April 15,2012 ni in nidangte bang in zingsang dak 5 in ka thou a, ‘ka ngai em che’ cih kawm kawm in, electric mei zang in singpi ka bawl a, kakisak khit in ka tenna insawng khatna a kumsuk in, morning walk din Embassy kawngtual ka manoh hi. Zingsang dang te mah bang in, ITBPF commando hon namukha khempeuh in a khut taklam a veilam aang tung a koih in ‘Jainsaab’ ci’n honna greet sauhsauh uhi. Ken zong ‘Jai-Hind’ ka ci jel hi. Amau sapte a greet na uh ‘Jainsaab’ cih pen ‘Jai Hind Saab’ cih lamtom ahi.
Embassy huangsung a walking exercise ka laak pihsek, Commandant pa toh brisk walking ka pan ua, dak 7 a ITBP commando ten amau parade(exercise) a group a alak hun uh hong tun in, Commandant toh kakikhen ua, amah badminton kimawl din a gari in compound pawlam amanoh a, kei leng ka office ah ka va lut a, Melhoihnu kava houpih a,aman tuni Biakin kailou ding,Pathianni nawn Central te kum 2 cinna lopna atel zaw ding cih honna hilh a, internet mail leh FB a saulou ka tut nung in, Gym a saulou cik work-out bawl in, ka room ka tung a,kisil khin in breakfast ka nei hi.
Dak 1030 vel in, zan a Officer’s Meeting toh kisai etkai ding om man in ka office kava lut nawn a, local contractor khenkhat toh ka kimuh nung un,kalunglut na Reading room bawlding kacihna mun te ka hem siangsak a, Book shelf bawldi dan ka gen pih hi. Sun an ne khin dak 1.46 in ka phone ah sms hong lut a, huai ah ‘unusual gunshots in Kabul’s Shar-e-Naw area, details will follow’cih Security Chief apan ahong tung hi. Shar-e-naw kici pen tua ka omna Chancery kingakna lampi ahi. Hiai sms pen Embassy a department head teng kiang a, a kitawn a akhak zel system tungtawn ahi. Ken le ka lungsim in ‘eiveng a thauging aih cu’ ciin ka koih dap hi.
Huainung minute 10 le paiman lou in,dak 1:54 in sms dang hong lut a, huaiah ‘multiple explosions heard as witnesses reported suicide attacks in Charahi Zanbag near UNAMA office’ cih hong kigelh ta hi. UNAMA kici UN organization khat ahi a, a office uh kou omna apan km.1:30 vel lel,kei mahmah leng meeting a kava hoh khak ngeina ahih ban ah,India mi Foreign Service thou senior mahmah khat leng deputation a a omna ahi. Ei mahmah inleng suicide bombing gin ngaihtakmai I bil mahmah za ihih takman in, lungsim ah ‘Eh’ cihna hong ompan ta hi. Security officer apan a gelhthoh leh khut apiak ‘circular’ hong pai a, huai ah thuhilhna hongtung non hi. Embsaasy Security Chief pen IPS officer senior khat ahi a,amawkna a hiai advice hon hawm hilou hi. ITBP Commando te ‘alert’position in a om ua, a battle fatigues utoh,thau kamsa in kongpi teng ah hong ding ua, kei kongkhak bul ah leng khat a hong ding hi.
Huainung siah, Embassy compound sung ah muh ding, local te hi’n India te hileh kuamah omnawn lou, room ciat a ki om hipen ding hi. Ka tukverh neukha apan Vahui khat leh nih te loungal nungta kuamah muhding omlou hi. Huaihun apan message te ah leng ‘Kabul Attack update’ cih ahiden ta hi. Minute 10 vel kihal in, sms hong tung zel hi. A zingciang April 16,2012 dak 8:19 in update nanung a hong tung a,huai ah ‘Kabul Police chief says both areas are cleared, about 9 terrorists killed in both locations’ cih ki gelh hi.
Pathianni nitaklam, eilam a biakin kai hun vel bang in bel, akoilam tuakin hah bawl mahmah damdam uhi. Sawt kihal lou in alom in hong ging zoizoi ua, atunglam ah helicopter in meivak tak a mikhelte omna inn sal kawm in machine gun icih ten kap in a kapsuk ziahziah hi. Sawtlou hong dai in,theih khollouh in hong kipan zel uhi. Zankhang a khanglou ihih ciang in,hucilak a TV khawng lunglut tak a et haksa kisa hiven chin, ka room sung apan tua thau leh bomb gingte ka mobile a na record sawm in kana hahpan mahmah hi. A hong ginpat ding theih kholh louh, atawp hun ding leng theih kholh louh ahihman in, hoihtak a record khak haksa mahmah hi.
Kabul Khawpi sung a hicibang buluhna aom louh kum 2 bang ahita a,agaalbawl te a din zong, ‘bangci ihi ua,kuamah lah buaisak ngeilou, kum 2 sung mahmah kuamah Kabul khawpi a ki that kha nonlou,annek le lim non kei ve aw..’cihna amau leh amau kal ah om tham ta ding in gintak huai hi. A heutu te uh mohsakna leh bangmah le hihlou ci a kiphinna nasa mahmah ding hi, muanna leh bitna om ciang a migilou te kuamah in theipha lou ahihman in. Ahihziakin, terrorist te om maimai lou in, a guk in,hun sawtpi apan Govt.office poimoh tuamtuam leh Embassy khenkhat te luhna ding a pan ana la in, inkilam lai zohnailouh a na seemte lak a kihel gu in,thau leh bomb, rocket natan ana sek lut zel uhi. Hiai naseem te lak ah, Pakistan apan migilou te hong ki zeptel in,lamci tuamtuam in, local contractor te toh pangkhawm in, mun bangzah hiam ah,galvan a kemgu thinthen uhi. Hucibangzel in, Kabul khawpi kia hilou, mundang khenkhat ah zong, tuabangmah in galvan a guk in a seklawk ua, ani ciam ahong tun ciang a, huai mun teng apan, khat vei thu a akiton a buluhna neih ding cih a tup uh ahi.
Amakaite uh ngaih a,Afghan gam a thuneihna lian neipen a atheih uh,Amreica te makaih NATO sepaih te a hi uhi. Huaite atam zaw kristian ahi ua, itheih bang in kristian te a din Pathianni tuh khawlni leh ni siangthou ahi. NATO huangsung ngei ah zong, Pathian ni teng in sunning dak 1 apan Biakna kikhop nei zel uhi. Amaulak a thunaseem(pastor) zong tampi om uhi. Bangci leh hicibang mite thangpaihna tawpkhok kitun thei ding hiam cih tupna in,Taliban makai ten Kabul dou ni ding hun hon bikhiah ua,Pathianni, April 15,2012,akipat hun ding nitaklam dak 1 cih ahita. NATO huangsung a Biakin dak agintoh kiton geih ngim hi ngei ding uhi.
Inn sawng sangpi lamsan lai sung a pindan tampi om seuhsouh te lak a khat apan rocket hong leng khe vengveng pen, akap khakna mun atun ciang in, kithei pan hi.Koi ahong kipan,bang floor ah, cih pen theih khiak ngal mai theih hilou takpi hi. A hong ginnon matan kapthuk ngaihna zong omlou hita.Amun leh mual theih ahih cian bel, huailam ngim a kihawt ding hita. Machine Gun e,bang e, armoured vehicle te ging vevu ta, khat vei Taliban te thaukap tuh aleh 100 tan a thukkik hita hi.Anuailam kia cilou in, atunglam a pan American te helicopter galvan toh kithuah tetoh,thauvui-thautang in buak suk uh hipen hi. Ahitazong in, mun dang tuamtuam a zong hucibang kikaptuahna om ahihman in, helicopter te zong kicing lah mahmah ding un ka gingta hi.Beita isak cia mun dang khat a hong ging thei zel ahihman in leh,gari bomb a dim te puakzak sak ziahziah ahihman un, security adin zong,haksa mahmah suak hi. Pathian ni dak khat apan azing ciang dak 7 tan mahmah kikaptuahna pai hi.
Azingciang in, Ambassador pa mu malam in,ka tenna ding ua inthak kibawl na(New Chancery) lam kava pha a,a mazan a huai sung ngei a leng rocket khat na kaplut uh ahihman in, huai nasep en ding in kava hoh hi. Huai huangsung ah, inn sawng nih a kilam, a bongbong in kikhen hi. A masa pen Director level te ading, atung leh nuai a mi nih luah theih ding khat a om a, a zawm ah Deputy Secretary level te ading atung leh nuai a mi 4 ten theihna ding kilam hi. A nuainung a amasa pen, kei luah ding a kisep, asung a sofa,leh furniture te leng ka deihdan a ka bawlsak, sitting room-cum-dining,kitchen,bedroom with attached bath room-cum-toilet om hi. Luah pah ding ci a pillow natan kakoih hang a Security Officer in ahon phalnailouh ziak a luah kha theinailou lel ka hi. ‘Ngaihte saab, ana khawl lai in, senior officer te kituahlutna dia security lam kiman nailou ahi, luah theih ta ding ahih cia kei mahmah toh kituan lut khawm di ihi’ acih lai in ka lung akim ngel kei a, ka mel ah leng aman le athei mai kha ding. Sel cu ka sel kei a, ahihziak in, ‘huci ahih leh huai toh kisai a sepdi omte hon seem kin deuh ve’ ciang zaw ka ci hi.
Japan Embassy te adi, ei compound a hong kekha hitawk lele(kou gen dan ahi aw),huai rocket in kei tenna ding bang a khoh kha a,ka invengpa a ngial tuh a kongpi kalhsa bang leng a kheng hong a, asung a cupboard natan a vang a,kei tukverh frame te a lengkhia a, glass te bang tuh abuilding pumpi ban ah,ka opposite ua SO te tenna dia kilam building a teng leng a kithehthang vek hi. A rocket in akhakna baang leng feet khat phial ding akuak a,central heating system adia sik a kibawl pipe lianpipi te bang leng a koi gawp a, ka room sung a furniture te bel ase zen a om kei uhi. Ahi a, mihing khat huai ah, huai zan in, huai lupna tung a ihmu henla, hucibang tuk a hat rocket khat a inn bang ah hong puaktam guih leh...cih ka ngaihtuah khak cian, tua pa tangthu saunon het din ka gingta kei hi. Hucikawm kal ah, Pathian in a itte, amah deihbang a sapte adin,cikmah a theih ngeilouh,zak ngei louh leh muh ngeilouh vaite khat na ngawn, a hoihna ding un nasiatak a nna naseem sak thei himawk ahi cih ciang sem in ka mukhia hi.Sawltak Paula in, ‘heutu te Pathian seh ahi uh, athu uh mang un’acih bang le ka pomsiam tuan mahmah. Pathian ngei inle, a sms khakna dia internet dan a zat ding a aneih hiai ‘heutu dan a I bawlte’ana hi maimah lim uhi, cih peuh ka ngaihtuah hi. Mohpuakna nei tute thuman ziak a, Pathian deihna bang a, hiai ngaihtuahna khong gelh khe thei lai a hing leh dam a om ka hihlam ka ki haih kei hi.
......