Vuah bangle a zuk lai mah a i doh keileh vuahtui kineilou himawk in chin. Eh! Thangvaan sang a meipi kailou in tulvuah a luanglou! Laigelh i chih bangle a hong pai laitak a i gelhleh gelhgelh di om in, i pawng sawm simleh a zuk louh lai a vuahtui doh toh kibat theih mahmah ana hilim in maw.
Sep di hause lua a ki-awngthawl sak in thu khat ko’on gelh deh chi a kisa zaw hi veng aw, bangthu ka gelh dia aw chih hiai ka gelhtan a thei nai lou chu kei ve. Aw, tuisa ka dawnleh a hong puaklek!
Lamka a dawr neite’n tukum sum kimu mahmah lou chih a hahthum ten uhi. November kha a ka phakkhakna dawr khat in, “Kum dang a hichi hun khawng a mi nih leh thum in ngak ngai hi a, tukum chu hichi a kingak lel hi,” chi in a lunglelh gen mahmah hi. Lamka economy khang hat mahmah i chi ua, mi’n sum hauthei lua uh i china ua zaw Ibobi in solkal nasemte loh kia a khahkhiakleh Lamka a sum leenglou zou hi mawk in chin.
Manipur Solkal zawngkhal tak, sum a giautau tak a om kawmkawm in Ibobi in Australia a ni 20 mawngmawng a mipite taisan a khual a zin sung teng state solkal sum mawngmawng khoihkhak theihlouh dia a koih in Manipur a keu sak mahmah hi. Huchi kawlkal ah solkalpa’n gamsung khantouhna nna sep tuamtuam mimal tung a a piakkhiak nung a a sumte a heentaang det ziak in Lamka khopi ah sum a om kei zou hilhial hi.
Huchi kallak ah, lawmte nih Lamka a solka pisa veh diing in ana kisawl khanglang uhi. Lawmpa’n, “Poi kei, den chia i President di uh le hithei ahi,” chi in pisa hohtu pen kha muan hi. Ka lawmte geel kha songnawi (persons with disabilities) tuak ahi ua, solkal apan panpihna tuamtuamte kan dia va hoh zaw hi ve uh aw. Pisa atu pan ana donsak lou deuhzaw hi diiing hi ven, hehtha suak hial a lawmpa a fon leh huchi in ana dawng giap a, nalh ka sa mahmah hi.
Huchi a den chia i President diing uhle hithei chi a dawngpa pen bangle College hoih tak a kai, graduate nung a damlouhna nei in songnawi a hong hi hi. Songnawina kikhellou chih mahtak hi ven, a utleh hon na donsak keilehle amahle songnawi moh la hilou a chih ngaihdan neihkhum giap theih ana hi lo ngut diing dan ahi.
Ka folder sung a 2012 chih MS Word file min omna ka scroll sukleh October 24, 2012 ah ka article gelh nanung pen ana om a, eh! November a gelh neilou ka hi maw chih ka kingaihtuah thak phiing ka chi.
Thupi ka sa mahmah a, nungak khat in Tangthupha Kum Za chin lopna dia sial sagih thoh chih venvon tel ngal, a gaizou di ua hia, eh hilou ka gai zou di ua hia chih mite hon ngaihtuah sakna ahi. Gaih zohleh zohlouh pen thutuam ahi a, tangthupha i gam ah hong lut keileh hiai dinmun a kidinglou di hi a chih ngaihtuah vengveng thei diing a lungsim chiim tak neite a dia itlawtna ana omlou ahi maimah hi.
Ana kidur tei sam ahi diam ah pek 330 a sah tangthupha kum za chin lop chiamtehna diing in Magazine khat k’on buaipih cherchur u chu a nuam thou. Chiamteh tham ching dia ka ngaihtuah chu peek huai zahzah ni nga sung keleu a design, layout, printing, binding, correction bawlzoh chih chu thupi sa veve ing, huaile Lamka a ni nih sung a layout zou, internet a khak in Guwahati a ni thum sung a zou, Lamka hong tungkik man chihdan ei ngal ve. Khovel chu a neusot tel! Tehmoh louh dia kum 20 bang article ana kigelhsamna a ei a khawng ta zoulou chihdan hilai ei ve.
Akhaih! Zu loupi a vuahtui doh a gimhuai, hunsak pouh ni.
©December 10, 2012 | Pauzagin Tonsing