“Aknou chiakchiak kaw hoh di?”
“Nu phula di pa phula di, paam a sa-ngak dai kai di,”
“Sa-ngak tung a lungdam kua om dia,”
“K’on zui aw.”
 

Aknou bangmah tohloh zoulou di pen in a nu thahsak a om a thangpai lua a, a pa le thaksak a om a thangpai mahmah ahih chiang a lohdan di om nawnlou, hong kipankhe telhtelh chu hipeuhmah diing hi. Et mai in chu nuiza buuk bangmai diing in a gintaak huai hi. A phulaakna diing in a nu thattu, a pa leng that zou tung a phu la dia kisa, amah lah mei leh kha le tungnailou, hi silhselh in huai batphu la dia kuan chih himhim chu a awm kei khop mai hi.

Khanglang! Valnou hon in ka aknou chiakchiak gelh dek hong hawlzaksak kei le uh kizou di hi a, aknou vaak dalh kaihkhawm nawn sawm sin himhim awle.

Et mai a awmlou lua himahleh a hong kisakkhiak hial chiang in a tuah peuh lunglutna, atuahpeuh a dia melma dou dia kisa ahihna ah ana ban zuih uhi. Agenna peuh in ‘Sa-ngak tung a lungdam kua om dia?” chih ana lehdawnna uh ahi daih hi.  Hiaite’n Sa-ngak tung a lungdam louhna a neihziak uh a kibang vek kei diing hi. Aknou bang a a nu-le-pa thahsak a om ahi vek kei diing uh himahleh  haw ri-ngot bangle a om maithei uhi. Ahihkeileh Sa-ngak kichaphou sak lua hiam, midangte simmoh lua hiam ahihkeileh a neuzawte nelhsiah lua leng ahikhamoh kei diing hi.

Aknou kipatkhiak nung a zui dia kisate i et chiang in ‘thil’ chituam ngen ahi uhi. Amau a kibatna leh kinaihna nei a om kei uhi. Nanghiam leh Uiphuk chikmah in pau kibang ahi ngei kei diing ua, Guul-ngawngsan leh Tanai in sisan a kizopna a nei ngei mawngmawng kei diing uhi. Akhosakna khovel uhleh gamtatzia uh leng a kituam a, kinaihna mawngmawng neiloute ahi uhi. Ahihhang in hiai teng in gaal khat neikhawm thei diing a hong omna san uh thillamdangpi a suak hi.

Hichi bang a Aknou phubala dia a kuanna lam ah bangziak a Sehal chihte khawng hong tellou a di ua aw chih bang ngaihdan piansak theih mawk hi. Sehal i chih chiang in Sa-ngak toh a nekzonna uh kikhat thei hi. Khokim-khokiang a gamtaang a Sa-ngak bang a huanghulh gantate gu cheuhcheuh theithou ahi hi. Huchi bang in Gam-ak bangle hiai hun a tel dia kilawm lua ahi. Aziak chu gamlak a azan giahna uah Sa-ngak mah in zanphawn in, a nu-le-pate uh a laksak zel thou khat ahi. Gam-ak bang inle ‘Sa-ngak tung a lungdam kua om dia?’ chithei di bang hi.

Mi tuam sa tuam ngen himahle uh hiaite kipumkhat theihna om sun chu ‘common enemy’ ahi. Sa-ngak ana ho chiat uh chu hipeuhmah diing hi. Ahuatna ziak uh bel atuamtuam a om peuhmah diing a, a kibang het kei diing chih theih hi. Aziak tuh thil hing tuamtuam ngen ahihna uah. A genkhakna peuh in a thangpaih thu a genkhum thei mawk ua, tua kia hilou in batphu la dia mansa ngen in ana om ua, a thupi mahmah tuh zui dia mansa ngen ahi mawk uhi.

Hiai kibatna neilou, kinaihna leng neisam lou, amau leh amau leng ‘common enemy’ neilou hile uh kiho mahmah diing ngen himahle uh a hong pankhawm theihna uh thupi mahmah hi. Etton tak mahmah uh sakhuai hi veh aw. Amau vuak a ding hile uh kuamah zoh neilou dite hong pangkhawm a galpi a hon bawl hial chiang un chu a dou uh bangchi tuk in hat mahleh a pangzou vual kei hi.

Sa-ngak in khat khat a melma nei khin ahihlam phawk lou in, ngeina bang a om sa in vuahpi hong zu chu inlam a delh a, votsa a kon khinkhen kawm khawng zaw himai thei hi. Inn a hong lut a a ngatna lampeuh ah gal ana omta mai chu a patauh thawm anasa mah homhom di! Galpi om eih chi a suaktak sawm a a taisiat hang in melma hitham dia a ngaihtuah ngeilouh Uiphuk in bithal a ana kaap thal tep mai dan chu ei ve.

Uiphukphuk lang ka thang ei,

Maling poupan ka ka bawl e!

Ngaihtuah vengveng le melma bang a i ki-et hang in ei leh ei i kimelmaak sang a melma lianzaw om ahihlam phawk hile tulai tak zaw ‘ui meikaang bang velvel uh zaw hi a maw!’

©December 28, 2012 | Pauzagin Tonsing