KNLD series:01

EIMI PRESIDENT
-L.T.Ngaihte

Kal paita bangzah hiam I houlimna ua ithugen uleh I ngaihdan te uh ka sim apan,eimi bang le India President hong hithei guih mawk di hileh kilawmsakna bang hong om thei sim phial a, Tribal ngumngek ihih utoh, Kristian bang ana hi thethup zawmah, I tenna ulah gamdang India in ana kidoupih ngeisa, China te leh sepaih gilou simngen vaihawmna, Myanmar te na hikhanglang lai  ua, India a MP tamzaw te bang in koiciang India a,koiciang gamdang ahia cih leh atheih zoh louh lak ua kiteng, sepaih hong zin masa te bang in ‘jungle man’ hon cih top te uh, India mi za lak a 95 di bang in state tuamtuam a kipua ahihlam mel le thei lou a ‘Northeast’ hon cihtop mai uh ina hi ua,huaite lak a khat President a pansak bang, amau thuthu mah a om di cih a theih ziak ua, kiceina dan a hoihsa vanglak uh ahih zawk mah cia, hithei simpi hive aw’ cihna om thei hi. Huai ngaihtuahna gintak haksa simpi in hon hual deuh adiam, Afghan nipi kholum kipan ding kuan lai a sun-an nekhin ka lusuk daudau lai in, hicibang ngaihtuahna in hon buak a, ka nui lum dek(KNLD) hial hi:

Eimi khat India President hong hileh, bang ici mah duam aw..,adiak a Delhi khawpi a eimi omte ?:

Delhi YPA ten atheih phet un, meeting akin akin in Jt.Hqtrs office a hon sam ua, a program nuai a (PS) ah ‘ankuang sawk khawmna leng durr deuh aneih a kisawm’ cih a taklang ceuhcauh uhi. Meeting ahon pan ua, President in ‘itheih ciatsa bang un cin’,mi theihsa gen in hun sautak a hon zang a,tawp thei nonlou ding a diam aw acih lai in,President thak pen Delhi YPA te Val-Upa dia guan hoih asakthu a gen hi. Aman a gen na a lung khoih mahmah tuh, meeting a ahong kuan madeuh a President thak va cibai di acih leh Prime Minister toh meeting aneih ziak un, aremchang ciah kei a,a hih theih tawk ci in,a huangsung a leivui san te khutdim khat ka hon tawi’ ci in ama a dohkan ah a hon sung khia hi. Member te lung a khoih mahmah! Secretary pa hong ding tou a,nui sim selsal in ‘I lungkhamna pen uh, misi om cia a luang koihna di tuh buai huai nonlou hiphot eive’ ci’n President insung a room 340 omte lak a 10 beek luah  sawm pah ding’  cih a gen hi. A vualupa deuh khat in, khuh sim khauh khauh kawm in, ‘misi luang koih cih nilnel, avuina ding leng mun awng lianpi petmah om vo awi, a tumlam doh a huan sung maimai le acre 13 mahmah eive’ ci’n ana huh bawl hi.Alak ua nungak member suan huai mahmah khat in, ‘ana khol dih uh..a inn cauh in le acres 335 tak luah hia maw, a enkoltu dia le mihing 2000 bang ngai ahih cu, misi luang leh a vuina di maimai a President in zat sang mah in, eimi sepna neilou teng le guanlut theih di hi ve aw..bang na ci ngaih ua?’ hon ci kenkan nawn hi. Alak ua thilthei zaw deuh a kingai khat in, ‘a room zah a gen thoh lou in,a inpen sawng 4 mahmah ahih cia, YPA ten apoimohna bang a izat theih ding un, a sawng 3 na ngen le, i kul leh poimoh te a hu kha zaw kei di maw? I remchang bang a thoveng tak a zat hiuhiau din’ ahon ci leuleu hi. A advisor pa uh kilop gawpta hiam a hong ding hial a, khut zak kawm in  ‘ana khol di uh, thil ban gen zualzual lou in, ngaihtuah detdet le hoih kasa.Bangteng bangteng hi leh, hia President ineih ziak ua, I pupa ainah phahna, sawlkal in amin dikloupi a honna sapsak nilouh pen uh amin diktak Lamka hong kicih tak ngal ka lamen’ aci lauh hi.Hucin, hun lemtang masa pen a President pa muh a, pakkhi khat tawi a, ohsakna leh Val–Upa a guanna neih ding’ cih thukham toh meeting a zou thei ham uhi.

Hucih hunlai vel mah in, SSPP ten leng Head Office ah Emergency Extraordinary Meeting sam pah uh a, amau etna dan in, kumteng a haksatna nasatak a tuahsek uh Annual Conference pen leng President pa huangsung a open tak leh thoveng tak a ut tantan neih theih hita ding cih ban ah, SSPP Sports Meet leng Rashtrapati Bhawan huangsung a Tennis Court 9, polo ground, 14-hole golf course leh Cricket field te a amanbei a neih theih hita ding ahihman in, nidang a kumkhat a khatvei neih pen,tuni apan khateng a khat vei neih zel hitheita ding cin kipak mahmah uhi. Hun lemtang masa pen a President pa Advisor a guan na Executive Committee in neih hoihsa uhi.Huaite ban ah, student sum leh pai a haksatna tuakte a manbei a coaching bawl ahih theihna ding in, President inn sawng 4 na luah theih hileh cih thupuk uhi.Atawpna ding in, SSPP fresher’s Meet masa pen a President pa Chief Guest dia cial lem sa uhi.Hiai hunsung Video a lak ahi ding cih leng thu passed ngal uhi.Sport Secretary in sport ciang a President huangsung nitsak luat ahilouhna ding, kuapeuh in kuva leh haitheih cing ten cilsiatna ding polythene tawi ciat hita leh cih zong a gen hi.Next meeting President pa Durbar Hall a neih teitei sawm ding, cih thupukna toh meeting a zou uhi.

Saptuam makai lamte buaina lian mahmah. Aziak bel President pa koi Biakin a kikhawm ahia cih kuamah in thei zoulou uhi. Baptist na bang cibang a tang ahia,cih bang le record omlou. Minkhumna laibu a etet hang un, amin muzoulou uhi. Huci himahleh, a kinthei pen a Pastor leh Bialtu Local upa in Gate Pass bawl pah hoih sa ua, Prayer Cell tengteng Headquarters dan a President pa inn pindan lianpen,Durbar Hall  mi 1500 vel tut theihna, bawl sawm uhi. Huai ding a pan la ding in Dorka Pawl te guang uhi.Delhi khawpi a saptuam khempeuh in a kikop a zat theih lemtang dia President huangsung a Swimming Pool pen Baptist tanna dia zat sawm uhi.Hiai in Delhi leh asehvel a eimi saptuam pawl tuamtuam te kaikhawm tuan mahmah dia lamet ahi. Centenary Celebration Committee ten leng,centenary lopna a om non peuhpeuh cia President pa huang sung tengteng gospel tract toh umsuak ding cih thupukna la ngal uhi.

Hucibang zel in, eimi min a kipawl khawm tuamtuam ten leng, amau committee ana sam sauhsauh uhi.

DPI kici ten akin-akin in Ex-Home Secretary a phone pah ua, thil omdan a dong uhi.  Huai kia leng hunsa lou in, Delhi a NE state tuamtuam a MP  leh Bhawan Commissioner te a ban a phone in, President thak neihna tungtawn a govt.fund muhtheih ding om hiam cih leh akintheipen a President pa Associate member hihsak theihna lampi om hiam cih te a buaipih uhi. Hunlem masa pen a President pa a office ngeingei a working lunch neih pih ding cih leh huaihun a limlakna ken ding cih leng a thupuk uhi.

Zomi Welfare leh mutual fund club tuamtuam 20 vel mahmah omte’n amau pawl bing ciat a President pa muh leh pahtawi ut ciat hina pi in, a hun leh mun in a citzoh louh ziak in,Second Saturday masa pen a,Munirka apan Rashtrapati Bhawan tan gari pei 4 nei leh pei 2 nei teng toh celebration procession neih ding kithu kim uhi.

Zogamonline(ZOL) ten leng akinthei pen a President thak pa interview neih ding ci in,bank a nasem heutu muanhuai tuamtuam te tungtawn in Rashtrapati Bhawan a SBI nasemte toh pangkhawm in, appointment delh nak mahmah uhi.

Hucihlai mah in Zogamdotcom ten President thak ‘User of the Week’ in puang ua, a official limlak zong khe ding in, admin tuamtuam te ki leipei uhi.

Epilogue:

Thukhonung kiza dan in, eimi President in kha khat vel nung in, Rashtrapati Bhawan sung nangawn leng a amohpuakna ginatak a semkhe thei lou leh amah mimal ngei a leng privacy nei thei nonlou lua kisa in, Delhi khawpi sung a Airport omna, Munirka City ah inluah ding a guk in zong kici hi.@170612.