LUNGKIMNA
– V. Ginkhenpau
Laisiangthou in “lungkimna toh kithuah Pasian limsakna tuh punna thupitak ahi” achi (I Tim. 6:6). Lungkimna khatpeuh bel lungkhamna sang in a hoihzaw chih i thei, himahleh Pasian limsakna toh kihel/kizui lungkimna pen thupi in deihhuai khol diak hi.
Hiai a Paul in “lungkimna” chih genna a kammal ana zat pen Thukhun Thak kigelhna Greek pau ah “autarkeia” ahi. Hiai thumal tuh “mahni-a lungkimna” genna ahi chi in Strong’s Greek Dictionary in gen hi. Mi’n Pasian alimsakna tungtawn/ziak ua lungkimna angah pen uh tuh punna/metna thupitak ahi chih Paul gennop dan ahi. Lungkimna thuguk kimtak Pasian chauh ah om hi.
Mihingte’n lungkimna zong in asuk-atou, ahak-anuam ah i vial diandian uhi. Himahleh, misiamte’n “mihingte taksapna in bei ni nei lou ding” ana chihtak mahbang un, lungkimna taktak leh tantawk a lungkimna i mu zou kei uhi. Bangziak hi in na thei a, unau? Paul in tuh Pasian limsakna (Pasian miitna) i neih louh ziak ahi chi hi.
Pasian nei taktak mite’n lungkim dan athei uh. Sam laibu gelhtu in, “Toupa tuh hon Chingpa ahi a, ka tasam kei ding” ana chi hi (Sam 23:1). Toupa tuh achingpa a nei a omte tasam lou in lungkimtak in om uhi. Philippite kiang a alaikhakna ah Paul in zawng leh hau, vah leh kial a om theihna thuguk muta ahi chi a, huai thuguk tuh Amah hon hihhatpa Khrist ah thil tengteng hihtheih ahi chi hi (Phil. 4:12).
Paul mah in I Tim. 6:8 ah “nek ding leh silh ding nei in huai khawng ah i lungkim zaw ding uh” ana chi nawn hi. Mi tampite’n Pasian in A hon piaksa vualzawlnate tung a kipahna dan thei lou a A hon piak nai louhte i deih baih luat sek ziak ua lungkim zou lou i hi. Huchibang a hauhsak utte tuh thang ahte, khemna ahte a puklut sek uh a, lungkhamna’n a kisun pailet tektuk uhi (I Tim. 6:9). Nang-le-nang puakgik kipe kei hial in, unau.
Huaiziak in, Pasian in tua na neih nailouhte A hon piak nai louh hilel bang in ngaihtuah inla, A hon piaksa vualzawlnate khatkhat in sim in kipak leh lungkim in om in. Huchi in khalam, lungsim leh taksalam ah khamuang-lungmuang leh kipak-lungkim in hinkhaw nuamtak na zang thei ding hi.
Mahni a lungkimna pen kuamah suh theih vuallouh kipahna ahi a, damtheihna thuguk hoihtak leng ahi.
“Na omdan ding Toupa tung ah nga inla; Ama’n ahih vek ding...” (Sam 37:5).