PAU-LE-HAM KEPBIT POIMOH
-Valte Ginkhenpau
I pau-le-hamte kepbit poimoh ahi chih kuapeuhmah in i theihsa uh ahi. Kepbit poimoh ahihdan kichian sem a sim utte’n “I PIANPIH PAU MAH PIBAWL CHIATNI” chih thulu a zang a thugelh https://www.zogam.com/columnists/columnist-i/ginkhenpau-valte/3769-i-pianpih-pau-mah-pibawl-chiatni.html ah sim theih ding hi.
February 21 pen apaita 2000 kum vel apan in International Mother Language Day chi a chiamteh in om a, pau-le-ham tuamtuam omte manthat louhna ding leh tawsawn semna ding in hiai ni tuh khovel pumpi ah manphatak in zat hita hi. Khovel ah United Nations (UN) theihpih gam 195 om a, himahleh Ethnologue dungzui in khovel pumpi ah tulel in pau zaat tuamtuam 7,117 bang om hi (https://studyanylanguage.com/how-many-languages-are-there-in-the-world/). India biik ah enle, Eighth Schedule of the Indian Constitution in ahihleh India ah sorkal theihpih pau zaat 22 om chi a, Census of India of 2001 ah ahihleh India ah pau kizangtangpi 122 leh tualsuak pau tuamtuam 1,599 om chi in kichiamteh hi (https://en.wikipedia.org/wiki/Languages_of_India). Ahi a, hiai a pau om zah kigente pen ahichet hilou a, khenkhatte chiamtehnadan in bel India ah tualsuak pau leh sorkal theihpih pau zaat 19,500 om chih hi leuleu hi (https://www.ccjk.com/how-many-languages-are-spoken-in-india/).
Hiai atung a kigen khovel a pau omte lak ah khenkhatte pen tuchiang in mangthangta a, a dang khenkhatte’n manthat lam nawt hi. Hichibang a mangthang thei ding dinmun a om pau bangzahhiamte lak ah, United Nations Educational, Scientific and Cultural Organization (UNESCO) chiamtehna dungzui in, Paite pau leng telpha ahi chih mangngilh kei ni [https://en.wikipedia.org/wiki/List_of_endangered_languages_in_India#:~:text=India%20%20%20%20Language%20%20%20,%20%20aio%20%2039%20more%20rows%20 (Moseley, Christopher, ed. (2010). Atlas of the World's Languages in Danger. Memory of Peoples (3rd ed.). Paris:UNESCO Publishing. ISBN 978-92-3-104096-2. Retrieved 2015-04-11]. UNESCO mah in a chiamtehna uh dungzui in Papua New Guinea ah pau 98, United States ah pau 191, Laos ah pau 31, France ah pau 26, India ah pau 196 chihte pen a mangthang thei dinmun ah om hi. Hichibang a mangthang thei ding dinmun a om chi a kichiamteh paute pen 2050 kum tan a pau mangthang khinta leh kizang nawn lou hita ding ahi chi in misiamte’n genkhawl uhi (https://matadornetwork.com/abroad/what-can-yo-do-to-help-preserve-the-worlds-endangered-language/). Paute a manthat dekna ziak khat ahihleh sappau thansak luat ziak bang ahi. Pau tuamtuam theih a siam ding mah ahi a, himahleh tuni a eimah pau ngaina a i zat gige keileh den chiang a pau-le-ham a midangte leh nam dangte’ nawmvalh a omkha thei i hi chih mangngilh kei ni.
Ahihleh, i pau-le-ham bangchi kepbit ding? Pau-le-ham kepbit theih dingdan chii tampi om hi. A mangthang thei ding dinmun a om paute kepbit ding poimohngaih in pawl tuamtuam in panla ua, huaite lak a khenkhatte ahihleh Committee on Endangered Languages Preservation (CELP) leh Endangered Languages Project kichite bang ahi hi. Pau-le-ham khatpeuh a manthat louhna ding a panlak dingdan toh kisai Bernadine Racoma in hiai anuai a bang in gelh hi:
1) Khangthakte a pau sin ding a hasot.
2) Internet a koihlut.
3) Lai a gelhkhiak.
4) Houlimna video a khumkhiak.
5) Universities a sinsak.
(https://www.daytranslations.com/blog/preserve-endangered-languages/)
Hiai atung a kigente chiamteh in zat manphat sawm leng chih uthuai hi. Khangthak tamtakte’n tuni chiang in i pau-le-hamte adiktak in zang siam nawn lou mawk uhi. Paukhe hawihawi pawl toh, gelhkhe neinuai pawl tamta hi. Huaiziak in, a pichingzaw leh i pau zangsiamte’n khangthakte sinsak a, amaute pau-le-ham sin ding a hasot poimoh mahmah hi. Internet ah leng i laigelhsiamte un tamtak a koihlutta ua, hoih mahmah hi. Huai kia hilou in, youtube tungtawn bang in leng video tamtak kepbitna paitou lellel a, siamsinna innte ah leng Modern Indian language (MIL) in tawi in omta a, hamphathuai lua hi. Hiaite tengteng ban ah, niteng a suak, kaal teng a suak, ban ah khateng a suak tanchinbute leng i nei siseuh vanglak uhi. Ahi a, hiai tanchinbute lak ah, abiik in khateng tanchinbute bang khosuak zou lou lampang hi sim uh ahihna uah kuapeuh i pankhawm uh poimoh mahmah hi.
Pau-le-ham kepbitna ding a poimoh mahmahte lak a khat “Lai a gelhkhiak” ahi chih atung lam ah i en khinta. Tuni in, khangthangte’n hiai ngaipoimoh mahmah in sahkhovai hilou tanchinbu bang hon pankhe thak in kiman chik in hon zuak ua, kipahpihhuai mahmah uhi.
“Thaikawi Leelpi” khateng tanchinbu khankhiakna ding leh khosuahna ding in na sakhau sawk kidam kei inla, a lakha nailoute leng la gige ding kun in; i pau-le-ham a manthat ding lah a ngaihngamhuai ngal kei a. “Thaikawi Leelpi” tuh nam khangtoute i phakna khat ahih ban ah a gelhthoh a i pau-le-ham kepbitna leh thehzakna hoihtak khat ahi.
©Valte Ginkhenpau, 2022