Kithoihna` khenkhat sutzopna:

SUL HONNA (nau pai theilo, numei chiingte): Pasal nei ngal si a, naupai theilou te buaipih mahmah ua lunghihmohna toh anumei hileh, apasal` sungkuante mangbang thei mahmah uhi. Damdawi leh ki-at chihte om nailou ahihteh kum khat sung pasal nei lah naupailoute a sul uh bing chi ua, sul honna buatsaih uhi. Siampu`n phuila sam zenin vok/ak/kel/ui that a, kithoihna neisak zelzel hi. A phuisam la uh hichidan ahi, a numei pen NIANGPI hitaleh:

“Nang Hise vungvung nu, Hise vungvung pa, lei thuappi leh kha thuappi pa`n hong piang teh, nuai a om tualpi leh nuai mang khuapi-ah hong piang teh, keih vompi-ah ong dak teh, Teitevum ah hong suak teh, Mualpi ah hong dak teh, Tuisa lui hong sukzui touzui teh, Niangpi sulgui a gaigui hong hek teh, nupi pasal kual nang hi, mi pasal kual nang na awn in, kei ka pu manmasi pan pupi pasal kaihtuahsa ka hi, chiltui leh sultui gawm ning, a si tui a sa tui gawm ning, vok/ak/ ui/kel si tawh gawm ning, tui khu hon lai kai hen, nupa lam bingsa, pasal lam bingsa, nikot khakot hon bangin,”.

NAU NEIH HAKSA/SUAK THEILOU: Nau suak theiloute ahih dingdan tuan theisamlou ua, kithoihna mah in beinawn leuleu uhi, Siampu in hichi`n phuisamna nei hi:

“Lep zual e, lep zual, sung nupi lepzual, nupi lamtang lep zual, sung nupi lepzual, kei ka pu, manmasi khan a ka pat, nupi kaisuahsa ka hi, pasal kaisuahsa ka hi, nidawng hong hong zo, khadawng hong hong zo, nidawng hon bangin nupi hong pawt in, pasal hong pawt in, zawltholh teitui hong bang in,” .

A numei pen Sungi hitaleh:

“Van nuai simkhua tangpi zing mei tha nu leh mei tha pa kituah, Nu zal na zal pa zal na zal, sul sung khak teh lam sung khak teh, Sungi sung hong khak sak teh, Lam sung hong khak sak teh, Ka sik damin na nawk in, ka sai damin na nawk in, Ka min khau in na peu in, sul sung khak teh lam sung khak teh na kiin in, Na kiin kei leh ka tawl nu muatin muat in, ka tawlpa muatin muat in, ka pu vak a vak hi’ng, ka pa vak a vak hi’ng, Ka pu gui zui hi’ng, ka pa gui zui hi’ng, Ka sut lah omlou ka phellah omlou, Mim pi zu tawh ka lak hi, kha tang tawh ka lak hi, Sikdam a ka lak, taang hai a ka lak, tak , hum ham, hum ham, hum ham”, chizensam hi.

ZAWLGAI: Numei zawlgai a om chiangin kua hi hiam a pasal pen (gaisaktu)? chi kheukhou ua, khenkhat te`n geenthei pahpah lou lawi om uhi. Zawlgai pen in, pasal khat peuhpeuh, ngoh chat a neih lehbel, huai mipa`n a pom ding dan ahi hi. Ngoh zou zenpi a, pasal pen a ut bilbel kei lehbel numeinu hamsiatthuak hisak ua, kithoihna nei uhi. Kithoihna a neih zoh chiang u`n numei pen A PUSA IN PAI ahi chi ua, engbawl, gelgawt leh simmoh in om hi. A ta pen Sawnta chi ua, tagah hisak sawnsawn laidep uhi. Pasal ngoh a ompen in, a ut bilbel kei lehbel tuilipi pang ah ak si suahna nei in phuisam zenin tuililuhna nei uhi. Khenkhat te`n zawng luguh/ mihing luguh aa tui sungin, tua tui dawn hial in kichiam ngap ua, khenkhat leuleu in sahang hapak keih in kichiamna nei uhi. Huchidan a kichiam ngapte bel a diklou penpen in tuahsia tuak ut mahmah ua, khuavang in a dam sawt ding phallou hial ahi chi uhi. Nungkaih vei om ut mahmah ua, kichiam ngaplou, tuililuh ngaplou zong om mahmah dan uhi. Tuililuh leh kichiamna I gente tengteng, thukhenna thupitak hi ua, adiklou nu/pa tung ah tuinuai dawi, ahihke`h sahang` gamtang ut mahmah chi uhi. Thep nel nel thep nel nel, tum pang pang tum pang pang chi`a I chiamteh pen bel a neep mahmah lawi hi a, nupa hizenpi lah gaitheiloute` tungtang, hausa khat in a thukhenna dan lel ahi zaw hi.

NAUPIANG LOPNA: Ak mitetna chi ua naupiang pen kipahpih mahmah uhi, anu pen gamtang pahpah lou hial a, apa pen nit hum sungbeek inn om hi. Innsak innkhang paikhawm siausiau ua, naupiang pen lawm uhi, pathian kiang a kipahna etsakna ahi hi. Pian hun pen naupang a dingin a thupi ni khat ahi, laphuak siamte`n “mimbang piang” chih kammal zangsek uhi. Khenkhat te`n ak in lawm ua, khenkhat te`n ui in lawm uhi, anu pen aksatui haang hawpsak ua, pilhuiapi khat ahi hi, thahatna ding leh nawitui omsakna dingin pangkai mahmah. Naungek piangtung pen khaugui in kual kiimveel ua, phuisam zenin a damtheihna ding ngetsakna nei uhi. Zu in zong lawm ua, himahleh ta nei nailoute dawn phallouh ahi, nit hum nungin apa pen gamkuan thei pan lel hi..

THAHUAL: Kuahiam khat tuahsia, mangsia, kamsia, lunghihmohna, nopsaklouhna, damtheihlouhna, lauhna, sal tanna, sungte sihna etc. nei kisa a om leh, pute (nute pa/paneu/sanggam) kiang ah lut in khamuanna ngetna nei hi. Pute`n ak matsak ua, thahualna neihsak uhi. Mangsia beitheilou neite`n ui zangin thahualna bawl ua, ui in hon uizoupen chi uhi. Phuisam la ah, sungkuante min baan sam kual masa a, “hual ang, hual ang, nuntluak in hual ang, pang dam in hual ang, khuup bih in hual ang, tar kuun in hual ang, nipui dam chen hual ang, buh ba thlovin hual ang, fangza thlovin hual ang”, chi uhi. Mi khat peuhpeuh kuahiam khat suak leh sal in lut lehbel, a neitupa`n thahualna bawl a, suak/sal pen a neitupa innsung mi a pom ahi hi, a beh a phung zuan theinawnlou chihna ahi.

BIL VUHNA: Nau piangtungte kha khat vel a phaak chiang u`nn bilvuhna nei ua, bilvutsiam kineih chiat uhi. Hidan leh sawngbawl da nom lawtel lou hi, bilvutpa/nu bel kipahman piak akilawm.

I pipute`n pialgal leh misikhua omsak ua, misiteng teng misikhua ah leitung khosakdan mah a akhaa uh teng ding chi uhi. Pialgal pen misikhua gal aa om ahi chi ua, kigalmuh phak hileh kilawm hi, tua mun ah mihangsan leh mithupite khosa ding ua, nasep ngailo leh a taaksa ne in niang leh tai in omding chi uhi. Tuaziakin, leitung khosakna ah gamsa mat, gal mat, leh amatsate uh aih hahbawl ngial ua, nunnemna, mihoihnna, diktatna, gentheihna, leh pathian lau`na te`n sihnung hinkhua ah gennei lou suaksak uhi. Mimal hoihna leh kuhkalna te`n leitung hinsung mahmah a lawhtak nei ding, leh nopsakna tuntu hi ding in ngaihsutna nei zaw uhi. Himahleh thagum thatang a nekzonna, gamsa toh, gaal toh, dawi-le-kau toh khosak khawmna ahiziakin, pasal huaitak aa hinkhaw zat mah thupipen in koih uhi. A thil thupi ngaihte uh ziakin taihmakna/chihtakna/kuhkalna/tlawmngaihna te`n kitaitehna namenlou chituh a, damsung hinkhua thupitak leh manphatak a zat dingdan kichiantak in theisak hi. Pialgal paina lampi omsun bel Thangsuah nupa hihding chi ua, pialgal lutna lampi aa tangpang Pawla leh a zi Sahnu in tua mithupite sai tunga tuang leh a sa matte, gal matte uh makai a pang te, lauhchihtakpi in lau ua, en ngamlo in kibu hialthok uhi. Gul-ngaan leh muvanlai thatte ngialhouh, a sihchiang u`n tungleng vasa, valuk leh a dangdang te`n nuailam leh tunglam ah veeng kheukhou maimah uh hihtuak. Midangte himhim, sihna limguam mialtak nuai ah pai ua, Pawla leh Sahnu in soisa nasathei mahmah, sairukhelh tang aktui chiachia in pawla in kaap zialzial a, kum thum hilhial a kaapna pawn damlo chi uhi. Lamzuih, nungak siangthou, naupang lai etc. a sihna tuakte bel aktui leh sasin them toisak ua, pawla leh sahnu lungkim mahmah leuleu uhi. Sihna himhim atun chiangin sahnu ngoh naknak ua, thahding zong a vialvak vak chi uhi. Misikhua lutna lampi ah zong, a laudiakte kibu ua, thazoi ngoihngoih in pai ua, sahnu in kai leng dorhdorh zel chizawmah lai uhi, a pasal` kaap ding deihsak ahi chihna ahi.

Misite a khaa u`n Rihdil tawnin pai a, huai banah mualtung saangtak leh thawvengtak tung ua, Hinglangtlang@ teutevum chi uhi. Huai mualtung nuamtak apat a khosakna munte uh leh a damsung ua a omdan tengteng uh muhtheih in kilang dundun a, lungleng thei ngial hihtuak uhi. Lawm ngaih, khan leh vual, sungkhat laina, leh zi/pasal leh tate ngai in kap zoihzoih zel u`hi. Khitui naptui toh painawn leuleu ua, pak kilawmtak “Hawiloupak” kichi a gam pumpi uapsuak in om demdum maimah a, tua pak lou louin paisuak theilou himhim uhi, hoih lawtel mahmah, mi hip tuntun ahi chi uhi. Tua pak etlawmtak te`n a leitung ngaihna uh beisak hilhel a, misikhua manoh in manmohtak in pai leuleu uhi. Lui khat ah Lunglouhtui siangsitset, limchitak mai luang dimdim a, tua tui a dawn chiang un khanlohna thupitak nei u`a kipahna in pum-dim uhi. Huchi`n a tangtawn mun ding u`a kisehkhawlsa mun ah chiahta uhi. Mumallou sim a batna leuleu bel, misikhua lutna ding a “Zingvanzawl” chihna mun ah pawla leh sahnu a omsak sese uh ahi, kilawptak a misikhua lut ding laijenpi, hiaite nupa in ana soisak sese uh poimoh nawnlou hileh kilawm. Himahleh, thil omthei ahingei ding a, Christiante gindan ah zong, sihkhamuanna neite nangawn in vangam lutna ah minlamna, Jesu thudotna, judgement, gate keeper, hinna laibu etc. a omsak a, thil lamdanglou suak hi. Pipute gindan ah damsung gentheihnate, leh kah leh hagawinate a om nawnlouhna ahi chi ua, lungkhamna pel aa khosakna dan in koih uhi.

Gindan khat leuleu ah pipute`n Khuavang chih khong thangsak ua, khuavang chiamtehna (chivom), khuavang bawl (kaampha), khuavang samsuih (nupa kituak), pathian samsuih chih khong paukam nei sek uhi, ahi, khuavang pailai ahi chih leng kithangsak mahmah (pautemtum lai thakhat a daiduak).

Huchimah bangin, Lasi toh kizawl, pheisam toh kizawl chih zong omsak ua, sa manthei u`n a khosakna uh bubit tuanse hi. Himahleh, muingillouhna nei ua, a khan` uh zong toulou thepthup hi, a pusa un a paisan chiangin genthei mahmah lenliang uhi. I khanglui tangthu leh mi masate khangthu ah zong muhtheih leh chepteh theih om mahmah hi, Thomte Mangsum` tapa upa pen in gamhuai nungak (Lasi) zi in nei a phungching mahmah ziazua uhi, ahia, nau neitheilou a, Mangsum zi Kawmkim in suvaikek nei ahi chih theisuah zenhouh ve`nchin, tuani apat kiangniam manoh ua, khangmang demden zenhouh uhi.

Judaism leh Jews kichite: Juda nam mang khat chih tungtang ah a ngaihtuahna uh paisual sak khenkhat om ua, a pansante uh ensin le:

Phuisam la khenkhat Judate suan ihi chi`a tangkoupih khenkhatte` pansan`,

“Tung ah ja, lei ah ja, Efraim leh Manasia tate in ka mawh sut nading in sasin leh salung toh ka hong bia uhi……….”

“Shalom, Mannasseh, chibai, Mannasseh aw……Mannasseh aw, tui hong pia in……….”

1933 kum in khuathlir khua Rihdil gei ah lou vat ua, natna hoihlou mahmah vei uhi, (malaria hihtuak).

“Kote pu Efraim aw, ka hong thum hi, Kote pu Manasseh aw ka thu hong ngai in, nou Rih tuilipi leh a kiim a paam a dawite tun g ka hong gamtat khelh khaknate uh, kote mohna khempeuh na hong maisak nading in hehpihna ka hong ngen uhi. Ka khua zang buppi tang in kouteng ka hong pai uh hi. Rih tuilipi kiim a singkungte pen naupangte ahihlam theilou in, hibang in ka phuk gawp kha uh hi. Huaihamna leh gitlouha toh hilou in nek leh dawn zonna ding a ka sep uh ahi a, hichi bang a ka sep khelh khakna uh na hong maisak nading un ka hong thum uhi. Tua kipan nung chiangin hih mun panin khanglam ah lou ka hong khou nawn kei ding uh a, a zenzen in …………….., hong maisak lailai nading un ka hong thum uhi”. Tua mun ah Siampu pa`n vok gou a phuisam hi, huaikhit chiang in natna bei chi uhi (Peter Ginkhandou).

ET KIKNA: A kampau zatte uh endik sin le! Manaseh/Mannasssi/Manasia/Efraim chihte, ei kampau ah omlou himhim hi. Pathian thu I gam ah a honglut khitnung a phusam la phuaktawm leh bawltawm ahi chih kichian mahmah hi, ahangbel mawh maisakna chih kizang ngeilou a, Bible a tuang foreign language alaktawm uh ahi hi. Bible thu theimasa khenkhatte`n a dikloupi a, a khenlumlet dimdem uh ahi a, belhchian dawllou a suak. Tulai pau leh christiante biakdan leh thumdan zeptel chiang mahmah uhi.

I Pipute kampau leh phusam late ah MANMASI chi zaw uhi, i phuisam late himhim ah, Pathian kiang a thumna, Bible toh kituak kizanglou himhim hi. Bible thu thei masa leh kamsang khialte nasep ahi hi.

Mihing khat Manmasi kichi taanglai pek in Nungak khat melhoih mahmah om ngei hi, nikhat mansuah kha zenzen uhi. Zong nilouh mah le uh muzoulou ua, a tawp, a tawp in, pipute kansuidan in a manglam u`ah theihsakna mu uhi, dawite lal (dawikungpu) zi ding a pimang anahi uhi. Dawite`n lungkham kei u`n, ka kumpinu thupitak uh ahi, na mangbat chiang u`n amah min suang in thungetna nei zelzel u`n, nan get peuhmah uh hon pia ding hi, chi`n thukhaak uhi. Tua ziakin I phuisam la te ah Manmasi chih kilou loutheilou hi, Manaseh kichi ngei himhim lou hial hi.

Aron Chiangkhun kichi zong zuau thu siangsitset ahi. Azong chiangsel chih ahi. Ganhing chikhat gamlak khong ah (sing-kung, chiang-kang lak ah) chiang-kang dandeuh a om, ganhing saupetpuat ahi zaw hi. Chiangkang mah bang hiven theitumlou in kikhoihkha nolhnolh theisek hi. Paite te khenkhat in R lamsiam lou ua Aron Chiangsel pen, Azong Chiangsel achih uh ahi, chikhem khem ua, awm dek lehlam zawzen, Aron chih kammal kipatsuahna pen Bible thuthei masate phuahtawm ahi chi ni, kikhemna siangthoulou ahi.

Racial: Leitung mihingte khempeuh in kipatna nei ihi a, genetic makeup zong kibanglou hial hi. African te` pianna tuam a, Caucasiante` pianna tuam hi. Mongoloid te si leh sa tuam a, Aryan te leh Dravidian te si leh sa tuam hi. Race khat apat race dang khat suahna ding in kum 1000 tampi ngai hi, ahangbel genetic mutation sawtkuamtak a om masak ngai hi. Mihingte si ah cell simsenglouh om a, huai cell khat sung ah chromosome om zawmah lai hi, huai chromosome te sung ah protein chikhat metochondria (DNA) om a, khaidiat dandeuh in mihingte khanggui leh a mihinna diktak muhtheih hi, huaipen genes (genome) zong kichi hi. Genes pen, mutation a fuhlou leh sisan kituaklou chih omthei hi, ganhing leh mihing kipawl lehpen mihing mah piang duaisanlou hial ding hi. Himahleh, sisan kikhek lou bel hoihlou zel a, tuiching deedaw dandeuh in mihingte gene pool kisegawp ngiingeei thei laizang hi. Tuaziak mah in, I pipute`n, sungkuan khat leh sungkuan khat sungpa`n zi leh pasal kilaktuah nilouh deihlou hial uhi. Khangthum tan zong diklou hi chibilbel ua, telsuina neihoih mahmah uhi. Chihbel piansualna chituam tuam, leh pawihlongna, miphaklouhnate piangsak a, phungzawl vei chih mahtak tam ut diak hi. Jharkhand ah Tribe neuchik khat, kitengtuah nilouh ua, khezung nih keleu nei in piang lemlum uhi. Mihing sisan pen tuiluang dandeuh hi a I genetic pool I khansak zelzel kiphamoh mahmah hi. Geneticist leh genetic engineer te sui dingin sit ni. Leitung a mihingte, mun tuamtuam a piangdok hi hang, civilization om maskana, Huanghaw leh Yangtze luikam, Nile luikam, cauvery luikam, Euphrates leh Tigris luikam, Ganga luikam, mediteranian kuamlak, Caucasieus gam etc. apat race tuamtuam hong piangdok hizaw hi, hitamahleh Africa pa`n Mother Eve khanggui kum 2,00,000 paita apat mihingte kikhahsawn ihi chih British Paleoanthropologist Chris Stringer in gen.

Melputdan: Vaki naak dandeuh a naak kui ngeunguau, saau zeezaw, neite toh ei Zosuante chikhat ihih ding thu lamdang mahmah khat ahi hi. Naak tubouh neite leh nak tawtawrawt neite a suangtu kibang Juda mi hi ngeingeilou hial ding hi. Mit kikhup leh kikhep deuduau neite leh mit kikhuplou te chikhat hingeilou hial uhi, tuabang bok in pianken a tawbou a chiamtehna neite Mongoloid ihi ua, Judate`n huchidan chiamtehna neilou hial uhi, Race tuam vilvel ihi uhi. Taksa pianzia leh gamtat, khawhei ah kibatna neilou leh kikelki lawtel mahmahte ihi, Zeksuum lou leh zeksuum nam kibang ngeingei lou hial hi.

Nek tak zonna: I neek leh taak zonna, khawsak dan leh hinkhua zatdante lei leh van a kikhai hileu leu hi, Tuibuk, buk, zabel neite ihi, Zosuante muhsuah ahi, Israel a Judate muhsuah ahikei hial, zong hihsese lou hial uhi.
Buh ne, bal ne nam ihi a, sangman pibawlte ihi, Judate`n bread ne ua, buh duh mahmah louhial uhi, Zosuante bel buh omlouhna aa hingzoulou dingte ihi thepthup ve. Zu leh sa nete ihi ua, zou buh siang in zu kiluup hi, Judate`n Vine leh Grape zangin wine bawl ua, ei hinkhua toh kilamdang petmah suak hi.

Culture: Khuang leh dak tellou a hinkhaw zangtheiloute ihi, Judate` ngaihsang penpen Pengkul (tawtawrawt) I pipute`n theiphaban louhial uhi, neih zong nei ngei himhimlou uhi, nam tuam ihihna kichian semsem.

Dress: Kicheidan leh puansilh lam ensin le, Judate pen Jesu hun a zong khedap, puansilh, kicheina kiching neite ahi ua, I pipute bel 1800 kiimlak a zong mihing leh gamsa kikar a mite ahon chih uh hilaisam hi, savage tribes chia Pemberton, Alexander Mackenzie, Bethram S Carey, H.N. Tuck, J. Sakespeare, MC Cullouh, Cole, Fowler, Lord Warren Hastings etc. te chiamteh ihilai zenhouh ve. Puansilh leh kicheina mumal deuh I neihna uh sawtlou hial hihtuak maimah.

Misi kisongbawl dan: Kivuidan leh sihnung hinkhua om dingdan gindan pen mihing khempeuh in chiindan nei chiat ua, Kambodia, Thailand lamte`n kivuidan nei ua, Andes mountain a tengte`n zong nei uhi, sihnung a hinkhua om dingdan zong theiban chiat uhi. Gindan neuchik khat leh nih aa kibatna a om khaak ziaklel aa sumkuang chiangkeih pahpah ding hisamlou hi, Africa a om mimawl penpen te`n zong chindan neulou thahah louhail uhi.

Zek leh Tan: Judate melma lianpen pen, vok leh voksa ahi, lah I pipute ngaihsang penpen vok ahi leuleu hi. I pipute`n vok vuul ua, vok in kithoi ua, voksa pen a special mahmah khat hi a, zi neih hun, tanu khaak na in kizang tangpi hi. Sathau dingin vokthau zang ua, meh kanna ding in zang ua, khut leh khe, sam nuh ding in zang uhi, vokthau bing toh mou khakhia ua, sathau bing leh nungak tehkhin hialthok uhi, huchipi a le Judate kihithei lai mahmah ding hiam? Lamdang! Zek-sum loute kihilai set.

Settlement: Inn bawldan ah, Judate suang inn leh lei inn ah teeng ua, puan inn Juda namniam te`n bawl uhi, Zosuante`n gua leh mau, sing, bii leh nahpa (grass) zangin inn lamtangpi uhi. Judate khawsak dan pen permanent settlement hi a, ganchingte (namniamte) nomadic/gypsies dandeuh in puanin kaihparh ah teng in tuankoi koi uhi, ahangbel, Beram chingte (pute) ahihziak u`n, mihausate siahloh ahitangpi uhi, Nepali bawngkhoite dandeuh ahi uhi.

Huangvulh Ganta: Judate bawng, Beram leh Vakhu in kithoi u`a, Jesu hunin zong Jerusalem Temple ah vakhu tampitak khahkhia hi, I pipute bel vok, ui, kel leh ak in kithoise uhi. Kibanglou deuh hiau hi, uisa nete hi hang, tunitan in uisa kinelai lai hi, Judate`n uisa ane uh chih kithei ngeilou hial hi.

Chiindan: Gamsa mat leh sa neek, gal bawl leh gal lu lak chihte Zosuante hihdan ngeina ahi, Gallu laak chihbel mi khempeuh in taanglai in hih chiat ua, himahleh Judate`n sa aih, gal aih chih aneihlam uh kitheilou hial hi, ei a mah hi linlen ahive. Galmatte suak leh sal a kibawl pen khovel pumpi chiindan hitaget zel a, ki-uizuih hilim ihi. Hiai pen uingol gamphut a phut chi hilou hial hi, chi`ndan a I neih ahi.

Kivaihawm dan: Inndongta kinei hi, mou heldan kinei hi, kikhen kimak dan kinei hi, Judate a kizui hithahah louhial hi, ei local product liau liau ahi hi. Judate dan in Abraham in a tapa pen a pute kiang ah zi zongding in sawl hi (a zi sanggampa kiang ah), huaichiindan bel khovel a mi khempuh hihdan ahi a, thulamdang lua hilou hi. Zosuante`n I nu lamte kizong thousam a, tanu te`n mahni nite zui chihte ihi, kitanau dan leh kilainat dan pen I bawltawm chiat uh ahilim hi. Vaite lak ah family (clan/gora) khat sung a kitentuah khaam bikbek ahi, huai pal-sate bel that zialzial uhi, eilak ah zong sisan kinailuate a kiten ding uh kikhaam bikbek hi. Numei in a pasal loupi midang khat luppih leh ZEH PHI kichi a, a pasal in SUUN hialthok hi, sianglou leh sihna tuk a ngaih ahi hi. Zehtang lai a kithoihna palsattu zong ZEH PHI chi ua, kithoihna man (sum se`n teng teng) din kimsak sipsip uhi. Judate hihdan bel tuam mahmah jel.

Kithoina: Kithoihna mun/taudoh tungtang ah Vaite leh Mayante leh Andes Mountains a tengte`n zong hahbawl thei ngial ua, civilization khempeuh in chi`ndan leh ngeina nei uhi, mihing a kithoina (human sacrifice) tanpha bawl pawl om uhi. Scotland a stone hedges pen zong kithoihna mun hidingin ummoh ua, mount Pichu Pichu a mun poimohtak zong sabiakna toh kisai ahi chi uhi. Judate`n kithoihna dan a neih ziak ua mi kibang hipah pah samlou ihi, mihing tengteng in kithoihna dan leh biakpiakna paidan kineih chiat hilim uhi.

Pau leh Haam: Mongloid mi, Tibeto-Burman language zuite ihi u`a, Hebrew pau nengchik zong tellou hial hi. Pau leh haam ah Meiteite toh kinai zawtham ihi, khut, mit, sam, mei, nih, pa etc. common in kizang tel hi, sulkhat kual kihipeuhmah hi, lungsim paikhial, eh! Lungsim zangkhialte phuaktawm, Bible a tuang mun min, khua min, mihing min etc. te toh a kibulhtuah remloupi bulhtuah teitei sawm lawi ki-om tazen.

Piandan: Mongolian race, physical features, skin colour, body hair, facial hair, sam tumdan etc. ah I pipute ngeina dan paih theihlouh tampitak om hi, samtum mi kihi a, mul haulou nam kihi a, khabe mul leh mukmul neimeuhlou nam ihi, botkhiak thamlek neite ihi, Judate bel samsau nepnuap, mul hau thepthuap, dinsang ngekngok, maidungsau peupuau, tal sau zenzon hi uhi. Dark to yellow skin colour neite toh, white lampian skin colour neite ki-unaulou himhim ding uhi. Tan gai trengtrong, taw tual deldol, khutzung tom bengbong, din niam kiukiaute toh Caucasian race te sulkhat kual theilou hial.

Biakna: Sumtawng biakna I pipute`n nei ua Judate`n neilou uhi, sial in Tong ua, sial in sa ai ua, sial in gal ai ua, Judate`n sial a vulhlam uh kithei hilhel louhial. Mouman leh liau leh paan ah sial in kilei ua tunitan in mou man dingin sial hiai zah chih ahilai, himahleh a sum a hisap ahi chihmanthu lel.
Biakbuk: Temple/biakbuk kineilou, Judate`n Temple pen taang a tuan apat nei uhi. Ann huan na dingin suangtum thum in thuk thum (oven) kibawng a, suangtum nih a belsuang a omlam kitheilou hi. Thuk bawldan ah khawvel a mihing khempeuh in, suangthuk mah kizang masa ahi hi, thupi kei hial.

Lampi: I pipute`n lui tamtak kaantan uhi, pem kualkual nam hi hangin Chindwin luinak Hukawng Valley apat tui lian kuamkuam tamtak palsat leh palkai ngai hi, Gunlui dung ah zong lui lian kuamkuam kantan ding tampetmah hi, khaugui zanin pai daudau zel uhi. Huaibel luidam, tuidam, zangkhauhlou chihna ahi a, tuipisan hi seselou hial hi. Phuisam la ah tui kaan thu leh mual leh guamte bang genkha ua, Bible a Tuipisan hiam, Jordan lui hiam, Harmon taang hiam, Olive Taang hiam hi peuhmah zenhouh lou hi. Israel gam apat Chin Hills paina ding ensin le, hot and cold desert tampitak kaantan ding om a, mihing nam simsenglouh teeng ua, gaal haat taktak, thupi taktak om ua, Lui lian taktak vuktui in a tawm, a tui khalthei phialphial, current hat taktak, mual minthang Hindukush mountain kahtouh ngai a huai mun a teengte mi huham mahmah ngen, Tibet gam lut nawn leuleu ngai a, vukgam leh nek ding omlouhna gam ahi, Himalaya mualdung chiahchiah China gamsung ah kikhung zengzung a, luituite tunitan a mihing paikaan vuallouh Tsangpo, Hwangho, Yangtse te om lemlum ua, I pipute`n lenna nei ahih ua lehbel thutuam, mihing melmawl a ding in Judai gam apat Chin Hills tuna ding a om kei himhim. Chin Hills apat khe in paisin mahle uh (khevuak in, numei nauneen tellou in leh innsung van pawlou in), Kabaw Valley chu a tungzou hamham maithei uhi, huaiban zaw, Himalay mual kantan ding mihing melpu a om nawnkei ding. Arunachal Pradesh ah I unau Juda kichite zin ngeilou a duam? lui neuchik le khe a pal ngam di himahmah lou eingal ve, taang saangtak tak tungvum ah pass kichi om zeuhzeuh chauh a, taang khat kaantanna ding in mihing tha beizou hi, taang saang mahmah ngenta asaang-asaang-a-sim kaantan ngai lai di, bang ne a hing di, bang puan a kizem di, numei leh naupang te`n bang chipanlak ding, khovot, vukgam, huihsia, vuahsia sialpi vuahthuak in thuak le uh nikhat le hing zoulou ding uhi????..

Khangthu ah: Zo geneology I etchet chiang in 800 AD lakvel a kipandok ihi hi, Meitei pau kipatna zong 700AD vela hi chih W. Ibohal Singh, Historian minthang khat in gen in gelhkhia hi. Abraham suante mi thupi mahmah, lammang ua, singzungka, suangzum leh sa kii mangin lou khoulou hial ding uhi, mihingte`n I theihsa te kibehlap toutou a, a pilsa, Holy Scripture nasan neisa, thupilouchik a gammang lak a suangbul, sing bul bia a, dawi leh kau tetoh khosakik thahah laizang louhial ding uhi. Ka pu in puan a tumten a, ka pa`n khekor a teng a, ke`n coat suit leh tie ka kineih mah bangin, mihingte khempeuh khantouhlam manoh ihi ua, civilized hinazenpi khulvang apat suakdok kik thahah lou ding hihang.

Neek leh Taak: Ta-ngal meh, Sathu meh, Gotuai meh/thu, Aisa thu, bekan thu Sa ho/ dol ho /ankam ho/ gawtuai thu/ gawtuai ho leh a dang dangte`n Zosuante culinary ah dinmun poimohtak nei ua, I identity uh ahi, Judate`n hiaite neloupi ua.

Tuinuai maang: I pipute`n tui liandeuh peuhmah lauh chihtak in lau ua, tuilipi liandeuh peuhmah biak bawl uhi, tuitaw ah dawi om dingin um uhi. Tuaziak mah ahi, thubuai labuai a om chiang in thukhenna dingin tuililuh chih omsak ua, zuau gen pa pen, zuau gen nu pen tuinuai dawi in kaitum a ne gai kichi hi. Judate`n huchi dan gintakna nei ahih lam uh kitheilou zel.

Bil vuh, bilbah, khii leh taau bun ua hiaidan kicheina pen ei Zosuante ngeina ahi, pasal in bil vut ua bilbah bat uhi, numei te`n khi ok ua, tau bun uhi, a khawnungpi in numei te`n bil vut ua bilbah bat uhi, tulai a kicheidan a suakta, nam dang te hihdan enton uh ahihtuak. Judate`n, bil vut uh adiam kitheilou zel.

Inn vokpi leh gamsa (ngal) kipawl ua, amah bangloupi khat a gial ngitngiat nou kai tuttut hi, species tuam apat piangdok ahih ziakin inn vok toh kilamdang mahmah hi, pau thei lehbel, Ka nu`n gamsa a kipolhpih zenhouh a ahi, kei mohna omlopi, achi ngei di. Tua dan chet ahi, I hihlouhna zenpi a kitahlut teitei pen buaihuai ahi, kipikhelhna poi mahmah khat ahi, tunung hun sawtpi ding, khangsawn a hong om ding, atu leh atate` dinmun ding uh khuallou a duam? chi mahmah ke. Juda converts, not Jews, chih hileltak ua maw….. Manipur gam ah Meiteite Christian suak khenkhat om ua, Meitei hi veve uhi, Zosuante hithahah laizang lou uhi. I hihna, I minam, I ngeina, I pianzia, I sisan, I genetic make up kikheng moh mahmah, ginna ah bel thutuam, ginna ichih chiangin taksa thil hizawlou in, lungsim a suangtuahna ahi zaw hi.

 

Ka tuppen a kidawkta, tawpsakta ni, diksalou I om leh ngaihdam aw: This email address is being protected from spambots. You need JavaScript enabled to view it.