Ginkhenpau Valte

AKIKHEK LOU SONCHING' HON ITNA LAMDANG
By V. Ginkhenpau

"U Pau, k'on mohsa tuankei," Sonching in awl in hon chi a, himahleh kei bel mohsak louh vual hi in ka kikoih kei hi.

Bangteng hileh, Sonching toh senchil pan vang kingai ka hihman un ama'n leng hon itna a bei thei tatak kei chih ka thei a, ke'n leng amah lou midang himhim ka ngaih et thei kei hi. Hinapi in, tua ka dinmun leh tulel a amah dinmun ka etkhawm chiang in kituak ka sa mahmah kei a, amah a ding in chitna himhim nei nawn lou hi in ka kimu hi.

"Sonching aw, k'on it mahmah chih na thei a, nang leng na hon it mahmah lailai chih ka haihkei. Himahleh kei hiai mun a zattheih nawn vual ding hilou a om hita mai ing a, kei n'on mangngilh hun phot ahi," ka chi a, ka khut leh khete liing susup kawm leh mit hak haksa kawmtak in, kuun ngeunguau kawm in ka dawng hi.

Sonching in leng amah ka itdan pen kei gen sese ngai tuanlou in a thei mahmah a, ka omna pindan neuchik leh uih vuvut ngei leng a thei lawtel ding in ka gingta hi. Thudang gen in hon houlimpih sawm zel mahleh ka kum kei a, hon paikhiatsan mai ding in ka kun nilouh hi.

Atawp in, khitui-naptui toh, kei lam enkawm a a ngawng nunghei vungvung in hon paikhiatsan khong hi.

Sonching mudah ka hi zenzen kei. Sonching ning ka hi thahah kei. Kei mahmah ahizaw ka muhdah leh ka nin! Kithah hial dinglah ka tangtawn mun ding mukhawl ka hihman in ka lau zel hi.

Damna ding leh hoihna ding a damdawi ne hi a ka na kikoih seklai in bel apoina ka mu kei. Kei utthu a khawlkik chet thei mai ding a ka taksa leh pumpi thuzoh ding a ka kimuan mahmah lai in bel tawthep dokdok leh gawng dildel a lamlian dung a pai a, siksia leh buangnaisia khawng khonkhawm a ippi nin nemnum khawng liangpuakte ka nuihsan mun law thamtham hi. Aziak bel, huchibang a vakthapte toh ka kiteh chiang in kei bel smart petmah in ka siangthou hiuhiau sek a, saptuam leh khotang ah hitaleh tuailai program omte ah madawk in naktak in ka pang hi. Ka nute thu leng ka sel ngeilouh man in amau leng hon muang in hon hawmthoh mahmah uhi. Sep lit chihbang om ngei vetlou. Tang khat hiam tang nih hiam om peuhleh ka lung a kim mai a, a gimnam chihlah om sese lou zawmah ahih chiang in Pathian leh kei loungal kuamah hon thei a omkei uhi. Taksa lah sisan suak in san singsong hial a, ka duang ngei leng kikhai henhon maimah ahihman in mite muhna ah bel suanhuai mahmah ka suak ngut hi. Ahi a, huai hunlai in bel fel huntawk thou ka hihna ah suantaak mah leng ka na hi him hi.

Himahleh, tu in zaw huai hunte manglam ahita hi.

Kidek zou tuan samlou ahi ngei ding a, ni nih nung in Sonching hong tung nawn hi. Aguktak in bel ka kipak mahmah a, ni khat kihal lel a hong pawt bang leng kihal sau sa lawlam chuh ka hi. Himahleh, maban limchitak nei, ka it mahmah Sonching ka khualna ziak in amah mu ut leh ka kiang a om gige ding a deih bang in ka kilang nuam kei bikbek hi.

"U Pau, hiai ah na nek ding nektheih tamlou k'on puak," Sonching in awnemtak in hon chi hi. Amah bel pianken a mi awlmohna hau mi hi a, kamdam mahmah in awsang zang ngei manglou hi.

"Bangmah hon puakpuak kei in ka chi hilou mo?," amah leng en ngel lou in ka chi numnum a, "Na naute khawng piak zawk ding eivoi," ka chih behlap hi.

"Amaute kei awlmoh ngai nawnloupi ua, nungak-tangval ahihtaak ban uah summuhna kineih chiat ahitave uale."
"Hilehle..."

Gen ding thei hetlou hinapi in "hilehle" ka chi veve hi.

Hon pizza puak bel lim mahmah ding hinapi in ka sungteng bang leng segawpta ahihman in a lim ding bangtak in lim ka sa kei a, ka lunggulh zah leng ka ne zou kei hi.

"Nidang inlah tampipi na ne sek a, u Pau. Tu'n tawm ne natel chia," khase kawmtak in, a taklam khutmuk nemtakte a ka khabe awl a hon doptouhsak kawm in hon chi a, a mittui paak nilnel ka mu hi.

A khutmukte'n hon sukkhaktak un nidang a Sonching toh khut kikilh tuah litlet kawm a mun nuamtaktak khawng a ka vakvial laite uh ka phawkkik hi. Ka lungsim a halh mahmah giauguau hang in ka taksa in a zui zou nawn mahmah kei hi. Ka taksa hatlai hita himhim lehleng ka khut tegel leh khe tegel a sikkol hon bunsak ahihman un ka it Sonching ka taikhiatpih thei tuankei ding.

"Kha khat bang inn lam a om hita ing a, ni tamzaw nang kiang a hong zang ing a," Sonching in awl in hon chi khialkhial hi.

"Na chihleh hong vehveh in ka chi a hia?," hon hehsan theihna ahihkhakleh chi in ka aw neih teng phial in ka chikhe lala a, himahleh ka hatlai bang in bel a ngaih zou hetkei. Adiktak in, Sonching in leng za zou hamham sim lampang ahizaw hi.

"Hon haw lawtel in, hon mu peih keile chinle, u Pau aw, hehpihtak in ka gennop beek hon gensak samve maw," khase kawmtak in Sonching in hon chi a, itpen kidik hithit zak bangzaw kidekzoh a haksa petmah.

Ka pau kei. Ka puansilhte lah kisegai in, namse thengthung geuh hi. Himahleh Sonching in poisa lou ahi ngei ding a, kha khat phial hong veh sung in khatvei mahleng namsia leh nin hon chih lam ka za kei hi.

Sonching in a gennop genna ding hun hon muta hi.

"Mundang a siamsin a ka omlai in nang a ding in ginomtak in ka om a, na hon laikhakte leh phone, whatsapp leh facebook khawng a n'on hasotnate'n kei mimaltak a naktak a hon hanthawn ahi. Hiaitan ka tunna ziak leng Pathian leh ka nute ban ah nang mahmah ziak ahi."

"Gen nawnk'oh!," ka kihehsak a, "Huai hunte beita ahi. Ka maban chu sihna leh meidil chauh ahita."

Pau zou ngellou pipi in ka genbeh siausiau a, "Kei lam ah nang a ding in kinepna bangmah a om nawnkei. Misi sangmah a leng zatna beizaw ka hita. Ka si khong ding a, ka sih ni chiang in mite'n 'huai khamtheih hihpa leh gutapa sikhe khongkhongta e maw' hon chi ding ua, ka sungkuante lah maizumna toh kidim in a om ding uh. Maizumhuaipi mah leng ahi him a, kei ziak a ka sungkuante nuamtak a khosa lou ahih kia uh leng hilou in khosung mite lak a leng dakkhiat ding zumhuai khop in ka koih maimah. Poisa mahleng a kikhel vekta. Ka si ding a himahleh ka nu leh pa loungal ka luang bul a tu a hon kah ut om ding in ka koih kei. Hantou ding in leng kuamah a kilawp kei ding uh..."

Huai thute ka genlaitak in Sonching hong kidek zou lou in hong kapkhia a, hon pumkawi maimah hi. Amah perfume gimnamtui mahmah leh kei taksa leh puansilh namsetakte kimil mahmah lou uh ahi chih ka thei.

"U Pau, na si kei ding. Sih ding ka zak in hon gen nawn mahmah kei maive maw, u Pau," mittui luang puapuap kawm in hon chi a, kei mittui leng a pawt ding omzek laisam ahingei ding a hong kawt nilnel sam hi.

Sonching in hon genzom zel a, "U Pau, hiai apan ka hon lakhe ding a, nidang a field work khawng a leng ka na sinsate nang tung a hon zang ding ing a hong dam hiaihiai mai ding na hi. Lungkham in kingaise hetkei in, ke'n hon taisan lou ding ka hi..."

Aw, maizen! Sonching in damkhe ding a hon um lailai tel ahi maw ka chi lungsim a, ama'n lametna hingtak a neih mawk pen mak ka sa hial hi. Keilah lametna bei kisa in maban mial mahmah nei in ka kikoih den hi.

"Sonching aw, hehpihtak in a phatuam lou ding lametna leh ngaihtuahna mangnuamtak na neihte apan in hong halhkhia inla, pil in," ka chi a, "Hon en leteh, damdawi tang khat leh nih kia a hunsa thei vual ka hi nawn kei. En in ka khut leh khe a siguite tengteng leng binggai ahita. Huaite kia hilou in, ka khe leh khalkal ban ah ka zunthakna a sigui om sunsun teng leng syringe ka zatzatna a segawp hita ahi," chi kawm in ka khut leh khete ka lak nulnul hi.

"MSW ka zillai a drugs hihzongsangte leh mipoihlawngte khawng etkol dingdan ka zilsiamsa ahi, lungkham k'oh," chi in nuihmaitak in Sonching hong om selsal a, lamdang ka sa thak zezen hi.

"Huai nang MSW zil in kei hon hondam zou mahmah ke'nte," thusim lou leh lametna beitak in ka nuihsan nenalh a, "Jesu ngial in leng keizaw hon hondam zou nawn ke'nte...," ka chih behlap lai hi.

"Eh, zenzen! U Pau, Jesu sisan in khelhna tengteng silsiang zoh louh neilou ahihdan nidang pek a na hon hilhte khawng mangngilhta na maw?," awl in hon chi a, "Pathian chou hihkhak ding thil lauhuaipi ahi, u Pau, kampau pilvan ding ahi," hon chih behlap hi.

"Mikhial laklak a mikhial tungnung ka hi a, thei kawmkawm khawng a ana khial ka hihna ah kei a ding in bel vangam lamlam ah lametna om in ka thei kei," awl a chi kawm in, baang a ka kingaihdan kihei ka thuah a, puteksiate mah bang in ka om khawikhawi maimah hi.

Nidang in, saptuamte'n a hon suan mahmah pawl khat uh ka na hisam a, himahleh aguk-agal in damdawi tang nek ka na chiing kha hi. Ka sungkuante hon theih khiat nung in bel a khawk petmah ka na himanta a, nungkik thei nawn vual ding ka na hi kei hi. Sonching ngial in bel, Class XII ka zoh ua kipan amah mundang a omsuak den ahihban ah tomchik hong pai sunsun chiang a kei ka na hat deuhlai hisek ahihman in damlou hidan peuh in ka kigenkhe thei hi. BSW a sin apan hong pai nawn lou vengveng in, MSW hon zohkhiattak in hong pai pan a, himahleh ke'n leng amah it leh deihsak lawsam ka hihman in ka kithuzak chiang un ahoihlamte ngen ka genpih hi. A sungkuante leh kei sungkuante'n leng ki-it mahmah ka hihdan uh hon thei ahihman un hon awlmoh mahmah uhi. Kei pen buaise sim a ka hong omtak in Sonching' nu leh pate kiang ah ngaihdam ka va ngen a, Sonching maban ding khualna a ka omdan ginaloute amah theisak lou a im bikbek ding in ka va kun teitei hi. Hon nial nilouh mahle uh kapzen a ka va nget ban a kei pen kibawl hoih zou vual nawn lou ding ka hihna ah Sonching pen kei apan hemkhe di'a ka kichiam ziak in hon lemsakpih thei khongkhong uhi. "Pasal hoihtak a hon neihna ding in Sonching ka hasuan ding a, ka siatna noute leh kei hitaleng kuamah in amah i theisak kei ding uh. Keizaw hichi ka hitamai. Maban ka nei kei. Sonching maban ding ahi i buaipih zawk ding uh," ka chi hi.

Sonching in hiai thute a hong tun nung kal khat vel in theikhe vek pan hi. Himahleh, a siamsinna hun sung tengteng a ka hasotna leh deihsakna thute ziak in kuamah dang a lungsim ah ana pe thei kei hi. Agal a a omlai in leng huailam khawng a eimi tangval feltaktakte toh ana kimaikhe ding in ka hasuan sek a, ama'n leng amah try om zezeuh thou ahihdante khawng hon hilh zel hi. Ke'nlah ka omdan hoihloute hilh ngam lou ka hihman in, a hoih lai dandan in amah ka houpih den hi. Tangval dang amah toh kituak thou hi a ka theih khat toh hong kithuzak theihtak un kei pen, haksa sagu sim mahleng ka hihna kitheichian lawtel ka hihman in, awlawl in ka na kihemkhia hi. Ama'n hon thuzak zel sawm mahleh paulap khenkhat khawng bawl in ka hemkhe zel a, huchi in MSW a zil lai in kum khat sung in, atamtawp in thumvei khawng lel ka kithuzak lel uhi.

Sonching in, "U Pau, bang achia na omdan diktak na hon hilh pah louh a? Ka hon panpih theihna bang omsam kha thei hi a," hon chi hi.

Sonching thugen adikna chiang om mah ei. Himahleh, kei pen keimah thu deih mi ka hihna ah BA ka zoh in private school khenkhat a sem in ka zatkhop sum ka kimuh hi. Huaite zang in ka sungkuante subuai lou in bangtanhiam ka om zou a, himahleh ka hong zongsat a ka hong uat luat chiang in ka sepna ah leng ka hon sem thei nawn kei hi. Saptuam Upate bang, Evangelist-te bang, Missionary-te bang leh Gospel Camp leh Crusade khawng ah leng hon koihsam mahle uh hon thuhilhtute bang Bible chang kilawmtaktak zang in ka sel thalsek hi. Atui omleh dawn, atang omleh ne, avui omleh diik, kaap ding omleh kaap in ka omta a, niteng a sum poimoh ahihman in guk theihtheih gu in, suam theihtheih ka suam hi. Huaite tengteng nung a tua ka omdan tan tung ka hita. Tu'n bel, ka sungkuante'n lah hon enkol zou nawn lou uh ahihna ah ka hoihkhiat theihna a hih zenzen lai khakleh chihna in a huham deuh a kigen Rehabilitation Centre khat ah hon koih ua, sikkhainiang buhsak in pindan nin leh neuchik sung ah zun leh ek toh khumbichilh det in ka om maimahta hi. Hiai mun ah kithuhilhna omsek mahleh ka pilkhel leh uat luat ziak in khum tuam in ka om hial hi.

"U Pau, hehpihtak in kei omlouh sung a na omdan khenkhat na hon hilh thei diam?," Sonching in kisuanlahna lianpi toh hon chi hi. Ke'nlah, "Na theih a kanna bangmah om nawn ke'nte. Tunle na inn lam uah paimangta oh," ka chih khum hi.

Sonching khasia kisa lua a, hichibang kampaute kei apat a zakte paw zou nawn lou hi.

"U Pau, huchia kei leng hon thulak lou a om ding na hihleh inn lam ah ka paimang ngut ding. Nang hihte bangbang ke'n leng ka hih ding a, nang omna mun a hon koihkhawm ut kei hial uh lehleng k'on itpen nanglah kei hon haw lua a hon mu peih nawn lou na hihna ah kei a ding in leng hinman a om nawn kei a, huaiziak in ka ettonpen nangmah omdan in ka va khosa ding awleh..."

Kap huphup kawm in ka pindan kawchiktak nawse ding in kisa hi. Ka khou tuankei a, a gen bang a huchia omse hial ut ding in leng muanmohna himhim ka nei kei hi.

Ni khat hong beizoh nung in ka nute'n hong veh ua, a pai dek un 'Sonching in nang hon it luat ziak in nang omdandan a om sawm ahi' chih teng lel hon hilh uhi.

Huai thu ka zak chiang in ka omtheita kei a, huai zan ngei leng ka ihmu kei hi. Sonching bang ka mangsiat lai zawmah hi. Azingkal phalvak ding vel apan in ka pindan baang ka bengging den a himahleh kuamah in hong enkhe kei uh. Zingann nek hun in leng bangmah ka duh kei a, Sonching kiakia ka ngaihtuahta hi. Khamtheih aniamzaw deuh a avangkim a hon piak ziak un chu ka hing hamham ahi. Kei gina kei lengle amah beek milohching a hong hih ding ka deihsak mahmah a, ka houpihdante'n kei hon hawsak a hon mangngilh thei mai ding ka saklai in a hon itna pungsak zaw ahimaw ka chi hi. Hon it kuamah om nawn lou a, Pathian ngei in leng hon nungngatsanta hi a ka koih lai in ka ngaihtuahna hoih lou lel ahizaw chihte ka hon ngaihtuahkheta hi.

Ni thum ann ne lou leh tui dawn lou a ka kul sung a ka om chiang in hon koihtute leng patau ua, hong houpih uhi. Ka pau zou ngel kei a, ka genzoh sunsun tuh 'Sonching ka mu ut, Sonching hon musak un' chih teng ahi mai hi. Kisikna ngen in ka pumdim a, khuisa a thum hithit in keimah zakkhop ding in Sonching tung leh Pathian tung ah ngaihdam ngen in ka mauden mai hi.

Sonching hon sam ngut ua, midang teng pawtkhesak ua, kou tegel chauh hon omsak uhi. Ka damtheihna kisiat behlai ahihman in pindan lianzaw leh siangthouzaw sung ah hon omsak uhi. Ann ne lou a ni bangzahhiamtak omta ka hihna ah, muh lahlah a a zonkhiat uh ka sigui ah RL leh Dextrose 5% chihte buk tamkhop hon khai zom ziahziah maimah uhi. Huchi in, Sonching in a theihnop mahmah ka hunlui tomkim ka hilh ngapta hi.

Ka kipat chiil in mite'n khamtheih hih hidan a hon ngoh uh chiang bang in ka im a, mi hoih mahmah bang in ka kikoihsek hi. Ka sungkuante bang in leng hon muangmoh lou uh ahihna uah hon gumkhasek zawmah lai uhi. Saptuam Upa hong thuhilh leh thumsak di'a hong kuante khawng kiang peuh a sumpung hawm leh nekguk-takguk thute ah nou leng na dik tuansam ua hia khawng ka na chi gagaih hi. Mahni mit a singtum mu lou a midang mit a ninneng mu chi peuh in ka na demsek hi. Khamtheih hihte huat tuan ding hilou ahi aziak chu kuamah hoih bukim om lou peuh ka na chihkhum hi. Mite'n khamtheih hihte a mohsak chiang bang un khamtheih hihte leng tawpkik thei veve uh ahi peuh ka chisek a, mihoihte tan ding hilou in mikhialte tan ding in Jesu a hong pai ahizaw ka chi phanphan deuhvel hi. Mi tengteng in khamtheih hih nei chiat i hi: huai tuh banghiam zongsat i nei uh ka chihna ahi ka chisek hi. Khenkhatte zu-le-sa ah; khenkhatte sum-le-pai ah; khenkhatte numei-pasal kal ah; khenkhatte gitlouhna tuamtuam ah chi khawng in hon thuhilhtute ka na lehchih khum ekek sek a, khenkhatte bang ngial houh gen ding thei lou in hon kiksan uhi. Huai hunlai in phawk kei mahleng, kei siatna ding tan lel a pil ka hihdan tu in ka theikheta a himahleh a zekai lawta. Ka thil gukhihte ngei leng ka ut hunhun a tawp chet thei mai dingdan a ka na kikoihleh ana hi zenzen kei a, ka hong zongsat chiang in keileh kei bang ka kining gawpzak hi. Kining selua bang ka hehtha kiakia khawng suak in bangmah awlmoh nei lou in utdandan in, gilou taktak in ka gamtang hi. Ka hong hoih sawm chiang in mite'n hon gingta thei nawn lou in, muanmohna toh hon en gige ua huaite khawng mah paulap in ka pukloh nawn zelsek hi. Tu in bel, Pathian in leng hon paisanta hi in ka kithei.

Ka mittui hong takkhe zungzung a, ka dangtawng teng binggawp in ka paukhe thei nawn kei hi. Kei pau chih louh ngal thawm dang himhim pindan sung ah zak ding a om kei a, ka nakging leh avangkim a Sonching khuisa leh kidik gingte bel kizachiang mahmah hi.

Lunglut leh kamka heuhou in, bil lawkzen in Sonching in hon na ngaikhe nilouh hi. Ka gen dingte gim pipi a ka genzohtak in amah leng a gawl khawng hong kikhuahsiang phot in, hon houpih sawm hi.

Ke'n leng, tu hun chet inchu hun a deih zahzah hun thoveng a zat ka phalsak hi.

"U Pau, mite'n hon hua a, Pathian ngei in leng hon paisan na sak pen nangmah mimal kikoihdan ahi. Hon sal a hon taite pen hon ittute ahizaw ua, Pathian in a sawite pen a itte ahi uh chih mangngilh kei in," tamkhop a gen nung in hiai thute Sonching in hon genbeh hi.

"A thu inzaw theihdan khat in theimah veng aw hilehleng a huntak a pil atheihsiam haksa ka na sakha nak a ahi. Hon ngaidam in," ka chi a, ka khitui pawtte ama'n leng men phemphom kawm in hon nulsak thiamthiam hi.

"U Pau, ka hon ngai lua... Bangchizong teng in omsia kichi mahle chihnle k'on itna a kidang thei tuankei a, a kidang tuankei ding."

Ka kipak gusim mahmah a, "Ka it Sonching aw, ke'nle zaw nang loungal liapal dang it nei lou keive aw," chih sukmai bang ka ut hial hi. Himahleh, kei a ding in thil bangkim a kikhelta chih ka theih ziak in ka nuihmai leh kisuanlahmai lel ka lak hi.

"U Pau, thilkhat ngetnop ka hon nei a, n'on nial louh ding ahi aw?"

A kiten ni chiang ua ngap dandan a va kilaak ding a hon ngen dek adiam?

Ahihkeileh, Bible thak hon piak sawm hialeh?

Ahihkeileh, bang hon nget sawm ahi mahmah de-aw chi in ka na gukbuai simten hi.

Sihngak lel a om kei maimai kiang a Sonching in ngetnop a hon neihleh bel nial buanglou e ka chi lungsim a, "Genve," ka chita hi.

"Hon kitenpih in, u Pau."

Ka hihuai zezen a, ka om helhawl zezen hi. Lamdang ka sa lua a, a mel etlawmtak bang ka en tuantuan kha hial hi.

"A hai na maw?!," ka chikhe kha guih a, "A sikhe lou lel, a sibang ka hih mangngilh na maw?"

"Hai hike'ng kichi nuam mahleng nang ngai a hai ka hi. Mangngilh bel bangmah ka nei kei. Lungsim chiang kilkel toh k'on nget ahi."

"A sidek hilou, a zatna omlai pasal na neih ding ahi. Ka dinmun thei kimvek lou na hi."

"Na dinmun tengteng ka thei kimvek mah ei, u Pau. Doctor in kha nih leng daih nawn lou ding hon chih ahihdante khawng leng thei vek ka hi. Ka theih ziak a ka hon nget ahizaw. Hon nial ke'n, u Pau, hehpihtak in..."

Hiai teng a gen zoh in, ke'n dawnna ka piak ding lau in kongkhak lam a tai kawm in, "Hong kik nawn ding ka hi," nui selsal a kipahmel kawmtak pu in inn kong lam ah hon taipawtsan hi.

Hong lut nawn het kei a, huai ni huai pindan ah kei chauh in ka zang bei hi.

Ni li hong bei. Sonching hong kik lou.

A ni nga ni a leng hong dawk om lou.

Ni guk ni a leng amah hileh kei lamte kuamah mu lou.

Pathianni hong tungta a, huai bel a ni sagih ni hita hi. Zinglam dak 11 hong gin toh kiton in Pastor khat, a taklam lenuai a Bible lianpi khat zep kawm in, awl in hong lut hi. Amah nung ah ka sungkuante hong lut nawn ua, huchi in mi tamlou in hon zuilut uhi.

Ka taklam pang lukhung zawn a ding kawm in Pastor in a Bible hon pheen hi.

Ka lu ka phong tou a, lamdang ka sa mahmah hi. Ka nute lah nuihmai heuhau chiat zawmah lai uhi. Ka lungsim ah, ngaih-a-ngaih in, "Si nailou sam keive... Ka sih ding kal ngaklah lawman na hi ding uh maw, maimah oh...!," chi in ka kikou hi.

Huchi laitak in, Pastor in, "Tu'n ah a pa'n Mou ding hon pilutta hen aw," hon chikhe mawk!

Huai toh kiton in, moupuan kilawm siang-ngou sitset silh in Sonching tuh a pa' veilam tongkawi lenkawm in ka omna pindan siang sitset ah hong lut uhi. "You look beautiful in white" chih ka lungsim ah hong kilang a, Toupa Jesu Khrist leh A mou kitenna ni ding bang ka ngaihtuah thakthak hi.

Bangmah genlou in, ka ngawng ka phong tou a, awl in ka tu touta hi.

Pastor in lupna tung apan kumkhe di'n awl in hon kawkmuh a, Sonching taklam ah, ka damlou puante toh ka ding ekta maimah hi.

"Nungak fel leh melhoih Lia Sonching kuhkalna, chihtakna leh itna thupitakte ziak in tuni in kitenna sai thei ding in i om ua kipahhuai mahmah hi," Pastor in hon chita hi.

Ka dip bang a kisai lutlut zezen a, bang natna nei ka hi hiam chih lamlam leng bangmah ka thei nawn kei a, kipahna ngen in ka dim hi.

Pastor in genzom zel a, "Pathian piak pilna leh siamna zang in Lia Sonching in a it mahmah a u Pau kiang ah amah a kiphawkkhiat theihna ding in amah mah bang a hinkhua zat sawm ahihdan vaukholhna va pia a, huaimah Pathian in zang a tu'n ah a u Pau hong kiphawkkhia a kipahhuai i sa ahi," chi in hon gen hi. Sonching in amah sungkuante leh kei sungkuante toh pangkhawm a nna sem ahihdan ka thei khe thak a, a itna thupi ka sa mahmah hi.

Huaizoh in Pastor in, "Itna zaw chikchiangmah in a bei kei ding," chih teng hon simkhiat zoh in a Bible khup a, ka khut tegel uh lenkawm in paikhawmte mai ah kitenna hon puangkheta hi.

Nitak in kei leh Sonching chauh huai mun ah hon giaksak uhi.

"Ka itluat Sonching aw," chi kawm in ka lupna apan amah lam ah ka kihei a, a biang zutsak thiamthiam kawm in, "Itna diktak omzia muhna ding in ka mit n'on vaksak a, Pathian lam a leng kik thak a ka om ziak in sih ding himhim lauhna ka nei nawn kei. Na tung ah ka kipak lua," ka chi hi.

Huaitak in, Sonching in ka muk gawsim leh gawngtak mai hawmthohtak in hon tawp nelsak kawm in, "Toupa Jesu hon itna ziak vek ahizaw," hon chi hi.

[Ataktak bangthei di'a phuahtawm pumlum ahi. ©Valte Ginkhenpau, 2016]