April kha a hong hita a, kumdang bang mah in leitung pumpi in Sintawpni Hoih ( Good Friday) a zatni uh a hong tung nawnta hi. Kristian omna mun khempeuh ah, mitam zaw ten Biakin a thumna leh Toupa Nitakan nekna in a nei ngei ding uh. I khosakna atuam dung zui in, atamzaw te hihdan hihkha theilou mi tampi i om ding.Kei leng huaite lak a khat ka hi. Ka khosakna Kabul apan zinglam dak 730 a Lamka ka houpih chiang in, zingan neding kuan mahmah ahita ua, huaizoh a Biakin kai ding laptum in, mikhempeuh kisa uhi. Delhi lam aten leng Gazatted Holiday ahih toh, ama zek a misi khat vuiliam hina zen in, tangval nou khat sihna tuak bang nei uhi. Ahihhang in,atamzaw te Biakin kaiding a kisa uhin ka thei hi.
Ama apan chial a ka om mah bang in, Lunch ne in ka kuan khia a,huaiapan ka kik chiang in nitaklam ahong hi ta a, damsung a khatvei Good Friday zangkhin non ding chu ka hisam hi. Ka room ah leitung ah bangthil tung hiam chih theinuam a NEWS channel te ka ban et na a India te a: NDTV ah Police ten numei sualluih(rape) a omte a ngaihsaklouh dan uh report a,police te theihlouh a a limlak uh (sting operation) toh thuah in a taklang uhi. Times Now ah India Army in poimoh kholloupi a gamdang te bawl Tatra truck tamtak 2008 a alei thu uh naktakin a gen ua, Army saplian tamtak houpih in, nekgukna thupitak theihkhiak nawn ahih thu kia gen uhi. Huaiapan CNN-IBN ah ka pai a,huaiah Maoist ten Odissa a khualzin lai Italian te khat leh MLA khat a kidnap thu uh nasa takin ana gen non ua, CM pan huai minihte suahtaktheihna dia Maoist (Naxal) makai tamkuamtak suangkulh a omte khah khiak ding lemasak ziak a a state Police te khasiatdan leh lungkimlouh dante a taklang uhi.
Gamdang te channel te adan omdeuh hiam chi in America te CNN ah la lut a, Tom Clancy makaih in South Africa gam lailung, Equator in a totkhakna mun teng a haksatna tungte ziak a mihing million 10 bang mangthang pah ding a UN organization te muhkhiak thu gen in, panpih ngai te panpihtheihna ding lampi bang a taklang hi. Gam tuamtuam apan huhna akilamet ban uah, huaiteng mai in daihlou ding ahihman in mimal olmohna nei khempeuh apan leng baihlam tak a thoh theih na dinglampi bawlsak uhi. Britain te BBC ah ka lut nawn a, Mali gam a diplomat 7 mikhelte kidnap thu hah gen in anagen uhi. Arab te news lianpen Aljahzeera ah ka kisuan nawn a, huai ah Syria gam buaina kim leh chiang mahmah in ana gen uhi. A President uh deihlouhna ziak a kiphinna hun sawtkuam apan om pen,dai tuanlou in paitou zel mah leh, athakhengtu dia President nuai a sem mah pang ding chih thu te'n mipi te patausak in, buaina pung deuhdeuh hi.
Hiai teng ka etkhit in, Kabul ah nitaklam annek hun ahita a, Good Friday bei petmah ding ahita. Anne khin sawtlou nung in ka lum ding a, zing a dam a kathoh khiak chiang in,Kiginni na hita ding hi.
A tung a thute apan I muhtheih tuh, leitung a thil tung lel te a kipahhuai leh lungnopna tun thei ding om mawngmawng lou hi. Tua buaina kigen te thulian pipi ngen ahih man un, zingchiang leh thai chiang in leng thukipahhuai hong tung mai din a gintak huai kei. Kristian te adia 'tatna' ni in gen bang mah neilou hi. Good Friday ahih malak in Black Friday hou ahiam ka chi hial hi. Good Friday I chih zong hibang ahitak chiang in, BAD Friday chi a I gen theih ding hong tun chian bang achita phet diam maw, chih bang peuh ka ngaihtuah a, leitung damsung a lamet thupitak leh nuamtak ineih khong zaw, lamet lel himaimah ding hi, chihna ka nei hi. Mimal ngaihtuahna a ahoihlam na kipiak a, kipahna nana muh theih leh, huai ahi mai a om sun.
Mi tamkhop te tangval sanlai in, kithalawptak in khanletna leh tenna gam nusia in lametna toh Delhi Khawpi te khong izuan a, nuamsatak leh lohchingtak a khosa pawl bang le I om. Anuam thuak zoulou a ahun loupi a sihna tuak pawl bang le I om. Zi leh ta nei in, u leh nau te bawl in, pupa apan iluah Indongta te bang hial leng bawl in ikhosa ua, mi bangzah hiam te bang in inn leh lou nachiang I lei khia uhi. Tate bang le hong piching in, amau a khosa thei hial ding bang leng hong hita uhi. Amau a pawt a, amau a hong tung thei ahitak chiang un, kithuahkhawmna hun tawm hiai hiai a, annek khawm a tutkhawm nasan thil haksa hong hita. Huchiin, ikiten tunglai a eigel kia I om mahbang in, tu in kum sawm asim aliam nung in, eigel kia: nupi-papi in I om nawn ta hi. Huai dinmun tuh a lohching mahmah ichih te luah ahi leltak hi. Huchibang a om thei te tuh mihampha leh lohching a ngaih ahi uh. Tate ngai a huibang mauna gam tung thei te mi vangnei ahi lai uh, leitung ah.
A kum a kha hong beizel ahihman in,taksa a leng naupan lam kimanoh lou ahih tak chian, umbang a vuai a teklam manoh leh naih mahmah ihong hita. Damsung paidan ah ahiding mah ahi.Huchia umbang vuai a tek ding ihong hihchiang in, I khanletna singtang a huih vot hiauhiau leh loupa hing dipdip te natan hon ki lunggulh nawn leuleu hi. Khangthak te sang mah in, I tekpih-ivuaipih te mah hon kingaina deuhdeuh a, amau omna lam kia uh I nga nuam ta hi.
Huchi in, I khanletna, deihthohtak a Zogam I chih zen bang,ki itna leh deihsakna toh na pallun dia, ei leng huai mun nuam leh hing didi, huihkhisiang leh damtui luanna a ngabang va leng sam dia kikoihna a om hi. Ahihziakin, tuni a thil omdan te I etchiang in, lametna lel himaimah ding a bang hi. Atak a hong tung hetlou ding pi khat ki lamen ahi. Good Friday a min lel ahih bang in, Zogam nuam ichih zong amin lel hia a,ataktak in koimah ah omlou hi.Lungsim a gam bawlna lel ahi. Huai Zogam a teng taktak ten, a inveng mahmah uleng ngailou, itlou uhi. Hinna kilak sak dong in ki hua uhi. Inn leh lou ki halsak uhi. Tagah genthei te nekzonna lampi te kisuanlahna omlou in laksak uhi.A unau sang in sum deih zaw uhi.Pathian thu sang in Politician te ngai thupi zaw uhi. A inveng mahmah natan itlou in, agaal mel sangtampi hal a teng te, a hon ngai un a hon it mahmah ding uh chih ngaihna omlou hi. En huchibang a hon it, hon ngai ding ua I ngaihtuah ziak lel mai ahi. Ngaihtuah na a thil hoih, gam hoih, lawm hoih,inveng hoih nei a kingai hi lel ihi. A taktak a huai te omlou pi ana hi.Hichibang ngaihdan Good Friday ni a genkhak tuh awmlou pi abang, ahihziak in atak tak lel mah ahi.
Wish you all Happy Easter, 2012.
.