HOIHNU TOH KA TABLE MAI AH HUN TOMCHIK
By Ginkhenpau Valte
"U Pau, hong kin inla hiai lim hong en zok ou..."
Hoihnu in hon chi soisoi a, ke'n leng ka lehkha gelh khawl zen in ka vanaih phei pah hi.
A limlak ka en a, ka gintak ana bang hetkei mawk hi.
"Ash! Hichibang limlakte enen nawn ke'n k'on chi hilou maw? Ba'chi'a na et teitei a...? Puan beek silh hileh thutuam!"
Kei bel lunghilou deuh in ka table lam manoh in ka paikik thak hi.
"Facebook a hichibang khawng ngen mah hilou maw mi'n leng a etsek uh?"
Hoihnu bel kisiamtan mahmah a, himahleh ka heh ding bel aguk a lausim ahi chih a mel enkei mahleng a awsuahdan apan ka theithei hi.
"Nang minu leng chuh, teitei mai," ka chi a, amah en lou in ka dawng a, ka laigelh ka sunzom hi.
"Huchibang limte kha mitkha a dawkden inchin numeite et ding bang a hoihlou sa ka hi," ka chih behlap hi.
"Achihleh hon post sese dahle uh akei di'a," chi numnum kawm in ka tutna lam a hong pai in, a taklam khut ka veilam liangzang ah hon nga a, facebook mah khoihzom hi.
"Midangte'n bel a utut uh post di'mah uh ahi, hilehleng ana et vek ding chihna hiloupi a..."
Mahni inn a ngaina a hong pawt nungak khat kiang a kampau ding in bel khauh deuh hi in ka thei a, himahleh it taktak ka hihna ah ka kineisak a amah leng ka kineihsak chiang in a kipak zaw hi in ka thei hi.
"U Pau, sorry lua aw," hon chi a, serious simkha ka hihdan ka thei thak a, himahleh bangmah ka gen tuankei.
"Heh lua mawleh, u?," ka dawn kik louh ziak in hon chi tuantuan hial a, kisuanglah mahmah ahi chih ka thei hi.
"Ka itluat Hoihnu aw, i kiten nung chiang a tua na lim et a naupang piangsual bangbang i neih mawk khak ding lau ing a, huaiziaktak a naungek melhoihtaktakte lim en gige zaw di'a k'on chihsek mah ahi..."
Ka laigelh khawl in ka phone a zat lai awl a laksak in a khut tegel lenkawm in nuihmaitak in amit tegel ka en kilkel a, amah leng lungkimtak in hong nuikhe siuseu a, a heh ka omkei uhi. Huchih laitak in ka phone hong vibrate a ka etleh hiai ana kigelh a, ka nih un ka nuizak uhi.
"I like the way you think!"
(Ataktak bang thei di'a phuahtawm pumlum ahi).
©valte ginkhenpau, 2013