Siamtu` hon siamdan pen I khek theihlouh tampitak om a, a langtang a muhtheih lakah, I mel leh puam, dung leh vai, vun vom leh vun ngou, chihte khong ahi. Maitaina, vualnopna, ngaihhuaina, nunnemna, leh khanvual kholhtheihna anei tam deuh om ua, huchidan te`n leitung hinkhua nuamsa ua, midangte a dingin vualzawlna hi uhi. Khenkhat leuleu, hehphut phut, maitai lou, nelhuai lou, nuihmai lou, leh lungsim sia, lungsim guk nei ret rut, midangte omdan teng soisel sel, thil hoihsak le neilou, pahtak le neilou, kipahpih leng neisam lou, huchidante kha negativism kichi a, kikholhpih haksa diak uhi. Hiai qualities tengteng mihingte pianchil apat kisiam hitangpi a, innsung  kivaipuakna leh environment in 10% khong lel mohpawpha hi. Negative qualities ineihte kimuhsuahna a om kei lehbel, sihtanpha in chia muanhuaitak a I sihpih ding himaimah , a theisuah te`n bel kibawlpha thei zelzel uhi. Hoihlouhna I neih te suppress dingdan kizir takpi ngai dan ahi hi.

Naupang a piangtungte ensin le, khenkhatte ngaihhuai ua, khenkhatte pilmel ua, khenkhatte kahneh ua, khenkhatte nuaksiam ua, khenkhatte nuihmai uhi, nu leh pa, u leh naute hilh leh chiil hilou hial uhi. Himahleh, pianken pilna leh theihna kibehlap toutou a, a vot leh a sa, a lauhuai leh lauhuai lou, a ngaihhuai leh ngaihhuai lou, chihte khentel theihna hon nei pah tingteng ua, I lamkaih dan dan a hong khangtou ding uh isak leh, hideksuai lou hial! a deihlouh uh piakzoh ding hilou, a duhlouh uh piakzoh ding hilou, a utlouh uh hihsak zoh ding hilou hial dan ahi, individuality leh personality chihdan khat hon neidok pah tingteng uhi. Puan-ak, khekor, khedap etc. deihtuam hon nei ua, huai in a mihinzia ding uh ensak pah hi. I tate ngoihngoih zong, a mel leh puam uh a tuam dungjui in, hinna tuam, khovel tuam, leh hihna tuam nei, ana hi maimah ua, laisim utna pianpih mahmah louhial khong hong hi maimah uhi. Chituh a phatuam lou, thumpih a phatuam lou, gengen a phatuam mahmah lou chih khong ituah ding ua kisiam ana hi tazen! lamdang.

Sikul leh kul lou ah I kithuahna paidan tangpi leh I kidot sek a tamzaw bel, na aim in life bang ahia? Chih ahi tangpi. Aim nei a khovel a piangdok kihilou napi, tupna omlou bel mualsuah ding omlou mah suak a, I hinkhua huih mut dandan a zatmang theih hizenhouh hi. Hinkhua lohching ichihte lohching kisa khol hiallou ua, hih khaklouh hau kisa mahmah theizel ua, lohching lou isakte zong hihfuh kisa mahmah om thei thepthup uhi, kisik vulvul khollou uh I chihna. Lohchinna ichih pen subjective mahmah suak dan ahi hi. Albert Einstein pen, scientist minthang mahmah hi a, khovel a mihingte lak ah khuak neihoih leh zangpangkai penpen lawi hia chiamteh ahi, himahleh a khuak` thilhihtheihna (brain power) 20% leng zangphalou ahi chi uh. Huai in a etsak bel, khuakzat dingdan kisin takpi ngai ahi chih hon theisak a, tupna mumal neih ding ahihdan kilang pha ngial hi. Taksa hatlou tata, taksa neu tringtreng, lah khuak pilna (hoih) nei hi ut zawmah ua, khuak kiva taktak paai trengtrang ut mahmah uhi. Tuaziaktak ahi, khovel a mi pil leh minthangte, Napoleon Bonaparte, Akbar, Charlie Chaplin etc. mipangngaite tung a lengte hi zawdaih uhi. Mihing peuhmah in hihtheihna lam khat beek kipianpih chiat a, huai thilhihtheihna pen I hatna, I thupina kiselgu, thilthawnpiak leh I hinsan ahi, muhsuah a zatpangkai` sawm dingdan mah ahi hi.

Aim in life ichih sangin, purpose in life chih kilawm zaw (appropriate) hi, ahangbel purpose nei a siam ihi ua, purpose nei a hinkhua zang ding a pilna lungtang piak ihih ua, purpose nei a leitung paisan dingte ihi. Aim khat nei tentan le, huaipen ka mualsuah ngeingei ding kichithei thahah louhial hi. Naupang te`n a aim in life uh a gen chiang un confident tak in gen lala ua, kum khat sung zong daih lou hial hi, thil dang khat hong lunggulh ua, thil dang a tuam hon musuah ua, a ngaihtuahna uh kikheng thithe hi. Aim in life kichih sak phongphong sangin, na lunglutna lam bang ahia, koilam na ngaisang a, koilam hoih na sa a, bang sem a nekzon na ut a, huai te`n purpose a nei hia, chihte I zonsuah sak dingdan ahi zaw hi. Fresher`s meet, leh Birthday lopna nasan ah, mipi mai ah, my aim in life is……. Chih khawng ikigen sak ua, zahtakhuai leh nuihzathuai a suak, bangziakin, naupang` khawvel mudekpan pan in a hinkhua ding muphaban mahmah nailou hial hi, khovel ahong pal zek phot keileh bangchidan a khentel theihna nei mahmah zenhouh ding hiam? I neulai in, mi hat te I ngaisang a, I tleirol lai in kimawl siamte leh lasa siamte, huchi`n awlawl in nekzonna lam ah kilut a, nekzawna nuam dawmdeuh, thugum suah lou leh nisanuai, vuahzunuai, thosi thovai thuaklou a nekzonna ding kimaisuan pan niang niang hizaw hi. Tulai naupang te`n bel thil khempeuh musau mahmah ua, deihtelna leh tempaina hon nei pah lian uhi, a purpose thei leh nei hitangpi uhi. Huaiziakin, michih in I purpose thei in, purpose nei in I hinkhua chiat zang le, minute khat, dakkar khat, ni khat, kum khat, kum sawm, I damsung zat dingdan hong piang
mahmah ding hi. Purpose tuamtuam om thei te ensin le:

1. Numei a tamzawte purpose lian penpen bel, pasal hoihtak neih ding, innsung a manphatak a hinkhua zat ding, ta leh tute a ding a aphatuam thei penpen a siamna leh pilna zat ding, chih ahi zaw daih.
2. Numei khenkhat te`n bel sep leh bawl neih ding, family support ding, nek leh tak maisuah tu hih ding chih ahi, a purpose uh tuam vilvel, himahleh innsung kep bel a mohpuakna uh hi veve.
3. Khenkhatte leuleu, social service, saptuam service, leh community service a lunglut.
4. Pasalte purpose lianpen pen bel, innsung pa hih ding, nek leh tak zongtu hih ding, leh zi leh tate kingakna tham a panlak ding, innsung piching kemtu hih ding, chih ahi, a tamzawte aa ahi.
5. Pasal khenkhat bel, sep sang a seplouh, loh sang a lohlouh, innngaktu a pan`.
6. Khenkhat leuleu, zi leh ta poimoh salou, mahni a tol te`n, midangte a dia kipumpiak.
7. Minthanna delh a siamna tuam delh zong ki awm a, tupguhna toh mahni talent musuah te`n huai tupna mualsuah thei takpi uhi.
8. Entrepreneur hih ding, midangte kingakna, leh nekzonna piak ding chih zong khenkhatte purpose ahi, etsakna dingin ei sung ah Pu Khen P Tombing, V. Siamnunlian, Dr. Dallian Haokip, Pu Haukhen, etc.
9. Khenkhatte bel YPA mahmah, hun zangbei gige peih, philanthropic lungput pianpih ki-om.
10. Pathian gam leh a thupina puangzaak ding a purpose nei zong kitam semsem.
11. Tha leh sum leh pai thoh a public purpose sem, saptaum vaisai zong ki-om nawn leuleu.
12. Gam leh nam veitakpi a nei, vision zong nei, politics lunglut tuntun zong ki-om takpi hi.
13. Vaihawmna lunggulh a, mahni liangzang a tuansak tuppipen a nei zong kitam mahmah.
14. Om maimai, tup le nei zolou, nei peihlou, lung hin a hing dia purpose nei zong ki-om.
15. Muti tasking siam, seplah neilou, bawllah neilou, hinkhua tawichik sung a naa tampi semkhe`zou zong ki-om takpi hi, hiaite kha mihampha penpente ahi uhi, lungkimna hau penpen te.

Nidanglai in Aristotle, Plato, Socrates, ichite om ngei ua, academicians ichi, Vaite lak ah Gurukul chih ana om hi, hiai te`n naupangte chiil takpi in chiil ua, a hihtheihna lam uh muhsuahsak ua, mipiching leh milohching bawlkhia/sekkhia uhi. Purpose nei a hinkhaw zat dingdan kisin takpi poimoh a, khosakna ding leltak hilou in, mihinpihte tung a phattuamna nengchik bek neih kisam. Naupangte purpose (not an aim in life) ding a hoih penpen bel, ka nu/pa doctor/teacher/govt. employee/nektawm zong/dorkai/bawmpua/khedap bawl/kuva zuak/loukhou/singpi zuak/bazar kai/driver/sa zuak etc. ahia, laisiamlou leh siamsanglou hinapi in hiaitan a hon tut leh ka pa beek ka khup ding, ka nu beek ka khup ding, ka nu leh pa neih leh lam ka phung vuh ding, chih chiang bek purpose in nei tek le. Huaidan hileh, I nam I gam changkang loutheilou ding hi, ut in ut kei le. A mite a changkang chiang ua gam changkang pan ahi, ne bei tu hilou a aphungvuh tu hihzawk ding I purpose uh hisak tek le, maw.