MISHMITE GAM AH..PART III
Written by Vungzamuan Valte, Columnist Zogam.com

Kum 1998 ahong suak a, February kha apat hiai nasep zohlou sunzom nawn dingin thu ahongging leuleu ta hi. 1997 operation zoh in Narcotics Commissioner of India (Central Bureau of Narcotics) Gwalior toh kiselbuai eksa ka hi ua, long distance apat amun theikichian loupi in direction honpe gige kei un," leave it to be, I will do my job, and on its completion, all operational details will be made available to you", ka chihkhum leh heh phongphong inchin lah anuai a sem ka hihlouh ziakin bangmah lohtheih aneisam kei hi. Huai lai a operation a telte tanding reward money ka hawm ua, Policete, Arunachal Pradesh Bn leh CRPF te banah local officials tengteng ka pemasa vek uhi, huchi in akuanlamte sum sanction omdan dan in ka hawmzak uhi. Coolie te min nasan kaikhawm thak in kape sipsip uhi. Ka chihsa mah bangin, ka ut nawnkei petmah mai, geentheihna teng ah nawlkhin ka sawm hangin ka heutupa Commissioner of Customs, NER, Shillong, (Zopianga Tochhong) apang moh hilhel a, ka immediate boss lah, ka kuan ding deih tinten hi in, aguktak in panla ana hi maimah a, ka nialzou takei hi. Sum leh pai kiningching zawdeuh banah preparation lam leh logistics lam ah operational vanzat, officials leh security lam him him, na deihdan dan in hihvek ahi ding, chih ahimawk a, ka kuan nawnta hi. Amah kuan ding ahihleh, chi in, akuansa khenkhat, utnawn mahmah lou chite nangawn ahong kisathak sauhsauh ua, gari a poimoh pen ahia, a tamtheipen ka kaikhawm uhi. Huchi in, March khabul in ka diangkhe nawn nainai uhi. Nikhat thu in Dibrugarh ah kisutuah in vaihawmna kinei nawn leuleu hi. Sum hul lakh sawm kikeng hiven, a poimoh tantan naasep ding chih ahi hmak mai, Brahmaputra leng nuamtak in ka gaalkai thei ua, kum masa a ka buaina tengteng uh nuamtak a taaikaan thei in Tezu nikhatthu in ka bansuak uhi.

Reward money musa teng kuannawn ut in akituh chelchul ua, Arunachal Bn, local police leh CRPF te nasan akuan ding bang atam zawzenta uhi. Nektak mahmah suktuah haksa ahiman in, kar thum daih ding nek le taak ka kipuak ua, mi' tung a kingak louh himhim ding chih ahi mai, himahleh govt. sum a dawn ding kilei theilou ahihna ah, na duh zahzah uh kipuak un, fund kizanglou ding ahi, ka chitop mai a, hnianghnar deuh a om utten a kipuak tektuk hial uhi. Singtang nasem ngeilou ngenta ahihna uah, agam haksa a, kenselak peuh, mualtung sangtak tak a kal ngai, lampi leng omlouhna mun khong a kaltouh kuih kuih ngai ahihna ah, thadamna ding poimoh mah hitazen hi. Tezu ah DC e, SP e, SSB e, ka buaipih nawnse kei ua, ka taisuak ding uh, operation camp dingin Walong ka zang ding, chih lel ka theisak uhi. Tiluwa suspension bridge Major khat heu a kibawl pen zohkhit anahita a, army truck lianpipi khong atai huanhuan uhi, nuamtak in Hayuliang ka tungthei ta uhi. Hayuliang ka tuntak un, SDO leh BDO angeimah anahi lai ua, ahon muhtak un, a kiguih hial uhi, gen maksak ding hamhaih hial ua, Sir, hong hoh nawnlou ding konsa ua, achikha zawzen uhi. Ke'n le, ahimah voi, nasep zohlouh om- sa ahi ding uh, kisapah tingteng ni, nou a dia .. long run.. a hoihzaw ding ahi, administration lam vaisaite a ding mahmah in hiai thil hoihlou sukchimit apoimoh masapen ahi, development fund kon ngetpih dia, lampi hong kihong na ding ahi, ka chi a.

Zankhat Hayuliang ah giak in, IB ah SDO leh a staff te samkhawm in vaai ka hawm theita uhi. Local Magistrate hon guan' mengmeng ua, VLW kisehhawm in, Coolie leh security teng sehthum a kisuah in, operation team te sehthum a kikhen in, team thum kibawl hi, Choglagam lam ah Superintent khat leh Magistrate khat heu in, Lati Valley ah Superintendent khat leh Magistrate khat heu mah team khat, team dang pen in kei honzui ding ua Walong ah Camp bawl ding chih ahi hi. Hun beisak hetlou in a ninawn zingsang baihtak in hohna ding lamchiat ka manoh farfar ta uhi. Choglagam ah gari lut theilou ahihna ah, Hayuliang apat khe in akuan ngal ua, Lati Valley lam kuante bel lamkim tan gari a pai in, Lohit lui suspension bridge a kantan in, Hawai BDO Hq khe in a kaltou uhi, tal leh naak in lei sudekdek in kaltou ua, ahatdeuhte dakkar 3 in tung uhi. Huchi in, Hawai apat Lati Valley lutsuk ua, Changlang District toh gamgilam ahi hi. Kei heute bel Walong a Circle Officer Mr. Dubey, Magistrate dia zang-ngal in Hayuliang apat Walong lam ka manohta uhi.

Walong lampi ka pailai un ka husa uh theikhawl ahihna uah, lampi ah suanglom koih in a khaaktan ua, taang manlou hial in Pioneer labour te, truck dimlet a hong kuan ten a phiatmai pah uhi, huchi in lamzangtak in Walong ka tungthei uhi. Walong ah Wireless ka fit ngal ua, Hayuliang leh Hawai hoihtak in a manthei a, Choglagam bel aman keizel hi. Hayuliang ah stand by unit kikoih hiven, kithuzaktuahna hoihdeuhta a, operation conduct dan leng mumaldeuhta hi, Hayuliang a control room ten daily report apoimohna teng ah pesawn theita ua, kuanlamte innngaktu ten a ngaihven mahmah sek dandeuh un, Dibrugarh, Shillong, Gwalior kikar ah thu apai zung zung theita hi. Menchim, tuilian e, bang e, daltu om nawnlou in nasep kipantheita a, thumna kinei molh molh maidan ahi hi. Walong khua I gensa mah bangin Indian Armyte kepna nuai a om ahia, Walong baan paisuak pen phallouh ahi hi. Block Dev. Office omna ahia, IB khat kia aom hi, huchi in midangteng school building ah kikhumkhawm ua, bubittak leh khamuangtak in ki-omthei hi. Dubey pen midawilok deuh khat ahia, tangval fel tak bel ahi, Walong nungakte picnic dia a gari dimlet zenzen a paw kawikawi thei ahina ah, picnic khong bawlpih hon sawmmawk a, narahe, harahe ahimai. Choglagam lam kuante a mun tungthei ua, nasemtheita ahi uh chih thu kiza a, nuamtuam se hi. Lati Valley lam kuante zong tungsukta ua, aninawn chiangin nasep kipanta ding chih ahi. Armyte toh kithuah in, kou security te toh Kihibithu (Kibithu) lam azingnawn in ka manoh ua, Indo-China, Indo-Myanmar border a TRIJUNCTION AHI HI. Kibithu ah Burma lam kimusau theilou a, China lam bel hoihtak in kimuthei hi, vuuk in a hahtuam deuh chihmathu. Kibithu lak ah nasep ka pat mama un khotualte a haang in ahong haang mawk ua, suang khong a deen ahon sawm mawk uhi, kindeuh a khoudai pah in, nasep ka kipanpah ua, mualtung, mualnuai, mualpang teng ka hawtphei ua, nitaklam in Walong lam ka manohta uhi. Kibithu leh Walong kikar ah Indo-China war kikaptuahna nasatak apianna (war field) phamalam in Walong ah zan ka giaknawn uhi. Anithum ni in, Idu Mishmite khua khat Walong apat lamsak lam a kaltouh ahi, ka target ua, Dubey in plan heikawi asawm phet hi, lauhuai lua ahi achihtoh, na ngam keileh ana om hithiat in, kei ka omnak leh mi mansak thei, firing order pe thei thou ka hi, na poimoh sam a, ka chihsan chiangin a hon zui natnat zel hi. Mualtung k'ong kaltou taktakta ua, ka khodak ualeh, louzau 5 chia mahmah ding poppy chiina ngenta aom metmot mai hi, vuahzu nilhnilh ahia, atunglam apat ka sukbeih ua, ka zoulah hial mah uhi. Security khauhsak mahmah ka hihman un, kuamah hong kawdak ngam aom kei ua, deihdan teek in ka gamtang thei uhi. CBN team feet tehtu ten leng ateh peih nawn mahmah kei ua, lian lua chichi maita uhi. Khawmui in Walong ka tungkik ua, kihoupeih leng omnawnlou in tuilum hithit toh k'ong kibualchu, khut leh khe, nungjang, kawng, ana theiteng na ahihmaimah chia, dam teuhsuailou hial. Sahdeuh mah ngai chi in glass dim dektak ka khiat pok a, Dubey hong lut khualkhual laitei, na deih hia..ichihleh, dawn ngamsamlou adiam a, ka ihmutsan kha hialmah hi, gimlawtel maimah ihihchia.

Aninawn in, Walong apat km 10 a gamla, lamsaklam a kaltouh, mual lehlam pang ah poppy chiina thupitak om chih kitheisa hiven, ka mitsuan ua, paina ding lampi khat keleu om hiven, aken a kense zawmah, anuai a luiluang in mihing taithei ding hial a tuilian luang zawmah hiven, ka kaltou nainai ua, kei masapen in, ka nung ah Hayuliang OC pan hon zui ling keihkeih a, Dubey chu anuai ah khodak luailuai hial hi. Jungle booth toh kipang hiven, munkhat ah farsing luang liansim kisukkham henhon pen leen in khaam kensepi kaltousuak dektak chih in, Mishmi nupi sengpua mi nih zawng bangmai in khaam kensepi lak ah hong kaltou ziauziau mawk ua, ka singluang pansan uh hon khuukkhiaksak mawk ua, hon makhelh zawmah uhi. Khaamtung ah tuleuluau ua, hon melsiat khum utoh, hon kawk ekek utoh, tempawng toh, glass bottle sukek in hon paihkhum ua, suang tum hon khukkhum sawm zawmah lai uhi. Ka dinna uh kip hetlou, let ding zong om mumallou, ka pansan uh singluang lah omnawnlou, anuailam aomte kiang ah, kumsuk kik un, hong kaltou nawn kei un, chih ahi mai. Kaap ek le lah mi kithat kha di, blank firing hih le zong taise hetlou ding, sihngam a pang ahi uh chih kitheichian lawtel mahmah, OC pa kiah kumsuk mai ni, ka chih leh kipaktak ahi, ling derder in ka kumsuk kik ua, lunch zoh chiangin lampi dang zong ni, kuanthak thouthou di, ka kichi uhi.

Huaigam neite vangphatna adiam, kou vanduaina, nitaklam in Lati Valley lam kuante hong lohching ua, Hawai lak a khua thum omna Longling 1, Longling 2, leh Longling 3 abeihna lam uah, mipite pangkhawm toh kinawkna thupitak apiang chih hon hilhta mai uhi. Mipi thangpai ten nawk ua, tem toh thal toh, suangtum toh, blank firing nasan phatuam lou asuak a, kuanlamte taizaak ua, khutvuak in, lu leh taw humbit dingin Hawai IB delh uhi, khenkhat in Walkei Talkie nasan mangsak ua, Inspector khat in Pistol mangsak zawmah hi. Mi nih mang ua, zankhawmial in mukik thei hamham uhi. Hawai BDO pa toh kithuzak in, team leader A K Sharma toh thu omdan kihilh chian in, lungsim ka bawlta hi. Kou operation tengteng suspend in Hayuliang azan azan in ka delhphei a, Choglagam a gamkuante zong hong tungkikta uhi. Hawai BDO leh A K Sharm teamte, Hawai a omden dingin ka thukhaak hi. D.C. leh S.P pa kiang ah re- enforcements kintak a honthon dingin ka theisak hi, ADC khat toh security huntawk hon sawlbelh pah uhi. Hayuliang a BDO pa tonpih in Hawai lam ah Standby unit teng, Choglagam a kuante, re-enforcement team te ADC heu a hong tungthak te toh, ka kuanthakta uhi, kei team teng leh Choglagam team te Lohit luigei a (Hawai junction) BRTF camp a ready sa a om dingin camping site ka bawlsak hi. Hawai lam ah kaltou nainai, hehtha suah toh, gim toh, kisa vitvit hialmah hi. Kulite omkei le uh bang kisuak ding amahmah diam a? Khutvuak a, chiangkhun toh I kaltouh leh dakkar 4 la tel eivoi. Ka tun phet un, BDO pa residence ah kimukhawm in Tezu OC pa heh kisa in, kap utphial hi, hiaite tua izoh kei leh kiphasak semsem ding ua, kou nasepna haksa lawtel mahmah ding ahi, I zohkhiak teitei ding uh ahi, achi a, huaiding mah a hongkuan kei voi, taise mawk lou e! Re-enforcement teng hongtungkim ding ua, strategy I bawl ding ua, nawksuah himhim di, chi in ka kikhenta uhi. Nitak in BDO pa'n singtang ak hon huan a, tapsak a tukawm in kong kihoulimta uhi, Phalvak ma in I kipan ding ua, khua 3 te km 3 lel a gamla ahia, Lohit luipang a omte zing dak 2 in hong kipantou ding ua, wireless a kithuzak kawmzel in gamlak ah akibu ding ua, thupiak ngakin a tawldam ding uhi. Mualtunglam ah team khat kuantou in thupiak ngak in aom ding ua, alaizangtak ah akhauhthei penpen dingin Kei leh Hawai BDO pa toh Tezu OC, leh CRPF ten ngamlekhat a nawkphei ek ding, huchia a tunglam apat hon umsuk ding ua, a taisete a nualam apat hon nawktou ten baan zial di, chih kha tactic, plan, leh strategy hoihpen hidingin ka thupukta uhi. ADC pa kiang ah, na kuanngap diam? Ichihleh laulawtel anahi a, wireless khat konpe ding ua, BDO office ah om mai in, heart fail in na si kha dia I buaizaw kha ding uh, ka chi chiamnuih a, kipaktak in ka suggestion a pomta hi. Nitak in, plan omdan teng, platoon om thei teng aa heutute kiang ah kitheisak hi. Chiangpum tawi ding zankhua in sepaihten asui ua, khauh thei mahmah ek ok hi. Lohit luipang a omte dak 2 in na ready ding uh, chih ahimai, ok sir achi ua, alau na om uhia? Ichih leh, kuaman laulou..achi ua, good..best of luck..good night. over and out.

Kei kia a giah utlou in ka heute giahna IB ah ka kikhumkhawm ua, ihmut pah di, dak 4 a man chiat di, chih ahi. Gim ahi uhia, khamdeuh ahi uhia, a ihmu borhborh ua, amei apa chih omlou in ka chiau hehumah uhi, veihging mak deuhdeuh, nakging turu deuhdeuh, iikk nawinawi toh, Tom Sawyer laigelh ka phawk hial a, ka ihmu moh hithet hial hi. Dak 2 in Lohit luipang a omte walkie in ka houpih a, kuankheta ahihdan uh hon hilh uhi. Zing dak 3.30 in ka phawng vek a, dak 4 in AP Bn te singtangpa ahi ua, mualtung lam nawk ding in A K Sharma ka makaihsak hi. CRPF te manlou ding uh isak leh, a chiangpum tawi uh sau theilua chi in ka tantomsak ua, a thangpai ngen kisutuah ka hihna uah, kidaam mahmah poimoh ding ahi, chih ka thupipen uh ahita hi. Khuavak philhphelh chih in School kongtual ah kimukhawm in strategy briefing kibawl hi, huchi in ka kuankhia ua, anuailamte zong hong tungdekta ahidan uh kitheita hi, gaal te zankhua a duty pawl om ahi ua, kimuhsak louh ding ahipeuhmah phot hi. Puan vak lam peuhmah silh louh ding chih ahia, BDO pa'n puan-ak ngou ahon silh mawk a, ka sel nilouh uhi. Bengali Babu ADC pa wireless toh kinusia hi, huchiin akhua thumte kimuphata chih dingin, a tunglamte hong tuakkhia ua le, chiin walkie in thu ka pia hi, hong tuakkhia ua, kou alaitak ah..the charge of the light brigade..ka kikhoh pheita uhi. Suangdai (stone wall) tampi a bawl ua, pan petmah in apang uhi. Kon balsialnuaita ua, taise mai ding isak leh teuhlou mai, pan petmah in apang mawk ua, chiangpum lianpipi akitan motmot maimah hi. Firing order I piak thahah leh, ka-te-zaw, mun teng apat thau ging zuizuita mai, saklam a te firing order hon kipelou chih a phatuam ding om nawnlou, kidou phual suak maimah, Tezu OC pa'n a thautang kapbei pah, kinawk tuah zek in huchia akhanglam a te hong suaksuahta uh, ki-umchibilh hita, buainasa ahita ve ua, kei mahmah in putek khat ka zep ekek leh tai tuanlou inchin a tempawng honlak ngam laitel eivoi, ka Lama Pistol 9 mm dokkhe dektak man ing. Thuak dingteng athuak zoh in taikhe nuangnuang venchin, akhanglam a ten nuai ek lai zawmah uh, kawl kense lakpi a tuakkhia khong om ua asi amang aom ding uam, kithei talou. Deihthoh takin poppy dintantan kon metmai taktak uhchu, tehpih di atawm khop mai. Huaini zet chu, CRPF leh Arunachal Bn. ten nuamsa petmah uh himai, automatic a pawt ziahziah lel. Vualzohna ka puang ua, Hawa ah alopna thupitak in ka bawl zek uhi, Khua thumte, 1990 a avualzohna uh leh zanzek a avualzohna uh phuba kilazou hiven, ngaihdam ngen in hong kuun kheukheu ua, a galvan zatte uh tampitak kimatsak ahia, piakkik chu kahase himai. Walkie talkie leh pistol mansuah leng muhkik ahia, vainiliap khat chu mangden ahita ve. Tua zanin khavaknuai ah Siberian Cranes khualzin Hawai tung ah leng duamduam ua, ahamging uh kizaden hi, muhtheih bel hilou. Nitak sawtnung in huih toh vuah kithuah simpian a, votlawtel mahmah ichihleh, zingsangin singteng a ngou phengphung ua, vukzu ahia, vuahtuite'n colour nei, ka theisiam kei, nalh zawzen.

Bangla Babu laulua in Tezu lam ana zotmangsan a, Magistrate khat zong aninawn zingsang baihtak in kihemkhia hi. Lohit lui lam manoh suk in vualzohna lasa in ka chiahta uhi, huchi in Walong lam a ka vuallelhna mun uh nuai nawn ka sawm tinten hi. Leilawn hoihlou chik lohit luitung ah om hiven, CRPF te ka enmasa sak a, paitheih ahi achi uhi, Arunachal Bn te kiang ah paimasa unla poppy field omna mualtung ah kaltou unla survey bawl masa un chia thupia in leilawn a kaan nainaita uhi. CRPF te louvau tuak ah duty ua, mualtunglam enkaitu ten bangmah omlou achihtak un, luigal apat galmuang huntawkta chia durbin toh en gige kawm in, walkie tungtawn in, all clear, start the destruction, .khaihkhaihkhaih, minute 5 paipan in, mualtungsang pek apat suang alom alom in hong tuksukta tultul mai, CBN team apat khat in a chiang zat toh ana dalsawm, achiang nuaimat chet, suang chu feet sawm sawm a sang leenh uamuam ua, kikhuk suk uam-uam mai, Run for your lives, safe your lives, chih hita, lungdonhuai petmah, suang lah lui tantan tukging suk, puak rumrum zawzen, mun khat ah suang lianpi khat pangbel in Inspector khat Bora kibu venchin, suangtuk kikhohsuk in a suang kibukna dengkha, amah tuankaan chet, hei ha, ka sin kisai hia, ka lung kisai..ka thei kei. AP Bn. te hihkhelh ahihna ah kisuanglahtak in a tunglam kaltou thak ua, mat asawm chiang un taikhe zel ua, aken toh, anaal toh.. amat sawmte tuk zel ua, atawp atawp in thau hon khahta uhi. Order piak ngaihna omlou, agal a kigalmuh chang chang ahia, sepaihte khat tuahmang uh kisaman in, unlok ne le lia, apna admi le lia..chi toh kihi chelchul ahihna ah thau khah pawl ommah uhi, poi kei, ken saifel na ning. Atawp in hon mankhia ua, nuta (nupi khat leh atanu) anahi maimah uhi. Hon tonpih un, suangkulh ah khum ding, ichih thahah leh khosung mipite hong kipunkhawm nawn taget uh, deihtek in ka zep ekek a, ka kiveipuk zawzen a, ka pukna lam ah khut ka sukha zawmah a, ka zep tawp thei kei dek hial thok hi. Gari a aguanlut dek u'leh, sihngam in mipi apang mawk ua, nupi tengteng in a taw uh hon lemkhum ua1 anuam diak kei1 lian thei1 ngou thei zawzen,henhon thahah..bangziak e, ichihleh, kou police te mat himhim kumzawn phah hial ka hi uh, puja 10 vei bek ka bawl uh ngai ahi achi uhi, tua teng ziakin leng puja thumvei abawl uh ngailai ding ahi, aneih leh lam uh beizou hial ding ahi, achi ua, ka nuse ta mai uhi.

Lohcing kisatak in Hayuling lam ka zuan ua, zankhat giak in SDO ten dinner ka vek ua ding abawl ua, kou sangin amau a kipakzaw uhi, a thuneihna uh thakhat thu a power tampitak piakbelh ka hi ua, government official te zahtakna chituh nasatak hongtuh nahi uh, ka kipaklua uh, achi chi mai uhi. Galvan matteng museum ah koih un ka chi ua, ka pekhe vek uhi. State Excise a sem, ahongkuan tei khat zatna beipi in dinner ah zu kham inchin, a tem dokkhia hiveh aw, A K Sharma in a matsak leh akhutsung atkha, kou VIP room a om tengin ka theilouh kar ua buaisim anahi ua, doctor ah khuisak in azanbuai hial uhi. Zingsang in hon hilh ua, ka hehmahmah na a, akibumang hiau hi. Tezu tuntak in, gawtna piak ding chih ahi a, pia uh hileh kilawm. Zan sawt nungpi in AP Bn. a constable khat in, hon munuam chi ua, camp commander in, a thautang kimlou ahi, chia lutsak utlou anahi hi. S P kiang ah phone in, huai thautang kimlou kei thupiak a kikapkhia ahi, lutsak unla, gelh ding aom leh poilou ahi ka chi a, lutsak ua, nung ma suizui ding omlou in, sa khat, lu toh sapum kubulhtuah chiat, leh liamsia leh baisia omlou in, ka kik thei haam uhi. Tezu ah S P leh midang dang te kiang ah kipahthu gen in, Paite innlam zuan, ka manmoh hial uhi. Huai mihingpa le, I theih thakthak leh ka convoy ua gari nawnungpen, AP Bn. te truck nung a kibu kelkul hihtuak, Hayuliang apat Tezu tan kiselgu hiven, haksa sapeuhmah venchin, ka tun phet un tawmkhia a taimang hiau chi uhi. Kha bangzah hiam nungin, NEPA (North East Police Academy, Barapan) ah Narcotics/Drugs lam toh kisai, State Excise, RAW, Police etc. te training na ah lecture pe dingin hon chi ua, huai ah I mihing pa uh ana om pheiphuai zenhouh venchin, hon suspend zual uh achi aka.

Hiai poppy distruction operation tegel ah1 ka thiltuahte mangngilh vuallouh hunhaksa ahi ka chilou theikei. Lungsung lungguk ah anuamhetlou omgu giugiau den bel1 hiai Mishmite' hon hamsiatnate ka tuahding mawng hiam? Kei nasem lah hingal inga1 lah hun haksa1 buaina1 mangbatna te ka tuah chiangin1 hiai mihingte hon hamsiatna ahihkhak ding ka laugu giugiau zel hi. Manglam bang1 ithmut theihlouh ni bang aom chiangin1 avangkim in mitkha ah suak naknak a1 mangpha khaak ut mahleng1 lengmang ut loh hial hi. Pathian in Ahon lamkaihna1 vielam leh taklam1 nunglam leh malamte ah Pangden ahihdan ka phawk a1 ka kipak hi.Toupa aw! Na Hon piina thupi in lamdang hinatel e...ka chilou theikei. Hinna khat lel mansuah kha kihi zenhouh leh1 anaak buaihuai dingdan ka gelmoh hial sek hi1 tampitak khahsuah khaak theihna dinmun ahih ziakin.