Innsung khat ah I zollouh leh I deih khollouh gamhing tamkuamtak kitenkhawmpih kha naknak hi, tuate lak ah, akholdiak in namsia leh uihik ni`nhuai mahmah ua, himahleh sukchimit haksa mahmah leuleu. Ui leh ak toh tengkhawm ihihna uah, ak-hik muhtheihlouh sim khong vak nuaunuau maimah ua, I chi, I pum thak lukluk thei zawmah hi. Bawng leh kel neite ngialhouh, sa-hik lian simsim in achineem lailai uah bohsak ut zawmah a, belh teetaw ua nuam seesuu louhial hihtuak hi. Ganhing bil a lut thei zong om ut mahmah a, tuibuk sunkhum hial kiphamoh sek hi. Singtang khosakna ah bel mei chihte ihihziak in meikhu innsung ah leng lunglung a huai in ganhing chitampi bengdai hihtuak, etsakna dingin thousi thouvai leh thoukang chihte. Miksi leh leikha te zong hahpan ngial ua, mun khenkhat ah innkhuam nesia/nehawm ua munlauhuai suaksak thei takpi uhi. Inn hik ham kuk kuk di leh mite kiginlouh kar khong a tuanglai dengging dupdup di kitasamlou hial a, lupna tung khong ah hon kiguihsak zotzot thei te hizawmah lai uhi. Singlung (worm) in innban leh innbawlna sing keute khuak nguatnguat ua, zaansawt nungin hahpan semsem zawmah lai ua, ihmut theihlouhna tuntu lianpen hithei laizang uhi. Khenklhatte a dingin, mangsiatna tuntu, leh thawm lauhuai bawl thei ua, a dawilok diakte a dingin lauhuai theingial hihtuak. Innlawi neu leh innlawipi om zawmah ua, om theihlouhna neilou a duam, muhding om hetlou in kiselmang hiau theizel ua, nitakchiang in kitchen sung ah nuamsa thei huulhuul mahmah uhi, a kha khong uh gingsak sulsul ua, ki-umtuah heehuu zawmah ua, kichikhah pung zungzung zawmah lai ua, zakta theilou sak sim in a omsek. Hon kibukta-neih pih di tampha ngial ua, hawlkhiak but di himahmah lou hial uhi.

Inn khat peuh peuh ah innngaktu kinei deuhchiat a huaibel sansiim, zusa leh chikpi hi ut mahmah. zusa bel liandeuh theltul ua, mikhual dandeuh in zaangiak ua zingsang in manghiau thei zelzel uhi. Chikpi bel namsia a, haamdan chikhat nei ahihna ah muhsuah baih diak a, a tangpi in mihing te`n kingai khollou adiam, thah pahpah in om hi. Muk zum cheuchou, mei bong terhturh leh namse vevu ahihna ziak le ahingei di, kihaw kholdiak. Matkhak haksasim mahleh capital punishment piak haksa khollou hi. Inn zusa bel pilkhel ngial ua, beemkawm leh singrem kar, lupna nuai chihkhong ah kibumang hiau thei ua, bi inn ngial ah houh bichiing sungah bu sep in a tu a tate toh tengkhawm maimah ua, nuamsa nainai vial uhi. Tapsak nuai ah busep ut mahmah ua, I theihlouh kar in khopi ananei maimah sek uhi. Khopi lian zawdeuh ah zusa lutna ding omlou isak leh, lutmohna neilou hial ahingei ding uh, water pipe ah kiban dengdeng in leh, sewerage (drain) pipe sung khawng ah kitholhlut zatzat thei ua, I gintak khollouh na tata ah hong daak keukau zawmah ua, ka hong lengla thei diam chi hi-awmtak in hong dak keukau ut mahmah uhi. Lutna ding amuh naknak ua lehbel a nek ding uh, a dawn ding uh, a kiselna ding uh, a giahbuk ding uh, a lamtual ding uh, leh a kikholhpih ding uh tasamlou hial ua, a lawmngaihte uh hon chialdok pah geihgeih uhi. I phawkkhiak masang in nih leh thum pha-man ua, khenkhatte ngialhouh sungkuan nei in a tate toh nuamtal in hon khosakpih maimah ua, zanchiang in I innsung teng a mawltual uh suaksak zawmah ua, a utna peuh uah a zun leh ek uh nawse zialzial uhi, kisimmohna chikhat zaw ahitakpi ve.

Sansi`m bel, neu liilee, pil kiukiau, hak lela, a rong sandup pian ahi. Chik kar a hong bel hiam, chik kar a hong dianglut hiam, chik kar a hong inntek pan hiam, chik kar a permission hong la hiam??? Chihte dot thaman omlou hilhial khat ahi. A cheetdan lah arang a rang zawmah lai, innsung mi khat ding a hong kibaptist ahi chih I theihsuah chiangin thil tampi a kikhel khin omman naknak. I zan-puan sung khawng ah kiselmang thei khat hi a, numeite puan hoih leh innsung puansia khendan training piaklouh ahihziak hiam, numeite puansilh a hoih tata attack ut mahmah ua, nupite khasiatna tuntu khat asuak uhi. Puanbu gatlai leh puanpi koihhoihna mun khawng buluh zialzial ua, almairah sung ah kiselgu keukau in suksiat di maipah gopgop ua, thawmging neilou hial in che khialkhial zawmah ua, a utnalam uah bel hat mahmah dan hi uhi. Sing singrem khuakvang hekhok thei hial a haat ha nei ua, tupna a om leh a lampi a om chih motto nai zawmah te hi ua, a tupna lam uah kuhkal suahzou mahmah mai uhi. Tapsak a gawlawng sung, lupna gei a gapkhuam sung, sing chihding koihkhawmna kawmkar, tapnuai, biching, thuul sung, tui-um tunna, lupna nuai, bal leh maipum leh meh ding koihkhawmna dohsang kawmlak, puanthuah koikhawna leh almirah/thul/singrem etc. nuai, chihte kibukna mun leh khosakna mun suaksak ua, om isak kar a omlou, omlou isak kar a omzel, sikhaa hi-awmtak a hon kibuktaneih/kibuktehsiak pih nilouh dan ahi uhi. Mihing a piangkhe peuhmah in hide and seek game a theilou leh a utlou/nuamsalou ki-omlou hial ahihna ah, sansi`m te hon hilh leh sansi`m apat I zirkhiak uh himah mah dingdan ahi. Matsawm in thaangkam le chin a awk kei hial di, khutpi chia lek ahi, mat sawm le chin na`ng sangin a leh sawm in a cherang ding a mat maimai theih ahi kei hial. Khedap, tu, tutna, singkhuah chihte in deng ek lechin na dengkha kei hial ding, na insung van a kise tam zawtham ding, na tate/nupi na khuai kha zawmah maithei. Inntekte aphiat vengvung lai ua dai khinkhian peih ahi, himahleh a omlouh kar ua bel phepah selsul, a lang a lang a diang solsol peih hi thepthup zel, lungsim pianpih hoih mahmah leh, pianken a pilnatak nei zaw ahi. Nitaklam chiang in a dai khinkhian a, zansawt` tantan inn neite`n leengla nei tale uh, poi asa sekei, dohtheitak a ngak khiankhian peihte ahi zel thepthup. Mei sukmial ahih toh kituak in, inntekte luu in lukham a su-kha chih a thei ngial hi, huaihun a tun ding tuikang ngak a angak ahih ziakin theitak ahi leuleu, sawtkuamtak ngaakkhinta leh etkhiakna aneihkhit nung ahihziak hiam? A ngaihtuahna ah bel, ka gilkial law mahmah ta, ka tate gilkial a buaisia ahi uh chi ahingei ding, zum leh zah dawnlou in a kibukna apat hong diangkhe khauhkauh a, himahleh inntekpa`n ana gukchaan ahihchiang in, thakhat in torch light salhkhum guih ahihta, vaak lamdang mahmah in a mit vaisak mahmah a hamhaih mahmah hi, a tung a khetbuk atuah ding ngaingamlou in liing keuhkeuh ta hi. Mihing khut zung lian taktak leh tamkuamtakte sungpa`n suahtak ngaihna omlou hial in a bil, a deksam leh a nungzang vun ah deihtawk in bungbulehkhai, vunkhai, bilhek leh tuanglai denna in om maimah ta hi. A tactic fail ichi diama, a sih hun tungta I chizaw diam a, tuahsiat tawpkhawk chu tuak ahita peuhmah, suahtakna lampi a om nawn himhim kei. A mah ngaihdan in chu a nekzonna lel ahia, mihingte lawm leh tenkhawmpih dan in a kingai a, hihkhelh lawmlawm nei in kikoihlou hial hi. Himahleh a pu a ding in bel, sihnatan hial gawtna piaktak ahi leuleu, bangziakin e?

(1) Innsung a teenpih ding in permission a la masa kei a, innsung mi ahisam kei.
(2) Inn bawlna ah tha a thawh kei a, inn luahman leng a pe sam kei.
(3) Tui a tawi kei a, tuisiang a ni`nsak zawmah lai, tui fee le a pe sam kei.
(4) Meivak man a pe tei kei a, free tak a gamtang thei ahi zawmah.
(5) Nektak zonna a sep leh bawl neiloupi in ki-inteksak tak in nek leh tak a baansawk zialzial.
(6) Inntekte omlouh kar suam in a vanhoih teng uh a ban aatkeeksak zialzial.
(7) Ihmut mohna bawl in zaan sawt nungin a gamtang naknak.
(8) A zun leh ek a utna peuh a tha in innsung a thangsak gige.
(9) Inntekte bil leh khemuk khong a ihmut kar un a keihsak naknak.
(10)A free a om chih kitheilou in inntekte van teng a baan suksiat sak zawmah, a nek zohna lah hahsiang malak in, innsung teng ah thelthang sak neng nung gige zawmah hi. 

Hiaitte teng ziakin mohpaihna sangpen piaktak ahi takpi hi, chihtu a pu vaihawmna leh thutanna ahita hi. Ahi! sans`m in a pu-pa a buaisak a, a zahtat kei a, a amhaisak a, innsung buaina tuntu lian mahmah khat ahihna ah, a pi zahngaihna le a mu zou takei hi, ahangbel api niik it mahmah leh a puan chei lai a atkeeksak gige ziakin. 

Huchimah bangin, I tu I tate I lainat a, khosakna ah kidomtuah le chih I deihna in muntuam leh khua gamla taktak ah I kikoih khia hi. Siamna sin ding hiam, lai sinsang ding hiam, nekzonna hoihzaw beiseih naziak ahi tangpi. I sanggam lainate ngialhouh I kem ut a I kikepsak kheukheu uhi. Hiai pen thil manpha mahmah ahi leuleu a, paidan kilawm leh chiinchi mahmah zong ahi hi. Hitamahleh, khuapi zawdeuh ah I khosakna singtang nawnlou deuh hia, nek leh tak, duh zawng leh duhlouh zawng kikhek in, nek hun leh lup hun, hinkhua zatdan leh innsung kivaihawm dan kibang nawnlou hial hi. Paisuk paitouh, kuankhiak tunkiik chiang a I kivaikhaak dan nasan ah kilamdan na piang a, zingthoh chianga ki wish tuah chih khong chiindan asuak hi. Nitak chiang a good night, sweet dream chia kimangpha khaak khong chiindan kilawm a suak, hiaite tengteng singtang bangkua ah kizang seselou hi.

Tua mah bangin, ompih poimoh ngekngek tamtak ki-om leuleu a, nasep silbawl a hon huhtu ding I mi leh sa mah kilainat sese lai hi. Huchi in, ompih muanhuai, innngak tu di, annhuan tu di, I tate hon kepsak tu di, I neihleh lam hon humbitsak tu di I koih ua, a sia a pha hon theihpih sipsip vial laizang hi, nupa kikar, tate toh kikar tanpha. Ompihtute namatlouh ziak hiam, a omtu namatlouh ziak hiam in, mihing a tengkhawm ngeilou na nanachu kibauhna leh kibalsialnuaina piang thei a, kamsiamlouh ziak maimai in le thu saupipi paisawn takpi thei hi. Huai ziakin, ki-ompih tungtang ah dan leh dun zuih di I bawlkhiak kiphamoh mahmah suak tazen hi. A omtu ding leh a ompihtu dingte kikar ah agreement neukhat om leh bel, sum leh pai, sen leh pai, damlouh hitaan, silh leh teen, innlam pai, suty laak etc. tungtang ah kizen mahmah ding hi. Tua bel, ki-ompih chot, lungkimlouhna neite kigense heehuu, thu saupipi tung, a lang a lang a khial theite ihihna ah pilva`nhuai sa ing. Numei diak houh, siatna tuak baih mahmah te hi ua, minsiat theihna tamphangial a, inntekte tung nasan ah chihim khollou thei maimah ahihna uah, kigaakna chikhat bawlkhiak kisam lawtel hi.

Sungkuan nai, sanggam nai, I ompih chiang in inntekpan thei le uh hoih mahmah ding hinazenpi in, a omtute a gaalpan chiang un buaihuai pi suakthei hi. Insung ah, khateng a inluahman sangsawm lamlam liaute omna ah I tate I koih khia ua, nekman, giahman, inluahman, electric fee, news paper fee, periodicals man, water tax, bawngnawi man, gari tui man, leh adangdang kiliausak te ihikei hial. Hong piching unla, nu leh pa, u leh naute zattheih in hong khawsuak un ichih utna ahi hi. Tate sang mah a duatbawl zaw leng ki-om nalai a, tate khasiatna pipen suaksaktu hithei thepthup uhi. Himahleh, mihing lungsim leh ngaihdan theihsiamlouh tamtak om ahihna ah, I kamsung a lei zong kikeikha thei mawk mawk a, kitai, kithuhilh chihte a omlou theilou naa ahi hi. Naupang omkhiak sak peuhmah te`, nu leh pan te`n I theih ding bel, a omna te uh na nu leh pa ahi ua, a thu uh na man` ding ua, a mau thu lou in bangmah hih kei un, thusia lasia amau hon theihpihlou in vaisai` ahikei ding, chi in thuhoih-la-hoih muam thei le deih huai mahmah hi. Naupangte a om ngeilouhna uah maingal pahpah lou ua, kisikna lungsim, haksa sakna lungsim, lungle`nna lungsim, lawm leh vual ngaihna nungkaih veithei ua, nek leh tak nasan ah buai thei uhi, huiate pen mualsuah thei dingin, nu leh pate toh a ompihte kithuzak kul mahmah. Naupangte thugen teng pi bawl a ngaihmoh pen a I neih lehbel, kikepsaklouh a damdawi hoih penpen hi kha ding hi. Ki-ompih ichih laizang, I innsung nawngkai a, tate toh kikar ah buaina piangsak a, nupa kikar ah hih thrimthremna tun a, sep leh bawl a kingentuahna tun a, sum hek a, haksatna gentheihlouh tampi mahmah om ahihlam theih kiphamoh mahmah. Naupang pil in a pipute mitmei vengsiam a, kipaksak a, innsung nuamsak hi, a hai in innsung nawngkaisak a, unau kisiatna tanpha tungsak thei takpi hi. 

Tuaziak takin, Sansi`m dinmun a om khaak ding thil lauhuai pi ahi, sum nei te`n hostel ah ki-koih pahpah le vaiveng ding a, kep ngaite kem ding a, sungkhat-laina muan-ngap I neihte kiang ah, I kikoih vanglak leh full power pia le, sep leh bawl leltak lou, nek leh tak, dawn leh tep, muam leh hai, damdawi zongsat theih chituamtuam tanpha lakpan` kiven` takpi ngai ahihna ah. Ahitak in bel, khuapi zawdeuh a omte culture tuam dawmdeuh a, innleng tetoh formal hi~n informal hitaleh, official hi`n un-official hitaleh, I gamtatdan, I nek leh dawn, I tawndan kibang sipsip nawnlou ahih chiang in, cultural shock a om leh zong a theihsiam mahmah ding uh ahi, huchilou in zaw, ompihte mitmei kuaman venglou hial ding hi, a omtute`n adjustment problem a neih ua lehbel kituaklou, generation gap om chihna hiding a, kihepkhiak pah dingdan ahi. Tuabang bokin, unau ki-it ki-ngai tentante zong nupi khong nei zengzung khinpi` a, a teenkhawm neenua ua leh api vom, api kaang, leh api san, te` vai kituak gige lou a, kibalsialnuai na piang thei a, inntuan pahpah a damdawi hoih penpen ahi hi. Ki-it lawte, a hunsawt ah kisiatna huaise zaw omthei mahmah, hiai hi gospel truth ahi, mi tampite tuahkhitsa ahi. Sansi`m hinkhau ah sin ni.