_{NEKZONNA LEH KHOSAKNA KIPZAW}
Mi tamtakte muhdan in nekzonna pen siamsinna leh lai siamna toh kizawitawn hi`n kikoih a, lai sin ding in hahsawl in ikisawl uhi.Huaiziak mah ahi, tunitan in tamtakte`n sorkar zemsawk in khosakna I mai-suah ua, khopi khota ah I teng kheukou uhi. Nidanglai deuh in, sepna ding aom sunsun sipaih pan ahi tangpi a, singtangpa a dingin sepaih panteisam utna lian mahmah hi, ahangbel kawl a nisuaksim a thouvui thouvai lak leh azu asa thuak a hinkhawzat pen haksa law mahmah hi`n maw. Deihtawk a panlak khit nunga zong nekding pianglou hilai zawmah, tuabang hinkhua zangkhate` a dingin sepaih lubawk a pan, haksa mahleh, khasim a khalawh muhtheihna bel telhuai  zawtham mah hi. 1980 tan khong a tangval hinkhua zangkhate peuhmah, sepaih pan utna lungsim neilou leh kilak khalou kitamlou hial ding hi, tuchiang chiang intuh a gen ngamlou I om maimah ding ua hiven.India gam in suahtakna amuh toh kiton in I tenna leitang ah kumpi nasepna muhtheih tamkuamtak hong piangdok hi, Manipur kumpi nuai ah amite siamna toh kituak ding, aneu alian chih omlou in sepna hong kihawng a, kumpi nasem a nektak zong, a hunkhoptak I om ziak un, zi leh ta vaakna mumalzaw leh khosakna kipzaw a piangdok a, khantouhna kalbi liantak ahi hi. First generation (educated masate) te suan leh pakte a hong khanglian ua, siamna sin in khopi lam zuan uhi, nu leh pa khupzou in siamna sangtaktak hon nei uhi. Tuate second generation hi ua, 1970-80 kikar a mite ahi uhi, etsakna dingin sinsaktu, doctor, lecturer, gazette leh non gazette officials etc. Muanhuai huntawk a siamna neite bel BA pa (male) chi ua sepna mulou taktak omlou uh chih ding ahi. 1980 nung in sepna ding haksa mahmah ta a, deihsaktu ding neiloute a ding in sepna muh chihmai hinawnlou hial hi. Beh leh sungkhat laina thil in pai a, kideihsakna, kiphungvuha, politics tak a kivuktuahna hong piang khia hi. Bazar thil lei a lei theih suaksak ua, Minister chethei leh huham chih hong piangdok leuleu uhi, “pu, na mihingpa` driving a siam himhim sam a”, “la un ka chih leh la mai mai un, a sem dia a siam mai di”, chih bouruak ahita. Nekgukna leh golhgukna lou a sepna muh kinephuai lou asuak a, a lunghimawh zualte a ding in lungjiinhuia ahita, PLA kichi zong tua hunlai a piangdok ahi hi.

Ei lak ah mabaan khual dawm deuhte khopi lam zuan in nekzonna ding in zuan ua, Delhi tantan vatung hialthok uhi. 1986 vel apat khopi lam ah tamtakte kidenna ua, inn lam a aguhbawk tangkhalou teng ichi diam a, khopi ah kikhualtak a omdan kisin uhi. Haksatna gensenglouh leh mite gelgawtna (muhsitna) te thuakmualsuah in India khopi lian penpen ngial ah houh nuamsa pet pet lawi om tham mah uhi. Kum sawmnih sung khong, a hong khosak chiang un, lohchinna leh gahsuahna inamuak a, tate tute nasan toh Delhi leh khopi lian dawm dawm ah, asuk atung ah inntektak in diang souhsouh uhi. Khenkhatte ngialhouh a mother tongue uh siamphalou leh inn lam ngai mahmah lou, lungzuang se lou om tham uhi. Khantouhna thupitak ahi, himahleh tamtakte ngaihtuahna ah hiai om veve hi, inn lam ah ka sep theih theih sem hileng hia khopi a haksatak leh hautak tak a ka khosak sangin neih leh lam ka hauzaw ding chipawl om uhi. Bang hang hiam chihleh, a khanvualte uh a et chiang un, inn lam a khosate`n nuamsa zaw mawk uhi.Khopi liandeuh a khosak bel, paisuk paitouh ah bahara, nek ding taak ding teng leivek sipsip, tui, mei, meh, paper, ninpaihtu, guard duty, leh adang dang ah sum ngen sum ngen ahi hi. Inn neuchilik khat luahman gen ngam hilou lai hi, huaizong deihsaktu omlou a muh hilou lai hi. Mi lak a khosak zaw, tui na hek lua uh, mikhual na nei thei lua uh, mi na tam lua uh, lengla na hau thei lua uh, ekbuk dim meng meng, zaan sawtpipi na hak uh, na bengseng thei lua uh, vagara vagara,kisoiselna di gensenglouh a om hi. Nungak khenkhat ngialhouh, pasal a neih tung ua inn nuamtak a teng ding, khosakna nuamtak a khosa ding kisa, maizen Delhi tual ah kholum thuakzoulou phialphial a tam a tam ahi uh. Pasal neikhial kha kisa velvul lah beilou, mahleh a inntek vanglak ua leh bel, kua hawlkhiak but ding hiselou zel. Huchidan ahi, khopi hinkhua, I tun tung a bel haksa lawpetmah, I omom leh kingeinaseh inchin a nopna I hon phokphak chiang a bel zung kikai kip mahmah dan ahi ve, chu ua.

Khasum lawh hong tungding ngak khiukheu a nekzonna pen khangthakte a dingin tha leh zung, siamna leh hun mansakna chitaget zel uhi. Tua ziakin, kiloh theihna ding teng ah BPO leh private co. ah diang souh souh ua, sum tampipi mu in leh fecilities hoih taktak muphaban ua, khopi aliau in liau thoh kihita hi, khangtoutak zaw ihi. Hitamah leh, khopi a khosak bel sum senna tampha peuhmah ahih chiangin, mi tengteng a ding hilou hial suak hi. Sum muhna a nuam chih omlou leh sum sinna zong kikhek den ahihna ah, nekzonna mumaltak patkhiak thil hamsapi asuak hi. Tuabang kar ah, inn lam zong khangtou zelzel sam a, nek tak zon theihna tamkuamtak piangdok peuhmah hi. Siamna nei leh neilou gentaklouh, a peih leh thanuam, a remthei leh kuhkalte a dingin sumsinna hoih kuamkuam omta a tamtakte`n nekzonna mumaltak neitheita uhi. Tua kawmkar ah, ei te`n bangchi panlak a bangchi dan a nekzonna mumal zaw leh detdou zaw neithei ding I hiam? Chih thu kikum le chidan ihi.

1990 vel in New Lamka ah (Lailam lui ban) pharmacy, skul naupang uniform leh stationery zuakna omlou hial hi, tua hunlai in zekzonna ding in enlah mah mah ing, tu`n bel a demlet hikhinta hi. 1995 vel in Lamka khosung a diagnostic centre/clinic omlou chih thu houlimna pen in neisek ing, mipite khualna bek in kuahiam khat in pankhe leh chih ahi hi, himahleh a semsuahtu ding kineilou hi, tu`n bel a tam a tam ahita. New Lamka mah ah 2005 tan in Xerox, fax, lamination, cyber café, scan, print, photo studio etc. bawlna omlou hi, nekzon theihna ahi chih ka gen hangin a kipandok ding mi kineilou hi, tu`n bel Bazar lam pan sese ngai nawnlou suak.2000 tan in Sik, cement, sing, inn bawlna van, antang etc. zuakna khopi sung ah om deuhvek a New Lamka ah om nailou hi, a consumption Centre pen ah van kizuaklou chihmawk chia kum 10 vaal ka tangkou nungin hiaite a dimset in kizuakta hi. 2003 tan in Sawmill New Lamka ah omleh hoih mahmah ding chih theina-zenpi in a sem ding mi kineilou a, midang in hih souhsouh ua lohching mahmah ngeingai uhi. Restaurant changkang deuh kiphamohta hiveh aw, ichih leh Saulim hong piangdok hiau hi, pilhuai mahmah. I neih sang a thupi zaw a khosa utte ihi, chi`n kum 2003 vel in motor workshop bawl thei omleh ahoih mahmah ding, kum 10 paima in lohching ding hi, show room leh spare parts, servicing centre tanpha omtheipah ding hi chih ngaihtuah ngitnget ing, naute khat mechanic zirsak liang ing, bangmah suak lou, tuabel genlouh a mang suak hi, sumbuk diktak ahi. Huchidan neng neng ngaihtuahna leh suangtuahna toh, banglam ah nekzon theihna a om dia le….

Sumpung hawm ikidem ua, bat ding zong lah kiam` malak ah niteng in pung hulhul hi, thrift society dandeuh omsak le nekzonna hoihtak hiding a, mipite dawn zangkhai tuan mahmah ichin, khateng a sumpung 5 to 10 % pen 2% in hihleng zong kumkhat in 24% pung ding a, a leitoitute a ding a kouzanna, a zangsaktute a dia sum muhna hipah lian ding, hoih lou hekei veh aw.

Laisiam leh sinsangte a ding in nekzon theihna ding coaching centre/computer training centre leh career guidance centre om thei hi. Franchise laak a midangte toh hoihtak a kizopna neih theih ahi, etsakna dingin BPO te recruiting agent a pan theih ahi, sappau siamna gam ahia, nengkhachik tutorial leh spoken English sinzek a asiam a siam dingte ihi uhi. Medical/engineering/electronics/management etc. institute te a luttheihna ding kisinsakna (coaching) omsak le naupangte a dingin hoih mahmah ding hi, a centre neitu a dingin nasep senglouh piang ding a sum naak diktak ahi ngei ding, contract keleu buaipih sangin.

Gam zuak leh innmun hawm ikichihmuh ua, ahihthei teng in ihih souhsouh uhi, sumpi tampi lutna leh sumpung tampi buara bag dimdim a muh ok ok theihna ahi. Lou mun leh gam teng I zuak gai hak kei hial ding uh, huai sangin, ahihthei te`n housing society leh complex bawl le hoih mahmah ding hi. Etsakna dingin, gam acre 4 ah complex khat bawl le inn 100 phial lam theih ding a, a inn in zuak le mi tampi te`n hamphatpih ding uhi, gam zong heklou deuh ding a, inn teen lou teen kiningching piang pahpah ding hi. Tua I paidan bel, gam teng kizuak bei khong ding, common facilities lah omlou, lampi, tui, electric, drain, nasan mimal mal in kivaisaivek ngai.Vengsung khat a piankhiakna ding hamsapi khat hong hi in, approach road takngial neitheilou, a umm a ki-umm bing gai, postal address leh inn number zong om theilou, mumal lou suak ahi. Complex bawlkhetu pen MGNREGS vaisaina ah Hausapu suak ding a, nuam lehlam vanglak ding ei ve. Sum deih mahmah te a ding in long term policy ahia, tu leh tu a sum muh ut tuntun ihihna, sumdawng` lungsim pen paisan hun lawtel ta hi.

Khutnasep leh silbawlsiam taktak kitamta a, mistiri te nitha leng tampha mahmah ta hi. A hihsiamte a ding in contract system a inn bawl, dai bawl leh a dang dang nasep ding tampha ngial hi. Labour contractor bawlkhiak hun lawtelta hi. Khut nasep a kilawhtawm te` social security poimoh mahmah a, bandh hun, nasep theihlouh hun, damlouh hitaan hun etc. ah security naaktak in poimoh diak uhi. Labour contractor te government ah register hile uh, huaite tungtawn a nesemtu ding peuhmah laksawn hileh hoih mahmah ding hi, ni khat thaman (labour charge) bikhiahna mumaltak omn ding a, exploitation kiamtuan mahmah ding hi. Vaite leh namdangte nasem a mawk laak mawk mawk, innteekte nelhsiah bawl chihte zong kiamtuan mahmah ding a, ikihumbitna khuampi suak ding hi.

Teddim Road dung tawn in bazar I nei ua, huaipen hoih khinlou hial hi. New Lamka ah Damkam Bazar a om a, huai bazar ah numeite meh zuak leh nektawm zuak in sumdawng thei uhi. Mitampite nekzonna a suak a, Damkam leh a sungkuante a ding in sum naak hoihtak ahi hi. Tuamah bangin, sorkar sepsuah sese lou a kitoudelh dingdan lampi zon` kul hi. Mun poimoh teng ah dawr mun  leh bazar, gam (leitang) nei te`n bawlkhe le uh, Bungmual, New Lamka Vengnuam, Khawminthang, Tangnuam, Kawnpi, Dorcas road leh mun dang dang ah, mipite a dingin kouzang tuan mahmah ding hi, zong sum muhna hoihtak suak ding a, siangthou` zong siangthou thei zawtham ding hi, mimal gam ahih chiang in I siangthou zaw ngal ua, government hihpeuhmah nelhsiahte ihihziak un. Na Bazar ah nikhat tutman mikhat ah 50 la zel le chin, mi 30 hong tu le uh sum naak ahi, dawr dan a na bawl leh bel khateng a rent don ziang di himai.

Kuva duh ngen ihi ua, vaite bawlsa kuva lei suausuaute ihi, amei apa genlouh. Khosung mun poimoh teng ah pan dukan 10 koih lechin, na gintak sangin sum na mu mahmah ding hi. Supna mun a om dia, metna mun zong a om ding, a kaihrual in na met himhim. Van tamtham poimoh gige na hihziak in wholesale rate in van na la ding a, sum buk a suak pah ngeingai ding hi.

Khedap bawl siam pa`n khedap bawl thei ding a sungkuante mi 10 sinsak henla, mun 10 ah khedap bawlna lamgei ah koih lebel, nekzon moh hilou hial ding hi, a chain system I kisin kul mahmah liang hi.

Sam met pa mun khat a kuikunguk a sam met ding a ngak ngak sangin, mobile phone in sam met ding zong leh hoih mahmah ding hi, sam metna mun thum leh li nei lehbel thupi sem ding hi. I sam metna te uh houthei lawzen kei henla, changkang deuh leh mi lut lut didan uh ahi, mun 4 khong ah siamneltak in kuhkalna toh sem peuh leh nekzonna hamsapi lou maithei chi aw.

New Lamka ah clinic (children/women) changkang deuh poimoh mahmah ta e, kua kisa ding ade aw. Lamka leh Aizawl kikar ah gari service pai zungzung a hita, Behiang toh entuah lai le, kum tamlou sungin mihing kivialvei a saang a sim om gige ding uh bang ta hi. Tua dingin tourist permit nei, state tuamtuam a taithei permit nei, travel agency mumaltak poimoh ding hi. Gam dang mi leh khualzin mi te a ding mun nuam leh siangthou zong poimoh semsem ding hi. Tua ding in a kisakhawl pawl om le bang achi dia? Lamka ah travel agency office cum rest house (tourist lodge), Zezaw ah breakfast nektheihna mun changkang deuh, Singngat ah Hotel siangthou deuh, Behiang ah Lunch/dinner nektheihna mun leh giahtheihna mun kichup deuh, Lungthul ah coffee shop, Sinzawl ah khawlmun nuamtak leh Tuivai ah forest lodge nuamhuntawk. Khovel hong khangtou zel ding ahihna ah, mihing kibehlap zelzel ihihna toh, Burma toh kikawmtuahna Haichin lam zong lampi pai zungzung ding hita, sumbuk se lua ahi khol kei ding. Internet tungtawn a kithuzak utte a ding in haksa nawnlou sem sem, net booking tungtawn keleu zong I buaipih seng kei maimah diam maw? Lamka ah private hospital changkang deuh om lai ngial leh houh Chin Hill apat leh Mizoram apat ki-ensak ding, khual zin ding, zin tun ding I dou seng kei maimah diam chi ke.

Lamka khopi in nek leh tak, meh ding louhing leh sa a kiphamoh tam semsem ding hi, gam nei te`n vok vulhna, ak vulhna, ui vulhna, bawng vulhna etc. mumaltak pankhe le uh lamzang peuhmah unchia. Zaanglou teng I sukmang sang un bawng-ek ankam, bul-uih, kam-pi, mainou, tangkha, tomato, manta, havai, Meitei be, sapthei, phuinam, pasikhawm, pakbawk, zikluum, nahtang, singthupi, ching-ik, allu, carrot, onion, zawngtah, mantakha, khangkhuh leh adang dang chiing le uh, kha thum sung a piching thei a tamzaw hi a, kum khat sung a thumvei piang man ding, buh kum khat a khat vei bek laak sang in hlawk zawtham ding hi. Lou leh gam neite a dingin a ningkhat ah Ngakul bawl le uh manpha ngial inchia. Mikhat in, lou liandeuh nei leng zaw, buh suanlou ding ing a, ngakul tamsimtak bawl ding inga, nganou lakh 2 koih leng, lakh khat mangthang ding in hisap leng, lakh khat piching leh, kg 2 chiat pha leh, kg khat 250 in khong leng, crore pati ka hi pah di, achih dandeuh ahi, huchiguih le zaw ahi kholkei ding a, mahleh a dikna chiang om mahmah ka sa veve.

Lungsim leh tha sengpeihte a ding in nekzonna ding tam mahmah ta hi, khenkhat te`n mou van khelh ding leh zuak khiak leltak a sum amuhdan khong uh thei nazenpi a, ektehtut a tut hun nawnlou hial hi.Event management sai ding I society ah tam semsem ding a, Meeting Hall, convention centre, auditorium etc. changkang deuh buatsaih theite a ding in maban om mahmah lai hi. Samiana kiching, tui siangthou, ann sianghtou (catering), sound system kiningching leh gari kiching neite a ding in sep senglouh omta hi. Ann hawm, tui hawm, sa hawm, leh door to door service ah nasep ding tampi om tham tham hi, mi kichangkangsak uh ei`hch`ia. Birthday lop, anniversary lop, Mou lop, Mou khaak, Jubilee e bang e, pass lop, retirement lop, sepna lop, lochinna lop, kumkhat chinna lop, lop di ngen lop di ngen, Pastor khat in, ekbuk a hon lansak kha di uh chih ahi ka lauh” achih dandeuh ahi ta,nang` zong huai hihthei tei na hi chih kimangngilh ken, unau. Security service bek chu ka hih thei aka ichi hia le….Private security le hong poimoh semsem ding a, service provider muanhuai I bawlkhiak poimoh hi, mi thaching leh thahatte a ding in security service ah maban om mahmah.

NGO hiam, saptuam hiam ah kingak I sawm` vek leh thil hitheivual hilou ding hi, sep leh bawl theih, nekzonna chituam tuam zonsuah ding ahi. Politician, contractor ihivek theikei, Nam nasemtu ichihte transitory ahi, nekzonna kip leh detdou nei le, mite kingakna zong hong suak khamohlou ding hi. School, college, leh hostel te kua bawl ding hituanlou a, mimal mal in bawl theih ahi. Khopi deuh Shillong khong ah, gam neitute nekzonna pen, naupang et-kolna, school leh hostel bawl ahi hi. Educational centre suaksak le I gam changkang mai ding ahi, chi teuh le.