Ginkhenpau Valte

ZRO-ZRA MIN A KHUALZINNA
By Valte Ginkhenpau
 
Zogam Tungdingthak Pawl khat kihisam ven chi in lawmte kiang ah khawvel pumpi a Zomite omna mun poimoh teng vehkual vek zoukei mahleng Manipur sung leh akiim a om Zomite omna khawpi lianzaw deuhte vavehsuak thei leng chi in ka gen a, amau leng hoih ana sakluat ziak un ka kithukim thei pah vanglak uhi.
 
Ahi a, hiai bel nidang pek a kou ZRO-ZRA pawl in ka na tup uleh ka na genkhawm seksa uh leng ahi him ahi.
 
“I zinkual hun chiang un i pawlpi minsiatna ding leh melhemna ding kuama’n gel kei ni hang in, Zogam leh Zomite khantouhna ding chauh ngaihtuah ni,” ka chi a, paikhawmte’n hon thukimpih mahmah uh ahi chih a lu uh a kunsak ngaungau dante ua pan in ka theithei mai hi.
 
Ka tutna apan dingtou in, ka zadang a ka sofa tutna nungkhin kawm in, “Ahihleh, lawmte, kisa pah nileh!,” ka chi hi.
 
“Sia Pau, ahihleh bang khua ah i pan masapen ding uale?,” Public Relation Officer (PRO) Khuma in hon chi phut a, kei leng tomchik kunsuk in ka ngaihtuah zok a, huaizoh in…
 
“Sagang khawpi ah pan ni. Na kiman uh maw?,” chi in ka dawng hi. Zomi tangval za khat vel omte’n a taklam uh liktou in “Zogam leh Zomite a ding in ka kiman gige!” hon chi zuazua bang uh bel nuam mahmah eive.
 
Huchi in, lungsim a omsa vehkual ding khuate PRO kiang ah ka gelh khesak pah a, huai khuate bel Sagang, Kangpokpi, Lingsiphai, Singngat, Haichin, Parbung, Thanlon, Hanship leh Ngopa hi masa a, ahun leh amun zil a khawdang leng phak theih dingdan in ka hilh hi.
 
“Bang gari zang a, mi bangzah, gari bangzah a kuankhe ding chi e, heutupa?,” Transport lam mohpuakna piak a om pen in hon chi gaih hi. Ahitak a gen in paivialna ding lam toh kisai bang leng nna lianpi khat ahihna ah buaipih tham mahmah khat a suak ngut hi.
 
“Eee… Huai lam chuh buaihuai a om kei ding. All Lamka Bus Owners’ & Drivers’ Association-te (ALBODA) ka om uh. Bus a poimoh ding zah hon gen geih mai un,” chi in anawl khat apan ALBODA President Sian Lian hong kikoukhe phei a, hong fel pah di’n kilang hi.
 
“That’s the spirit!,” ka chi phei pah kha phut a, ka ngaihtuah thakleh bangziak pentak a eipau zanglou a sappau ka va khelh sese a de-aw ka chi thak sim hi.
 
Zinkual sung daih thei ding chi in Aganwadi a heutu liante’n bawngnawi leh a poimoh teng hon thoh ua, DI 407 khat ah guang uhi.
 
Nek leh tak toh kisai Every Little Help Store, Mualveng in hon thoh vek sawm hial chiang in, hiai pen mimal a ahihman in mipi ki-awi lou in wholesale rate in bangzahhiam kileisak hi.
 
Lamka Public Ground kiang a om Lamka Community Hall a numei leh naupang simlouh inn dim phial a omkhawm bangzaw kithutuahna kilang petmah eive.
 
Hall kongpi a pawtkhe phei in Mualveng lam en kawm in lamlian a gari taite ka en a, lamlian leivui khu a dim in hitan hon puangsak thei dingdan eive chih hon ngaihtuah khesak hi.
 
Sawtlou khawdak pan ka kisakleh, Lamka a Bus om tengteng chih zezen ding a diam ah Bus tamtak Lamka Public Ground ah hong tailut huthut ua, leivui khu tam lawkeileh bel nasa zeizoi kha maithei ding hi.
 
“Bus hiaizahzah i zangkei ding ua,” ka chi a, “Mi za khat lel i zinkhe zaw mai ding uh. I zinna lamte khosakna dinmun ana kibang kimvek khollou kha ding uh ahi,” ka chi hi.
 
Kintak in tangval zangkhaite hong kipei pah vitvit ua, a zin dingte hon sehkhe khin pah mai uhi.
Sagang ka zot ma un kintak in huai lamte theihsakna pepah ua, amau leng ana kilawp mahmah napi in kinoh lua a sakdan uh hon hilh kik uhi.
 
Himahleh zan giak lou ding chih a theih uh chiang in kihoulem theih in om pah vanglak hi.
 
Tuabangmah in khaw tuamtuam veh a om dingte theihsakna kipe suak ngal a, kal khat sung a vehkual zoh vek ding in kigen hi.
 
Amun ka tun un Kom pau siamte hong kipei pah ua, pau leh ham ah leng kinaih mahmah in om hi. Zogam tundingna ding a poimoh thute dakkal nih kikup zoh in Kangpokpi lam ka zuan nawn uhi.
 
Kangpokpi khua ahihleh mi tamtak in zasek mahleh ataktak in a mukhalou tam mahmah hi. Thadou-Kuki pau bel atangpi in Lamka lamte’n kithei ahihman in kamlet bel poimoh lou suak hi. Huchi in huai khua ah leng Sagang a kigen thute mah gen in dakkal nih nung in Lamka kizuan kik hi.
 
A zingchiang in Lingsiphai ah Hausapu makaihna nuai ah dakkal nih chet Vaiphei pau ngat in houlimna om a, nuam kisa chiat hi.
 
Lingsiphai apan Singngat ah tailut in Zou Veng ah houlimna kinei a, khenkhatte bang in Zou Thai a Paupu dialogue a theihte uh khawng zang in nuamsa leh kipak in ana nuikhawm lalaih uhi.
 
Singngat apan Haichin ah taisuak in, Ngaih Anglai a kampau nalhtaktak a zatte uh khawng zang in kichiamnuih in mi pawl khat a om uh chih hon hilh ua, ka kipahpih mahmah hi. Houlimna zou in Lamka ah kikik nawn a, kikhomial dimdem zou hi.
 
Zingchiang a kipatkhiat nawn ding a thukim in ka kikhen uhi.
 
Zingkal in Tipaimukh lamlian tawn in Parbung khua kitung a, huai ah hun vakizang nawn hi. Hausapu in Hmar pau a hon zatleh a thei lou simsim om ua himahleh ama’n a gensiam ziak ahingei ding a lehkhiat hial bel ngai samlou hi.
 
Huaizoh in Thanlon ah kigiaklut hi. Thanlon ka tun nitak un Hausapa lemsakpihna toh houlimna nuamtak kizang a, Simte pau nalhdan huai nitak in kilangchian mahmah hi.
 
Thanlon apan in Guite Kual lam ah ka kihei ua, Hanship khua ka va hoh uhi. Hausapa phalna toh mah in hiai khua ah houlimna kinei a, Paite pau hichitel a khauh ahi maw chih theih ding bang khop in thugente paukhe kolkol uhi. Himahleh Zo’ suante lak a Paite pau thei lou a om louh man in pau kikoppen hon suak a, kuapeuh inntek kisa vek thei uh hi in ka mu hi.
 
Hiai zinkual sung a ka taikhakna khua khempeuh uah Zogam leh Zomite kigawmkhawmna ding ban ah khantouhna ding thute kigelhna laidal ka hawm vek uhi. Tuni chiang a lai sim theilou om taktak nawn lou ahihna ah hiai in nahoihtak sem ngei ding in ka lamen uhi.
 
Azohna ding leng hita ahih toh kiton in Ngopa ka zot lai bang un nuam ka sa mahmah ua, Zogam ngaihna late bang khah leh sa in tangvalte phur thei mahmah uhi. Ngopa ah leng Village Council (VC) heutute ana siam mahmah ua, kinaihsemna ding chih ziak a diam ah ‘r’ zangsiam loute bang in leng zat sawm teitei in om ua, hoih vanglak hi. Atawpna leng hitaven chi in Ngopa VC-te’n gan hon goh ua, niang leh tai a ka nek zoh nung un Zomite kisaktheihpih mahmah khopi Lamka lam zuan ding in ka hong tai khia uhi.
 
Lum vingveng in k’ong tai ua, khua ka totkhak khempeuhte un nopsakchi hon sa mahmah uh ahihdan a mit hahdante uh leh a kam katdante ua pan in kithei mai hi. Khente’n lah galpi om dek hia chih bawl in hon na en heuhou geuh ua, genchetna ding hun man omlou ahihman in, a khua zil a pau kizangte pau zang a kigelh laidal ka vawkkhe zel uhi.
 
Tuivai Lui leipi ka hon kan uleh bel leivui khut kipan pah chih ding ahimai. Hiai khawngte ziak mahmah a leng ZRO-ZRA kipankhia akahia peuh chi in ka au zuazua ua, Zogam pallut hun ding ngaklahhuai ka sa chiat uhi.
 
Akhenchiang in ZNC hatlai a gen sekte uh bang ka phawk a, khangthakte’n amau sulnung kithutuaktak a zui thei ding a kibat ziak in lungmuanhuai ka sa mahmah hi.
 
Ka kipahna leh thupi ka sak mahmah diak khat ahihleh mi huaizah khualzinkhawmte’n Zomi sung a pau tuamtuam omte kizang kop nilnial theivek a, ‘nang huai pau zangte na hi’ chihleh ‘nang huai khuate na hi a huchi neive’ kichi tuah a kina leh kiselbuai a omlam kuamah in a hon hilh kei uhi. Khawvel khangthu a kigen minthang Alexander The Great in a pa Macedonia gam Kumpi Philip lalgam kipumkhatna ding leh kekletna ding a a panlakdante khawng ka ngaihtuah khe hial hi. Khawvel a mi kipumkhat theiloupente chih in na om hilhial himahle uh Alexander in hon huaikhawm in, lalgam liantak hon suah a, Greek-mite sung a pau tuamtuam omte lakkhawm Koine Greek kichi hon piangkhesak zou hial hi.
 
Taitou zel in ninem lam in Sinzawl ka tung uhi. Huai khua a eimi hotel khat a sawtlou ka khawltawldam zoh nung un ka hong kisakhe nawn leuleu uhi.
 
Songtal khua ka hong tun un khawlai mun khat ah sepaih uniform silh a galvan tawi bangzahhiam galvil in ana ding uhi. Ka thawmging uh galzak pah ahingei ding ua ana kigal ging uh hi in ka thei hi.
 
Kou lah Bus bangzahhiam dim phitphet a thawmngaihtak toh, full uniform leh vanzat hoihtaktak tawi ka hi zawmah uhi.
 
Kuapeuh husa nei nawn lou phot ding in ka kihilh suak pah ua, lamlian khaktan kongpi a bawl ua pan lam sawmlenga ding vel ah ka gari masapen uh ka khawlsak uhi. Amaute buluh ding a kuan hon sa ahi ngei ding ua a galvante uh khawng hon kamging thrapthrap maimah uhi.
 
Kibohtuah thei ding bang a a kilat man in PRO ka sawl a, kongpi a galvil heutupa kiang ah va pai hi.
 
“Koi apan hong pai na hi ua?”
“Ngopa apan hong pai ka hi uh. Ka paisuak thei ding uam?”
“Noute bang pawl na hi ua? Mi hiaizah bang bawl a va zin?”
“Kou ahihleh ZRO-ZRA kichite pawl ka hi uh.”
 
Kigamla lawtel lou ahihban ah nakpipi a kihoupih tuah uh ahihman in ama’n leng nak simsim in dawng a, kou omna apan leng kigalzak zou hi.
 
Huai a gentak in galvil heutupa’n a lawmte kiging semsem ding in thu pia a, ka PRO pen uh khukdin di’n sawl a, a khut tegel a dek a koihtou ding in kikoukhum lala hi.
 
Gari apan ka kumkhiat dekleh thautawi khat hong kikou phei kongkong in hon ngim tenton a, lutkik ding in hon sawl hi.
 
Kei leng awl in ka lutkik hi.
 
“K’on dotnate chauh na hon dawn ding ahi. Na theina maw?”
“He, ka thei. Bangthu ahiale?”
“Na makai uh kua ahia?”
“Ka makai uh maw Sia Pau ahi.”
 
Ka tangvalte un hiaite a muh chiang un a tha uh thak in, kumkhiat sawm pawl na om uhi. Ahuchih chiang in galvil heutupa’n PRO pen a thauneu toh a lutang sutuah in na naupangte om kinken ding in thu pia in chi hi. Ama’n leng kou lam hon en in om kinken ding in hon huau kawm in a khut hon vaan hi.
 
Huchih sung in galvil heutupa tung a khat hilh ua, amah zong hong tung pah hi.
 
“Bang thu ahia?”
“Sir, hiai mipa’n ZRO-ZRA pawlte ka hi uh chi a… En leteh huai a Bus sung ah leng mi tampi om lai uh ahi.”
 
A heutupa’n leng thil omdan mu vek khin hi. Ka PRO pen uh mai a va ding in banghiam ngaih deuh in gen hi.
 
“ZRO/ZRA kichi koute ka hi uh! Bangziak a nou buaina bawlsawm?”
“Heutute aw, buaina bawl sawm ka hikei uh. Zogam leh Zomite kipumkhatna ding leh khantouhna ding tup a nei pawlpi ka hi uh.”
“Kou tup leh ngim huai mah ahi. Bangchidan a nou pawl tuam kaai na hi ua?”
“Pawl kai ka hikei uh.”
 
A heutulian uh heh gawp in a thauneu lakhia in kaplup mai sawm bang hi. Huchih laitak in khoutung lam apan kuahiam in thu va pesak ahingei ding a, amau leh amau hong kihou tiptip zoh un kei hong pikhia uhi. Mi khat in ka khut tegel hon nunglehensawm a, adangte’n ka banbul a naktak a hon lenkip in, bangzahhiam in thau toh hon ngim ua, Bus a tuangte leng va umkimvel uhi.
 
Khou tung lam a inn khat ah hon pilut ua, dohkan hoihtak mai ah hon tusak uhi.
 
Ka khut hon henna uh a phel tuanlouh man un a nuam hetkei.
 
Midang khat hong lut nawn a, amah toh khokhung lam ah gari in ka taitou ua, ka nung uah vengtu bangzahhiam leng hong tai uhi.
 
Sawtlou ka tai zoh un sepaih camp thupitak khat ka tung uhi.
 
Pindan lian lou khat ah hon khum masa ua, huaitak in tangval thathak nih in hon chil zialzial ua a nuamchiam hetkei. Hon pek uh toh, hon bet uh toh, thaubul a hon khet uh toh, a naa leh nuamlou theithei dingdan ngen in hon khoih zialzial mawk uhi.
 
Anaa chi leng kipak deuhdeuh uh bang. A thu in gen ni chi leng kou a thugen dingte hilou chi zel uh. Gen tam zekle dai dide zaw di’a hon sawl zel uh. Bang hihkhelh nei ka hia chi leng hihkhelh na neih louhtak in hon kiman ding hia chi zel uh. Anat kia hilou in a buaihuai!
 
Deihtawk a hon soisak zoh un inn noptuak deuhmai khat ah hon pilut ua, huai ah heutu liantak, muhngei ding bang mahmah khat na tu hi. A hon muhtak in ama’n leng lamdang sakchitak in om a…
 
“Eh, nang ana hi maw?”
 
A aw apan ka thei pah hi. Ka program tengteng uh phone tungtawn ngen a ka kikup ziak un a aw bel ka thei lai mahmah hi. Maitang a kimuhtuah ding leng ka gensa uh ahi a himahleh khatvei mah leng ka kimukha tuah naikei lai uhi.
 
“Kei himah ing ei, Sia. Kigen lenglah naupangte’n hon ngaikhe lou ua…”
 
Ka nungzang khawng golhnat pian a, nuam hetlou hi.
 
A kisuanlahthu naktak in hon gen a, a thu ana zakdan a amau apan taikhe pawl khat in hong buluh sawm chi uh chi in hon hilh hi. Poi in poikeitaleh ka thuak ding teng bel thuakkhin keitave ka chi lungsim hi.
 
Amah gari ngei in a naupang hong koihtoute toh ka taisuk ua, lamlian a galvilte kiang ah ka va pai uhi. Huai mun a omte kiang a a pilvan kim zoh louh ziak ua a thilhihkhelh man uh gawtna tuak ding uh ahihdan a gen chiang in ke’n nuam ka na sakei zel hi.
 
“Sia, huchih a ngai tuan kei. A nasep ding uh sem lel mah ahi uh. Ahi a, ka hoihsakdan in bel tunung chiang in tup kibangte lungkhat in luangkhawm in, aneupen apan alianpen tan in kithuzak kim sipsip thei leng ahoih ding in ka gingta.”
“Himah e. Hihkhelhna poi lua.”
 
Huai mun a galvil heutu in ka kiang ah ngaihdam hong ngen a, ka na ngaidam pah hi.
 
“Na heutu uh kua hiam ka chihleh Sia Pau chi a, na pawl min uh bang hiam ka chihleh ZRO-ZRA chizel a ana theikhial mah ka hi. Hon maisak in maw?,” hon chi hi.
 
Sia-pa toh ki-entuah in ka nui uhi.
 
“ZRO kichipen Zogam Rebuilding Organization (Zogam Tungdingthak Pawl) hi a, ZRA pen Zogam Rebuilding Agents ka chihna uh ahi. En leteh huai a full uniform a silh uh leng sepaih puanak ahikei a, a vanzat hoihtaktak tawite uh leng galvan ahikei.”
 
Amah kisuanglah deuhdeuh a, ke’n leng ka genzom tou zel hi.
 
“Kou tu’n Zogam a Zomite lak a kineksiatna, kisualluihna, kithahna leh kipawlkhennate a om nawn louh ding tangkoupihna nei lel ka hi uh. Sianthouna toh khantouhna in a opkhum gam khat, pau khat, lai khat, tup khat a i hong om theihna ding uh thuhoih a zuak leh semkhete ka hi uh,” ka chih behlai hi.
 
Alehlam ah, ka PRO uh lah lungkim theilou sim in om a, himahleh awl a ka gen chiang in hon theisiam thei khong hi.
 
Khualzinte singpi leh nektheih limtak hon neksak zoh in Heutupa in siamtak in hon khakhia hi.
 
Lampi a ka pai touhzelna uah hiai thu ka ngaihtuah tou nilouh kha hi.
 
“Hiaibang thil omkha theimah eive,” ka chi lungsim hi.
 
©Valte Ginkhenpau, 2015
(Ataktak bang thei ding a phuahtawm pumlum ahi)