I leitung hinkhua ah sin ding leh theihbeh ding tampha ngial a, i thil tuahkhakte leh nawkkhak te`n lungsim ahon khoih diak omthei ngial hi. I piantung apat, hih ding leh hihlouh ding, asiang leh sianglou, ahoih leh hoihlou, asia-apha I kichituh chiat ua, mihing a piangkhe peuhmah in zuih ding leh omdan kilawmte kithuhilhna in, hun leh lungsim kithapai tam mahmah ding hi. Himahleh, kep kep a zong phatuamlou, hilh hilh a zong hilhbutlouh, tai tai azong taigimnamlou, leh vuak vuak azong vuakthaman om mawng mawng lou chih omtaget zel hi. Mihing khenkhatte a sual ding a piang mawng mawng u`hiam, khenkhatte a hoih ding a kisiamsa hi u`hiam, chih ngaihsutna ah teeng nilouh thei hi. Banghanghiam, chihleh, innsung hoih mahmah apat mihing namanloupi khat hong pawtdok zenhouh thei a, inn thupi leh a goumanpha teng uh bangmahlou suaksak thei takpi hi. Huchimah bangin, ngolvei innsung apat kuamah kep leh don hikollou, ama buut buut a bu tei mai, a hong khangdawng` chiang in, lungsim chiimtak toh mi zattak mahmah leh kongbangkim a sithuai hetlou, milohchingtak hong suaksuah nolh thei hi. Hiaite hi reality ahi a, khasiatna hiam, chapouna hiam aa laak ding ahi thahah kei, natural selection process ah, a hatte vualtungtuang ua a genetic makeup uh hoihzaw chihna hileh ding hi. A nei te-in nei den lou, a zawngte zong zawng den sam lou; zong in na mu ding, ngen in piak in na om ding, kiu in hon na hi ding, chih thumalte a theisiam leh zangsiamte a ding lel hizawleh kilkawm maimah hi.

Naupangte a  neuchil lai u`n, sia leh pha thei lou ua, nu leh pate kammal zat, khawhei dan leh mitmeite en kilkel kawm in, a lauhuai, nelhuai, kipahna, khasiatna, leh a hehhuai te bulhtuah pahpah uhi. Misiamte`n naupang anu sung a aom lai nangawn u`n apaitu hehna kampau leh nuihna kampaute theisiam uhi, chizenhouh uhi. Tua bang ahih lehbel, I sepkhelh, bawlkhelh, paukhelh, tatkhelh naa tamtak om mahmah ding hi, kichilna ding tam mahmah leu leu. Singtang a khosakna bel haksa kholdiak hi, naupang neuchik in zong nu leh pate huhthei ua, nu leh pate dawn zangkhai mahmah ua, naupang kizen leh thumang ichih te`n a nu leh pate uh nasepna huh pahpah ua, lou lam nasan ah gin-om takin kuhkalna suah thei uhi, huchidan te kha nu leh pa te kingakna suak uhi. Khenkhat leuleu, khawlak a vakthap, hun zangmang, tep theih, muam theih, nek theih, dawn theih leh adang dang chiing zongsang ua, nu leh pate thadawn tupna lungsim pianpih mahmah lou hial uhi. Tuate bel, nu leh pa te kingakna hizawlou in puakgik guantu, lungkhamna tuntu suak takpi uhi. Hilh louh ziak hiam? Tailouh ziak? Makaih louh ziak hiam? Duatsual ziak? Chihte ngaihsun leuleu ni, huchi khollou hial hi, thuhilhna kampau, taihilha kampau leh vuakthuak` tam penpente hizawmah kha ding uhi. A bilh a thou lou himhim, huchidi mawng a kisiam ade aw, ichih theih tampha ngial hi, tuate mi vangtah a suak ua, hehpihhuai uhi. Thadah ua, a lim lim duh zawmah ua, huaiham ua, ahoih hoih deih zawmah lai uhi, sep lah sawm lou, lohsuah lah sawm samlou, lung hin a hing, nu leh pate chawmhlawm ichih piangdok leltak hi.

Kichiilna khenkhat ensin le….

Gu ken: I neuchik lai apat gu lou ding a kichilte ihi ua, guktak laktak khelhna ahi chih I thuginpi u`ah zong kihahgen mahmah hi. Himahleh, guk louh ding chih I gen tam peuh leh guktakna tam maimah hi. Singtang ah lou-kuansan in inn kikalh ngeilou a thulpi zong kikalh sam lou hi, vanmang chih kigen vekvek lou. Ui, ak leh huangvulh gantate zong, sa in hon laksak ahihkei peuh leh mang mawkmawk lou hi. Tuchiang in bel, tahbi a kikalh gari a buksung a om khong mang maimahta, innsung van bel a gutute kuamah dang hilou in I innvengte leh I innsung a I kepte mahmah hizenhouh uhi, guktak laktak a hoihlouh dan I gen tampeuh leh a gutu ding kisaan maimah uhi, lamdang! Kisinsak louh houh a damdoi ahizaw diam maw? Guktakna ziaka kigawtna dan khauhtak pipute hun apat ineihte i nawlkhin khak ziak himawhlou hial ding hi. Indongta level a hihvaiveng pahpah theite ihihziak zong hi kha ding hi. Launa lungsim a omlouh chiang in, poisakna bei a, kithunun haksa semsem hi.

Kem thazoh lua: Naupang` hoihtak, a nu leh pate chiil ngitnget, hong khanglian deuh deuh, naman lou deuh deuh, poisakna neitawm deuhdeuh chih om thei hi. Kep khollouh a naptolh neenuu, utna peuh a zun leh ek pek ziangte a hong khanlet chiang un, hong siangthou heuhau mahmah thei ua, veihsan nangawn kidam siam uhi. A gen thoh sang in, siangthouna pen I pichin dungjui a amah a hong suakdok ding  hizaw hi. Neu lai a veih uih deuh deuh sang gige zong hong huchilou takpi ua, neulai a siang heuhau pen niin bulom toh khosa thei laizang uhi. Etsakna dingin, veihsang zongsangte kipahpih kei hial le,awl awl in amau aa hong dai mai dan ahi; lawm lawm tel, ngoi ngoi tel, ipp deuh sek in la, chia I nuihsan san hiam I khouh khouh ziakin hong kiphasak ua, uang semsem ut mahmah uhi. No farting sign koih lebel huai mun a sang ong ong gige didan hizawmah uhi. Gen tam louh leh gal-et deuh dingdan kichituh poimoh hi, naupang kap zongsangte I khem khem leh kingeksak semsem ua, I ngaihsak kei leh sawt kappeih lou uhi.

Kawmthoi hinkhua: Mihing a piangkhe taphot in numei leh pasal te zahmoh mu ut lou omlou ding hi. Pasal naupangte uangdiak ua, numei naupang khenkhat bel pasal ding kisa ua pasal` zunthakdan a peksuk ziang zong om uhi. Inquisitiveness, theih utna om ahihmaimah chia` muhtheihna ding vial zonzon pawl omtham uhi. Nu leh pate mohpuakna bel, theihsiamsak ding mah ahi, imm trettrut sang in a hoih zaw ngal a. En ve, nang a toh kibang thou ahi, chih hi-hial kei mah leh zahmoh chia muhtheihlouh koih a koih pen chidamhuai pen lou hial hi. Kou neulai in papi khenkhat vuaktang a kisil hon hon kimukha sek a, theihsiamna khat hon pe mai aka, lamdang lua ahi kei chih kithei inchin, muhsawm a kipei chhen kul nawnlou hial hi. A hutlaitak a kitheih siamsakna in thu tampi gen lawtel dan ahi, poimoh tlat aka.

ZihZeh tel: Thumna neih ding ahi, chih kichiilna hoih mahmah khat ahi, himahleh a hun leh a mun omsak louhial a mun teng leh hun teng a thum thum pen chidamhuai lou suak hi. Gamlak I vakna, lauhna leh thawmhauna I tuah chiang in, I lungsim in kithum theizel a, Pathian la I theih sunsun sakkhiak baihsam mahmah hi, hon khamuan tuan mahmah dan ahi. Ngeinaseh chih omthei a, thum zongsang chih zong om mahmah hi, mi khat in a pawtna te kiang ah siansuahna bawl gige mawk, khat in “inn ana balsak kha man zel ka hitel uh maw”, chisuk lel. Biakna toh kisai loupi a thumna toh I pat sese uh leng kituakmoh hial a, hihsuk maimai, thumsuk tei ringot, chihdan tampitak om hi, hiai te`n I biakpiakna dausak a hoihpen khollou hial hi. I kichituhna pen serious deuh dingdan mah in kichituh thei leng phatuam zawtham ding hi. Khenkhat te thum teitei ding sa, mitsi zual, Aw Toupa.. chiman hamham a Amen suk leltak kitam mahmah hiven, hiai chiindan pen hoih bang mah leh i biakna pen mantamun suah-sakna ahi hi. Namaskar I bawl chiangin khut hoihtak a fold kawm a zahtakna toh hih ahi, hihzouh peetmah, hihtei zual, chite`n thupi genlou a kipahhuai thahah lou hi, good morning kichih a manpha zaw.

Tep ke`n: No smoking sign omna ah laizial tep teitei ding ahi kei, himahleh a tep theina mun ding omsak kul hi. Laizial tumbang om neng nung I muthei kei, tep ke`n, paithang ke`n, chih sangin ash tray koih le vaiveng hiau hi. Doctor te`n laiziak na tem hia? Ahon chih chiang un, laizial tep kitamlou hiven, teplou kichisek tangpi hi. Himahleh kamsung a guantheih, nekthoh kitam mahmah a, akhu omlou na nanachu I dawnna uh dik geih lel, ahia lah akhu omlou a anek a nekthoh ziangte ihi. No smoking sign bel kiphamoh mahmah lou kisuaksak. A poikhoih dan bel poi zawmah maithei, kichihmuhte ihi, ngawlh sawmlou ngen.

Koi ah maw: No parking leh no parking zone chih muh ding tam semsem a, gari parking na ding mun thawveng I muh tuankei lehbel, no parking singboard pen paint brush a nulmang duam dia hoih ahi, suankhiak dawrh chih leng omthei lawtel dan ahi. Khenkhatte uangdiak lai ua, a innkong peuh uah No Parking, chih takzawsop uhi, violators will be fined Rs 500/- chih khong taak laitel uhi, bangchi enforce ding a diam ua. Parking na ding mun I bawl kei lehbel tua chibang public warning te` gitlouhna kaipuangtu a suaksak a, poisaklouhna chii-tuh thei hial hi.

Niin paih ke`n: No garbage here, chih a kitakna mun khawpi liandeuh ah tamphangial hi, garbage kholkhawna ding, paihkhawmna ding a om kei lehbel thil phatuam lou penpen asuak hi. Gilou hih ding a kichituhna asuaksak a, poisaklouhna a pianpih mahmah hi. Inn sak inn khang kiseltheihna leh kimuhsiamlouhna leng tunthei hi. Khawpi sianthouna kideih ahih chiang in, dust bin hiam garbage disposal facility neih ding kisam mahmah hi. Khawpi khanglian ding a kisa (Lamka) ngial ah houh, vengchih in niinbawm bawl siausiau le I khawpi siangthou dawmdeuh ding a, khantouh vai zawdeuh ding hi. Sorkar in a bawl sese ngailou, ei leh ei kitoudelh theih ahi, niin paihkhawmna, niin halna omsak le leihoih suakthei lah ahin ngal a. Dan leh thupiak bohse ding a kichituh sese sang in a manpha zaw. Mipi mahmah in siangthouna I kichituh uh poimoh lua hi, Mizote tenna, Khasi te tenna khuate siangthou kholdiak hi, sum tampipi asen-ziak uh hituanlou hi, poimohpen a akoih ziak uh ahi zaw hi. Hiai khua/veng/inn zaw Paite te tenna ahi di a siangthou si, anoptuak si, chih hileh zaw aw…. .

Taat ke`n, se ke`n: Do no rub lime, wat tah sun, chih kigelhna mun tam mahmah a, kuva haite a ding in sunu taatna ding vaang mahmah leh kilawm, himahleh tuabang a warning kigelhnate tata ah sunu kitaat tam penpen hi. Banghanghiam chihleh, sunu taatna ding mun bawllou zel ua, tuahna peuh ah taat ahiziang mai, phallouhna mun a om lehbel phalna mun zong omsak kiphamoh mahmah hi. Gentehna dingin, Shillong, Aizawl, Imphal, Lamka.. khawpite ah kuva ziak a nektak zong mi asang asang aa sim om ua, nelou-hailou ding in kithuhilh leng zong phatuamlou hial ding hi, tua ahihziak in sunu taat theihna ding mun leh chilsiatna ding spittoon omsak kiphamoh hi. Bawltawm dan leh thupiakte vengsung leh khawpi sung, a siangthou zawk theih na ding a panlakna ahoih vek, himahleh dan bohsetu hih theih a, huai dinmun I pumpelhna ding in lampi dang bawlsiam kiphamoh hi. Hiai ah niin paih theih, sunu taat theih, chilsiat theih…chih.

Zun leh ek: Do not urinate here, chih kitakna mun tam mahmah hiven, zunthakna ding mun leh ekthakna ding mun a om kei leh thil phatuamlou penpen asuak hi, ahangbel zun suak iip haksa pi ahi a, numeite diakhouh teh malam maimah ut kholdiak uhi. Zun thakna ding mun kichian leh siangthou, even on payment, poimoh mahmah hi. Tuachilou in zaw, zung hang ne, chih taksuk in taktou le uh zong, gitlouhna kaithoutu asuak leltak ve. Eksuak iip haksa salou om kei ni, public toilet omloupi a, hiai ah zun tha ke`n, ek tha ke`n kichih mawk pen meangingless le a om kei, genbei ahi.

No sex, chih sangin use Condom chih Mizoram te`n hahbawl mahmah ua phatuam mahmah dan ahi. Hih ke`n, bawl ke`n, zang ke`n, kithuah kei un, chih sangdaih in, kikemsiangthou zaw un, chih a manpha zaw. “Aids pumpelh na`n kondom hmang roh” achih mahmah uh ngaih-sa ke. Huchi dingdan mah ahi, hihlouh ding I gen tam luat chiang in thuman` leh zuih a haksa, huaite pumpelhna ding in kichituhna chituam deuh leh kichiilna manpha te poimoh lawtel dan anahi hi. Khamtheih hih ke`n chihsangin, a hoihlouhna leh a kiven dingdan tangkoupih le a phatuam zaw ngal a.

Ice breaker: An na ne ta hia, bang non meh ua? Chih kampau I zat tangpi pen uh, mi khangtou zawdeuh te`n lamdang sa ngial ua, chiinchii lou hial hi. Why do you want to know whether I had food or not? What is your concern about the food I took? Hon chihkhum le uh, daak heuhou angai ngei di. Houlim patna ding leh phone a kihou masakna ding in a subject a lut pah geih mai le a siangthou zaw diam? Gen ding nei loupi a mi kiphone mawk mawk lah hisam lou a, chi aw.

No alcohol chih sangin a poikhoih dan leh a hoihlouhna te gen zaw le thupigen zawtham ding hi, I huatthoh pumlum ziak leh melma dan a I etluat zawzen ziak ua buai buai ihizaw diam? Dan pawlam a koih pawl I hauhluat ziak leh kamka peuhmah te`n pulpit leh pitlou apat “zu leh sa, zu leh sa a kibuallou, chu e kha  e, misiangthou ahi” chih I gen tamluat ziak ua uangtat tam ahi. Zu dawn loute van-gam toh kinaidiak leh kilawm, I tangkou dan dakmual pan et in. Zu tam-dawn luat leh sa tam-nek luat ahoihlouhna kikim mahmah ve`n, thauna mamna hipeuhmah kei, sungna laina pianna hi. A dawn dingdan leh a hunlel a hih dingdan kisinsak pen hoih zawtham ding hi. Sungkuan tamtak I buaina uh hiai ahi, zu leh sa chih gengen mai, melma lianpen a ngai, huai I gengen chiang a naupang khangdawng lai te chituh hoihloupi khat chituh den ihi uhi. Thil hoihlou mi`n achih uh hih ut teitei mihingte ihihlam tak phawk kul hi. Zu hahdou a doute sungkuan` ah zu leh khamtheih aa buaina a piang ut viau, Nagaland, Manipur leh Mizoram ah zu zuak khaam bik bek ahi, zu dou namte omkhawmna statete ahi uh, a tawm tuan hia? I dou peuh leh tam himailou hia? A doutute a hatzoh peuh leh a dawn ut pung zawsop akei maw!

Toilet Vs Temple: Jairam Ramesh (Union Minister) in temple bawl bawl sangin India in toilet tamsem  bawlkhiak akiphamoh zaw achih leh gen-se kheukhou ua, Pathian thu awilou chi uhi. Reality ahi a, universal truth genkhia ahi, thu diklua te mi`n a genkhak chiang un, nuam khollou mah ahi.