uh khamloutak in ka zou uhi. Power point presentation ngenta ahia, facultyte lah siam, amun lah nuam, lunch chu veg. te a dingin a buaihuai deuh chihmanthu. Gender sensitization (a global perspective), E-governance for social upliftment, International Trade Practices and Development, Financial Management in the Digital Economy chih khong a thupizualte ahi hi. London School of Economics pen 1895 a ditkhiak ahi a, Fabian Society te panlakna a kipankhia ahi hi. Socialist leh reformist te patkhiak hi a, revolutionary lam hizawlou in society hoihzawkna ding ngiimna ahizaw hi. Hiai University in U.K. ah Labour Party piangdoksak a, mipite leh vaihawmtute nasatakin influence zou hi.

Ni 30.7.2013 nitaklam in Cambridge lam manoh in kuankhe leuleu ung, huai ah ni nih sung mah, Judge Institute of Business Management, Cambridge University a lecture room nuam penpen ka tangkha uhi, kithawhuai hial hi. Cambridge University pen 1209 a kipankhia ahi, Oxford University apat lungkimlouhna neite patkhiak ahi hi. Oxford leh Cambridge University khovel a alui penpente hi ua, Oxbridge chia minloh hial ahi uhi. Cambridge te kisaktheihna mahmah bel Noble Laureates 90 seksuahtu kichi uhi. Cambridge endowment pen Pound Sterling 4.9 billion 2013 in phazou a khovel pumpi a fund neihoih penpen asuak uhi. Cambridge ah college lui penpen Peter House hi a 1284 a bawlkhiak ahi hi. Clare college 1441 leh King’s college 1515 a kiphutkhete minthang deuse uhi. A nuihzakhuai sim bel, Oxford toh Cambridge te huat chihtakpi in kihua ua, kidem peetmah uhi, kum tengin boat race kidemna nei gige ua, huai hun pen a kisoisak nasatna hun pen uh ahi gige, skill banah endurance poimoh mahmah a, team building leh team work nasatak in sinsak vial laizang hi. Oxford pen Hsitory, Political Science leh Literature ah hat mahmah a, Cambridge pen institution tuamtuam 30 val nei ahihna uah, Management course chiteng, IT leh Engineering lam chiteng ah tungnung peuhmah hi. School hoih taktak 30 val zong om laizomah hi, teaching professionals 6500 val om uhi.

Cambridge ah ni nih sung programme sehkhawlsate semsuah in, lecture leh interaction hun ah, E-Governance policies and Implementation in the UK, E-Governance for Public Sector Reforms, Ethics and People Management chih khong ka sui deuh uhi. Newton Bridge (Methimatical Bridge) mit mahmah a muh banah a village sung a mun poimoh leh munlui mahmahte, leh college tuamtuam fangkual in hun ka zangzou uhi. Pitek guide feltak kinei mahleh ahunlai in kingaikhe peih lousim inchin, a akhonung in a kisikhuai sim thak maimah aka.

Ni 2.8.2013 zingsang baihtakin Cambridge khamloutak a nutsiat ahihna ziak bel, Her majesty’s Treasury Building ah UK te Revenue leh Customs lam toh kisai discussion/interaction nei dingin hun dak 9 geih a piak ka hih ziak un direct in London ka delh chanchan uhi. Dak 9 chet a tungin, pass hon bawlsak meng meng ua, waiting room ah coffee dawn zoh in dak 9.30 chet in programme pat ahi hi. Treasury department pen Chancellor (Finance Minister) makaih ahi, Internal Revenue (income tax leh corporation tax), Customs, Excise leh Value added tax teng teng kigawmkhawm vek ahi. Treasury department in tax reforms, fiscal policies, monetary policies, economic policies tengteng sai vek ua, poimoh mahmah mai hi. Border control poimoh ngaih mahmah ua, Customs, Coast Guards, Border Police te pangkhawm in, electronic surveillance tungtawn in nasatak in a gamsung uh kemsiangthou zou uhi, smuggling lam ah drug leh cigrette a buaipih pen uh ahia, mihing smuggling mahmah le venbit haksa ahi chi uhi. Cigret bel a tax a san`luat ziak a smuggling om hidan ahi. Dakkar nih chet hun piak ka hi ua, tua zoh in London Eye, 4D show, Thames river cruise, leh vialvak. Zingkar khat Hyde park ah walking pai zenhouh veng, lianlaw mahmah inchin a lutna lam leh pawtna lam theitum nawnlou, lammang zenhouh ing, i pawtkhiakna lam ah gate lianpi om mawk, galvan bukim a kithuam guard khong om mawk, joging mai ngai, hon en liakliak lel uh, palace gate vatung kha zenzen. London chu siang petmah, orderly petmah, nuam kei.

Ni 3.8.2013 sunma hunsungteng vialvak, oxford lam hoh toh, lawmte veh toh, kei bel ni nih nitakin Benjamin leh Lulun te kiang ah, tute bang kimu lah aw (Frido Pinto tapa). Ni 3.8.2013 nitaklam in London khelahtak in nawsia ung, Dover lam pan chuai chuai mai, huchia longpi decker 8 nei in English Channel hon kaanpih, gari toh mihing toh, gan toh, van toh, tam pawpeuhmah e, Port Calais (France) ah hon nga hi, ka bus uh longpi gilsung apat hong kitholhsuah huanhuan a, ka vanteng utoh longsung a omtei ahi hi, hon paipih charchar a, France apat Belgium, Belgium apat Netherlands (Holland) azan azan in ka lut uhi. Mun khatpeuh a khol mawkmawk chih omtheilou ahia gas filling station khat ah departmental store ah nekna, dawnna banah kikhitkhiakna thupitak om hi, zun thakna a luttheilou toh, asung a tang toh, Euro .50 khiak ngai anahi laizang. Aninawn zinglam in Amsterdam ka tung uhi, Sunday hi a, khopi sung fan’kual na hun nuamtak ahi leuleu, Amsterdam pen capital hilou daih, business capital banah khopi lianpen zaw hi, hiai khopi a nopdan khong zaw genlouh a maang ahi, gari tam hetlou, mi khe a pai duamduam mai, cycle a tai souhsouh mai, adamthei mahtak ua gilpuak kengkung loudeuh mah uh zaw hi. Self sufficient village kichi  registered society a ki-enkol, Chocolate village zong hohna chi mahmah leuleu, vanlui, nidanglai khosakdan, diary products chituamtuam, gifts leh souvineer... holiday zatna nuam mahmah chu ahi.

Ni 5.8.2013 leh 6.8.2013 in Nyenrode Business University ah India a Ambassador luite khong banah misiam tuamtuam toh Holland te khankhiakna thuguk, Business enterprises, IT toh kisai, banah Holland gamsung in haksatna a tuahte uapat sinkhiak theih (land reclamation),Taxation system, leh  ageing population ziaka maban limchi lawmlawm lou ahihna uh (social security schemes leh pension liabilities sanglua). Nyenrode Business University bel 1946 a Dutch Multinational Companies (AKzo, KLM, Phillips, Shell leh Unilever) te patkhiak ahi hi. A specialization uh MBA, Accountancy, leh Finance ahi tangpi, semtu India mi Professor nih tak om uhi. A mak mahmah bel, Indian companies tamtak (Reliance, Tatas etc.) in Holland ah office nei uh eisettawk voi, tax omlou chi ua companies tamtak khovel pumpi apat dianglut souhsouh mawk uhi, himahleh money laudering hilou in, sum diktak mah lalut ua, tax la lou uhi, hlawk veve uhi. Company a sepna/kam, semtute inn luah, semtute sum lohsuah, semtute nek leh tak leina leh semtute income apat tax laksak pen hamphatpih zawdaih uhi.

Ni 7.8.2013 zingsang baihtak in Flora Holland, Aalsmeer ah phalna piak bangin ka hoh uhi. Khovel pumpi a flower auction centre lianpenpen ahi, hiai society in member 5000 val nei a, niteng in paak 20 million zuakkhia uhi. Khovel pumpi chihtheih phial apat paak hongtung zungzung, hiaimun mah apat thotkhiak nawn ahi leulleu. Zing dak 6 in kihong pan a dak 9 in auction zouhiau uhi, systematic peuhmah. Flora Holland in gam acre 200 val tutphah a lianpenmah hi, mi 9000 suppliers nei a, 3500 customers nei a, 4500 employees nei a, khovel pumpi ah mihing 250,000 direct leh indirect employment pia hi, 90% of Dutch flower trade capture zouhial hi. Business enterprise mumaltak chu ahi peuhmah ve.

Amsterdam khopi sung ah canal paikimvelna ding lampi seselou, boat in zong kholai vakvak theih hi, red light district bel munsiangthou mahmah suaksak ua zahtak mahmah vial phiangsan uhi, European Parliament in beisak ut mahleh, Dutch ten phal mahmah louhial uhi, Sex tourism zaw nasatak ahi mahmah ve...

Ni 8.8.2013 in Rotterdam port vehna leh mite sumdawnna munpi etna nei ung. Things move seamlessly without human intervention chisek ua, khovel pumpi a international trade transaction bawlna thupipen pawl Rotterdam port leh container terminal ah X ray, scanning, radio active detection, drug detection squad, automated processes, unmanned vehicles leh adang dang robot nasem ngenta pai zungzung hialte i muh chiangin lamdang peuhmah e maw, ei nasepdan toh kikhia e maw, chih chih in aom hi. Rotterdam pen World War-II in Nazi ten bomb sevek sipsip ua, building thak leh design thak piangdok hial hi, tulai a smart buildings glass a kibawlte ahi.  

        
Ni 9.8.2013 in The Hague (international agencies 150 banah Netherlands te capital) tawn in Brussels manoh ung. The Hague ah International Court of Justice vehna, Municipality Board Office vehna kin leh buang in nei vanglak ung, program a omsapen bel University ahi, himahleh holiday hikha chitchiat. Municipality office ah interactive sessions, local tax division, assessment division, enforcement division te toh hun nuamtak kinei hi. IT hahzat petmah ua, gam, leitang, luidung, lampi, inn leh office tuamtuam 3D image neikim sipsip uhi. Van zuak, gam zuak, inn zuak tengin a value diktak koih chetchet ua, kikhemna hiam, tax dikloutak a piak chih om thei mawngmawng louhial chi uh. GPS hahzat mahmah ua, agencies tuamtuam kizom vek uhi, tracking system hoihtak nei ua, van mang, mi mang, galguk bawl, gari mang etc. om vaang mahmah chi uhi, parking fee leh dog tax tanpha a income muhna uh ahi hi.

Brussels lampi ah Antwerp (diamond khopi) nuamtak om hi, sun ann ne in khawltawldam ung, Nepalite ann ngat nek ahi, khopi nuam leh siangthou, trade guilds te munpi (trade associations) leh thuneihna mun ahi, long khawlna mun luitak zong hi hi. Hiai khopi ah “Cathedral of our Lady” kichi kum 800 a upa thupitak om hi, a en ut kiphu nuainuai gige ua, hun neiloute a dingin asung tankhak baihsamlou hial hi.
 Brussels pen Belgium te capital hi a, Holland te toh mi leh sa kibang hinazenpi Catholic kulmit ahihna ziak un gam tuam piakin om uhi. Gam neuchik hi a, economy a niamtuanse ahihna leh mahni thahatna a khangsuah zoulou ding ahihna uah International agencies te headquarter tamkuamtak koih ahi hi. World Customs Organisation (WCO), North Atlantic Treaty Organisation (NATO), European Commission, European Parliament chihte om teltul ua khangtou mahmah zezua hi. Sepna nei gamdang mi 70000 val khosa uhi. WCO ah nikhat hun kizang a, interaction hun nuamtak kinei hi. World Customs co-operation lam toh kisai ahihziakin ki-intek tuanse a, India te representative nihtak om ahihna uah luch zong Indian restaurant ah kine nainai hi. Japan ten WCO ah sum thoh tamdeuhse ahihna uah WCO chairmanship len lellel uhi, S. Korea te le intek vial uh. Japante leh S. Koreate sappau a theihhak bualbual toh, hih tuhtuh ua, poimoh viau laitei uh.

European Commission ah gam 28 ten Commissioner (Minister) khat chiat sawl ua, department khat chiat pua uhi, department khat Director General in kem hi. European Commission pen Central Secretariat ahimai, expert bodies, leng achih theih. European Parliament ah gam lianpenpen in MP 96 neithei a, gam neu penpen in 6 neithei hi. MP 700 valzek nei ua vaihawmna inpi hitakmeuh hi. Hiai Parliament in Council zong a poimoh dan in dinkhe zelzel hi, kithutuak tak ahita uh, world economy banah sum leh pai seksuahna ah survival poimoh ahih chia. Khanlohna hoihtak ahi.

Hun awl leh thoveng kinei hiven chi in Siene luipang a khopi etlawm leh thupi Paris ah ni bangzah hiam nituang dingin ka kisa ua, Overseas partner ten Paris khopi sung tan hon kha uhi, huaiban chu kou kitoudelh (on our own) ka hita mai ua, kholak vialvak pen kisak takpi ngaita hi. Paris khua bel millineum nih a upa hita a, Celtic te pau Parisi apat piangdok ahi hi. Kidouna tampitak thuakkha a, French Revolution sung in a hauhsakna, a mel kilawmna, palace thupitaktak etc. suksiatin om maimah hi. World War I leh II zong hahthuak ngial a, Nazite heutupa Hitler thupiak in tamtak suksiat in om veve hi, himahleh sipaih zaheutu khenkhat in pammaihsakna lianpi nei ua Hitler duhthusam tangtung zoulou suak hi. Paris khopi ah kar nih nituang leng le a khopi sung thupinate kiensuak zoulou ding hi, National Library, Louvre Dame Museum, Notre Dame etc. khongte ni nih sung daihvek chiat ahi uhi, etkimsuak haksa mahmah ding hi. Arc De Triomphe pen India Gate dandeuh hi a, British ten hiai lasawn ahiding uh. Napoleon Bonaparte bawlpat ahi, zousiang manlou in tuahsia tuakkha hi (Battle of Waterloo 1815, ah Arthur Wellesly in balsialnuai, Prussia army te Napoleon in a general khat a nungdelhsak ziak ahi hi).

National Library (Imperial National Library) pen Napoleon mah in nasatak in phungvuh a gamdangte azohna tung ah mite hauhsakna tamtak lailut in koihkhawm hi, 1920 in hiai library ah 4050000 volumes leh 11000 manuscripts om hi, Louvre Dame Museum chu gen ngailou in koih le, Sainte  Chapelle pen 12th Century lai a  Gothic style architecture a bawl ahi, Notre Dame de Chapelle (Cathedral of Notre Dame) ahihleh Napoleon in Catholic te toh kiremna abawl khit un hiai Cathedral ah 1804 in Emperor hihna lal lukhu khuksak in om hi, Cathedral kongmai ah zingsang baihtak apat a lut nuam line sautaktak in kivual ngeingoi sek ua, hun neih ngailua himai, kilutmanse lou. Champs De Elysees pen mun nuam mahmah ahi leuleu, France te thupina phoulakna ahi. Eiffel Tower pen engineer khat Sir Eiffel in a design ahi, Universal Exposition Paris ah 1878 in om a, huai exposition theihgigena ding leh a gate dan a bawl ahi hi. Nalh/hoih salou pawl, a soiseltu tamtak om ua, kum 10 sung kia om dia bawl ahi, himahleh a khonung in athupidan theisuah thak phing ua tunitan in phelsiat ding lamlam vaihawm nawn mahmah keihial uh.  L’Hotel National Des Invalides pen chu Napoleon mah in France Army te, liamna baina nei, sungkuan belh ding neiloute inn ding a abawlkhiak ahi, tunitan in hiai mun hi sipaih retire te bitna leh muanna ahitakpi hi. Hiai National De Invalides geizek ah France Army te Academy a om hi, Napoleon patkhiak hi a, kum li sung vingveng Army Officer dingin kisek ua, hiai Academy apat zoukhete chu khovel pumpi a army officer ten atuk kei uh, chi tinten uhi, French Pride. Place De La Concorde bel hohlouh theihlouhna mun ahi, New Delhi a Raj path dandeuh chi ni. The Obelisk of Luxor, metre 70 val a sang, 250 Metric tonnes, pau chituampi a kigelh belbual, kum 3300 a upa, Napoleon in Egypt apat a puaktun ahi, bangchipuak le a zouzen diam. Hiai pau danglam tak Napoleon mah in decipher chi uhi, laisiampi khat hihtuak maimah. Siene luidung a zaan chia ferry tuangkawm a Paris khopi fan’kual chih mahmah thupisa ua, romantic lua chia genmangmoh hial tam uhi, Eiffel Tower zong zan chi’ah vaksak ua, naknalh e chih ahi mai. Paris khopi tawn in tourist 24 Million kum khat sungin zintung gige uhi, hausa ding mah akei ua, mi sum buakkhiakna munpi ahihchia. Holiday pai, honeymoon lam-etna nei tengin Paris chi kheukhou ahih chiang ua, French wine mahmah khelah, leh a atmosphere mahmah nuamsa, mi tam peuhmah uh ei. France tan ah tawpsak mai ni.

SINLAI OMTHEITE:
1.    Mi`n a gam uh itpetmah in it ngoih ngoih ua, puah petmah in puah uhi, patriotism chituh kiptak nei uhi. A neu a lian tuamlou, hihtheihna lam chiat ah pan’petmah in pang chiat uhi.
2.    A gam pau uh ngaina petmah ua, gamdang pau zang ut khollou hial uhi, himahleh international language tamtak thei thou ua, English bang chu theivek sim uhi, mangbat na ding tam kei hial.
3.    International co-operation lam ah European Counties te matawng deuhse ua, gam neu chikchik ahihna uah world economy ah tallang zoulou kisa uhi. Trade blocks tuamtuam (America, Africa, Asia) ah om teltul ua khovel kisumdawn tuahna ah simthamlouh suak uhi. Tuaziak in a National Pride uh suppress hialthok in European Trade block bawlkhia ua, European Commission, leh European Parliament hattak in paipih fefu hial uhi. European countries ten a dan bawlte uh European Union Laws toh kituak in bawlkhia ua, kipumkhat takjetta uhi, 80% of legislative business is in the hands of EU Parliament. England leh Switzerland chihlouhsiah visa tuam nei omnawnlou ua, India a state border I cross sangin zalenzawta hi, kizintuah sungsung maimah ua, gam khat mah bang hial thok uhi. Euro in kankhawm kholdiak mahmah. Pankhawm hatna ahi.
4.    IT hahzat peuhmah uhi, computerization ei zatdantoh kikhe mahmah lel, sumbuk leh departmental stores, ticket counters etc. ah cash counter omlou hi, khiaksuk ziauziau na ding ngen ahi mai. Social Networking site, websites, twitter leh adang dang hahzat mahmah ua, medical emergency, disaster management, coast guards, police, fire service, revenue department, legislative department etc. ten social network tungtawn in mipite na sem uhi, chihbel enforcement department in mi thil postte apat suiguk theih hau petmah ua, emergency services ten ahun hun in, a mun leh mual ah tung chetchet thei ziang uhi.
5.    Dignity of labour neituanse ua, sweeper hi’n, receptionist hi’n, conductor hi’n, bangpeuh sem le uh chitak mahmah linlen uhi. Driverte dignity maintain sak ngai a, akan aval a kizat chih omthei mawngmawng louhial hi, dakkar a sim chetchet ahipen mai, labour laws hoihtakin kankuah hi.  Khut nasepna ngaisang mahmah ua, siamna neite bel a khosa nuam mahmah te hizawdaih uhi. Dakkar a sim a nasemte hi ua, carpenter, electricial, plumber etc. te a pick up truck u’toh a vanzat teng u’toh vial taitai mai uhi, sep ding hau thei ngial ua, nuamsa hanhan mahmah uhi.
6.    Ei gam toh kibanglou hial ahihna bel, sorkar nasemte babu dan a om kuamah omlou hial uhi, singpi kibawl ua, nek ding kipuak ua, cycle khong in kuan nainai zel uhi. Holland, Belgium, London chih khong ah cycle a school kai, cycle a kholai vak, cycle a University kai, Cycle a ofis kai, atamzaw hi ua, khe khong in pai dupdup mai uhi, damtheih huaipi zaw hi, siahloh chihdan omloupi eive, mi gam ah.
7.    Environmental concerns leh labour costs te ziakin technology transfer bawl zungzung ua China, Vietnam, Africa, Brazil,  India etc. ah vanbawlkhiakna outsource zungzung mai uhi. Siamna ziakin Royalty ne hmiahhmiah leltak uhi. A pipute goumanphate uh sumsuahdan siam ua, midangte muhnop, zaknop leh deihgoh hithei dingin puahpha ua, khovel a hauhsakna a luahkhawmte uh manphatak in kembit uhi. Tuate sumnak suaksak ua, mun nuam, mun galmuang, mun thawveng ahihziakin miten naih suausuau zenhouh uhi, sum bawldan, ommun a summuhdan siamlawtel uhi. Ettontak mahmah leuleu uhi.
8.    Siamsinna mun, kiseksuahna mun… poimoh taktak khovel theihphak ding Institution liantaktak dinkhe teltul ua, sum naak hoihtak suaksak uhi, Cambridge a kaiten course khat ah lakh 30 val seng ua, Nyenrode a kaiten lakh 40 val seng uhi. Louvre Dame Museum ah niteng in mihing sangtampi lut noinoi gige ua, ticket khat man Euro 12 ahi, Madame Tussauds ah ticket khat Pound Sterling 25, VIP treatment deihte a dingin Pound Sterling 100, London Eye tuanna dingin Pound Sterling 18, Eiffel tower a kaltouhna dingin luch to Euro 34, River cruise, open bus city tour chih khong neng neng ah Euro 20/30 senna ding adim aha omsak uhi. Holiday zang dia khualzinte lah ticket atuh a kituh mai, nekzonna ding hoihtak bawlkhiakna dia zaw, lungsim sen ngailua hiveh aw, a kuitung ding leh a detdou ding hizawmah, hotel booking chu advance deuh mah ngai ahi.
9.    Mihing kuamah kisimmoh tuan omlou, kingaihsak vak leng omtuan khollou, amau hin a hing, kuamah thulak le nei tuansamlou ngen ahi uhi. Numeite ngialhouh gender lam ah sensitive vial unchin, sexual remarks, simmohna kampau khong zat khak ding lauhuaipi khat ahi. Kizuak leh sex lam uangbawl mahmah hinazenpi a civilized mahmahte gamtatna ahi, kilawmloutak a gamtat khak hiam kampau neih khak ding lauhuaipi ahi. Forest Service te khat airline office ah numei khat in ngaihsak lou deuh sa ahingei di’, “what do you want” chia akikoukhum leh emergency servicete call geih inchin, tang geih mai, India sorkar in buaipih mahmah. Ei gam ah zaw, hui thu, sak thu, pagal, suar ka bacha chih khong thangsak hive hang, niam lai mahmah ihive. Excuse me, chihlouh bangchu a bil ua bangmah lutmoh hilhel eive, sorry chih in thoidam zoulou dan ahi.
10.    Hun zatdan ah ettontak mahmah uhi, hun kipedan chetchet a vaisaite ahi ua, minute 5 a late zong ngaidah mahmah uhi, kithununna hoihtak (self discipline) poimoh takzet ahi. Late nengnung sangin minutes 10 advance a tun lamen zaw uhi, singpi dawnna hun chihdan ahi. Sin ding in hoih mahmah, mi a tamtheipen a kisamkhawm nuainuaite ihih ua, time is money, chih kisinsak banah ki-respect sak poimoh lua hi.
11.    Electric apoimoh louin mawk zatlou ua, gari zong a poimoh tenten louin thautui halkang selou uhi. Tui ahihleh rensiam mahmah ua, toilet a tui ki-flash zong measurement bawl detdet in bawlkhia ua, European Union a kizang ding specification (max) prescribe top mai uhi. A neizawdeuh ten zang ziahziah chih omlou hi. Natural resourcete zatdan I siampoimoh lua hi, free gift dan a zat det ding hisamlou hi, tui lei ten a haksatdan ithei a, a luangletsak ten nuamtak sa, kiliausak dingdan zaw ahi.
12.    Laisinna lam ah high skul a zoh chiangun piching in kisim ua, atangpithu in tempaina lam ah bur pah uhi. Eiloi zong general line a I pai duamduam sangin sep theih bawl theih maipah gopgop le phatuam zawleh kilawm hi, kum 25 tantan lai kisimsak veksim hanga, a gahloh theih bel tawmchilik. Skill developments lam hahbawl kul mahmah hi, specialization khat pian’sak zong apoimoh mahmah khat ahileuleu.
13.    Frontier knowledge ichi hiam, super speciality lam manoh takpi ua, a siamthei vanglak phakbat ding hipeuhmah louhial uhi. A siamna vanglak uah siampetmah ua, kisek den laitel uhi. Kuhkal petmah ua, hichitel in pang le, bang… nek muhlouh a om mah di! Minthan’ khiak sawm uh hilai, mite theihtham dia kisek peih lai uh eitel ve.

14.    Damtheihna kembit siam mahmah ua, taksa kisawizoina ngaipoimoh petmah uhi, khe a pai, cycle a khuazin dupdup, office kai zawmah, bazar kaina dia zang chih a than’sak khat uh ahi. Holland pen Cycle capital chih hihialthok hi, damthei mahtak uh ei, nek leh dawn ah kisum vak kei le uhle, nopsakdan siam ua, self discipline nei ua, taksa kem siangthou ua, kisufit zawmah lai uhi. Joging, walking, work out chih khong a tempaina lam tak uh ahi.
15.    Siangthouna ichih akhanletpih uh adiam, khosung, vengsung, insung, innkiim, taksa leh a vanneihte uh kemsiang petmah uhi. Bazar leh lampi khong ei compound sangin siangthou zawtel hi, adamthei namah ua, dam huaihuai na dingdan mah ahi, damdoi inn leh damdoi zuakna tam muh ding omlou hial ichih leh damlouh pen hautak lua inchin, health is wealth, chichi zaw uhi. Public park ah ni’n paihthang hetlou ua, ettontak mahmah sa ing.
16.    Mahni’ sep leh bawl ah specialist ngenta hi ua, a nasepna uah midang kigolh thei louhial hi. Bus driver in asep theikichian petmah a, ei gelpih ding, ei gensak ding om kiikei louhial hi. Hotel receptionistte nasep bel siamneltak a hospitality na saifel ahi, ut leh dah a kisap, kisukbuai chih te a dictionary uah a tel kei rengreng. Sepna lam chiat ah specialist ngen ahi mai uhi. Nek muhna tham mah hi vek. Office ah mi khat khongin hon vaidawn a, hih ding teng, conference hall arrangement, coffee, lunch etc. saifel sipsip vek, lecture pe dingpa introduction bawl zawmah, huchia programme a tawp tan mikhat in saigaivek. Rotterdam port ah customs officer khat in reception, lecture, interaction, physical inspection etc. amah keleu a saizouvek, siamneltak ahi. Ei bel, kuahiam khat in sound system hon khoih leh anapau tultul, asiampen hih kituh, siam’tumta neilou ngen ihihziak ahi. Mi gam ah huchidan in om laizang le, hon pawtsan hiau di’dan uh ahi. Siamnelna mah poimoh hitah e. Brussels ah nitak khat bazar husa ngaihdeuh hiven, police 3 full gear a hong pai thramthram uh, dai duam mai, kizahtatna liantak nei uhi, rule of law theisiam ua, traffic rule bohsia muhding om mahmah louhial, a bohse vanglakte chu a license uh gitsansak himai, first and last warning ahi, nihveina chu ngaihdamna omnawnlou, huchidingdan mah zaw hi.

Sinlai banghiam bek neithei chiat le, a mukha leh mukha loute kibang hilel mai lou ding hia?