I Paidan uh-mimal muhna:

A TAMLUA THUAKLAHNA

L.T.Ngaihte,Kabul

Kabul ka tun nung a keimah mimal ngei a leng ka phoksuah deuhdeuh tuh a tamlua thuaklahna ahi. Hicibang in. Afghanistan gam buaina ziakin, India palai hiai gam a semte adin, asemte kia paitheih ahi a, a sungte'n a zuih uh phal hilou hi. Huaituh non-family station akicihna ahi. Gambuai thut thei, taikhiak phut ngai mai thei,ki ven mahmah ngai gige ahihna ziak ahi.

Khat kia ngen a ki om ahihna ah, insung thil buaipih ding tawm mahmah pah hi. Office leh tenna inn, building kibang ahi tangpi a, kei a bang leuleu, kongkhak khatin hon hal lel ahi. Office apan insung a lut theihmai ahih cian, a koilam akoilam ah om leng le, office kai kihi gige mai kasuak hi. Nek leh taak lah, anhuantu ilak kei le zong, Sepaihte mess ah va nek theih lel ahihman in,insungna tawm mahmah hi.

Tutan a ka theihdan in, Afghanistan ah eimi kuamah dang omlou hi. Tanau veh ding, tutpih ding, houlimpih ding cih te om peuhmah lou hi. Biakin zong NATO te huang a loungal koimah mundang ah omlou tazen hi. Om le zong, mundangte bang a va kikhop om thei vual hilou hi.Eimi kuamah dang omlou ahihman in, eimi lak a tam mahmah Committee hiam, SSPP, YPA, Mission meeting cih te pawl omlou kii kei hi. Thumkhawmna hiam vengsung kikhop cih mawngmawng zong omlou hi. Tuabang deuh in, damdoi inn a damlouh veh ding, si gal ding, sivuina cih te pawl, kava tel na ding om ngei lou hi. Office dohkan ah, desktop computer, internet toh kithuah om a, hucibang in ka inn ah sawlkal hon piak Laptop ban ah, mimal a laptop ka nei a, huaite ah zong internet connect ahihi. TV I et peih nak leh Delhi a ettheih teng mah om hi.

Hun awl tamlua thuak lah ! Zingsang dak 5 a thou, walking khit a Gymn a kava gamtat khit cian leng, dak 7 ahipan hi. Ka kuan ma a Ambassador J N Dixit in a gelh, 'My Afghan Diary' cih ka sim lai in, thupi kasa a, etzuituak bang le ka sa a, ka lungsim in, hun awl te laisimna ding leh laigelhna ding a hawmzak ding, ka mimal khangthu beek gelh khiak ding cih bang ka ngaihtuah hi. Hithei mahmah leh kilawm ahi. A pawimoh teng: laibu, laigelhna ding machine,mun leh mual ban ah hunawl te kiningcing tak a om vek ahi. Taliban te lak apan hon veng ding lah, commando muan huaitaktak tampi om uhi.

Kabul ka tunnung kal 2 sung vel, nitaklam teng in, 'ka diary' ci in ka laptop a ka guanglut zel a, thanuam gige kholkei in, lemtang gige kholkei mah leh, 'tunung cia poimoh kha ding ahi' cihna toh ka pang hi. Kuamah hon sawl leh deihsak le hilou a ka hih ahihman in leh kei mahmah kakithalopsak kei ngal leh, kuamah hong genpih ding omlou ahihman in, akoilamlam ah thupukna lak haksa lou hi.Atawp in, 'hicih hehu ngai kei ve aw..kum 2 bang omdi na hih cia,dam nak leh, hun lemtang zaw leh hun thoveng zaw le hong om law kei dia..'cih ka ngaihtuahna ah hong lut laizang hi. Ngaihtuahna diklou pumlum cihna di ka thei kei a,ahihziakin, khemtu ngaihhuai mahmah ahi cih bel ka lungsim tongnung ah ka thei veve hi.

Khemna himhim a hong kilat tung in, thil hoihlou hon tut ding sang in ahuntak a nopsakna omding lianzaw in I mu veu uhi. Hiai ahi khemna thuak hakna. Lai na simlouh ziak hiam na gelh louh ziak hiam a, na ciltang hong na veuveu ding cih bang hileh, gelh teitei khading nahi, ciltangna na thuakpeih louh ziak in. Ahihziakin, khemna tuah anopdan bel, lai nasim kei a na gelh kei leh, na sofa tung a nuam tak a tu zihziah thei cin a, TV channel tuam tuam kheng thei cin a,na khe bang na lu sang a sangzaw a koih in,bak zal a kizal thei na hi laizang hi. Hucikimlai, computer va 'on' di maimai le peih nonlou, 'zing khong cia le bang hihdi omtuan di lah hilou a' cih in hon siamtan zawmah lai.Khemna Gu! Jesu mahmah inle huaiziak a 'khemna ah hon pi lut ken' honna cisak hiding hi. Aziak bel, khemna a pilut a omkhak nuampetmah hi mawk hi.Khemna natuah khak nonlouh cia bel, taksa mahmah a le mannabei petmah hi ta ding na hi hi.

Leitung a a neih theihlouhpen, a khol(save) theihlouh himhim tuh 'hun' ahi. Hunteng a pailiam ziahziah, apai liam nung lah sapkik theih hinon hetlou tuh 'hun' mah ahi. Huaipentak 'hau' a kingaih khak tuh leitung a mi haipen ngaihtuahna bang lel ahi. Huai tuh kei dinmun ahi.Huaiziakin, kei mimal kakimuh dan in, khovel a mihaipen phazou mahmah in ka kikoih hi. Mihaipen phak lahna neilou!

Hiai a kei mimal thulimlouhna leh haina tungtawn a tuni a ka taklat nop pen bel, eilam a I uangbawl mahmah uh thil khenkhat te, atam luatziak a ngaihsaklouhna om thei adiam aw cih ahi. Huaikacih cia ka lungsim a hong kilang masa tuh Pathian Thugen ahi. Pathian thugen ding a telkhiak leh khasum piak I neihte Pastor leh Evangelist icih te khong ahi uhi. Huaite nasep di tuh Pathian in amipi te a dia a deihdan zonkhiak a, huaite mipite theihsak ahi. Nidang a jawlnei te dinmun luah a om ahi uhi. Pathian in leng, mipilak a agennop te, hiai te tungtawn a genkhiak abaihlam pen hikha ding hi.Hucibang mi I neih tawm mahmah lai in bel, aciak thei tapouh Pulpit a I ding a, kamsiam iki tuh uhi. Tuciang in bel, saptuam cih in Pastor nei thei ihi simta.Huai mah tuh Khukpi te thiltup leng ahi.

Ahihziakin, tunitan in leng, atuak teng in, hiai thupoimoh pi iban gen ua, khat gensa khat in hon gen zel a, munkhat a hihdan mundang khat ahih zel, huaimah pawldang khat in hong hih jel! Zihzeh law deuh bang. Kigenmun lua kha, kuamah in ngaithupi nonlou! A value tak pen le kimuthei nonlou lam ahi.

Huaiziakin, ici ta ding. Kamuh dan in, Pathian Thugen pen Pastor te ading liauliau in koih in,Upa ten saptuam en kawl uhen la, Dorka ten a kikhopna te uh, anhuan dan, puankhui dan, phim zatdan, annsepdan, puanten dan leh insung nasep dan te genpih zaw uhen la, Tuailai ten, paukam zat dan, lapau,I pau zat dan, ki tanauna,kipanpih tuahna, ki awlmohna, thupukna, numei leh pasal kaal, midang lak a kilawmtak a gamtatdan, nam leh gam itna, taksa sawizoina, mel bawlna, laisiamna leh khantouhna tuamtuam te gen tam zaw le uh, naupang lam ah leng,hucibang mah in, Jesu tangthu apan kia ahih sang in, leitung a Pathian thilsiam lamdang leh thupi mahmah te poimohna,mihing kisiam dan leh a tuam bikna, ganhing te poimohna leh a nasep uh, sing leh loute manphatna, huih leh vuahtuite manphat dan, hun leh kumte kisiamdan, mihing nasem hoih te,mi lohcing te,mi panpih tute, midang a dia kipia ettontak te tancin khong hilh tamzawk in nei le hang,bang aci dia? ci ihi. Tua I omna lai tak in duhthusam lou ahihleh, a lampi dang-thugin leh pomdan kibangmah hilele, avehdan tuamdeuh leh a hon sukha thei zaw nasep khiakdan om kha hiam ci lel ihi.(090612)