I GAM A THIL PAIDAN : MIMAL MUHDAN

Zanlam zek apan Facebook a hong ki hah gen mahmah tuh Singngat Khawpi, eilak adia khawpi lianpen nihna, a tengte tuihaksatna, suk vaivenna ding ngimna a, tuicinna dia sum Crore 2.05 DoNER apan sanction a kibawl, phatuam a zat ahihma a, segawp maimah tungtang ahi. Hiai nnasepna a contractor te min ciangtak in Facebook ah hong kitak kheta hi. Huaiziakin, hiai ah munluah maimai din ka taklang non kei ding. Ken mimal a ka theih hikei mah le uh, eimi lak a mi suan huai leh tal-lang pipi ngen a ahi uhi. Hucibang mite kipeina ahihziak sawnsawn in, midang khempeuh in, amau apan nasep hoih leh ettontak I lamen uhi. Huaiban in, midangte adi le hilou, eimite mahmah phattuampih ding naseem ahih ziak un, ahih hoih theihtawp uh suah a, amau muhdia sawlkal sehkholh teng lel mah la a, sawttak daih ding leh muanhuai mahmah dia hon bawlkhe dia lamet theih ngen ahi uhi. Himahleh, tua anasep gah uh hicibang a thu leh limlak hong kitaklangte apan in, bang igen ta dia? Zumhuai mahmah maw! Ka neulai ua singtang a tuiluanglai ka cin sang ua le thulim louzaw bang ka sa hi. Tui le om lou, acinna se zawmah! I gintak abang kei uh cih a hong kilang a, I nam igam khantouhna dia sum Central sawlkal in a piakte ginom loutak a zang tute a hih man un, igam-ilei khantouhna dalte hiaite khong himai mah lou di hia cih ngaihdan hon pe thei hi.

Sum hiai tuicinna dia sawlkal in apiak Crore 2.05 ichih, eisim dan in Nuai (lakh) 200 val ahi! Nuai khat a leng eigam a tuh nna bangzah hiam sepkhiak theih lai ahi a, nuai 200 a cu tampi petmah, hoih petmah leng sepkhiak theih ding ahi, chih im vuallouh in a theihtheih hi. Ahihziakin, mi bangzah hiam kisehsat a hiai sum kihawm ua, a nna taktak sepkhiakna dia tamlou kha hong vaalte a, a kilawmsakna dan lel a banghiam va hih ningneng uh cihna ahi.

Hicibang a zumhuaitak a nasepna ka genlem sawmna hilou in, I paidan tangpi uh, agaal pan ka muh dan leh ka theihdan tamlou kon gen nuam hi. Tulel a MLA hiam Minister a om khate ka cihna bik ahi kei a, Manipur a thil paidan tangpi hi a ka muhdan ahi zaw. Huaiban ah, sum lakh 200 in igam a bangcidan a baang (wall) hicia lel, detdou lou petmah, pan dikdek lel, bawl khe thei hiam? cih taklat sawmna le ahi.

Central apan hi'n State apan gam (district) khantouhna dia fund kibawlte tung a thunei tu tuh a bialtu MLA/Minister ahi phawt hi. Ama theihpih leh lemsakna lou in, kuamah in lakhe theilou uh ahi cihna bang ahi. DC icih zenpeuh te leng, hiai bialtu MLA/Minister thuthu a om theite om hilel uhi. Amau theihdan a dik gum a, Minister thu kalh te, transfer hi zel uhi. MLA Election hiam Cabinet bawl dekchia sum alom a tampi senna ding omtak chiang in, tua candidate in a bialsung a sumhau mahmah Contractor te panpihna va la hi. Sum lakh 10/20 ka deih acih cia, Bank a va lakkhiak tultul ngailou a, pekhe thei pah contractor bangzah hiam aneih ngai hi. Huaite sum zang in, alang alang hon fuih a, huciin, MLA maimai hilou in, Minister bang hongtung thei uhi.

Minister hong kaizoh cian, hiai district sung a khantouhna(development) fund teng teng kintak in a hon hentang a, huaite a contractor te lak a bang ci hawm zak ding cih a lungkhamna ahong hita. Amah a ding in, hiai contactor bangzah hiam te a kipah uleh, mipi tengteng kipak himai, hiai teng a suk lungkim nak leh, adang a poimoh lua omnonlou himai hi. Huciin, hiai khantouhna dia sum om te pilvang tak in hon hawm kual panta. Amah tak tuh hiai 'thil nin' lak a ki hih buailou in, khawtang leh saptuam ah anasa thei pen in hong ki theh darh a, aguktak in a muan mi bangzah hiamte a saisak hi. Hucihlai in, a contractor ten huai sawlkal apan sum alak khiak theihna ding un, pan ana la ua, 'cha thaknabah' ci in,office a sum mahmah deih officer leh a dangte khut a va thoih zol sak vek uhi. Engineer telak ngial ah gelhthoh hilou lah fixed rate anei vek uhi. Chief Engineer apan SO tan a micih ten a mautan ding percentage omsa om lian hi. A tampen bel Minister share ahi gige hi. Minister in bel huai khong theipha lou dan in, khawtang ah akilawm tak in a gamtaang hi.

A paipi dan in Special Contractor I cih te'n, amau mimal a, sumtang tampi aneih ding ban uah, vanzat poimoh Truck, tractor leh vanzat ci tuamtuam aneih ding uh ahi. A poimohna a sawlkal apan sum lakhe masa sese lou a, amau sum leh a vanzat te toh nna kin leh poimohte asep theih pah ding uh cihna in. Huaiziak tak in, nna lian deuh, sumtampi senna ding te ah Special Contractor te nna piak ahi zel uhi.

Tuabangzel in, hiai Singngat Water Project leng Special Contractor khat kiang a piak hingei ding hi. Ahi a, aman nna dang tampi nei ahih man in, a nuai a mifel(?), muanhuai(?), thumang(?), tanau laina(?) bangzah hiam kaikhawm in 'team' khat a bawl a, huaite kiang, nna apesawn a, amau tanphak ding zah fix sak in, huai toh a nna semkhe ding in thu apia hi. Tawm asen zoh peuh uleh, amau a ding tam himai dinmun ahih ciang in, abaihlam pen, amantawmpen te zang in ahon bawl ta uhi. Ahoih/ahoihlou gen ding pa, geel bang a bawl ahina hia? cih check dia om, AE/SO in leng sum mah ana lamen zel ahih manin, dikloupi mah in certificate ana pe zel hi. Piakzek omlou a bangmah pai mahmah lou ahih man in, Singngat mipi te tuidawn ding lai tuh government office te leh mimal insung te ah a hawm hawm tamai uhi.

MLA/Minister in bel, atung a I gen Special Contractor tamkuam,sum leh pai a humbit leh vak ding a nei a,huaite ban ah UG te share pen Manipur adia alou theilou a ngaih hita hi. Singtang hin Phaizang hileh. Government office lam a thil poimoh khempeuh sai ding mi anei ua, huaite bang leng a share om sawn non hi. Teacher te Lamka a om a, asepna mun ua semding a khohausa a hire dandeuh mah uh ahi. Lakh bangzah hiam mudia ana pang nuam mahmah Executive Engineer pa hong kipei a, bill hon passed tang hial hi. Asum la dia bag toh Gari mantam deuh a hong ki tholh lut cu nuam a sa ten uhi. MLA/Minister adia bel, hop ding tamlua hi gige, ahihziak a amawkna a mawkpiak cih bang pen omthei vual hilou. Chief Guest a apan na a piak, sum leh van te bang leng, ama neihsa midang a itna ziak apiak omlou himhim, anuai a dangtak-gilkial a dak seuseu te ading a bawl, aman Contractor te tungtawn a 'kipahman' a amuh, huaite lak apan aphal dandan thupigentak a va pekhe zel hi zaw hi.

Kikhemna gam ahi a, akhemtu na hi hia, ahih kei leh khem a om na hi hia ?cih kaal lak ahi.

'Huaiziakin, vaihawmna ei akipan gamlapi ah a om naknak a, diktatna in a hon phazou ngei kei: vak I ngak sek ua, himahleh, ngai in, mial ahong hijel; vakna I ngak jel ua,himahleh mial bikbek mah ah i pai nak uhi. Mit-taw bang in baang I mai pualpual ua, ahi, mit neiloute bang in I mai pualpual nak uh; khomial tuung bang in sun nasan in iki sui ua; mihat te lak ah misi bang phet ihi uhi. Vompi te bang in, ivek un I ham dupdup ua, vakhute bang in nakpitak in I thum ngutngut ua; vaihawmna I ngak ua, himahleh a om hetkei hi; hotdamna ingak ua himahleh gamlapi ah a hon omsan hi. I tatlekna te uh I ma ah akhangta ngal a,I khelhna ten ahon hek gige hi; I tatlekna te lah I kiang uah a om gige ngal a, I thulimlouhnate I thei hi. I tatlekna te,TOUPA I theihmohbawl te, I Pathian jui lou a I kiheisan te, nuaisiah thu leh helthu I gente, juau thu I pai ua, lungtang akipan I gen khiak jel te. Hichiin, vaihawmna in nunglam hon ngatsan a, diktatna in gamlapi ah hon din san ta; thutak lah kongzing ah a puk a, dikna alut thei kei hi'. (Isai 59:9-14).

Hiai thilhoihlou hidia kikawikhawm te bubit mahmah uh ahihman in, thulehla khat leh nih gelh ziak a a akizopna uh (vicious circle) suksiat vual hilou hi. Huai ding in, micitak leh lunglut mahmah bangzah hiam bek kipawl khawm a, organize tak a pan lak kul ding hi. Tua I tenna, I sikna lei, I pianna, I khanletna, sa bang I tatna, zu bang I momna, leitung a eigam icih theih omsun en in, huai min lou in, mi tengteng in hicibang kikhemna utnonlou ci'n nuaksan le hang, huaituh alampi omsun hin kilang hi.

..... ...... ...... .......