Itdan kibang sapsap momnoute lak ah kuan, “Daddy, happy fathers’ day!” hon chi masapen diam? chih ka ngaihtuah lai in hiai thu ka kiang hong tung hi:

Ka tapa in preparatory school ah akilawm hun tan laisim a zoh in sikul lian kaithei vual hong hita hi. Midangte hihbang in koule ngetna laidala gelhlut tuak teng gelhdim mitmet in ngetna ka thehlut sam uhi. Sawt kihal louin Principal leh a khawnbawl madamte’n houlungkum diin sapna awnem in hon kou uhi. Thuvantang hon dot khit un ka tapa sam uh a, amin nu min, pa min, kipatna mun leh mual, ABC, one-two-three, ‘A’ for apple khawng dong uhi. “Hindi film na en ngei hia?” “En ngei mahke!” “Hindi laa khat hon sa ve leh” “Awle” chia a gawl thiansiang masa zet in huailai a kithang Border Film laa “Sade se aate hai” chih ngaih huntawktakin hon awi ngelhngelh hi.
Delhi Khopi ka tuntung, August khatawp, Sangkhat za kua, sawmkua leh li kum khawng in minautang diin melmuh tongsan (Television) leiziau zoh vual hilou hi. A neisate’ neihsa en in ka zanpawt sek uh. Ken le chikchiang ka nei zou sam mahdiam maw! Aneute leh remote controlna omlou te hitangpi hi. Channel kheng di chianga hekpuak kokkok ngai. A hekna bilbolawk buangnai gam fehfoha kibawl hiven, khaangkek pahpah. Chengnga ngut mansak uh ahihtoh leilei zoh vual le hilou a, eimi TV neite’n taiteh kungtom (pliers) TV tunna bul ah koih khial lou uhi.
Hun leh ni te mualliam zela, lawm Nialkhanson leh Kamkhansing thuphatna toh TV neute khat awl a dittouh keuhkeuh diin ka batlak thei ta, nuam e! Huainunglam in, Onida colour television twenty one inches ngat ka tuahlut zou sam ta. Huai TV bangchichi a koilamlam kidenna ahia chih ka limsak louhna khangkhatlian val bang pailiam ta. Nikum, kumtawp lam in New Delhi, Masjid Moth veng a om sanggam John leh Annie in nitak-ann ne diin hon chial uh hiv’aw… a “Neighbors’ envy – Owners’ pride” uh ka muh in ka kiguih hial hi. Keia ahihlai ngaih lungzuan sial in thumvei mahmah ka zut hianhian hi, “Na hoihzel na maw?” chiin.
Principal: Son, what is your favourite cartoon film? My Son: “Popeye the Sailorman.” Kou pata in zaw Popeye the Sailorman munuam tak ka hi du, a suah chikchik chiang in ka enmaih vang mahmah uh. Ka tapa in Popey, Olive leh Bruno toh a tehpih eimi khenkhat bang kilawmkhawm thei viau vial hi. Ken chu, Popeye etnophuai sa mahleng, William Hanna leh Joseph Barber in Metro-Goldwyn-Mayer Studios te dia a bawl uh Tom & Jerry banga nop ka sak om nai tadih lou hi. Tuni chiang dong ka en veu lai. Atek-akhang in kimunuam chiat le bang veh aw!
Tom zohngeu leh Jerry sazu inn khat ah khosa khawm mahle uh, a khawlkhawm chiang un ui leh kel bang uhi. A kimuh louh zek chiang un lah kizonbawl in khutkawi peuh in kisam uh e! Kikhen thei hilou lah kithutuak thei mahmah lou, eilawi mah bang! Khovel paidan in zohngeu in sazu duh mahmah hi. Tom in bel Jerry nek-et in en ngei vetlou hi. A thahatna leh tupguhna zaw Jerry soisak leh zahlaksak tupna’n ahi a zat. Tom in Jerry mat a gelgawt diin iplah mahleh Jerry pilkhel leh vanphatna vang in lohsam deuh gige thamlou in leh thuak ek zawsop sek! Jerry neu fifa mahleh, a zaitha hat petmah a, van lianpipi dom in zangpoi zou mawk hi. Asa’ lian zawtham Tom nehsoh mahmah!

Verther Jerry a otluatzen chian bel aman le thuak tei ek nuam hi. Etsakna ding in The Million Dollar Cat ah, Jerry in Tom hauhsakna thuguk khat: Tom in ganhing khatpeuh a khelbawl ngeingei leh inngam di ahi chih suikhia. Tom dia huathuai thei tawp dia totbawl leh gamtat siam lawse zel. Kidek zou zouzai lou Tom in Jerry soisa ek! Khat veivei lah anih un thuak tuaktuak uh. ‘Filet Meow’ ah Tom in ‘gold fish’ etlawmtak khat nek a tup tinten ziak in vaulau diin Jerry in ‘shark’ va sam zenhouh hiven… aman le a lauh luatluat a! Khat vei taget, naudontu khat in a naudon limsak lou in vialvak sak hi. Tom leh Jerry in phatuamngaihna suah ua, naungek in nat-le-sat, sih-le-man a tuah di veng in pangkhawm thepthup uhi.

Tom & Jerry in lauh riau khat: bulldog , a sakmin Spike, episode khenkhat a ‘Killer/Butch’ le kichi nei uhi. Amah zaw melsia, sinsia, thahat mahmah, a hehchia’ Tom & Jerry balsialnuaia khen-op pahpah pa ahi. Lawmta te a kikhelbawl chiang un Tom in Jerry mattum in delh tonton sek hi. Spike ihmu him lai va palbuai hiam, Spike in bukta bawl tha-it lai a suksiatsak chiang leh Spike tapa ‘Tyke’ a sukbuai chiang bang un, Jerry in pilkhel tak in Spike belhbawl a, sazu thuaksik teng Zohngeu in thuak daih zel hi. Tom in a hindan a kikhek kei leh Spike thangpaihna a tung a tu dia vauna tuak hi. Jerry in huai thei khinkhian hiven, Spike sukbuai theih di dan lampi dapkual khop. Spike in amah ngoh ngeingei di ahi chih thei, Tom in Jerry khouhtheih-khouhmoh in khou. A huchihna lam ah Tom liam khanak. Jerry in a thiltup pichin zawmah, i Tom uh kha… Spike khutthak kihta in a taihang nasa thei zorzor eive aw!

Tom & Jerry soisel nuamte panna: A gamtat uh huham deuh hiveh aw…Jerry in Tom phelkhap phok; Tom’ gawlgek tukverh leh kongkhak khawng tepsak choih; Tom in galvan, heipi, heita, thau, sikthang, puakthei leh sihnagu zang; Jerry in Tom refrigerator sung ah peklut thruaih; kidoumite phaw a Tom zepthop; elektik leh Tom mei zopsak; Tom khezung kikal teng a nawtkuangbil siat dim a halkuang zuapzuap; Bazar bomb denkhum ek, chih leh singkung lianpi/elektik khuam kiphuk khum chih khawng ahi lawmtate kisoisakna.

Awle. Fathers’ Day Eve a ka ngaihnat ‘series of theatrical animated cartoon film’ et a bei toh kiton in FM radio ka tohhing hi. Unaupa Mithun Chakraborty panna Disco Dancer film a laa khat, “Yaad aa raha hai” chih hon khah riahriah uhi. A thupaidan kibang kei mah leh; ahi, Zennu sikul kai dia kuan khia, ken ka pu te hulliap pan a donliam chiaichiai, amah thum vei hong kinung hei sesalh lai khawng ka geldok ta ve! “I kihuchih lai khawng a nop lai tak ana hi zaw daih aka…” chiin ka tawnzau suahkhia in Radio ka seppai phei tep ta ngal a.