“Don’t let the fear of the time it will take to accomplish something’ stand in the way of doing it.  The time will pass anyway; we might just as well put that passing time to the best possible use.”  - Earl Nightingale

Nasep ‘I thadah aktuam siah’chiang tata’n annek leh ihmut him lou nuam mahmah.  Annek himna i chih zenmah bang le, hihcheuh siam lou; ahun-hai thei lou a khiat lut khutkhut t’a diin, ann nek ginatlouhna lehsuah zosop.  Tawlluat demdum chiang’ luppah henhan lunggulh mahle, ak ihmu kibang guguih khanak.  Gel tuak lou ngawn selung hon gelsak sek.  ‘Thadah lou, zaitha tawl loua’ sep kinken di mah ana hitah.

Ka nau numei naupang pen uh a pian in tunnu hong hat baih di deihsakna leh nunkhum kiningching di ngimna in aksa ‘Nganhuan’ sak sek uh: Gohsa ak pen tuisa ah diah; amul bot giau; a muk, khechin leh kengbom’ vun potham nuai tol uhi.  1975 kum in anhuanna huih bupi kinei nai dekneng lou hiven: Mei tohhing; ak suankual a tep; thuktung a pum-em-san-gimgem; kuangdai khat a koih; tuivot a buaksiang; a muk nuailam hiikbal; gongkholh paih; a gil puah; a kituahpih belta hawm khat a beuguan; belta tuibei, aksa bop omna nahtang nah a maituam; huthe lou dia gakchiip; thuktung ah bellian zaw khat a tui suangsou; huai sung ah belta khesuk; belkuang sit khum; sousak bibilh; minta; belta taw ah aksa uina tuihu – satuihang vung piupiau; tam dildel hetlou; asa le hang-him mahmah hi.

Nikhat kei kian leipi ah ka kuan zensam a, nasep va awlmoh nawn zawzen.  Akmai chia lel louma tut pan pa’n singtangpa thau tawi a sapel dia diangkhiat daih chih khawng zumna’n ka ngai hi.  Kei sepdi thou ahihlam haih lou in ka sem khomial guigui hi.  Bahsesim in inn ka tung a, singpi nou thum vel dawn ta, ann nelou a lup vengveng mai ut-huai akaa!  Himahleh, ka nu’n akpi tuilai ngat’ sa: Alu, a gawlguh, a vun, a tawphun, gilpi kimkhat, ngoiphek khuttal tan, a kengbom khat leh a phei khat hon koihsak chenchen ana hi.  Sukzawnga lut ahi bok a, luttum suk zungzung mai. Taksa gimna teng thengduak hial hi.

Hun leh nite genliam vovok mai ni: Zennu in a kholam ua ka vazin chianga goh di akla khat hon leisak ngeita.  “Hiai ak lamdang lua, gongthak petmah, tuahteng bannek, i nek teng hon duhgoh!  Singzu nasan duhchihtakin duh – ak singzu hai ka theih patna!” chi liangh hi.  Hinapiin ak in gawnlam manoh hiaihiai.  “Ana gou mai un!” ka chita ngal a.  A gil sung ah ‘condom & rubber band’ khawng peuh om a, huai in asung-alai phupawm hi zenhouh hi.  Zennu zulhzau hi kei; naupangte’n mutpuak dia a zat uh; numeite maisuah siangna dia vanzat tangzang ‘face cream’ bawmvuak peuh valh kha hilel e!  Na thutheihte veve uh toh!

Nikhat pumlum sungah dakkal sawmnih leh li om a; dakkal khat minit sawmguk ahi, i chi.  Minit mualkhum sa te hong kilehkik nawn mawngmawng lou di ahihna ah minit chih in lamdanna leh manphatnatak nei chiat uhi.  Minit khat botsau thei kei mah le, seken sawmguk manpha tak in zang thei tham hang.  Khotaang leh pawlpi te ah bahsiat theina dinmun enkai le hiaite hong piang ding hi:  (1) Nasep kidawn zang tuah, (2) Bahna beisak in, sepkhiak khangsak, (3) Puakgik tuam kisakna heimang, (4) Bahse taktak ding te hunkhia, leh (5) Sep hun sung leh sepkhiak kimil.

Kuaman a omna pawlpi-pawlke khatpeuh ninbawl ngei lou a; heutu khenkhat ahi a chimtak naknak uh.  Mi kuahiam khat in anuai a te nasep hunsung kilawm bikhiahsak, nasep paizia kizen phuan leh sep-leh-bawl hawmrual dan di a ngaihtuah but kei leh, tubouh (sek luka chi chitchiat le) suak vek ding uhi.  Huan, ngaiin, vanzat tubouh kia na neih in zaw, thilteng na mu sikkilh vek ahi mai!  Kilhlut leh phawidok kikal ah na leplailep pungpung nilouh khakha de!

*****

Na gingta hia:-

(1) Ak sinkha omna kisuankual thei.  Ak kigoh hun, sun leh nitak ahih zil in a sinkha omna kibang gige lou hi.

(2) Ak sinkha asialin nawmvalh le mit diin hoih.  Aktui sial haite mit bel mial baih (aktui’ mit paih sese lou a sialdawn veu te).

(3) Aktui sangin, aktal leh akpi upa zaw.  Pathian in ganhing te a siam in ‘amau chi omdan ding bang chiat in’ siam phot a, ‘Chi tampi suangin hongpung unla…’ chi hi.