London Summer Olympics 2012 Khawmpilian a dangkapi duk-khia, Nu Chungneijang Mangte leh sapngou lianu ki-ngam huntawkte a kisukpuak bekbek dek chiang un, unaunu’ meh duhzawng voksa ka zial ek sek hi.  Huan, June kha a EURO 2012 futbol kimawlna (Poland leh Ukraine gam in a zintun) sung teng Germany Team bangtanmah ka tunpih louh ding lauhthawng man in bawng guh leh satak satpolh uimin, a khenchiang a aksa nganhuan.  Satuihang hawp, ahaa bak in sa guhbawk kheuh miatmiat lel, nuam e!
 
Nikhat zingthou phet ha nawt dia kisa kimlai, limlang ah ka kien malam hi.  Hatak teng a panmun chiat uah gin-om takin dingkip mahleuh, halem pentak zehphi in pang hi.  Ka gintakna leh upmohna teng: pohdoh sung, lupna nuai, puanthuah kawmte dapkual ing e, mu zou lou.  ‘Mis-call theih himai leh aw…’ ka chi vungvung.  Ha khat lel himahleh, kamsunglam a hani toh kibatkip thei dia ka vingviang a kibawl hiven, nawmvalh khak vual hilou hi.  Houh, ka ihmut kala  ana vakmang thei ahi a hiata?  Sum tamtham sim beia ka bawlsak hiven, pammaih tak hiveh e!
 
Halem mangsak chiatchiat diin le kei mansuah dan leh khangthum lian mualliamsaa ka nini’ tanu Nemkim mansuah dan kidang hi.  Zing daitui kai nuai ah Singngat nusia’n Lamka zuan bus sung ah tuang hi v’aw.  Huihsiang dong kawm a, singchih-palchih leh tang kitawite don kimvel kawm hiven, chim  manlou in Lamka tungsuk ziau. Hong kilehkik lam in bel tuang fuh lou hi.  Gari sung leh a tung teng mihing in luahdim, a kawngkhak leh anung a leilawnte ah lung bangmai in belh khipkhep uhi. Gimnam tuamtuam: Kho-ul, zakkha, mense hiing, veih uihkhak, zukhing, laizial, khaini, kuva-zarda, tuibuk, vuikhu, petrol leh motor lawngkhu teng pi’n a sungnimna behlap hi.
 
Khaile!  A minthang Zezaw tou hong tung ta ngeimai uh.  Huailai in Zezaw tou lamtouhdan tou diak hi.  Lamsiat toh lamsak-lamkhang ah awn doidoi!  Taikai zou mahmah lou sim hong nungtolh dek chiang bang in, numei-naupang teng, “Breaf fail hia?” chia men dia kigalgingsa ngen hi uhi.  Gari khamsia U Kim kidek zou nawn lou chu uak lualua ta.  Khaih! halem a phuhkhia foh voi!  Lamlian a phei dawm deuhna  mun ah gari khamkhawl ua, pasal kumching leh dan zoukim teng in khuktan a sah leivui lak leh luaklak chiangkang in vathai uhi.  Himahleh halem tawi kawm a nuihmai pua in hong kik lou uhi.
 
Ken halem bangchi sukmang ka mahtak diam maw?  Bangtenghileh, mu zou nawn tuan lou di bang bawlsak thak hoihzaw venteh.  Dohkan tung ah laipuan dal khat zalh, a laizang tak ah pathaap phah in laikung toh dan nih ka suah phel phok hi. Veilam dan sung ah leipah tuak thilte banvolh in taklam dan sung ah bel leipah tengtung louh a le pha thei ding te ka gelh dim hi.
 
Eh! Ana khawl tadih un.  Annek kuan a halem tolkhiak di ka mangngilh lamtak ka theikhia.  Ankuang sung ah hong tawmha bauh vele!  Amah omna dia kilawm ka kamsung a aomlai in bel etlawm in phaze ngial hiven, ankuang sung hial khawnga hong gamtat hial leh zaw sung gialsak zou mawk hi.  Ka halem zaw, saguh seuhsa kholna kuangdai sung a koih a, ninbawm a paihkhawm kha ka hihtuak hi.  Huai ni zingthoh khangma kha ka hiam aw, ahihkeileh ninluaknu zingthoh bel val, ana kiluak siang khin hiau. Bye bye, deihthoh uihalem.
 
Numei samsau pum pahtak khat ka hi. “Kholum toh ning kitel huai, samsau niapnuap kizenhuai kei. A himhim in samsau kilawmpih chi ka hihlouhpi” chite’n a sam uh hon bois-kat chiang un, a kizen tuam ua, a kilawm kholoh tuanna uh gen di ka thei tuan talouzen!  A hia, numei in a besam hon puah a, sampulhte ziallom toptop in thukkhuk ah hon hal taktak mai zaw aw, sagoupa ninnok hal gim lamlam nam vengvung zou hial hi. Ahi, luvun a sam a pou lai in etlawm thamlou in nisa leh natna khenkhat kipan hon humbit thei hi.  Himahleh, tui dawnna nou sung, belawi bai lak, sameh a pasikhawm kawm leh anbeu a samzang kizankang ponpon khawng in pahtak loh lou hi.
 
Huchibangmah in, anne khin kuva hai diin kuan taleng.  Zennu bang a kivontawi lianu khat in, “Oi! U Lian na vang ngei e, manglam kia a muhphak in na om tel lawmlawm a, hong hoh ve, ka gen ut khat om eive,” chiin maitai sihsiah in hon houpih taleh.  Aha mai ah  maiteh neng belh dedok taleh - lehlam ngatsan daih mai bang uthuai diin ka gingta hi. Huan gil a kial chiang in buh hoihtak a kihuan, thukpang a heimin toh mehbai leh antuimawl mahmah  duhhuai.  ‘Buhsih lou zaw’ chi tentun te hi hang.  Himahleh, hakal leh khekol taw a anneng belh leh tuithawl sung a anneng-mehneng kilam luailuai khawng in mit-hip himhim lou.
 
Simtu it, i tuallen nopna; i khosak-gamtatna mun-leh-mual te velpha thak zelzel ni maw.
 
                                                               *****