INNSUNG KITHOIHNA: Sumtawng kithoihna ban ah pusa kithoihna pen Paite te kia hilou in Zosuante khempeuh in hihchiat uhi. Vok I khoi mah kizangthei lel a, behsung a Tuulpi kia in hiai kithoihna saithei hi. Innsung ah ludam chidam a pian na`ng, buh leh baal a vualzawlna ngetna dan ahi hi. Pipute leh hon sihsante suunna leh lungdam ngetna ahi, a hon vualzawl ding uh deihna ahi. Kaam sia dau sia, aki-sak chiang u`n, “Ka pusa in hon paih ta hiam aw?” chisek uhi. Nu leh pa, pi leh pute asi khinsa himah le uh a vaang u`n hon ompih a hon vualzawl thei ahi chih gintakna nei uhi, mualsuang lian taktak bawl ua, asungkuante a dingin mun siangthou leh zahna piakna leng ahi hi. Siampu in hichi`n thungetna nei hi, “pusa pisa na tai in, chidam ludam hon pia in, tanu tapa hon pia in, mimpha taangpha hon pia in”.
DAIBAWL: Hiai kithoihna hi khosik damtheiloute a dia damna ngetna ahi, Siampu in a hihding teng a koihkhawm zohchiangin phuisam hi, ak khat khai darhdarh kawm in, ‘Chibai, Ramchawngnu ati maw, Ramchang lal ram vuavua ati maw, Sumsem zawl ah sumsem tang ati maw, paisen zawl ah paisen tang ati maw, Ka rawhcheh a tha hlang tang ati maw?” chi`n a ak khailai theihkhe dawrh kawm in,
“Vawiin chu chunga pathianin, hnuaia pathianin min rawn en roh u aw, chibai, Ramchawngnu in ka hlui khuang lo chhang ang che, Ramchawngpa in ka hlui khuang lo chhang ang che, Paisen in ka hlui khuang lo chhang ang che, Thing bul a mi in ka hlui khuang lo chhang ang che, Lung bul a mi in ka hlui khuang lo chhang ang che”. Damlou pen Thangpu hitaleh, “Thangpu mantu hi lo haw rawh u, a lu, a baan tlan naan ka ti. Hrui a in hlin chuan phelh ula, lungin a delh chuan phok ula, thingin a delh chuan phok ula. Chibai, ka thembu a tha a ti, ka theibial a tha a ti, ka rawhcheh a tha a ti, ka maicham a tha a ti, ka lenglep a tha a ti, ka changsial a tha a ti, ka darbu a tha a ti, ka nghaleng a tha a ti, tui bungpuinu, Thangpu` chawnbaan rawn vuan che, Thangpu` pheiphung ah rawn vuan che, I vuan thei tohlou ang” chi`n, a ak pen phelkhap in a si thehdarh a damlou pen ak si in zuut hi.
Hiai kithoihna pen NUHPI ichihtoh kibang hi a, damlou khosik leh kumzawn natna neite a thoih chiang un hichidan in siampu`n phuisamna nei hi,
“Tung a pathian, nuai a pathian, sasin, salung na saang in, dawite…nang` Manmasi tate tung ah bangmah hihtheih na nei kei, ka sasin, ka salung na saang in”, chi`n damlou pen thoina nei hi.
KHAWBAWL/TUAL BIAKNA: Hiai kithoihna hi KONGPUISIAM chihtoh kibang geih ahi, khuasung pumpi a ding a kithoihna ahi hi. Hun hongpai ding a chidam leh ludam ngetna, kangmei patau apat bitna, gaal leh sa apat bitna, buh leh baal hauhna ding ngetna ahipen. Keltal chilvom khat in Siampu in kithoihna a bawl a, dawite tenna mun teng, sing leh suang, tangsang leh guam, lui leh sih, leh min dangdang samkawm in khuasung a dia damna, phatna, hauhna ngetsak hi. Khenkhat te`n vok/ak toh zong hiai kithoihna bawl uhi. Kongpuisiam ah hichi`n phuisamna nei uhi,
“Hual ang, hual ang, mi thuai chhiah ah tla lovin, mi ralvan ah tla lovin, mi chem pelin hual ang, mi fei pelin hual ang”, “kawng ka siam e, kawngpui ka siam e, mi lu lawi na`n ka siam e, sa lu lawi na`n ka siam e, buh za lawi na`n ka siam e, khua ding e khua ding e (khua min)…., Kawngpui min hon roh u, khual tha nge in nih khual chhia, khual tha kan ni e, mi lu, sa lu, kan rawn hawn e, punte kan ni, punna kan rawn hawn e, parte kan ni, parna kan ron hawn e”, khuasung siansuahna leh hoihna ding deihna in gan sisan in kithoi uhi. Kithoih hunsung in mikhual himhim khuasung ah lutphalouh ahi, zehtang ua, a lut teitei a omleh sial liautheihna ahi. Kithoihna mun a vut (meivu) thehthaang ua, zingsang in va en uhi. Mihing khekhap a omleh misi om ding, gamsa khekhap a omleh sa man ding chih gintakna nei uhi.
TUAL UI AT: Hausa inntual ah siampu in kithoihna bawl a vuahtui leh haichi hoihna ding a thungetna ahi hi. Siampu in tulpi min teng baansam kual hi, “Tuahchiang tu Tonlum siam, Ampum siam, pathian siam in ka louma tung uah buhphung pha hongpia in, vuahtui daitui honpia in, mimza tangza honpia in”, chi`n ui gawl at hi. Huai ui sisan toh aiisaan ua, ui sisan omdan apat vangphat ding leh kamsiat ding theithei uhi. Fanoudawi chihtoh kibang geih ahi, hiai hunin unaute`n hichi`n hih leuleu uhi, “kumin hian, kan thawhhma tluang rawh se, lengrual ram tuanin pheilai khai zang rawh se”, chi uhi.
LOU MUN A KITHOIH: Lou thak ah siampu hiseselou, inntekpa in ak toh kithoihna neithei hi, hiai hi loumun leh louma a vualzawlna ngetna ahipen. Unau Lusei te`n hih uangdiak ua hichi`n phuisam uhi, “Khai, khai! Vawiin chu rawn inkhawm rawh u aw, Mim za tang z aka rawn dil e, nuntluak, pangdam ka rawn dil e, upa leh upa inkhawm ila, tlangval leh tlangval inkawm ila, nula leh nula inkawm ila, naupang leh naupang inkawm ila. Hei buh leh tang z aka ngen ani”, chi`n ak atlum ua a sisan theihdar/taksak uhi.
KHALA: Hiai kithoihna pen damlou gimtakte damsuahna ding lametna ziaka hih ahi, Khalpui le a kichi. Lou tui mun ah hiai kithoihna hih ua, gawlawng in Maimompi thun uhi. Lui ah chiangkang in leidoh ua dawite zuihding chi uhi, inn a tunchiang un damloupen gawlawng in mut ua maimompi khah uhi. Phuisam la pen Lusei te`n neihoih zaw uh abang, “Kongphunpui ah lo thou che, sangau ah lo thou che, ngau tar ah lo thou che, ngau buang ah lo thou che, zawngte tlang ah lo thou che, pautu tlang ah lo thou che, ka mualhoih lo chang ang che”, chi`n kel a naak a vitlum hmiah mai hi. Ei pawl in zong kithoihna la, phuisam la neisam ua hichidan in sam uhi, “Hong sang in Khul a piang, Chiim a piang, Noksem nu Noksem pa, Ngawn hang nu Ngawn hang pa, chidam ludam kong ngetna hi”.
GAMPI KITHOIH: Kau keih, mihai, bum tuakte, kaih veite khong a thoihna uh ahi, ZUNTHIANG le a kichi. Gamlak ah, kin leh buang a vaisai chi ahi hi, kau keihte ngialhouh hihpah tengtung ngai hi. Biakbuk dandeuh bawl ua, tungman nupa lim bawl ua singpaan khusak ua toktol battuak uhi. Aron Chiangsel kichi simbuthut (mauchiang maam) khai ua, a leek ah khau vom leh san khai uhi. Gan kheli, a lung, a tuap, a bil, a ngawng, a muk, a ki leh tuithe, aika, pathian sailum leh ngazu tautung ah koih ua, siampu in “Pathian thubei”, chi`n phusamna nei hi. Gan sisan tautung leh a kimvel ah theh a biakbuk pen puanngou in khuh a khau vom leh san, a tung ah kikawkalh in koih bok hi. Kau keihpa (etsakna in Thangpu hileh): “Thangpu in nek duhgawh taak duhgawh ding bangmah ne lo hi. Lunggulh thei nawnkei ni teh, sun ma-in dai in, zan ma-in dai in, aktalpa khuan ma-in dai in, lungtalpa khuan ma-in dai in”, chi`n phuisamna nei hi.
Unau Lusei te`n, lui min leh taangsaang minting baansam kualmasa in: “Se kong rau ron zui che, vok kong rau ron zui che, Thangpu hnen ah I om thei tohlou ang, a pheiphung ah ron vuan che, a chawnban ah ron vuan che, a sakruang ah ron vuan che, a thlunglu ah ron vuan che, Thangpu hi I man thei tohlou ang”, chi`n a phuisam zoh in gan/ui a gawl-at, Serh danin uisin a koih ua neek-vaal khoih theihlouh dan ahi, biakbuk pen le hihsiat phallouh ahi.
LUI KITHOIH: Naupang gilna, santen, sungkhoh, hatlou leh hileng dalna dia kithoihna hai pen. Bawm khat a gan ua, luigei ah kithoihna gan chiangzum in a dawtlum ahi, kithoihna gan pen Ui, ak, kel, khat peuhpeuh zattheih ahi. Lui ah damlou pen thoi ua, bawmsung ah aserhte koihkhawm in siampu in damlou pen a mut.
Unau Lusei te`n NAUPANG HRI chi ua, a phuisam la uh,
“Kawlkung ah lo thok che, ni zung ron zui che, Thangpu pangti ah I sen thei tohlou ang, ka luikhuang in ka trin che, vaan thimpui ah lou thok che, chum thuah kar ah lo thok che, tumpui kau ah lo tum che, khaam puuk karah lo thok che, saza pa`n a lak tak che, saipui mei ah lo uai che, tumpang pui mei ah lo uai ang che, se kawng rau ron zui che, vok kong rau ron zui che, Thangpu pangti ah lo sen che, Thangpu pangti ah I sen thei tohlu ang, hnai sen I chhuah thei tohlou ang, hnai var I chhuah thei tohlkou ang. Ka hluikhuang in ka trin che e maw, ka khai kawpin ka trin che”,
chi`n siampu pa`n ak/vok at/vit lum a, “Engmah dang an neilou va, unau neih an ron puk ani e, I nupui I fanau hnen ah chhun zaan zawm in tlanpui roh”. Kithoihna sa a nekzoh un siampu in saserhte leinuai ah phuum a suang in delhkip a, “Hei, ka suang lungpui hi a nghin hma louh chuan I chechang thei tohlou ang”, chinawn leuleu hi, mei am, meihol natan leinuai ah phuum ua sikkhaak le phallou uhi.
KONG THOIH: Kongbiang khanglam ah singkhat phut ua,sialsawl chi uhi, kongbiang tung ah zulei bu dandeuh (squerral nest) bawl ua buzial chi uhi. A tunglam ah uilu kamkasa koih ua, ai (ai-eng, ai-san, ai- ladum etc) chikhat koih ua, khuh-hiip-vei leh awmna neite thoihna ahi hi.
BUM-LEHNA: Hiai kithoihna pen I pi leh pute danin a thupi penpen a ngaih ahi, KHANGPUIZAM/DAWISUT zong chi uhi. A ngaihtuahna u`ah damlou a om chiangin, bum hia, inn dawi keih hia, gam dawi keih chi`n paukam nei pahpah ua, kibumna zong tam hiven, bum theihna nam tuamtuam zong nei uhi. Ngalngam dawibuk chih zong omsak ua, Komte` laaksak ahi chi uhi, huaiziakin Komte mi bumsiam chi`n thei uhi. Ai (aigechil le ai chikhat ahi) chituamtuam nei ua, khenkhatte ngialhouh neuchik a nekkhaak ua leh sihtheihna ahi chi uhi. Ai chi tamtak om a huaite lak ah chi li zang tangpi deuh uhi, Khualtawn ai, Sutzou ai, Aithim, Ailaidum, hiaite banah aijaam, Aileilut, Aihliap leh adang dang omlai hi. Siampu ten a zatna ding thei mahmah ua, tur (poison), mi bumna leh bumlehna, damdoi etc. in hahzat ngial uhi. Ui sisan lum vitvit leh ai chitam tuam gawikhawm tui kidawnsak pen damdoi hoih penpen suak mahmah dingdan mah ahi hi. Bumlehna a kithoihna ah ui, ak, vok leh kel azangtangpi ua, gante a khe ua khihbetsa in kawlzaalpi ah kuah uhi, ui kuahpa masa in, voknou kuahpa`n zui a, kel kuahpa`n zui a, akpa san kuahpa`n a nung uah zui in sing kiphutte kiimveel in paikualkual uhi. Huci`n siampu in phuisam kawmkawm in innkong ah akpa a paih-khe dawrh a, insaklam ah vok a paihkhe top a, innkhanglam ah kel a paihkhe nawn leuleu a, a nawnung pen in ui a paih-khe nolh hi.
Gante a gawh zawh chiang un ui si (hot blood) damlou pen a dawnsak ua, a dawnna nou damlou pa`n a sattam a, damlou pen tung ah khaau saupi a koih ua huai khaau pen inkonglam ah a kaipawt uhi, tuazoh in damlou luttung ah sahang hapak leh ai chi li a koihkhawm ua, ai chi li gawikhawm tui tamlou a dawnsak uhi. Innkonglam ah sing kiphut khat lakhia in milem dandeuh damlou a dawitu/bumtu lem a bawl ua, huai milem leh ui zunbu mutpuaksa koihkhawm in huai singphutna ah asupuak duup ua, thau gin kawm zawmah uhi, apuak fuh kei leh hihthaknawn ngai zawmah hi. Laam kawmkawm in siampu in dawite leh a bumtupa bumna a suutkiik dan leh, huai bumna gu alutnawn ding venna in unaute`n hichi`n phuisam la nei uh,
“Amah tak phun va rit e, ka zai in mual tin a hrut chiai e, chungtiang e, ki hei en leh, turnipui mawt tang a ti, thangvanpui mawt tang a ti, chhawrthlapui mawt tang a ti. Hnuaitiang e, ki hei en leh, en leh aw, ngulraw zing chil chel hnuai ah, mi tin ka sai thlu, sa tin Ka sai thlu, khumphel khat ah zalh ing e, pasalpa, a thu thouvai in bawm chiai e, ka ral a mi kha aw, in that ni nge in chhiat ni? In that ni nawn ing e, in thih lam dar e maw, in fam ni? I nu`n ka nu a ngam ngainawh, I pa`n ka pa a ngawm ngainawh, nang in kei mi ngam ngainawh”, hiai hi ui zunbu a suk kawm/puak dektak lai ua a sam uh ahi.
Paite khanglui dan in bumlehna sawngbawl dan chituam tuam omsak ua, khenkhat in hichi`n hih uhi, damlou pen a kawng ah linggui (khau) in khih ua lupna apat kaikhia uhi. Siampu in,
“Bangsak a om mi kihem un, bangkhang a om mi kihem un, kongsak a om mi kihem un, ongkhang a om mi kihem un, kuamah zahtak hikeng, kuamah kihta hiking. Ni awi a vaak hing, kha awi a vaak hing. Keimah Ngalngam tapa hing”, chikawm in uital a sakhaupi ah kuah hi. Uital pen a muk vaimimkung petsak a hengaak in, a khe teng heentom a, a taw vaimimbul in hu hi, ek teh zenzen leh buaihuai ding ahihziak in. A phuisam kawm in damloupa kiimveel in laam a, “ Vanlai pan khuang a tum e, …eeee, ee, ka nung ah khimkhua ka zingsak, ka mai ah taikhua ka vaal sak. Tuipi luanglai ka tan a, aaa, a lai ah e, eee, tem zungsan ka tawi eee, tak ah luang in ka chihleh a luang a, aaa, vei ah luang in ka chihleh a luang. Vanlai tapa pa ngam aa kamkei ka tungnung e, eee. Ka sep semlah keng ka bawl bawl lah keng, ni awi aa vaak hi`ng, kha awi a vaak hi`ng, ka khua awi a vaak hi`ng, ka pu ka pa aa kipan dawi sagui hi`ng”, chi tuaituai kawm in a uital kuah innkaa hon denna thraui hi. Damlou pen ui sisan leh aitui dawnsak a, ui sisan a tall eh a pum a khut ah taat hi, a ui zunbu a puak hoih leh, “kik tapa Zauhang tapa ka bawl e”, chinawn leuleu a, khenkhat te`n hichidan in phuisam uhi,
“Nang ka singpi nu ka singpipa, sing bunga hong piang ai bunga hong piang hi teh, ka lung thulpi hong pal teh, ka lung lenpi hong pal teh, a tuisa dung hong zui teh, ka tui vaidung hong zui teh, lamlei minthangah hong awk teh, zu chin in hong sut hong sut zo kei, va chin in hongsut hong sut zou kei, zu chin sut lah va chin sut lah ke’n sut ing, sut zou ing, nangmah taltuan masa ka singpi nu`n, ka singpi pa`n sut in, kei ka pu gui hi’ng ka pa gui hi’ng”.
Dawi thoihna peuhmah ah bumlehna omsak sek ua, aknou, voknou toh kithoih in, ka meitual hong saang aw, ka pikaang tan, ka pivom tan, ka luikhuang tan, ka meitual tan, chih khong in sam sek uhi. A phuisam la uh, “ Tuni`n bum sutna ka voknou dawng ka aknou dawng, ka khimpi zu, ka khuaipi zu toh hong kuan ing e, ka meitual hong sang aw, ka luikhuang hong sang aw, ka pikang hong sang aw, ka pivom hong sang aw, chiangsawn a suak in sa hong sang in. Lennuaipa a suak in sa hong sang in,. Thuamvum a suak in sa hong sang in. Innbuk a suak in sa hong sang in. Ka sialtal hong sang in, ka uital hong sang in. Ka khimpi zu`n hong tan ing, ka khuaipi zu`n hong tan ing. Ka aipi-zungsan toh hong khim ing, ka khimpi toh hong khim ing. Vaanlai a pa, Vaanlai a nu, sangsing dawn ah hong leng tateh, teute vum ah hong leeng ta teh, tui suklua`n hong zui ta teh, tui toulua`n hong zui ta teh, sing lumlet suang lumlet in hong pai ta teh, khuaimu in hong leeng tateh, paangpan in hong kai tateh, khuangpirit in hong haam tateh. Diip a pang pa sut ning, taai a pang pa sut ning, khutguh teep sut ning, kheguh teep sut ning, suun a tum pa sut ning, zaan a tum pa sut ning. Pheizaang a luai pa sut ning, banzaang a luai pa sut ning, ka sut sutlah ke`ng, ka bawl bawllah ke`ng”, chi`n damloupa mai ah ui, ak, vok etc luute tah zouhzouh kawm in dok kik zouhzouh kawm a, HUMHAM, HUM HAM, HUM HAM chihkhum nilouh hi. Bumlehna ahih chiang un, ai hahzat mahmah ua, aitui dawnsak ua, bum sutna dan in phuisam uhi,
“Ai tawi ka lehna,, ka lehna, ai tawi ka lehna, Kawlnu aitawi ka lehna, ka lehna aitawi ka lehna. Thahdou aitawi ka lehna ka lehna aitawi ka lehna. Lusuang aitawi ka lehna ka lehna aitawi ka lehna. Ngalngam aitawi ka lehna ka lehna aitawi ka lehna. Bum leeng kalhna, tui sukluang a bawlpa sut ning, tui tou luang a bawlpa sut ning,, suunkim a bawlpa sut ning, zaankim a bawlpa sut ning, khutguh teep sut ning, kheguh teep sut ning, chipei a bawlpa sut ning, zagam a bawlpa sut ning. Ka sut sutlah lou hi`ng, ka bawl bawllah lou hi`ng thaloh bang henling khei bang heen, PHUUU”, chihkhum phung mawk hi. Huai tuh bumlehna zohna ahi.
Related Articles: