“Hong pai dih, hong pai dih,” chi zozen a khat in hon sam, “Na gelh dek pen na gelh kei maw?” hon chi teitei mawk. Zu loupi a vuahtui doh chih ka gelh pen ka gelh dek tawp thak hon hisak thouthou mawk aih chu. Ka lungsim ah article dang khat hong kilat loh a, kipahhuai ka sa mahmah.
Tuachi dan ei lam paidan himawk in chin maw. Genlouh tan kigensak, ngaihtuahlouh tan kingaihtuah sak kihi in chin. Zu loupi a vuahtui doh chih ka gelh dek lai a gelh hoihsa hile gelh di thei mahmah lou in a tuamtuam ka gawm suk leh ka lungsim a a thupi di hong lut in ‘intro’ pen lehgelh thak chihdan ahi.
Souvenir magazine ka buaipih lai ua lem khat caption di buai, YPA Hall chu hi ahih ziak a YPA pen ZYA a kikhek ahih chiang a ZYA Hall va chih mawk dilah a hall min kikheklou. Lawmte’n YPA Hall chi ni uh hon chi uh, “Nou huai chi le u chinle kei ngoh a om di ka hi,” chi a pang tiinteen mai!
Hichi bang deuh khawng a thil ahiloulou a vei veek ut pawlte apan kiveen kim a haksa mahmah hi. I ngaihtuah louh tan khawng ngaihtuah dia hon na gingta ua, i gen louh tan khawng hon na gensak hial chiang ua omdan di kha theih haksat mahmah hun a tam mahmah hi.
Ahi a, thil kipahhuai lam a laak suk mai di a de aw ahihkeileh hehhuai lam chih a ngaihtuah ngawingawi hun bang tam mahmah sek hi veh aw. Khat in hichi in hon gen a, “Na hihna lou a mi’n hon ngohleh naak poilouh lua, hilou hilel na hih chiang a,” chi hi. “Na hihna mah a mi’n hon ngohleh bang a poi dia, na hihna mah hi ve’n,” chih behlap hi. Adik hi! Hihhoihna hiam hihsiat hiam hihkhelhna hilehle hihsa chu kuamah taise theilou, hihlouhna le hithei tuan lou ahihna a ana naak eng poilouh lua ana hi ngut hi.
Mahni hihsa a siat chiang a mahni hih hilou a, ahoih chiang kia a mahni hih hisak ngam ngen i hi mawk nguut uhi. Mahni hihna le gum ngamlou, mahni hihlouh na tawm hih hisak ngam Khristian i hihna un i khovel uh buaisak ahi i chi lou thei kei. Huai om zia bel, zuau poisakna himhim omlou, maingal tak a zuau gamtaang sak a, thutak zahkai sak i hi lel uhi.
I ginna (Khristianna) pen uh zahpih kisuak ahihlam kiphawk hunta khat hikha diing hi. Mihing i hihna ah hih dik gige chih a om thei kei, hihkhelh hun leng a om dia hihhoih hun leng a om diing hi. Mihing hilou hile hichi bang a om thei kei diing chih theihsa ahi. Ahihang in hihkhial tawntung chih a om kei a, hih dik gige chih leng a om tuan sam kei hi. Tua i chih hang in, bang tehna toh i teh ziak hiam chih bel kingaihtuah ngai ve!
Bang tehna chih na ngawnle article piching khat suahsak thei hi veh aw. Thilgik tehna diing in ser-suang a gram, kilogram, etc i zang a, asau lam tehna diing in millimetre, cm, metre, inch, etc atuamtuam i zang hi. Huchi bang in thil dik leh diklou, thil hoih leh hoihlou tehna diing in bang i zang a? Mi thil hih hoihlou i chih chiang a bangtoh i teh ziak a hoihlou a, bang toh i teh chiang a hoih hiam chi hi suut vengveng ngai hi.
Khristian nungchang hoihlou i chih chiang in Laisiangthou in hon sinsakna peel a gamtatnate hoihlou i chi hi. Huchi bang in midangte’ gamtatna a hoih leh hoihlou, sia leh pha, kilawm leh kilawmlou bangchi teh i hi uh hiam chih kichian ni. Tamzawte tehna ahihleh mahni lungsim putna a dik leh diklou sakna toh tehlel i hikha sek uhi. Hichi bang a mahni lungsim put dik leh diklou chih i neih bang in midang teng inle ana nei uh ahi chih haih kei ni. Huai in amau aa a dik leh diklou a khen chet nung ua dik a saklam uh zui ahihlai un nang ngaihtuahna a diklou lam zui leng ana hikha diing, na tehna veel chian in.
Himahleh hiai pen tehna tangpi (standard measurement) chinglou ahih chih phawk in, ser-suang chinglou, inch tape tunglou toh kibang lel a tehna nei i hi kha diing. Na tehna diklou ahihlam phawklou a, na ngaihtuahna kawchiik tehtuh ahihlam theilou a, na tui dohna beel taw vang ahihlam phawklou a midangte thil hih ana phun pihpih na hi kha de aw...
Zu loupi a vuahtui i dohleh a dim ngei kei, zu zenpi beeltaw vang ahihlam phawklou a vuahtui tawm chi a phun pihpih di hilou in, i dohna pen hoihlou hikha diing hi, veelchian vai i zaw...
© December 18, 2012 | Pauzagin Tonsing
